Chor tsêr cơưv ntơưv Lai Châu sir jos hêik shux xênhz tuôx cơưv ntơưr đhâu so tsiêz

Cưk kriê Nguyễ Xuân Thảo, sêiz car lớp 8A1, Tsêr cơưv cxênhx oz Tả Lèng, huyện Tam Đường, tỉnh Lai Châu hêik pâuz, lớp cưk kriê sêiz car muôx 46 lênhx shux xênhz thiêz tas nro puôr lênhx zos shux xênhz mênhx cxưx Cho, Hmôngz. Chiê taz por trâu chor shux xênhz tuôx cơưv ntơưr huv six hơưv thâuv hâur shôngk shông, cưk kriê tưz muôx njêx muôs ntơưv tsêr cơưv uô ntêx 2 hnuz pir li cui tênhv tâu so Tsiêz, thiêz muk trâu têx jêx jok chiê hêik chor shux xênhz tror tuôx cơưv ntơưr. Taz sik, txos nhiv no cux tsênhv yuôr oz pêz lênhx shux xênhz hâur lớp tsik tâu tror mtuôx cơưv ntơưr:“Đhâu tsiêz chor shux xênhz tsênhv xar uô si, tiv zix zos chor shux xênhz cơưv lớp 8, lớp 9; tiv oz zos iz cxiê jêx jok tsôngv box uô chêi txưr jêx jok, viv li chor chuôz zis cux tsik tâu khênhr têx tuz nhuôs tuôx cơưv ntơưr. Txos nhiv no, chor shux xênhz tuôx cơưv ntơưr hâur lớp tsuôk tâu muôx 85%, tsêr cơưv cux tưz muôx tsưr ziv trâu chor cưk kriê sêiz car lớp cơưv, côngv đros chính quyền ntơưv qơư, tsar jok, bí thư jok chiê yax kriê, hêik chor shux xênhz tror tuôx cơưv ntơưr”.

Shông cơưv no Tsêr cơưv cxênhx oz Tả Lèng muôx 12 lớp, zuôr xar 450 lênhx shux xênhz thiêz 100% zos shux xênhz tsôngv box mênhx cxưx Hmôngz thiêz Cho. Tiv ciêz xuz thơưx ciês tror cơưv ntơưr đhâu jiês so tsiêz, chor shux xênhz tuôx cơưv ntơưr hâur tsêr cơưv tsuôk tax  tâu muôx 85%, hâur co muôx chôngz lênhx shux xênhz muk uô si đêz trâu têx thax tsav qơư txơưr, chuôz zis thiêz tsêr cơưv ntơưr tsênhv hu tsik tâu tâu trâu shux xênhz cov tror lok cơưv ntơưr. Cưk kriê Nguyễn Văn Trưởng, nênhs sêiz car Tsêr cơưv Cxênhx oz Tả Lèng, huyện Tam Đường puz pâuz: Đhâu tsiêz, chôngz lênhx shux xênhz têx lớp cơưv siêz tâu niêv txir muôz yêz mêir trâu chêix thiêz tsik so muk uô si đêz. Chor shux xênhz tox siêz li uô si tsiêz mak tsik so truz ntêr hnuz, viv li tsêr cơưv cux tưz nriêr pâuz qênhx shênhx chiê sik côngv đros chính quyền ntơưv qơư hêik chor shux xênhz tror tuôx cơưv ntơưr:“Chor shux xênhz tsik tâu tror tuôx cơưv ntơưr mak tsêr cơưv cux tưz hêik chor cưk kriê sêiz car lớp cơưv nriêr pâuz sêz chor shux xênhz tsênhv uô đaz tsi, nhoz kror tưs. Zos tiêk chor shux xênhz muk uô si đêz trâu têx thax tsav txơưr mak hêik chor shux xênhz tror lok thiêz tuôx cơưv ntơưr cov taz por. Tiv oz zos tsêr cơưv nriêr pâuz thiêz tsik so hêik trâu chính quyền ntơưv qơư, hêik trâu ban chox kriê kriê nzir ntâuz ntơưr; đros co zos cux hêik trâu chính quyền ntơưv qơư tsik tsưr tsix têx qơư uô si nzir lơưv, viv tưz tas tsiêz lơưv, tsik muôx qơư  uô si lơưv mak chor shux xênhz zênhx zuôr tror tuôx cơưv ntơưr xưz”.

Txơưv nganhx Zoz zux thiêz chính quyền cxuô cấp ntơưv thax tsav qơư tưz muôx ntâu ntâuz ntơưr chox kriê hêi chor shux xênhz tror tuôx cơưv ntơưr, taz sik lơưr chor nênhs sâu xor xưv nriêr pâuz, txos nhiv no ntâu luz tsêr cơưv nhoz tox siêz ntơưv Lai Châu nhiv kruôr muôx txix 70% txos 80% chor shux xênhz tror tuôx cơưv ntơưr đhâu jiês so tsiêz. Iz cxiê luz tsêr cơưv txơưv tưz hêik tâu chor shux xênhz tror tuôx cơưv ntơưr, taz sik cux lax tuôr chiê tâu chor shux xênhz tuôx cơưv ntơưr cxix cxuô thâuv muôx chôngz lênhx shux xênhz cux thor so nzir. Zơưv Lò Việt Tuyển, Phưv Giám đốc Sở Zoz zux tỉnh Lai Châu puz pâuz: hâux lưv tuôr chiê tâu chor shux xênhz nhoz tox siêz tuôx cơưv ntơưr cxix cxuô zos iz kror hâux lưv zov chênhr, chiê paz gra siêz tâu tsơưr lươngv zoz zux. Viv li, nganhx tưz hêik trâu Tỉnh ủy, Ủy ban tỉnh pâuz chox kriê chor tsưr tsix, cấp ủy Đảng, chính quyền, đoanx thêv cxuô cấp đros nganhx sir jos kriz uô kror hâux lưv no:“Nganhx cux tưz chox kriê chor cán bộ, cưk kriê ntơưr, nhân viên tsưr tsix sêiz shuôk jông tsêr cơưv, lớp cơưv thiêz muk têx jêx jok, thiêz tsưr tsix yax kriê txos trâu chor shux xênhz niêv txir pâuz sâuv têx chuôz zênhx thôngz xor mông; iz zav li zalo, hu tênhv chiê paz muôx tâu chor shux xênhz tuôx cơưv ntơưr cxix cxuô, tiv zix zos thâuv đhâu jiês so tsiêz. Nganhx cux tưz cxiv tsa tsưr ziv chiê tsưr tsix chor đoanx qênhz yuôx muk trâu têx taz viv hâur tas nro tỉnh, chiê paz gra siêz đuô chor shux xênhz tuôx cơưv ntơưr cxix cxuô hâur têx taz viv zoz zux hâur ntu no”.

Sir jos uô tâu truôx jông lơưr tsaz yênhx cơưv ntơưr thiêz tsơưr lươngv zoz zux, chor tsêr cơưv ntơưr nhoz tox siêz Lai Châu tsênhv sir jos tso tas nro chor cán bộ, cưk kriê ntơưr nhoz ntơưv tsêr cơưv, sêiz shuôk lớp cơưv, muk têx jêx jok chiê hêik chor shux xênhz cov tror tuôx cơưv ntơưr đhâu jiês so tsiêz./.

(Khắc Kiên-Lik Thox cxêik nhênhv)