Lớp cơưv hâur pâuk ntơưr nhoz thax tsav tox siêz

Thâuv tưs txos 8 six tsâuk ntux hâur niêx hmo, chor pox niêv vir ndâuk nhoz jok Lạng Xua, xã Chiềng Ân, huyện Mường La, tỉnh Sơn La siz zâuv jov jơưk tuôx cxix cxuô chiê cơưv hâur pâuk ntơưr. Lớp cơưv no muôx 50 ntâu lênhx zos têx pox niêv vir ndâuk Hmôngz, hnuz nhôngs txix 15-45 shông, tsi tâu pâuz nhênhv, pâuz sâu lok sik tưz pâuz ntơưr taz sik tsi ndo kaz têx ntơưr tas ntơư. Thâuv xuz thơưx, chor pox niêv vir ndâuk shâuv seiz, shâuv nhênhv ntơưr cov sưv, jux juk pâuz nhênhv mê njik li muôz lok uô yênhx iz lo heik..... Niêv lâul Tsu Xênhv Zax, cơưv lớp hâur pâuk ntơưr co heik pâuz:

“Tsi pâuz ntơưr phiv liv cơưk, uô đaz tsi cux tsi pâuz, chênhr viv li cur sir jos cơưv hâur pâuk ntơưr chiê pâuz nhênhv, pâuz sâu, pâuz xav têx nhiêx txiêx, pâuz tsưr ziv huôv tsar uô nox”.

Chor pox niêv vir ndâuk co muôx kênh lênhx lơưr tưz yênhx pos, niêv têik, muôx xênhz lênhx xênhz nzưr, taz sik viv ntâu qir tiv txos nhiv no thiêx tâu cơưv ntơưr. Chor pox niêv iz txưv têk tuôr co hlâu, co txuôk, khưr uô liêx têz mak nhiv no ho tâu cơưv txux chi, shâuv sâu ntơưr. Txơưv txov nhêv thiêz phiv liv, taz lênhx tưs cux sir jos, moz siêz lus cơưv hâur pâuk ntơưr cov pâuz tsưr ziv đros luôs lưv tus huôv tsar uô nox. Đhâu chor cưk kriê ntơưr moz siêz kriê têx txux chi tsưr ziv, hâur pâuk ntơưr, ntâu lênhx pox niêv vir ndâuk tưz pâuz nhênhv, pâuz sâu thiêz xav fax têx zôngx ziv. Niêv lâul Lu Xênhv Hav, nhoz jok Lạng Xua, xã Chiềng Ân, huyện Mường La heik:

“Cur tưz cơưv tâu 6 luz hlik, nhiv no cur tưz pâuz nhênhv, pâuz sâu mê njik, muk ciêz cux tsi yuô cxơưx lơưv, uô tsâus lok six ntâu têx lênhx cưk kriê”.

Lớp cơưv hâur pâuk ntơưr ntơưv xã Chiềng Ân qir cơưv txix hli 5 nhiv kruôr đhâu thiêz tâu cơưv lok zar tsâus ntux yênhx ciêz, zos 2 lênhx cưk kriê ntơưr hâur tsêr cơưv cxênhx iz thiêz cxênhx 2 xã Chiềng Ân kriê. Cưk kriê Cà Văn Dương heik:

“Chor pox niêv vir ndâuk nhoz no zos heir nênhs tsơưs, lơưr tưz puôr lênhx muôx hnuz nhôngs, tsi tâu pâuz luk Choz Tsiz ntâu viv li cơưv cux lok six phiv liv cơưk. Đhâu iz ntuk kriê thiêz cơưv, chor pox niêv co cux pâuz mê njik lơưv, lơưr pâuz sâu, pâuz nhênhv jux juk”.

Zơưv Tuôv Xênhv Shôngx, Chủ tịch Ủy ban xã Chiềng Ân, huyện Mường La, tỉnh Sơn La heik:

“Đhâu lớp cơưv hâur pâuk ntơưr cux gra siêz tâu tsôngv box txux chi tsưr ziv jênhv pâuz, txix ntơư pâuz huôv tsar uô nox uô hnar, ntâu lênhx pox niêv gâux muôv cux tưz uô lơưr tâu têx tsưr ziv yiêz hâur uô kôngz lôngk, tu zus tsiêx cxu....”./.

Nhoz ntâu thax tsav tsôngv box heir nênhs tsơưs hâur huyện Mường La, tỉnh Sơn La, chor nênhs tsi pâuz ntơưr thiêz tror tsi ndo kaz tas têx ntơưr cơưv cux tsênhv yuôr, lar heik zos têx lênhx nhoz hnuz nhôngs txix 40-50 shông ntơư. Têx lớp cơưv hâur pâuk ntơưr li no chênhr zos six hơưv jông chiê tsôngv box tox siêz tâu buôk ti têx txux chi, gra siêz tsưr ziv jênhv pâuz, paz tsôngv box muôx tsưr ziv đros luôs lưv tus siz tưr huôv tsar uô nox, cxuz cêr yeiz pluôs. Luôs hâux lưv cơưv txux chi muôx têx tsênhv zuôr njiz trâul ntâu phiv liv, taz sik txix têx lênhx nênhs cơưv li tsưr ziv, siêz xar sir jos hla đhâu têx phiv liv co, lơưr zuôr pâuz nhênhv, pâuz sâu, jux juk hlôngr yiêz tâu luz nênhx xênhz huôx./.

Thanh Thủy-Riê Lâux cxeik, nhênhv