Phênhv sâu tsar ndê 6% ntâu, Sơn La tror cxơưz cxiz têx pênhr jos chuôz tsar

6 luz hlik hâur shôngk shông 2026, kinh tế-xã hội tỉnh Sơn La truôx tuk, iz cxiê ngênhx huôv tsar uô tâu jông, hâur co phênhv sâu tâu tsar ndê 6% ntâu; ngênhx công nghiệp-cxiv tsa tror huôv tsar tâu truôx đros thiêz phênhv sâu tsar ndê zuôr xar 11%; xav hur si phênhv muôs têx hax huv thiêz sâu tâu txix dịch vụ tsar ndê zuôr xar 13%; muôs têx hax huv trâu 2 chas têz qơưk đrâuv tsar ndê zuôr xar 14%; Sơn La zos iz hâur têx thax tsav uô tâu jông đuô hur si luôs hâux lưv muôz nhiêx yưv pênhr côngz hâur tas nro têz qơưk.....

Têx côngz trênhx zov chênhr tâu moz siêz yưv pênhr uô, tỉnh tưz sir jos đơưk têx phiv liv, cxiz uô sei cêr muk chênhr Hòa Bình-Mộc Châu, sir jos heik cxiv uô txox cêr muk chênhr Mộc Châu-Sơn La-Điện Biên, paz muôx đar qơư huôv tsar yiêz thiêz txuôk đros 2 chas thax tsav. Thôngx ziv yưv pênhr uô 22 dưv anr, xav hur si đas cir tas 43 cxênhz tỷ đeiv ntâu, ntâu đuô 5 jiês pir li shông 2025. Iz chas têx luôs hâux lưv uô tâu, tỉnh Sơn La cux tsênhv yuôr iz cxiê uô tsi tâu tsi tiêr, tsuv muôx tsưr ziv đơưk uô, kho đuô. Zơưv Lò Minh Hùng, Phưv Bí thư thường trực Tỉnh ủy, Chủ tịch Hôiv đôngx tỉnh Sơn La ntâuk grê:

“Chuôz tsar kinh tế 6 luz hlik hâur shôngk shông tsi tâu tâu trơưk li tsưr ziv tso tơưv; iz cxiê luôs hâux lưv huôv tsar uô tsi tas têx txux chi, muôx jông, lar heik zos ngênhx dịch vụ, công nghiệp tsiv uô thiêz sir zôngv; chuôz tsar tsi tâu truôx thiêz tsênhv kho ntâu trâu tênhv tênhz, hâur thax tsav qơư, iz cxiê xiv huv tsiv uô kôngz nuv. Kôngz nuv tưz yênhx lix thax tsav huôv tsar uô ntâu kôngz, taz sik tsi tâu muôx txux chi, tsưr ziv huôv tsar uô tâu truôx jông. Iz chas co, hu zâuv tâu yưv pênhr taz sik ntâu dưv anr cux fuô uô kênhz....”.

Heik ntơưv jiês cơưv, zơưv Nguyễn Đình Việt, Chủ tịch Ủy ban tỉnh Sơn La heik pâuz, tỉnh zuôr sir jos trâu 11 luôs hâux lưv thiêz tsưr ziv chiê uô tâu têx hâux lưv tso tơưv lok huôv tsar kinh tế-xã hội hâur shông 2026; sir jos đơưk têx phiv liv lok sâuv muôz nhiêx yưv pênhr côngz, tsar ndê phênhv sâu tâu trâu têz qơưk, huôv tsar uô nox truôx, cxơưz cxiz hu zâuv yưv pênhr:

“6 luz hlik kaz shôngk shông, tỉnh tsov cưv cxơưz cxiz chuôz tsar txix tsưx phưv truôx kinh tế, cxiz têx pênhr jos chuôz tsar; sir jos uô jông hâux lưv sâu nhiêx txiêx têz qơưk, uô tiêr têx hâux lưv zok muôz, xar tsưr ziv chuôz tsar yiêz, hlôngr pâur cêr huôv tsar kinh tế, zuôr khoa học công nghệ, hlôngr yiêz txux chi thiêz hlôngr yiêz sôr uô qơư chuôz jos; sir jos uô tiêr têx côngz trênhx zov chênhr, lar heik zos têx cêr muk lol, côngz trênhx phax tir thêir ntux txơưr txar, côngz trênhx sôr...”.

Jiês cơưv tiv 2 Hôiv đôngx tỉnh Sơn La tsưr tsix hâur 02 hnuz 20 thiêz 21/7 tưz nus têz lok iz cxiê hâux lưv tâu cử tri thiêz tsôngv pêx xênhv moz siêz txos; qênhz shuôs thiêz quyết định 28 nghị quyết cui tinhv têx chei zov chênhr lok huôv tsar kinh tế-xã hội, phênhz pênhr jos, yưv pênhr côngz, huôv tsar khoa học thiêz  công nghệ, fuô uô têz qơưk têx tsaz yênhx cxiv tsa cxiv kho cxix luôs chính trị ntơưv qơư; têx tsênhv chei truôx tuk xã hội thiêz iz cxiê Nghị quyết txơưr đuô trơưk chei têz qơưk cui tinhv..../.

Lê Hạnh-Riê Lâux cxeik, nhênhv

Tsôngv px nôngx mênhx thiêz luz  yêz huk têx ar trâus đêx nas cuôr yôngz nhoz

Mường Than

          Thâuv đêx pêv hâur đêx tsênhv six fênhx ntưs lok txix sâuv tox trôngz thiêz têx ar, poz jêz tsênhv vôngz tas niêv cêr 32, muôx iz suôz meir tsuôk li hâur 3 hnuz đhâu tsi tâu pov so jiês tưs hlo. Co zos luz meir leix têz Kubota đax. Nênhs tsar luz meir no tsi zos cán bộ chơưv paz mak zos tix lâuk Phan Văn Hoan, iz lênhx nôngx mênhx nhoz jos Mường, xã Than Uyên, tỉnh Lai Châu.

          Ciês thâuv pâuz xã Mường Than muôx jiês đêx cuôr yôngz, tix lâuk tsuôk ciêr chênhr hu xor tôngx trâu lênhs tov xã thor chox chuôz zis luz meir leix têz li tuôx paz txưv xưz:

          “ Pov muôx đêx nas cuôr yôngz, cur cux thix ziv đros chủ tịch xã tiêk chuôz zis muôx meir leix têz thiêz xar tâu paz tsôngv pox nhuôs thax tsav trâus đêx nas cuôr yôngz, thâuv xã thôngx ziv mak cur tưz leir luz meir leix têz tuôx paz txưv”.

          3 hnuz đhâu, tsuôk li yênhx hnuz hmo, tix lâuk Hoan đros luz meir leix têz tsi so uô hâux lưv ntơưv tsêr cơưv tuêv 11, tsêr cơưv cxênhx 1 Phúc Than- qơư muôx đêx nas cuôr yôngz. Txix thâuv sơưr nzor txos yênhx tas hmo, thâuv lưx lươngv chơưv paz tsênhv tơưk tênhz pov cêr chiê uô hâux lưv chơưv paz, mak tix lâuk Hoan luz meir cux six fênhx tsi so đros lơưr uô hâux lưv chơưv paz.

          “ Cur thâuv tưs cux seiz jor ntơưv no, lênhx tưs zuôr trâus tul tsi mak cur paz thâux, truôx siêz paz max. Uô yênhx hnuz hmo mak cux pov lok six liv, têx đồng chí công an thiêz cưk kriê nhoz no cux heik tiêk cur khưr hênhr, paz thâux tsi so ciês hlo”.

          Yênhx puôk yiv đruôz ar thiêz poz jêz tâu thoz huk. Têx txox cêr muôx ntu muk lok tsi tâu jux jus tâu krêz thôngz. Iz yiv cêr tâu krêz thôngz cux zos paz cxaz chiê têx yêz chơưv paz muk lok tâu đhâu, lưx lươngv muôx txơưx jênhv tuôx paz tâu tsôngv px sei đuô.

          Thâuv têx zav meir zơưv ar lox tâu chuôz tsar tuôx ntơưv no, tix lâuk Hoan ho hlôngr uô hâux lưv txơưr. Luz meir tsuôk shưv đros hâux lưv leix têz nhiv no ho yênhx luz yêz paz thâux tsôngv px, lưx lươngv chơưv paz, cán bộ tiv phaz thiêz têx chuôz zênhx zuôr trâus đhâu têx ntu cêr muôx tox poz, đêx ngaz muk txos têx qơư nhiv no muk lok tsi tâu đhâu.

          Đros lênhx nôngx mênhx no, tas nro tsuôk zos txix zuk li siêz jông xar paz max tsôngv px sđ.

          “ Cur zos iz lênhx nênhs tâu xênhz zus ntơưv têz qơưk no, pov têx ruôr hiêv li ntơưv mak lok six pôngz siêz. Zos iz lênhx nôngx mênhx cur pâuz tsênhz qênhx shênhx no viv li cux tso cxuô hâux lưv tsês chiê gra meir tuôx ntơưv no paz tsôngv pox nhuôk”.

          Kror uô trâu tix lâuk xar txos ntâu tiv zix hâur têx hnuz uô hâux lưv ntơưv no zos hnuz 18/7, tix lâuk paz thâux 2 luz xa tso têx lênhx nênhs tuôs tiv trâus đêx cuôr yôngz tror lok thax tsav tuêv 11.

          “ Lok six pôngz siêz hênhr. Hnuz co cur cux cxaz chuôz thâux xa tso nênhs tuôs mak tsi xar ciês tul tsi. Đêx nas mak lox taz sik têx bộ đội cux cưr xaz muk đhâu, plav tơư ntos mak lok six hluz hênhr. Têx thâuv co taz por zos kror coaz tsôngv tiv zix”.

          Têx hnuz nhoz ntơưv thax tsav trâus đêx nas cuôr yôngz, chính quyênx tiv phaz cux tôngv vênhx tix lâuk tso siêz paz pox nhuôk, zos muôx nhiêx txiêx mak zuôr paz zuôr trox, paz nhiêx kho đuô meir leix têz trâu tix lâuk. Taz sik lênhx nôngx mênhx co tsuôk têz li no:

          “ Muôx nhiêx txiêx paz cur mak cur thor tror xa trâu xã chiê xã txoz cxơưx trâu têx ziv chuôz zis trâus ruôr hiêv, cur tsi zuôr paz tul tsi hlo”

          Nhoz thax tsav qơư trâus đêx nas cuôr yôngz, tix lâuk Phan Văn Hoan li luz meir leix têz tsi taz paz krêz têx cêr muôx tox poz chiê muk lok tâu đhâu mak tsênhv paz thâux lưx lươngv chơưv paz, thâux têx hax huv chơưv paz tuôx txos trâu tsôngv pox nhuôk.

          Đêx nas txơưv zuôr cuôr yôngz tas têx vax tsê, chuôz zênhx, uô zaoz thôngz muk lok tsi tâu, taz sik zuôr cuôr yôngz tsi tâu têx lênhx nênhs siêz jông li chinhz yênhx siz hluz, siz paz.

          Đros têx suôz meir đror yênhx hnuz hmo nhoz Mường Than, tsôngv px nhoz no ziv truôx siêz bo zuôr nzor truôx tul tâu luz nênhx đhâu jiês ntux nas uô ruôr hiêv no./.

(VOVTB-Txâur Vax cxeik nhênhv)