Tox siêz Sơn La lax txo grêk tsơưs xênhz zus nhuôv tuz, nhuôv nxêik siz bâus

Xar muôx 30 shông thiêz tưz muôx 3 tuk nhuôv nxêik, taz sik tix lâus Tanhr Xênhv Zax oz niêv txir nhoz xar Lóng Luông, huyện Vân Hồ, tỉnh Sơn La cux xar tiêk zuôr zus nzir mê nhuôv. Tix lâus tanhr hêik, luz nênhx tsênhv txov nhêv, pâuz tiêk zus chôngz mê nhuôv, luz nênhx zuôr txov nhêv đuô, taz sik chuôz zis cux xar njôngr tiêk zuôr zus cov muôx iz tuk nhuôv tuz lok tuôr đaz kruôk:

“Têx jâuv zuôr zus nzir iz tuk nhuôv tuz, zus tuk nhuôv no mak muôx 2-3 shông mav li zus nzir. Pêz tsôngv box Hmôngz zos tsik muôx mê nhuôv tuz mak cux tsik tâu, zos zus nhuôv nxêik tas hur si xưz mak cux uô phiv liv trâu chuôz zis”.

Cur siêz xar li co, niêv tix Chi Xênhv Zax, nhoz xar Lóng Luông txơưv tưz oz jiês xênhz zus mê nhuôv, taz sik cux lok six cxơưx tsav xênhz zus tsik tâu mê nhuôv tuz. Niêv tix Chi cux pâuz tiêk xênhz zus chôngz mê nhuôv zuôr uô phiv liv ntâu txos đas jos thiêz zuôr njiz ntâu kror phiv liv hâur tu zus têx mê nhuôv, taz sik niêv tix cux xar tiêk zuôr xênhz zus tâu mê nhuôv tuz chiê tuôr đaz tuôr kruô:

“Zuk zos iz lênhx nhuôv nxêik muk zuôr txir lơưv mak zuôr txoz cxơưx tsik tâu trâu zuk niêv zuk txir lơưv. Viv li tsuv muôx mê nhuôv tuz chiê tuôr đaz kruôk. Zos muôx mê nhuôv nxêik xưz mak zuk luz nênhx zuôr tsik muôx lênhx tưs txoz cxơưx, zuôr tsik muôx lênhx tưs tuôr đaz kruôk”.

Zơưv Khánh Xênhv Tênhr, canr bôv dân sôr trạm y têr xar Lóng Luông, huyện Vân Hồ puz pâuz, têx siêz xar, phongx cxưx li hêik sâur tưz zênhx đros đrêiv pox nhuôs luz nênhx zos iz hâur têx qir tiv uô trâu chor nhuôs tuz nhuôv nxêik xênhz zus tâu tsik siz bâus ntơưv thax tsav qơư tsênhv yuôr ntâu:

“Txơưv tiêk tưz muôx 2, 3 tuk nhuôv nxêik lơưv cux  tsênhv xar zus nzir iz tuk mê nhuôv tuz. Viv tsôngv box hmôngz têx phongx cxưx, zos tsuv muôx mê nhuôv tuz chiê tuôr đaz kruôk, zos nênhs txoz cxơưx cxuô kror hâur chuôz zis; phongx cxưx tsuv zos mê nhuôv tuz thiêx lêis tâu niêv txir thâuv niêv txir tưz tas siv nênhx”.

Zos iz hâur chor thax tsav qơư muôx chor nhuôv tuz nhuôv nxêik xênhz zus tâu tsik siz bâus muôx yưv ntâu nhoz tỉnh Sơn La, đros muôx 117 lênhx nhuôv tuz/100 lênhx nhuôv nxêik, nganhx y têr huyện Vân Hồ tsênhv sir jos kriz uô ntâu tsưr ziv chiê paz txo grêk tsơưs qênhx shênhx no, hâur co phênhv ntâu zos tsuv gra siêz jênhv pâuz trâu pox nhuôs. Zơưv Vưx Xênhv Shôngx, Phưv Giám đốc Tsênhv qơư Y têr huyện Vân Hồ, tỉnh Sơn La hêik pâuz:

“Pêz yax kriê trâu pox nhuôs pâuz tâu txos tsik siz bâus nhuôv tuz nhuôv nxêik thâuv xênhz zus li kror phiv liv; kruôz kriê trâu y têr xar, nênhs uô hâux lưv dân sôr xar chiê muôx nzir txux chi, yax kriê trâu pêx xênhv, txưr tsik khênhr xêir mê nhuôv tuz mê nhuôv nxêik thâuv xênhz zus. Thôngx cxix, sik côngv đros tsêr cơưv ntơưr kriz têx lớp kriê trâu chor shux xênhz têx txux chi lok tsik siz bâus nhuôv tuz nhuôv nxêik thâuv xênhz zus”.

Nhuôv tuz nhuôv nxêik xênhz zus tâu tsik siz bâus muôx yưv ntơưv ntâu thax tsav qơư nhoz tox siêz, thax tsav tsôngv box mênhx cxưx tsơưs nênhs nhoz Sơn La, zos qir tiv muôx chôngz txir nênhx, tsơưs pox niêv hâur ntu zuôr txos no. Cxuô thax tsav qơư tsuv sir jos uô đuô thiêz muôx têx tsưr ziv uô tsênhv tsênhz, truôx jông đuô chiê paz uô cov hlôngr yiêz đuô pêx xênhv li siêz xar thiêz jênhv pâuz./.

Lê Hạnh-Lik Thox cxêik nhênhv

Gia Lai: Paz max BHYT trâu thax tsav txov nhêv

Pos Trần Thị Tuyết Hạnh nhoz xã Cư An, huyện Đăk Pơ, tỉnh Gia Lai zos chuôz zis lok six txov nhêv. Pos tus txir muôx moz gênhk, chor nhuôs cux txov nhêv paz tsi tâuk, viv li txơưv tưz tsi yuô muôx đas jos uô nox, taz sik pos cux tsuv sơưr nzor, pư lis chiê txoz cxơưx trâu luz nênhx niêx hnuz. Txix thâuv pâuz chuôz zis tâu paz max thêv nhiêx bảo hiểm y tế, pos Hạnh tưz sir jos kêr txeik nhiêx txiêx chiê zuôr bảo hiểm trâu 5 lênhx nênhs hâur chuôz zis:

“Cur chuôz zis muôx 5 lênhx nênhs, thâuv tsi tâu muôx tsaz yênhx paz max, cur chuôz zis zuôr trâu iz tus jux juk, zuôr tsi tâuk trâu hur si 5 lênhs, taz sik nhiv no tâu paz 40%, zuk tsuôk tâu thêv 60% xưz viv li sir jos zuôr txâuk trâu hur si 5 lênhx nênhs hâur chuôz zis cov sơưr đơưk muôx bảo hiểm y tế cxix cxuô”.

Niêv lâul Đinh Thị Bước cux zos iz hâur têx chuôz zis pluôs nhoz jok Pơ Nang, xã Tú An, thị xã An Khê tâu paz zuôr bảo hiểm y tế. Niêv lâul Bước heik pâuz, niêv lâul chuôz zis lok six tso siêz thâuv 6 lênhx nênhs hâur chuôz zis puôr lênhx tâu têz qơưk paz zuôr bảo hiểm y tế 100%. Têx li heik co tưz paz txo grêk tsơưs phiv liv trâu chuôz zis thâuv hmôngr tsi jông trâul muôx moz gênhk:

“Tâu têz qơưk paz max, cur chuôz zis sir jos zuôr Bảo hiểm y tế chiê thâuv tưs muôx moz gênhk thiêx muôx txâuk ntâuz ntơưr muk seiz njuôk shuôs moz. Hâur chuôz zis, lâul hluôk, hloz zâu iz jiês muk seiz njuôk shuôs, kho moz ntơưv tsênhv qơư y tế lok sik tsêr kho moz puôr lênhx tâu sơưv têx chei paz, tâu tsoz phưz đas jos jông”.

Ntu 2023-2025, iz chas quiv nhiêx txiêx T.Ư paz trơưk li chei Bảo hiểm y tế mak lơưr HĐND tỉnh Gia Lai Nghị quyết, nhiêx txiêx ntơưv qơư zuôr paz 30% nhiêx zuôr bảo hiểm y tế trâu têx chuôz zis zuôr xar pluôs thiêz shux xênhz zos heir nênhs tsơưs; paz 10% nhiêx zuôr bảo hiểm y tế trâu têx lênhx nênhs zos chuôz zis uô liêx têz, chos jôngr ntông, tu zus shuôz njêl muôx phênhv sâu tâu tsơưs lơưr Chính phủ li cui tinhv.

Uô lơưr tsênhv chei no, ciês thị xã An Khê tưz paz max trâu zuôr xar 16 cxênhz lênhx nênhs. Zơưv Trịnh Duy Phước, Giám đốc Bảo hiểm xã hội thị xã An Khê, tỉnh Gia Lai heik pâuz, njuôk xav txos tas shông no, An Khê zuôr muôx nhos 30 cxênhz lênhx nênhs tâu sơưv tsênhv chei paz max zuôr Bảo hiểm y tế no:

“Đhâu thâuv muôx HĐND tỉnh Nghị quyết, taz viv tưz sir jos đros Đảng ủy, HĐND cxuô xã, phường cux iz zav li chor cơ quan cik txos yax kriê, vênhv tôngv pêx xênhv chiê lơưr pâuz tâu Đảng thiêz têz qơưk têx chei. Bảo hiểm xã hội cux sir jos đros cxuô xã, phường chiê tsưr tsix têx jiês siz chuôs njiz, sik thav chiê têz pêx xênhv li luk nus, đơưk têx phiv liv, tsi jông cik txos tsênhv chei bảo hiểm y tế”./.

(VOVTN-Riê Lâux cxeik, nhênhv)