Cxênhx hluôk nênhs tox siêz Lào Cai li siêz xar txos têx lịch sử tsik chiê plox

Thâuv tưs muôx kruô tuôx ndis shuôk txos, Thiếu tá Giàng A Trú, Chinhr triv viên phưv, Bí thư chi đoàn Zênhx Pênhz phax Pha Long, huyện Mường Khương, tỉnh Lào Cai ho hnar chêr tsôngk yo Pênhz phax sơưr ntơưv iz saz fiêx txix côngv ndo txos chor nênhs tưz trâus tuôs nhoz saz xik cêr muk trâu hâur Zênhx, piêr txos iz ntu nto bê taz sik cux lok six pôngz siêz:

“Thâuv tưs uô têx hâux lưv, tiv zix zos hêik txos lịch sử lok Zênhx Pênhz phax Pha Long, cur puôr lênhx lok six shir phaz xưk li zuk tâu cxaz chuôz uô jênhv vưv đros chor cxênhx nênhs uô ntêx co. Txix ntơưr cux pov zuk tsuv sir jos uô côngz xưv cov jông chiê phuôx huiz taz viv li chax chês cxôngx nzor zos 2 jiês tax tâu côngz bêx zênhz shôngx”.

Hli 7, chor nênhs tuôx trâu Mường Khương hax zav chôngz đuô. Sâuv ntu cêr ntus đriv ntêr tiv zix ntơưv Lào Cai no muôx lok six ntâu kror tsuv ndis shuôk thiêz nriêr pâuz.

Ndax ciês trâu jiês so sor, tâu niêv txir đăngk cir cơưv jiês cơưv quân sự, zos Huyện đoàn tsưr tsix, đrâuv chor jax cơưv tâu hâur cêr uô nênhx, yuôr iz kror mak nhuôv Phạm Bảo An, shux xênhz lớp 6A, Tsêr cơưv cxênhx oz thị trấn Mường Khương đros 20 lênhx shux xênhz txơưr ndo njôngr txos tsik plox, co zos jiês chuôr yuô Zênhx Pha Long; chuôr yuô qơư txi côngv, ndo txos 49 lênhx canr bôv, chiến sĩ trâus tuôs hâur jiês ntâuk tros châuz shông 1950 ntơưv Tả Ngải Chồ; chuôr yuô, khơưk muôz huv trâu chor chuôz zis saz pênhz sâuv thax tsav…

“Tâu nriêr pâuz tsênhv tsênhz li no mak cur lok six shir phaz thiêz uô tsâus ntâu txos chor chiến sĩ, zênhz shôngx tưz trâus tuôs viv tiêx tuk trâu têz qơưk, chiê pêz tâu cơưv ntơưr, uô si hâur tênhv qơư hux fênhx li nhiv no. Cur zuôr sir jos cơưv ntơưr, cơưv shâuv, chiê zos yênhx têx lênhx nhuôv ciêz, cơưv ntơưr txơưx paz trâu têz qơưk ntu tov ntêx no”.

Tas nro huyện Mường Khương nhiv no muôx 400 ntâu lênhx nênhs muôx côngz trâu têz qơưk. Têx shông đhâu, côngz xưv txoz cxơưx trâu chor chuôz zis muôx côngz trâu têz qơưk đros uô phongz yaox “Ndo txiêx pâux njis” tưz tâu thax tsav qơư tsov cưv txos kriz uô truôx jông. Txix shông 2017 txos nhiv no muôx 170 ntâu luz tsêr paz trâu chor nênhs muôx côngz tâu cxiv uô yiêz, kho đuô; phênhv ntâu chor chuôz zis tâu sơưv cêr chêi nhiv no puôr lênhx muôx phênhv uô nênhx nhoz siêz đuô xav luz đraz ntơưv thax tsav qơư nhoz.

Shông no txưv 75 shông chiv nhênhv Hnuz saz pênhz liệt sĩ, ntơưv Mường Khương muôx lok six ntâu huôx tôngv tsiv gri li luôx, qêz hur đu têx qơư kuô nza liệt sĩ; tsưr tsix siz njiz, khơưk muôz huv, chuôr yuô; phêiz côngz canr bôv, đảng viên, đoàn viên paz ciês trâu chor nênhs muôx côngz thiêz nênhs muôx côngz chor nênhs cxênhz jê muôx luz nênhx txov nhêv.

Lơưr zơưv Giàng Quốc Hưng, Bí thư Huyện ủy Mường Khương, têx kror hâux lưv uô tsênhv tsênhz nhiv no hax zav hêik txos mênhx cxưx li siêz xar txos têx lịch sử thiêz ntu nênhx tưz đhâu, txix co zos yênhx kror tso siêz chiê sir jos đuô, tiv zix zos cxênhx hluôk nhiv no:

“Cur thiêz tas nro cxênhx hluôk huyện Mường Khương tsik muôx thâuv tưs zuôr tsik ndo txos chor zênhz shôngx liệt sĩ li têx côngz lox chiê por vêv têz qơưk hlo. Co zos kror tsiv gri lox mak pêz tsuv ndo njôngr txos, chiê paz trâu zuk sir jos uô cxuô kror hâux lưv, lox tôngv, xar tơưv, paz đas jos trâu cxiv tsa têz qơưk, tiv zix zos nzor paz trâu huyện Mường Khương tơưv đhâu zos huyện pluôs trơưk li Nghị quyết Đảng bộ huyện  tưz xav jênhv hâur six cxiv no”.

Hâur têx hnuz hli 7 no, sêiz pov thax tsav nhoz ntus đriv faz Bắc jông jav. Chor nênhs tuôx ndis shuôk, nriêr pâuz thax tsav qơư no hax zav muôx chôngz đuô. Njiê txos fiêx sâu bê chiê txi côngv ndo txos chor zênhz shôngx liệt sĩ, njiê chor nza chôngz lênhx nênhs tưz trâus tuôs viv tiêx tuk trâu têz qơưk xưk lik zos têx luk hêik cov sơưr đơưk ndo njôngr txos thiêz sir jos cxiv tsa têz qơưk cov huôv tsar, shir phaz thiêz jông đuô./.

(An Kiên-Lik Thox cxêik nhênhv)