Yên Bái moz siêz huôv tsar têx xiv huv OCOP txix tsoz ciêv fix

Công ty Trà Thảo mộc Quế Phát, nhoz huyện Văn yên, tỉnh Yên Bái nhiv no tsênhv tsiv uô 6 xiv huv txix ciêv fix, hâur co muôx 5 xiv huv tưz tâu côngk nhav uô tâu jông li: Trox ciêv fix, cuô đêx ciêv fix nzuôr piz hâuk đêx….

Txix công ty têx xiv huv uô tâu jông thiêz chor xiv huv cux tsar ndê gri, muôx ntâu tus chôngz lênhx zuôr txos, txix ntơư cux muôx ntâu nuv uô thiêz phênhv sâu tâu trâu nênhs lox tôngv. Pos Nguyễn Kim Thoa, Giám đốc công ty heik pâuz:

“Văn Yên muôx têx ntông ciêv fix zos tsoz chos chênhr, pêz tưz muôx 5 xiv huv tâu côngk nhav zos huv OCOP hur jông. Hâur shông 2023 no, pêz tror huôv tsar uô têx yuôx so tsêr yênhx xiv huv jông chiê cê muôz hâux lưv uô, cê gra siêz gri têx kôngz nuv trâu pêx xênhv, doanh nghiệp”.

Nhiv no tas nro huyện Văn Yên tưz muôx 16 xiv huv txix tsoz ciêv fix tâu côngk nhav zos hur jông, tsav zuôr xar 60% têx xiv huv hur jông OCOP hâur huyện, li: Ciêv fix râuz đêx hâuk, trox ciêv fix, têik đik hniêr ciêv fix, ciêv fix zênhz gaz ntơưr Văn Yên….. Ciêv fix Văn Yên heik taz, Yên Bái heik cxuô thâuv tưs tưz tâu têx ciêz đrôngs, ntâu tus ntâuk grê siêz lok tsơưr lươngv. Ciês xiv huv ciêv fix Văn Yên nhiv no tưz muôx muôs nhoz 30 ntâu luz têz qơưk thiêz thax tsav, đros trâu 50 xiv huv cxuô zav. Zơưv Đoàn Anh Khôi, seiz car công ty Olam Việt Nam ntơưv Yên Bái heik pâuz:

“Pêz ntâuk grê siêz tsơưr lươngv ciêv fix Văn Yên, lar heik zos têx trox lok six jông. Olam zos iz công ty nhoz ntâu têz qơưk, viv li pêz sir zôngv ntâu têz qơưk sâuv ntiêx têz têx uz no tsiv uô. Ciês lok sâuv têx xiv huv ciêv fix mak nhiv no ntơưv Văn Yên tsênhv gôngr 70% trâu công ty ntơưv Việt Nam”.

Huyện Văn Yên nhiv no muôx 52 cxênhz ntâu ha ciêv fix, tsav nhos 70% liêx têz ciêv fix hâur tỉnh. Thax tsav no tưz yênhx qơư chos ntâu ciêv fix đuô hur si pir li luôs 2 chas xã, thị trấn. Iz shông, chor xiv huv txix ciêv fix tưz gra lok phênhv sâu tâu zuôr xar iz cxênhz tyv đeiv trâu tsôngv pêx xênhv. Zơưv Luyện Hữu Chung, Bí thư Huyện ủy Văn Yên heik pâuz, cxiv tsa thiêz huôv tsar têx xiv huv ciêv fix hur jông OCOP, zuôr tror paz cxiz tsiv uô trơưk têx tsưr ziv yiêz, muôs tâu gri, tsar ndê phênhv sâu trâu pêx xênhv tox siêz, trơưk li tỉnh Nghị quyết sôr 20 thiêz huyện luôs hâux lưv tso tơưv:

“Huyện tror jux juk hlôngr yiêz, qênhz shuôs đuô luôs hâux lưv huôv tsar uô nox nhoz tox siêz lơưr tsưr ziv yênhx lix têx doanh nghiệp, HTX chiê sik đros siz paz, phênhz côngz uô huv đros cov tâu trơưk siêz xar. Taz por nênhs lox tôngv, doanh nghiệp, phênhz pheiz xiv huv thiêz nênhs sir zôngv puôr lênhx muôx liv. Huôv tsar kôngz nuv tâu trơưk li ntu têz qơưk hlôngr yiêz, vav mênhx, reik đros cxiv tsa jêx jok yiêz truôx jông. Hu zâuv, cxiz doanh nghiệp, HTX, tổ hợp tác yưv pênhr tsiv uô cux iz zav li cir ntơưr chos luk tsiv uô, sâu zuôr pêx xênhv têx xiv huv”.

Bí thư Huyện ủy Văn Yên cux heik pâuz, huôv tsar tsoz chos ciêv fix lơưr tsưr ziv gra siêz tsiv gri reik đros cxiv tsa tsơưr lươngv thiêz suôz bê zuôr paz ntơưv qơư uô tiêr luôs hâux lưv cxiv tsa huyện jông jav lok shông 2024-nzor đuô iz shông pir li Nghị quyết Đại hội Đảng bộ huyện jiês tiv 16 tso tơưv./.

(Thừa Xuân-Riê Lâux cxeik, nhênhv)

Lênhx bác sĩ tsês tas nro ntu hluôk nhoz tox siêz Hồng Ngài tsưx phưv đas jos trâu

tsôngv box

          Kuôk no 20 ntâu shông, thâuv cơưv tiêr Tsêr cơưv đại học Y Thái Bình, bác sĩ Nguyễn Thị Lan txix Thái Bình xeir muk tox siêz xã Hồng Ngài, huyện Bắc Yên, tỉnh Sơn La chiê uô hâux lưv. Tror ndo txos ntu xuz thơưx tuôx têz qơưk yuôr ntâu phêv liv no, bác sĩ Lan heik:

          “Hnuz xuz thơưx tuôx jênhv uô hâux lưv nhoz xã Hồng Ngài mak tênhv tênhz cux tsi muôx, cêr muk lok phiv liv, pêz tsuv muk tơư, txix huyện txos tsênhv qơư xã tas 5 six hơưv, thâuv co cur tsênhv hluôk thiêz tuôx ntơưv no muôx lok six tsơưs lênhx nênhs. Taz sik đhâu co cux chiv chir tôngv vênhx zuk tiêk nhoz no chiê yax mông trâu tsôngv box pâuz”.

          Txơưv đruôz hnuz lok sik hmo ntux, yar ntux lok sik lok nas, thâuv muôx tsôngv box hu tênhv tuôx heik tiêk muôx lênhx nênhs trâus moz mak niêv lâuk Lan txơưv zênhx max sơưr cêr muk seiz njuôs. Chênhr khov bác sĩ Lan li têx siêz jông, pheiz kênh đros tsôngv box mak tsôngv box Hmôngz nhoz no thâuv tưs cux seiz niêv lâuk li iz lênhx nênhs cxênhz jê hâur chuôz zis. Niêv lâuk Hùa Xênhv Hav, nhoz jos Hồng Ngài heik:

          “Cur tul mê nhuôk trâus moz gênhs, chuôz zis tsi muôx yêz meir chiê chox muk qơư y tế chiê seiz njuôs, viv li cur heik têx bác sĩ tuôx ciês ntơưv tsêr paz seiz njuôs trâu cur tul mê nhuôk”.

          Yuôr zơưv Tuôv Xênhv Lâux, Chủ tịch UB xã Hồng Ngài, huyện Bắc Yên, tỉnh Sơn La puz pâuz:

          “ Muôx têx thâuv pox nhuôk moz gênhs lok sik pox niêv xênhz zus mê nhuôk tuôx tsi tâu ntơưv trạm y tế mak bác sĩ Lan ho pov cov trâu xã sik côngv đros cán bộ xã muk txos ciês jêx jos chơưv kho, txơưv lok six khưr taz sik niêv lâuk Lan cux jông siêz muk paz”

          Đhâu têx jiês muk jêx jos seiz njuôs moz trâu pox nhuôk nhoz qơư y tế, bác sĩ Nguyễn Thị Lan tror lok zuk li qar qơư nhoz. Viv uô côngz xưv nhoz đêz chuôz zis, viv li niêv lâuk tsuv pheiz tul nhuôv nxeik hloz đros tul txir nhoz Thái Bình, yuôr tul nhuôv zâu mak đros niêv lâuk nhoz Hồng Ngài. Tưz ntâu jiês bác sĩ no xar tso tsês hâux lưv chiê tror lok zuk kuz têz qơưk, taz sik ho uô tsi tâu viv hluz têx nênhs moz pluôs nhoz tox siêz no, niêv lâuk ho tror truôx siêz nhoz ntơưv no uô côngz xưv:

          “Viv zuk li hâux lưv tsuv jor thâuv hmo ntux thiêz muk jêx jos ntâu, viv li tsi muôx six hơưv tsoz phưz mê nhuôk, tsuv xa iz tul muk đros txir nhoz, iz tul đros niêv nhoz, thâuv muk jêx jos uô hâux lưv mak ho xa mê nhuôk trâu têx fôngx zưs, jêx jos paz jor chiê zuk muk uô hâux lưv”.

          20 shông ntâu nhoz tox siêz Hồng Ngài, bác sĩ Nguyễn Thị Lan ndo njôngr txos cxuô txox cêr muk lok đhâu têx tox trôngz câuv har hâur thax tsav txov nhêv; txơưv phêv liv li ntơư, niêv lâuk cux xar njôngr zuk thâuv tưs cux muôx jông đas jos chiê chơưv kho moz gênhk trâu tsôngv box, viv tsôngv box têx mênhx cxưx thax tsav tox siêz li đas jos thiêz luz nênhx./.

Thanh Thủy-Txâur Vax cxeik nhênhv