Paz ngaz tuk zoz thôngz sâuv chor cêr ndê tox knhâuk lêv nhoz Sơn La

            Tỉnh tox siêz Sơn La muôx 18.000 cêik cêr zoz thôngz cêr ar; thax tsav muôx trôngz, vuôk har ntâu, viv li muôx ntâu ntu ndê tox, knhâuk lêv. Tix lâus Cầm Việt Hà nhoz tôv 3, phường Tô Hiệu, thành phố Sơn La kuz-zos nênhs muôx 10 shông tsar yêz muk lok nhoz thax tsav Tây Bắc, tiv zix zos ntơưv tỉnh Sơn La hêik pâuz: “ Njiê cxuô mak cur pov chor cêr muk lok ntơưv Sơn La thiêz Tây Bắc lok six knhâuk lêv, muôx huôz tsâuk, lok nas yâur thiêz cêr bluô. Viv li thâuv muk lok sâuv chor cêr no cur zênhx muk cov huv zos zuk saz cêr, muk trơưk chor fiêx kriê pâuz thiêz sêiz shuôk jông cov ngaz tuk trâu zuk, chor kruô thiêz chor nênhs cxaz chuôz zoz thôngz”.

            Tiv thax tsav, qiv hơưv phiv liv, viv li txơưv tưz uô ntâu tsưr ziv, taz sik chor txuz txiêz nanv zoz thôngz, yêz siz yar, siz đrâu sâuv têx cêr ndê tox, knhâuk lêv nhoz tỉnh Sơn La cux tsik so muôx, hâur co muôx têx txuz txiêz nanv zoz thôngz zov chênhr, riêz nênhs. Iz zav li hmo 21/2 thâuv hâur shôngk shông no, ntơưv thax tsav xar Sặp Vạt, huyện Yên Châu (kuz), tỉnh Sơn La, luz yêz thâux xa kruô muk txix Sơn La trâu Hà Nội, thâuv tsênhv muk grêk har, txos ntu cêr lêv, cêr ho bluô tiv muôx nas lok, luz yêz kruô no tưz siz yiêr đros luz yêz lox muk tos cêr tor tuôx. Uô trâu 6 lênhx nênhs zos nênhs tsar luz yêz lox thiêz 5 lênhx kruô trâus tuôs, 9 lênhx nênhs txơưr trâus saz. Chiê phax tar chor txuz txiêz nanv zoz thôngz, chor lưx lươngv muôx vax huôv tỉnh Sơn La nhiv no tsênhv tror chuôz cxaz uô côngz xưv qênhz yuôx, xưv lik têx uô cxâuv hâur hâux lưv zoz thôngz cêr ar; phênhv ntâu zos uô jông chêi têz qơưk têx cui tênhv lok kinh doanh vận tải; yêz thâux ntâu, ngaz tuk sâuv cêr ar… Đros co zos sir jos yax kriê chêi têz qơưk trâu chor tsưr yêz thiêz nênhs tsar yêz muk lok sâuv cêr pâuz.

               Thượng tá Nguyễn Trung Kiên, Phưv Trưởng Phòng Cảnh sát Zoz thôngz, Công an tỉnh Sơn La puz pâuz: Phòng tưz uô lok six ntâu chor fiêx muôx tênhz chis pov cêr chiê kriê sơưr đơưk pâuz yênhx hnuz hmo; kho đuô 180 ntâu qơư siêz kik sâuv têx cêr cov chor yêz tsik muk chênhr, cêr tsik bluô… Taz sik tiv muôx nas lok, muôx huôz tsâuk ntâu, nênhs tsar yêz muk lok sâuv cêr tsik uô jông sêiz mak cux zuôr zôngx ziv muôx yưv ntâu txiêz nanv: “Lưx lươngv Cảnh sát Zoz thôngz, Công an tỉnh tưz tsưr tsix yax kriê, tiv zix zos ntơưv chor ntu cêr muôx huôz tsâuk ntâu mak tsưr tsix đôiv qênhz yuôx tsik so, zôngv têx tênhz, còi thiêz loa chiê kriê trâu chor nênhs tsar yêz pâuz thâuv muk txos têx ntux cêr co mak tsuv muk kênhz, huv zos zuk saz cêr thiêz muk jông lơưr têx cui tênhv thâuv tsar yêz muk lok sâuv cêr”.

            Uô jông lơưr tsưr ziv ngaz tuk zoz thôngz 2025 sâuv thax tsav đros tsênhv njiêz “Muk lok ngaz tuk jông-paz trâu ntu nênhx tov ntêx”, sir jos txo grêk tsơưs tas nro lok chor txuz, chor nênhs tuôs thiêz chor nênhs trâus saz tiv txiêz nanv zoz thôngz, txix ciês thâuv hâur shôngk shông, nganhx zoz thôngz, cxiv tsa tỉnh Sơn La tưz kriz uô ntâu tsưr ziv, li chuôz cxaz chor lưx lươngv qênhz yuôx, xưv lik truôx chor nênhs uô cxâuv, chor yêz tsik ngaz tuk thâuv muk lok sâuv têx cêr. Zơưv Nguyễn Văn Chính, Phưv Giám đốc Sở Cxiv tsa tỉnh Sơn La puz pâuz nzir: “Nganhx Zoz thôngz sik côngv đros chor nganhx muôx vax huôv chuôz cxaz qênhz yuôx, sêiz car chor yêz cxaz chuôz zoz thôngz cov txâuk têx kỹ thuật, kho đuô chor yêz tsik muôx kỹ thuật huv đros, thâux ntâu. Hok chor cêr mak kror zov chênhr zos qênhz shuôk, hêik pâuz, xưv lik chor qơư phiv liv, têx qơư zôngx ziv uô tsik ngaz tuk zoz thongz chiê txo grêk tsơưs txiêz nanv zoz thôngz sâuv chor cêr ar hâur ntu zuôr txos”./.

Trấn Long-Lik Thox cxêik nhênhv

Sơn La jux juk cxơưz têx lênhx nhuôv tuz thiêz nhuôv nxeik xênhz zus tâu lok siz bâus

             Niêx shông tỉnh tưz cxiv tsa tsưr ziv lơưr yênhx ntu lok tsưr tsix fuô uô têx hâux lưv phax tir thêir nhuôv tuz thiêz nhuôv nxeik xênhz zus tâu lok tsi siz bâus hâur thax tsav tỉnh Sơn La; fuô uô têx hâux lưv, chiê gra siêz tsơưr lươngv jênh sôr, pox niêv txir nênhx vax huôv siz luôs, uô lơưr ntiêx têz hnuz phax tir thêir tsi xênhz tuz ci, hnuz ntiêx têz nênhs lâul hnuz nhôngs siêz thiêz hnuz ntiêx têz nhuôv nxeik; luz hlik uô hâux lưv viv pox niêv txir nênhx vax huôv siz luôs thiêz phax tar ntâuk tsiv pox niêv. Luôs hâux lưv chox kriê, seiz car tâu thôngx ziv tsưr tsix txix tỉnh txos cxuô tsênhv qơư.

          Đros trâu têx li heik co, hâux lưv yax kriê tâu sir jos fuô uô, muôx ntâu tsênhv njiêz thiêz huv đros, yax kriê lok sâuv qênhz shuôs nhuôv tuz thiêz nhuôv nxeik xênhz tâu lok tsi siz bâus ziv hnuz ziv uô tâu truôx jông, phênhv ntâu zos xênhz zus nhuôv tuz thiêz nhuôv nxeik tsi siz bâus têx tsi jông, chor nhuôv nxeik li vax huôv, pox niêv txir nênhx vax huôv siz luôs chiê jux juk hlôngr yiêz tsưr ziv, siêz xar pox niêv thiêz txir nênhx vax huôv siz luôs.

            Iz cxiê hâux lưv phax tir thêir fuô uô tâu jông, tâu tsôngv pêx xênhv jông siêz, thôngx ziv đros, fuô uô ntơưv têx thax tsav muôx ntâu lênhx nhuôs xênhz zus tâu lok nhuôv tuz thiêz nhuôv nxeik tsi siz bâus, tưz paz hlôngr yiêz pêx xênhv tsưr ziv jênhv pâuz, cêr xênhz zus nhuôs. Côngv thôngx cêr thôngx ziv thiêz sir jos cxaz chuôz zos qơư khov chiê tsưx phưv tâu truôx têx luôs hâux lưv tưz uô tâu.

           Txix têx lênhx nênhs lês uô hâux lưv jênh sôr tâu tuôr truôx thiêz jux juk muôx canr bôv jênh sôr uô tâu jông têx hâux lưv zok muôz txix tỉnh txos xã, hâur co chor côngv tác viên jênh sôr hâur jêx jok tror zos têx lênhx uô ntêx nyuôs yax kriê, seiz kaz thiêz phax tir thêir têx tsi jông ntơưv côngv thôngx. No zos têx lênhx đros đreiv pêx xênhv, pâuz tsênhz pêx xênhv, paz yax xa, fuô kriê tâu jông Đảng, têz qơưk tsưr ziv, tsênhv chei txos trâu tsôngv lax pêx xênhv.

          Tsôngv pêx xênhv tsưr ziv jênhv pâuz jux juk tâu gra siêz, phênhv ntâu sơưr đơưk tưz pâuz tsênhz đuô lok têx tsi jông thâuv nhuôv tuz thiêz nhuôv nxeik xênhz zus tâu lok tsi siz bâus, jux juk hlôngr yiêz tsưr ziv, siêz xar, tso tsês cêr nênhx pôngz kaz. Iz cxiê lênhx pêx xênhv qir hlôngr yiêz tsưr ziv xar thiêz hâux lưv uô thôngz đhâu yax kriê tsi so, ntâu gơưv niêv txir nhoz hnuz nhôngs xênhz zus nhuôs tưz jux juk pâuz mênhx txos xeir zus tuz lok sik nxeik têx tsi jông, txix ntơư bax tsưr ziv xênhz zus mê nhuôv, tsi zus tuz ntâu li chor lâul thâuv ntêx.

            Tsôngv box....! 10 shông uô lơưr Đêx anr qênhz shuôs, phax tir thêir têx li heik sâuv, nhiv no xênhz zus nhuôv tuz ntâu đuô nhuôv nxeik hâur thax tsav tỉnh Sơn La tưz jux juk txo grêk tsơưs thiêz uô tâu jông. Shông 2022, tax tsơưs tiv zix zos 116 ntâu lênhx nhuôv tuz, txos shông 2024 tsưx phưv tâu truôx nhoz phênhv 118 thiêz njuôk xav shông 2025 zos 118,5 lênhx nhuôv tuz hâur 100 lênhx nhuôv nxeik. Taz sik, tỉnh cux uô tsi tâu tâu luôs hâux lưv tso tơưv zos: Muôx 103-107 lênhx nhuôv tuz hâur 100 lênhx nhuôv nxeik; Xênhz zus nhuôv tuz thiêz nhuôv nxeik tsi siz bâus nhiv no phênhv ntâu muôx nhoz cxuô thax tsav qơư. Hâur têx luz hlik hâur shôngk shông no, hâur thax tsav tỉnh muôx 119,3 lênhx nhuôv tuz hâur 100 lênhx nhuôv nxeik tâu xênhz zus lok.

           Chiê jux juk têx nhuôv tuz thiêz nhuôv nxeik xênhz zus tâu lok siz bâus, cxuô cấp, cxuô ngênhx tsuv nzor tso tơưv cui tinhv, chei ntov chiê xưv bluô txos qơư chor nênhs uô cxâuv chei têz qơưk cik txos xeir xênhz zus mê nhuôv, lâux mê nhuôv hâur niêv chêr viv tsi xar xênhz zus tus nhuôv co, thiêz heik pâuz uô ntêx lênhx nhuôv hâur niêv chêr zos tuz lok sik nxeik. Cxaz nzir nhiêx txiêx tsi so thiêz truôx tuk trâu cxuô thax tsav chiê fuô uô luôs hâux lưv phax tir thêir têx tsi jông heik co, yax mông, kriê cxaz txux chi tsưr ziv thiêz seiz kaz hâux lưv no. Iz chas ntơư, cux muôz têx hâux lưv co fuô uô đros têz qơưk têx tsaz yênhx, li: Tsaz yênhx txo grêk cêr pluôs, huôv tsar thax tsav heir nênhs tsơưs, tsaz yênhx y tế-jênh sôr. Chox car, kriê lês uô têx hâux lưv trâu cxuô thax tsav lok fuô uô têx trâur nuv, tsưr ziv qênhz shuôs, phax tir thêir têx li heik sâuv cov huv đros yênhx thax tsav, suôv qơư, lar heik zos thax tsav tsôngv box heir nênhs tsơưs. Fuô kriê nthuôr uô đar têx hâux lưv uô tâu jông tưz tâu qênhz shuôs, huv đros yênhx heir nênhs, tôn giáo, tsôngv pêx xênhv, lar hêik zos chor xã, jêx jok nhoz thax tsav tox siêz đêz đrôngs./.

Bích Thủy-Riê Lâux cxeik, nhênhv