Nôngx mênhx Lai Châu sir jos trâu chiv cheix hâur

shôngk shông yiêz

Đras liêx chos pax yuô bleiv Sùng Phài, xã Sùng Phài, TP Lai Châu, tỉnh Lai Châu têx hnuz no muôx chôngz tsôngv box tuôx uô lox tôngv. 20 hecta ntâu pax yuô bleiv tsênhv tơưs jông jav, đros grê muôs txix 3-4 cxênhz đeiv iz luz pax ntơưv vax li nhiv no zos đas jos chiê têx lênhx nênhs chos pax ntiêr cxaz lênhx nênhs tsoz phưz. Tix lâuk Nguyễn Chí Đông nhoz jos Sùng Phài, xã Sùng Phài, TP Lai Châu heik: “Txix hâur shôngk shông txos nhiv no qiv hơưv lok six jông thiêz chos pax cux jông. Xar njôngr qiv hơưv shông no jông chiê têx lênhx nênhs chos pax sâu tâu chiv cheix jông”.

          Sâuv têx đras liêx nhiv no pox nhuôk tsênhv qir chos qiv blêx tsâux yiêz. Chiê uô tiêr hâux lưv tsêz chos trơưk chiv cheix, ciês thâuv nox tsiêz tas, pox nhuôk nôngx mênhx tưz ciêr chênhr muk uô liêx. Zơưv Hồ Ngọc Đương, nhoz jos Cẩm Trung 1, xã Mường Than, huyện Than Uyên pheiz kênh: jiês ntux ntêr uô ntêx thiêz đhâu thâuv nox tsiêz tas, uô blêx trâus zênhr shar ntâu. Nhiv no qiv hơưv sor đuô, pox nhuôk hâur jos tsênhv chêx chôngk tsoz phưz mênhv chêx tsêz chos lơưr cán bộ kôngz nuv xã li heik kriê: “Cur heik pox nhuôk thiêz tôngv vênhx pox nhuôk zos yar ntux mak tsuôk yuôx cxiz hlar blôngx, hlar chas, đhâu co thiêx li zuôv qir. Cur njênhs njôngr zos ntux nas jông li no mak chiv cheix shông no zuôr tax zoz qơưx”.

          Txos nhiv no pox nhuôk nôngx mênhx sâuv thax tsav tỉnh Lai Châu tưz uô ar tâu zuôr xar 10 cxênhz hecta, chuôz ndê zuôr xar 10% pir đros tsêz no, hâur co mênhv chêx tưz tsêz chos zos 5 cxênhz hecta ntâu. Đrâuv tsêz chos nôngz blêx txuôv, chiê taz por txiv ngaz kôngz krâur, ntâu đras liêx tâu njuôs xav chos cxaz nôngz blêx tiv phaz li Séng Cù, Tẻ râu…chiê chuôz cxaz tsiv grê hax huv. Zơưv Nguyễn Văn Bắc, Phưv chủ tịch UB xã Thèn Sin, huyện Tam Đường puz pâuz: Xã li tsưr ziv tsêz chos chiv tsâux yiêz shông no zos zuôr xar 100 hecta. Nhiv no cán bộ kôngz nuv thiêz cán bộ xã phưv txơưx jêx jos tưz tâu tso muk tiv phaz vênhv tôngv pox nhuôk sir zôngv meir uô ar, tsêz chos huv đros, cxơưz tiês hâux lưv tsêz chos, sir jos uô tiêr hâur hli 2 no:“Xã tưz chêx chôngk vênhv tôngv pox nhuôk muk uô liêx chiê tsêz chos trơưk chiv cheix đros têx mênhv chêx taz por đêx. Yuôr đros mênhv chêx mak tsi taz por cungz đêx mak xã zuôr sik côngv đros công ty đêx liv tỉnh tso đêx, chiê pox nhuôk muk uô liêx chos blêx”.

          Đros têx vax ntông cao su, chiê taz por tsơưr lươngv thiêz yar lengx lơưr tsưr ziv shông, nhiv no têx công ty cao su sâuv thax tsav cux tsênhv huiz tôngv tsôngv box, nênhs lox tôngv chêx chôngk tsoz phưz vax chos cao su. Têx nông trường cao su sâuv thax tsav cux tưz phuôx tôngv phongz yaox tưr thik uô lox tôngv hâur têx tuêv, ndar txos uô tiêr tsưr ziv shông 2023. Zơưv Bùi Thanh Tâm, Tổng giám đốc Công ty cổ phần cao su Lai Châu puz pâuz: “Lok taz viv txix nông trường ndê muk li siêz sir jos mak nhiv no sđ tsênhv sik côngv siêz chiê taz por shông 2023 tax tâu 7 cxênhz tênhr cuô mis kruôr. Yar lengx tso tơưv shông no lok six lax. Chiê tax tâu tsưr ziv tso tơưv, công ty tưz ntâu tsưr ziv. Thiêz nhiv no công ty tsov cưv txos nhiêx shar trâu nênhs lox tôngv, paz lok côngz xưv kỹ thuật chiê uô tiêr jênhv vưv”.

          Đros siêz sir jos uô lox tôngv txix ciês têx hnuz hâur shôngk shông yiêz, tỉnh ntus đriv Lai Châu sir jos uô zênhx liv têx tsưr ziv tsiv uô, muôv muôs tưz tso tơưv hâur shông 2023./.

                                                              Khắc Kiên-Txâur Vax cxeik nhênhv

Bax tsưr ziv phax tar hluôr tơưk cuz jôngr hâur cheix ntux kruôr nhoz tox siêz Mù Cang Chải

Huyện Mù Cang Chải nhiv no muôx zuôr xar 83 cxênhz ha ar har jôngr; hâur co xar muôx 59 cxênhz ha jôngr chiv xênhz đrox tsuôs, 19 cxênhz ha jôngr lâul, zuôr xar 30 cxênhz ha jôngr phax phưv…njuôz vor trôngx câuv har tax 67%.

Xav tinhv luôs hâux lưv seiz car, tsưx phưv jôngr zos hâux lưv zov chênhr, hâur ntu đhâu, huyện tưz chox kriê têx ngênhx muôx vax huôv thiêz tsôngv pêx cxuô thax tsav qơư uô lơưr jông hâux lưv seiz car, tsưx phưv thiêz huôv tsar jôngr. Lar heik zos phax cuz tuô cuz jôngr hâur cheix ntux kruôr thâuv tưs tưz tâu moz siêz txos, uô jông, viv li ntâu shông siz lơưr liês hâur thax tsav tsi muôx hluôr tơưk txeik cuz jôngr hlo.

Hâur cheix ntux kruôr shông no, huyện qênhz shuôs đuô hur si 14 ban chox kriê phax cuz tuô cuz jôngr cxuô cấp đros thiêz 400 ntâu lênhx nênhs; yênhx lix 100 paz nênhs uô ntêx nyuôs lês uô hâux lưv seiz car, tsưx phư jôngr. Iz chas ntơư sir jos yax kriê chei têz qơưk lol sâuv seiz car, tsưx phưv jôngr txos trâu tsôngv lax pêx xênhv pâuz. Zơưv Thênhz Xênhv Shôngx, Phưv Hạt tsar, Hạt yuôx jôngr huyện Mù Cang Chải heik pâuz:“Pêz tưz qênhz shuôs đuô hur tiz si têx  Ban seiz car phax tar cuz tox cuz jôngr hâur xã thiêz tas nro têx paz nênhs uô ntêx nyuôs lês uô luôs hâux lưv phax cuz tuô cuz nhoz cxuô jêx jok. Ntơưv têx jok nhiv no uô iz qơư seiz shuôs hluôr tơưk nhoz têx thax tsav zôngx ziv muôx hluôr tơưk txeik cuz jôngr, phênhz 2 chuôz zis seiz jor iz hnuz iz hmo”.

Xã Chế Cu Nha zos xã muôx ntâu jôngr ntông, 5 cxênhz ntâu ha. Zơưv Shôngx Thành Công, Chủ tịch Ủy ban xã heik pâuz: Niêx shông, chor chuôz zis seiz car, tsưx phưv jôngr hâur xã tâu têx nhiêx har jôngr 2 tyv đeiv ntâu, đhâu ntơư pêx xênhv moz siêz tu, tsưx phưv têx jôngr ntông đuô. Chênhr viv li, hâur xã tưz ntâu shông tsi muôx hluôr tơưk txeik cuz jôngr; ntor luôx uô ruôr hiêv jôngr, nav ar har jôngr uô liêx têz cux tsi muôx yưv:“Pêz tưz cơưv jêx jok chiê tsôngv niêv txir cưr tix nênhx tsa sơưr đơưk cir ntơưr chos luk uô jông hâux lưv tsưx phưv, cux iz zav li phax cuz tuô cuz jôngr hâur cheix ntux kruôr 2022-2023. Lar heik zos pêz cux xav tinhv têx paz uô luôs hâux lưv phax cuz tuô cuz hâur jêx jok zos chor nênhs uô ntêx nyuôs, pêz cơưv thiêz yax kriê trâu tsôngv niêv txir lax pêx xênhv thâuv pov hluôr tơưk zôngx ziv txeik cuz jôngr nhoz suôv qơư tưs mak heik chor nênhs co pâuz chiê lơưr zênhx max phax tir their, tuô hluôr tơưk tsi chiê txeik cuz xuz jôngr xuz tsuôs”.

Uô ntêx thâuv zuôr txos cheix ntux kruôr, huyện Mù Cang Chải cux tưz chox kriê cxuô ngênhx, taz viv muôx vax huôv thiêz têx thax tsav qơư cir ntơưr chos luk lol tsưx phưv jôngr, phax tar cuz tox cuz jôngr txos yênhx ziv chuôz zis; tso canr bôv muk ntơưv qơư kriê tsôngv niêv txir lax pêx xênhv luôx cêr cêv hluôr tơưk thiêz uô qơư seiz jor têx jôngr ntông nhoz chor qơư zôngx ziv muôx hluôr tơưk txeik cuz. Iz chas co, cơưv shâuv têx tsưr ziv lok phax tar cuz tox cuz jôngr chiê bax phax thâuv tưs muôx yưv têx tsi jông, uô hluôr tơưk txeik cuz jôngr ntơư. Zơưv Nguyễn Anh Phương, Phưv Giám đốc Ban seiz car jôngr phax phưv huyện Mù Cang Chải heik pâuz:“Taz viv tưz buôk ti nhênhz chơưv trâu chor xã cxiv tsa tsưr ziv qênhz shuôs, seiz jor, tsưx phưv jông têx jôngr ntông, thax tsav zôngx ziv muôx hluôr tơưk txeik cuz, ntus jôngr….hâur cheix ntux kruôr gis”.

Bax thiêz muôx têx tsưr ziv tsênhv tsênhz, huyện Mù Cang Chải tror sir jos uô jông luôs hâux lưv phax tar cuz tox cuz jôngr hâur cheix ntux kruôr gis. Txix ntơư, seiz car, tsưx phưv jông chor jôngr ntông muôx nhiv no, sir jos cov têx shôngz ntông njuôz vor tox câuv har hâur thax tsav huyện ndê muôx 70% lok shông 2025./.

                                                          VOVTB-Riê Lâux cxeik, nhênhv