Uô jông lênhx txir ndâux txir luk luôs hâux lưv đros por hưv, tuôr tsês têx txux chi vênhx huôv jông

Muk trâu thax tsav tox siêz Bắc Yên, tỉnh Sơn La, txos cxuô jêx jok tox siêz, khênhr pov têx lênhx pos, lênhx niêv, chor pox niêv vir ndâuk, nhuôv nxeik heir nênhs Hmôngz thâuv shênhx, tsi yuô muôx nuv ntơư siz zâuv jâuv yênhx paz, yênhx pơưs uô pax ntâuz, xơưs tsôngk yo, tsôngk tiêz hnar. Co zos luôs hâux lưv iz txưv chor lâul chox nox chox uô thâuv nzor kriê tsês đhâu ntâu tiêv lok, chor lâul nhoz xã Phiêng Ban thâuv tưs tưz kriê txux chi tsưr ziv uô têx pax ntâuz, xơưs tsôngk hnar, kriê uô lưv zav hâux lưv chiê paz cxênhx hluôk pâuz tsênhz đuô lol zuk heir nênhs têx txux chi vênhx huôv, iz chas ntơư paz đros tuôr tsês luôs hâux lưv xơưs uô têx tsôngk hnar thâuv nzor hâur thax tsav tsi chiê pôngz plox. Pos Meir Xênhv Thox, nhoz xã Phiêng Ban, huyện Bắc Yên, tỉnh Sơn La heik:“Thâuv sâu tas têx kôngz mak pêz muôx ntâu six hơưv đuô, viv li tsi so kriê trâu têx nhuôs txux chi tsưr ziv uô pax ntâuz, xơưs tsôngk yo chiê têx nhuôs lơưr pâuz xơưs, pâuz uô hnar thiêz cux zos chiê đros por hưv, tuôr tsês nênhs Hmôngz têx txux chi vênhx huôv jông ntơư”.

Đros thiêz tsôngv box Hmôngz nhoz xã Hồng Ngài, huyện Bắc Yên, kênhx zos iz zav thâuv tưs tưz zuôr tsuv muôx hâur chei đaz kruôs thâuv muôx iz tus lâul pur 120 shông cux li cêr xênhz huôx niêx hnuz. Lar heik têx txux chi cêr nênhx vênhx huôv, nthuôr uô lov jêv mak thâuv tưs tưz muôx kênhx, txix co chor lâul nênhs hnuz nhôngs siêz thiêx tsi so kriê txux chi trâu chor hluôk cov lơưr pâuz yuôz, pâuz đhiê kênhx uô si lov jêv, paz por hưv, tuôr tsês zuk heir nênhs li zav txux chi co tsi chiê pôngz plox. Zơưv Lù Xênhv Zax heik:“Traz kênhx no khênhr tâu zôngv yuôz uô si lov jêv, chor nhuôs tsuv cơưv yuôz thiêz têx lâul cux zuôr tsuv kriê cov chor nhuôs pâuz yuôz, viv pêz Hmôngz luz nênhx tso tsi tâu tsês, tsuv muôx kênhx”.

Zơưv Đinh Văn Hân, Bí thư Đảng ủy xã Hồng Ngài, huyện Bắc Yên heik pâuz:

“Tas nro cxix luôs chính trị sik đros côngv têk chiê yax kriê, tuôr tsês têx txux chi vênhx huôv jông tsi chiê pôngz plox. Têx lênhx txir ndâux txir luk đros yax mông, kriê cxuô heir nênhs hâur thax tsav xã Hồng Ngài têx txux chi vênhx huôv trâu cxênhx hluôk, hâur co muôx heir nênhs Hmôngz”.

Nhiv no, huyện Bắc Yên, tỉnh Sơn La muôx 100 ntâu lênhx txir ndâux txir luk, lơưr puôr lênhx muôx ntâu côngz đas jos paz vênhv tôngv tsôngv lax pêx xênhv uô jông lơưr cui tinhv jênh tsuv hâur thax tsav qơư, cxiv tsa thiêz uô trơưk xã, jêx jok têx cui tinhv, sik đros cxiv tsa jok, chuôz zis vênhx huôv, tso tsês têx cêr nênhx pôngz kaz, por hưv chiê têx txux chi jông, tsưx phưv truôx tuk chính trị, xã hội hâur qơư nhoz. Zơưv Nguyễn Đăng Đức, Tsar phongx mênhx cxưx huyện Bắc Yên, tỉnh Sơn La heik:“Iz chas yax kriê, vênhv tôngv, Phongx cux tưz nhênhz chơưv trâu huyện uô lơưr jông tsênhv chei, cui tinhv trâu chor txir ndâux txir luk, iz chas co cux tsưr tsix têx jiês cơưv kruôs txos têx lênhx uô tâu hâux lưv jông chiê gra siêz txir ndâux txir luk, lâul jok hâur tsôngv box heir nênhs tsơưs li pưs txux”./.

                                     Thanh Thủy-Riê Lâux cxeik, nhênhv

Hêir nênhs Lok Tsuôk Điện Biên huôv tsar truôx luôs hâux lưv ntok ntâuz

Hêir nênhs Lok Tsuôk nhoz xã Núa Ngam, huyện Điện Biên, tỉnh Điện Biên huôv tsar cêr uô nênhx nhoz trâu oz luz jos Na Sang 1 thiêz Na Sang 2. Tsôngv px ntơưv no cux hêik pâuz tiêk, luôs hâux lưv ntok ntâuz tưz muôx txix cxôngx nzor lok. Phênhv ntâu, têx ntâuz ntok tâu, tsôngv px muôz chox lok xơưk tsôngk tiêz, tsôngk yo, fuôv, hâur ndông, pak puô…Pos Lường Thị Un, PX nhoz jos Na Sang 1 cux hêik pâuz nzir tiêk: Chiê ntok cov tâu iz đêiv ntâuz chox lok xơưk tsôngk tiêz, tsôngk yo, tsuv huôv tsar uô ntâu ntu, txix chos pax uô xor, muôz gax jak txos trâu thâuv ntok uô cxuô zav pax txêix jông jav huv đros zuk hêir nênhs luz nênhx nox nhoz muk lok cxôngx nzor: “Zuk ntok phiv liv đuô zos ntok tơư tiêz. Thâuv ntok tâu tiêr tơư tiêz, zuk muôz chor ntâuz co chox lok xơưk fuôv txiêx, xơưk yo, xơưk hâur ndông…..Đhâu co mav muôz chox lok trâuk gax. Chor lâuk đrav ntêx yax kriê zos uô li ntơư.

Trơưk li hêir nênhs Lok Tsuôk chax chêk cxôngx nzor, zos muôx iz tus nxêik, thâuv zuôr muk zuôr txir, lênhx nxêik co tsuv pâuz ntok ntâuz; viv đhâu zuôr txir cxiv tsa chuôz zis, lênhx nxêik co  tsuv ntok ntâuz chiê xơưk tsôngk tiêz, tsôngk yo trâu tus txir thiêz têx mê nhuôv. Chênhr zos li hêik ntơư, hêir nênhs Lok Tsuôk cxuô lênhx nxêik tưz tâu chor niêv pos thiêz lênhx niêv kriê tsưr ziv ntok ntâuz txix thâuv tsênhv zâu. Pos Hoàng Yến Vy, nhoz jos Na Sang 2, xã Núa Ngam hêik pâuz nzir: Phênhv ntâu, chor pâuz ntok ntâuz cxôngx nzor, tsuôk zos chor lâuk, hnuz nhôngs siêz. Viv li, luôs hâux lưv kriê cơưv shâuv tsưr ziv ntok ntâuz, tưz tâu chor niêv pos thiêz chor uô niêv kriê trâu chor hluôk, cxơưz cxiz paz phênhv khơưk tsês-huôv tsar truôx zuk hêir nênhs têx txux chi, vênhx huôv jông cxôngx nzor tsik chiê pôngz plox thiêz muôx muôs trâu ciêz đrôngl: “Hêir nênhs Lok Tsuôk têx tsôngk tiêz, tsôngk yo muôx ntâu zav jông jav tsik siz thôngx. Pêz chor hluôk nhiv no, tsênhv taz tov sir jos cơưv shâuv, khơưk tsês luôs hâux lưv ntok ntâuz. Lar hêik, tsuv uô li chas cov ntok tâu đêiv tơư tiêz jông jav

Trơưk li zơưv Trần Phương Nam, Phưv Chủ tịch UB xã Núa Ngam, huyện Điện Biên: Chiê khơưk tsês thiêz huôv tsar truôx hêir nênhs Lok Tsuôk luôs hâux lưv ntok ntâuz cxôngx nzor; hâu nov xã tưz cxiv tsa Hợp tác xã ntok ntâuz Na Sang. Xav txix cxiv tsa tâu HTX, luôs hâux lưv ntok ntâuz tưz uô tâu truôx jông, ntâu qơư muôs hax huv tưz tuôx zok nriêr zuôr. Ntơư zos iz cêr shir phaz, cxơưz cxiz trâu tsôngv px hêir nênhs Lok Tsuôk huôv tsar truôx zuk hêir nênhs luôs hâux lưv ntok ntâuz cxôngx nzor nhoz tsênhv qơư: “Nhiv no, uỷ ban xã tưz uô tiêr ntâuz ntơưr hêik trâu huyện chiê muôz ntơưr ntok ntâuz cxôngx nzor yênhx hax huv OCOP trâu jos Na Sang thiêz tror cxơưz cxiz tsôngv px huôv tsar truôx zuk hêir nênhs têx txux chi, vênhx huôv jông cxôngx nzor cov muôx đros đrêiv hâur luz nênhx../

                                                           Tsu cxêik nhênhv-Vũ Lợi- VOV Tây Bắc