Pêx xênhv Điện Biên sir jos phax tar ntux no trâu tsiêx cxu

Txix zuk li chênhz zênhv tu zus, zơưv Nguyễn Văn Lai, nhoz jok 11, xar Thanh Chăn, huyện Điện Biên, tỉnh Điện Biên puz pâuz: thâuv muôx ntux no chênhr, no njiv, zov chênhr tiv zix cux zos tsêr guôx. Viv li, zơưv chuôz zis tưz cxiv uô tsêr guôx lox đar, kruôr krơưr thiêz thêir vor cov sor, tsik yâu chuô trâu zuk chuôz zis chor nhux, tưv. Đros co, chuôz zis cux bax têx nhaz blêx, jâuz tâux chiê muôx txâuk zav nox trâu chor tsiêx cxu hâur têx hnuz ntux no:“Tsêr guôx mak thêir vor cov ntov; no hênhr mak trâur tơưl trâu tsiêx cxu ntê, tsik tso yar lơưv, muôx trâu nox cxix cxuô têx tsơưr pưr, puz krâur, cuô njêr trâu nox thiêz hâuk nzir”.

Zơưv Nguyễn Văn Giới, đros nhoz jok 11, xar Thanh Chăn, huyện Điện Biên cux hêik pâuz: Ntux no đros lok nas, viv li chuôz zis tsuôk pâuz cơư chor nhux tưv hâur tsêr guôx chiê tu zus, tsik tso yar chor tsiêx cxu. Ntux no chênhr mak chuôz zis cux tưz thêir vor tsêr guôx cov tsik yâu chuô thiêz uô vêv xênhz tsêr guôx cov kruôr krơưr, hur đu, chiê tsưx phưv chor tsiêx cxu tâu ngaz tuk:“Nhaz blêx mak cur bax tsês chiê uô ntêx, chiê chor nhux tưv thâuv tưs cux muôx txâuk jâuz nox, hâuk txâuk đêx mak zuôr paz trâu chor nhux tưv muôx đas jos đuô”.

Tas nro xar Thanh Chăn, huyện Điện Biên muôx 1.000 ntâu tuk tsiêx cxu, phênhv ntâu zos nhux, tưv. Txix ciês thâuv hâur chêix ntux no, Ủy ban xar tưz chox kriê cán bộ uô hâux lưv no thiêz tsar chor jêx jok yax kriê trâu pêx xênhv pâuz phax tir tar ntux no cov taz por ngaz tuk trâu chor tsiêx cxu. Zơưv Phạm Minh Tiệp, Phưv Chủ tịch Ủy ban xar Thanh  Chăn, huyện Điện Biên puz pâuz: Đhâu qênhz yuôx, pov pox nhuôs cux tưz pâuz sir jos por vêv thiêz uô jông têx tsưr ziv chiê phax, tar ntux no trâu zuk chor tsiêx cxu thâuv muôx ntux no chênhr, no njiv. Khov co, têx shông jê lok no, hâur xar tsik pov muôx tsiêx cxu trâus tuôs no hlo:“Pêz zuôr tror muk qênhz yuôx, khov lơưr Ủy ban xar li ntâuz ntơưr chox kriê sôr 28 chiê chox kriê chor cán bộ uô têx hâux lưv no tsik so muk trâu têx jêx jok chiê yax kriê, nriêr pâuz têx tsưr ziv phax, tar ntux no trâu chor tsiêx cxu”.

Tas nro tỉnh Điện Biên nhiv no muôx 210.000 ntâu tuk nhux, tưv. Txơưv tiêk tưz pov muôx chor tsiêx cxu trâus tuôs tiv ntux no, taz sik đros pêx xênhv thiêz hâu nov ntơưv qơư li sir jos uô têx tsưr ziv phax tar ntux no, yêiz plaz trâu chor tsiêx cxu, vav tiêk zuôr paz txo grêk tsơưs tâu têx phiv liv, trâus hiêv muôx yưv./.

(Vũ Lợi-Lik Thox cxêik nhênhv)

Tsoz phưz nênhs lâul hnuz nhôngs siêz li zos tas nro Đảng, tas nro tsôngv pêx xênhv sơưr đơưk luôs hâux lưv

Txix tsưr ziv yax kriê uô cê đros ntâu kror, huv đros tsênhv njiêz thiêz lênhx nênhs; taz por tsênhv tsênhz, zos chei, cxênhx txuôs, tâu trơưk li tsưr ziv, hâur shông đhâu, hâu nov, tsưr tsix, đoanx thêv cxuô thax tsav qơư hâur tas nro têz qơưk tưz uô tâu jông cxuô luôs hâux lưv heik, yax kriê Đảng, têz qơưk li têx tsưr ziv, tsênhv chei đros thiêz nênhs lâul hnuz nhôngs siêz. Lar heik zos thax tsav tsôngv box heir nênhs tsơưs, thax tsav txov nhêv, ntus đriv….. Tsưr tsix muk shuôs, muôz huv puz trâu chor nênhs lâul hnuz nhôngs siêz muôx luz nênhx txov nhêv, trâul muôx moz gênhk…., zos txir ndâux txir luk hâur tsôngv box heir nênhs tsơưs ntơưv qơư thâuv txos hnuz ntênhs, hnuz tsiêz, Hnuz ntiêx têz nênhs lâul 1/10. Iz zav li pos Lý Thị Lu, 92 shông, heir nênhs Xa phó, zos iz hâur têx chuôz zis nênhs lâul tsi muôx qơư khov vav, luz nênhx txov nhêv nhoz jok Nậm Rịa 1, xã Hợp Thành, TP Lào Cai. Niêx shông, iz jiês tâu Hội nênhs lâul hnuz nhôngk siêz TP Lào Cai tuôx shuôs, muôz huv puz, no zos iz kro lok six jông, muôx liv trâu pos:“Tuz nhaz puôr lênhx tâu tas siv nênhx hur si lơưv. Yuôr 2 tus nxeik, gơưk cux lok six txov nhêv hênhr. Nhiv no uô nênhx nhoz iz lênhs, tsuôk pâuz khov trâu tsôngv cưr tix nênhx tsa sơưr đơưk hâur jok đros tuôx paz uô mor nox, gra đêx hâuk xưz. Tâu Đảng, têz qơưk moz siêz txos, cur lok six shir phaz hênhr”.

Nênhs lâul hnuz nhôngk siêz zos iz kro jông trâu sơưr đơưk, zos têz qơưk qơư khov, zos chuôz zis thiêz xã hội li qơư truôx. Chênhr viv li, luôs hâux lưv tsoz phưz thiêz txoz cxơưx trâu nênhs lâul hnuz nhôngk siêz nhoz Lào Cai hâur têx shông đhâu thâuv tưs tưz tâu cấp ủy đảng, hâu nov cxuô cấp ntơưv qơư tsi so moz siêz txos chiê uô jông Đảng, têz qơưk têx tsưr ziv, tsênhv chei lok tsoz phưz nênhs lâul hnuz nhôngk siêz. Nhoz thax tsav tsôngv box heir nênhs tsơưs, chor nênhs lâul hnuz nhôngk siêz tsênhv pâuz cxix pâuz cxuô, tuôr tâu tsês ntâu zav txux chi jông thâuv nzor. Chênhr zos li heik co, ntâu tsưr ziv cxiz nênhs lâul hnuz nhôngk siêz huôv tsar têx jêx jok cov vav mênhx, choz kriê têx txux chi jông ntơư trâu cxênhx hluôk đros pâuz, por hưv, tuôr tsês tsi chiê pôngz plox. Zơưv Vũ Quang Ý, Tsar Ban hlôngr njêx muôs Hội nênhs lâul hnuz nhôngk siêz huện Bát Xát, tỉnh Lào Cai heik:“Viv nhiv no chor lâul cux tsi yuôr chôngz lơưv, pêz lok six moz siêz txos têx li heik no, chiê chor lâul kriê têx txux chi ntơư trâu têx tuz nhuôs. Chiê uô tâu têx li heik co, pêz tưz tsuv tso chor lâul đros cxaz chuôz têx jiês cơưv chiê kruôs jông txos têx lênhx lâul no. Đhâu ntơư muôz ntơưr kruôs puz trâu chor lâul….”.

Hội nênhs lâul hnuz nhôngk siêz cxuô thax tsav qơư li hâux lưv uô phênhv ntâu zos lok sâuv cxiv tsa luz nênhx yiêz nhoz thax tsav qơư, muk seiz shuôs, tsoz phưz đas jos, phax tar, kho moz gênhk, phuôx huiz nênhs lâul hnuz nhôngk siêz li pưs txux hâur chuôz zis thiêz xã hội; choz kriê têx nhuôs cêr uô nênhx tsiv txiêx; uô têx hâux lưv nthuôr uô lov jêv; đros cxaz chuôz têx phôngz yaox, cxiv vênhv tôngv “cxiv tsa jêx jok vênhx huôv, chuôz zis vênhx huôv”, “pos zơưs uô tsov iêr chi cax trâu têx tuz nhuôs cơưv shâuv, uô trơưk’, “hnuz nhôngk siêz txux chi ziv jông”.

Shông 2021 moz Covid-19 uô ruôr hiêv txos kinh tế-xã hội hâur tas nro têz qơưk, uô tsi jông txos tsôngv niêv txir lax pêx xênhv sơưr đơưk luz nênhx nox nhoz, lar heik zos chor nênhs lâul hnuz nhôngk siêz. Luôs hâux lưv tsoz phưz nênhs lâul hnuz nhôngk siêz thâuv tưs tưz tâu cxuô cấp, cxuô ngênhx zênhx max moz siêz txos, fuô uô jông hâux lưv seiz njuôk shuôs, kho moz ntơưv tsêr trâu nênhs lâul hnuz nhôngk siêz trâul sêv khiz luz chêr, tsi muôx qơư hov vav, muk tsi tâuk trâu têx qơư y tế seiz njuôk shuôs, kho moz. 100% nênhs lâul hnuz nhôngk siêz tâu sơưv têz qơưk têx nhiêx paz, chei nênhs muôx côngz têz qơưk, chei xã hội siz cos paz, nênhs lâul zos chuôz zis pluôs, nênhs lâul zos heir nênhs tsơưs nhoz chor xã txov nhêv…..tâu muôz ntơưr seiz njuôk shuôs moz thiêz paz max seiz njuôk shuôs, kho moz tsi tas nhiêx txiêx ntơưv têz qơưk têx qơư seiz njuôk shuôs, kho moz gênhk. Zơưv Hoàng Văn Lộc, nhoz jok 11, phường Bắc Cường, TP Lào Cai heik:“Cxuô lênhx sơưr đơưk tuôx no lok six jông siêz thiêz shir phaz. Puôr lênhx tâu seiz njuôk shuôs cxuô zav moz. Moz siêz txos pêz chor nênhs lâul hnuz nhôngk siêz lok six jông. Muôx têx zos hâur Đảng Nghị quyết lơưv, viv li ntơưv qơư uô lok six jông, tsi so moz siêz paz max txos nênhs lâul hnuz nhôngk siêz, tsi tiêk hâur hnuz hội nênhs lâul xưz”./.

(VOV4-Riê Lâux cxeik, nhênhv)