Ntâu thax tsav qơư ntơưv Lào Cai zôngx ziv tror njiz trâus ar poz

Sâuv têx trôngz tox siêz ntơưv Bát Xát muôx ntâu qơư ar xưz poz lox ntêr trơưk têx saz trôngz, vuôk har. Iz chas têx qơư co, cux tsênhv lok six ntâu qơư pov muôx ar xưz poz lox nhoz chor huyện li: Sa Pa, Bắc Hà, Bảo Yên thiêz Si Ma Cai.

Ntơưv xar Nậm Pung, chôngz lênhx nênhs uô nênhx nhoz ntêr shông ntơưv no puz pâuz, tsik tâu pov muôx iz jiês tưs jông li no hlo. 40 ntâu ziv chuôz zis, txơưv tsik tâu trâus ciês coz chuô sôr 3 uô ruôr hiêv txos, taz sik ho lok six cxơưx txos luz trôngz nhoz saz kâuv chor tsêr co poz lok thâuv tưs cux pâuz tsik tâu. Tix lâus Tẩn Láo Lử, nhoz jok Nậm Pung puz pâuz:“Ntơưv pêz nhoz no mak muôx lok six ntâu caz xưz jơưx, lok six riêz nênhs, cur vav tiêk chinhr quyền ntơưv qơư zuôr txar pêz muk trâu têx qơư nhoz yiêz ngaz tuk đuô”.

Đhâu muôx lok nas chuô, đrâuv 3 luz tsêr trâus poz vâu tas hur si, 40 ziv chuôz zis nhoz Nậm Pung zôngx ziv trâus xưz poz tsuv tâu txar muk trâu qơư ngaz tuk đuô. Chiê hêik pox nhuôs tso vax tsêr, liêx têz tsês txar muk nhoz trâu têx qơưk yiêz tsik zos zôngx ziv uô, taz sik chinhr quyền ntơưv qơư tưz xav jênhv txix ntâu tsưr ziv chiê hêik pêx xênhv cov txar muk nhoz trâu têx qơưk ngaz tuk đuô. Zơưv Ly Gì Mờ, Chủ tịch Ủy ban xar Nậm Pung, huyện Bát Xát hêik:“Pêz ntâuk gri mak nhiv no lox six lax uô hâux lưv txar pêx xênhv muk nhoz trâu têx qơưk ngaz tuk. Pêz cux vav tiêk têz qơưk zuôr yưv pênhr paz chiê truôx tuk qơư nhoz paz trâu sơưr đơưk tso siêz uô nox”.

Coz chuô sôr 3 tưz uô ruôr hiêv muôx 1.400 ntâu luz tsêr nhoz huyện Bát Xát. Đhâu qênhz yuôx txos six hơưv no, thax tsav qơư muôx txos 765 ziv chuôz zis nhoz hâur têx qơư zôngx ziv njiz trâus ar poz, đêx ngaz cuôr. Iz cxiê xar muôx chor ziv chuôz zis tsuv txar qơư nhoz ntâu li A Lù, Sàng Ma Sáo, Phìn Ngan, A Mú Sung…

Ntơưv huyện Bắc Hà, cux muôx zuôr xar 1.380 ziv chuôz zis nhoz hâur têx qơư zôngx ziv muôx ar poz, tsik ngaz tuk. Ciês jok Nậm Đét, xar Nậm Đét, 90 ziv chuôz zis tưz tâu chinhr quyền txar muk nhoz trâu qơư lav nhoz tiv luz trôngz ciês saz kâuv jok tưz pov muôx caz xưz jơưx lox. Taz sik chiê nriêr tâu qơư nhoz ngaz tuk zos iz kror tsik zôngx ziv uô. Zơưv Nguyễn Tư Hiền, Phưv Chủ tịch Ủy ban xar Nậm Đét hêik pâuz:“Thax tsav qơư lok six nxaz tox, chiê zok nriêr tâu qơư nhoz ngaz tuk mak cux zos iz kror lok six lax. Tsuôk zos nriêr têx qơư tsik yuô njiz trâus phiv liv ntâu chiê txar pêx xênhv lok nhoz xưz. Pêz cux tưz nriêr tâu qơư lơưv, nhiv no tsuôk tok muôx pênhr nhiêx mak kriz uô ciês qơư nhoz trâu pêx xênhv”.

Lơưr thôngz sâu, nhiv no tas nro tỉnh Lào Cai muôx yênhx cxênhz ziv chuôz zis tsuv txar qơư muk nhoz trâu têx qơư nhoz ngaz tuk đuô. Taz sik, hâux lưv kho đuô qơư nhoz ntơưv cxuô thax tsav qơư co tsênhv njiz tsik tsơưs têx phiv liv viv tsuv muôx pênhr jos, cuiv ar ntâu thiêz trung ương li chox kriê lok kho đuô qơư nhoz trâu chor ziv chuôz zis trơưk Cuêz tênhv 1719 tsênhv tsik tâu tsênhz mênhx./.

                                                                                                       TTTB-Lik Thox cxêik nhênhv

Tsi nyei riêz nênhs, phiv liv tưz sir jos đros paz chơưv tâu 3 lênhx pos cư hâur txuz tox xưz poz lox

Ntâu hnuz, đhâu tox xưz poz lox ntơưv jok Át Thượng, xã Minh Xuân, huyện Lục Yên, tỉnh Yên Bái, tix lâus Hoàng Văn Tiện cux tsênhv ndo njôngr tsês hâur đruôz siêz tsi plox thâuv hmo co. Tix lâus Tiện heik pâuz, muôx nhos 2 six iz tas hmo hnuz xiêz 10/9, đhâu thâuv hnor tơưs iz têk lox tas, txuôk nzir co zos hnor đror đrông ntưk, tsi pâuz muôx đaz tsi yưv siv, tix lâus tưz zênhx max sơưr tơưv muk saz đrâuv jôngr seiz. Đhâu tsov tênhz seiz njiê, kror cxiê qơư ar, poz jêz xưz poz, ntưk chuôs tsi, shôngz ntông vâu lor đrông ntưk, tưz tsi pov iz luz tsêr nhoz kror tưs hlo, tix lâus lok six nyei.

Đhâu ciês no, zos hnor têx lâul, hluôk, nhuôs zâu suôz kuôx kư siz hu siz nriêr chuôs tsi. Txơưv nhoz kuôk thax tsav muôx lênhx nênhs kư kuôx chuôs tsi cov đros paz chơưv ntơư muôx 400 thiêr, taz sik tix lâus Tiện cux muk paz tsi tâu hlo, viv ar poz jêz xưz poz, shôngz ntông vâu lor ntâuk vax tsêr poz vâu jis kênhs thêir cêr tas. Zênhx max đhiê ndê tox zok nriêr cêr muk txos jê thiêx pov pos Hoàng Thị Thắng, xênhz shông 1962 tsênhv puôs 2 tus nhuôv xênhz nzưr, ar poz jêz xưz poz lok cxuz txos hâur siêz. Pos Thắng thâuv co kư cov 2 tus nhuôv đhiê khiêr. Tix lâus Tiện nhiv kruôr puôs, truz tâu tus nhuôv Liệu lok, pos Thắng tưz tror kư cov khiêr đhiê chênhr mê njik, ar poz jêz tsênhv tror tu xưz lok, tix lâus Tiện zênhx max thơưz lênhx nhuôv Liệu khiêr đêz muôx 2 thiêr. Jiês 2, ar poz jêz nhav hênhr uô tix lâus Tiện tưz ro tsi tâu co tơư, thâuv co tix lâus xar, jâuv no zuôr trâus tuôs ntơưv no tiês lok uô chas, viv li tix lâus tưz sir jos thiêx ro tâu tơư lok. Thâuv tis seiz, pov pos Thắng thiêz tus nhuôv Vân trâus ar, poz cxuz tas ntâu, tix lâus Tiện tưz sei đrơưv muôz têk thoz huk ar, taz sik huk tsi tâu viv tsi muôx hlâu, tsi muôx fênhx. Txix têx riêz nênhs, ar poz jêz cxuz ntâu li ntơư, tix lâus tưz puôs hlo tus nhuôv Liệu đhiê khiêr, njiz đêx lok sir jos hla cov đhâu đêx, njiz ar gok lok sir jos muk cov đhâu, uô li chas chiê sei yax, zuôr tror tuôx paz chor nênhs trâus ar, poz cxuz. Thâuv chox tus nhuôv Liệu muk txos qơư truôx tuk, muôz choz trâu tix lâus Hoàng Văn Cuộc chuôz zis paz seiz, tix lâus tưz đhiê muk đrav kaz jok, hu iz cxiê lênhx nênhs thiêz gra chuôz zênhx tuôx đros paz khơưz, thoz huk ar chiê chơưv pos Thắng 2 lênhx pos cư. Tix lâus Tiện heik pâuz, muôx kênh lênhx lơưr tiêk, muk pêv co riêz nênhs hênhr, tsi cxoz muk, taz sik tix lâus siêz cux nhoz tsi kaz, pov luôs lưv tus njiz trâus phiv liv, tsi paz tsi tâu. Tix lâus Tiện, zơưv La Văn Chai, La Văn Bẩy, La Văn Ban thiêz zơưv Hoàng Văn Cung tưz zênhx max gra triêv txuôk, hlâu, fênhx, tênhz tơưk siz zâuv muk paz. Muk txos qơư, sơưr đơưk khơưz thiêz zok nriêr tâu pos Thắng, đhâu thâuv truz tâu pos Thắng lok, sơưr đơưk tror zok nriêr thiêz chơưv tâu tus nhuôv Vân. Đhâu hlo co, pos Thắng 3 lênhx pos cư tưz tâu chox sei đrơưv muk trâu tsêr kho moz. Pos Thắng mak trâus lor tar, 2 tus nhuôv xênhz nzưr trâus mê njik ntơưv têx tơưr grêix. Txix thâuv muôx yưv têx li heik sâuv, tix lâus Tiện tưz nduô têx hâux lưv hâur vax tsêr tsês chiê đros tsôngv cưr tix nênhx tsa sơưr đơưk hâur jok tror cxiv kho têx tsi jông tiv trâus đêx nas uô ruôr hiêv:“Lok six riêz nênhs tiês tiês, cur tsi tâu pov iz jiês tưs li ntơư hlo. Txix hnuz co txos nhiv no, tưz uô tsi tâu đaz tsi li, nhoz hâur tsêr paz sơưr đơưk xưz, paz tâu li chas mak paz li ntơư, đros sơưr đơưk chơưv paz chor nênhs trâus moz, trâus ar  poz jêz cxuz, paz đros lês uô iz cxiê zav hâux lưv uz no....”.

Pos Hoàng Thị Thắng heik, thâuv hnor đror iz tês lox, pos tưz zênhx max puôs ciês 2 tus nhuôv hâur xuz ntiês, đhâu co ar poz jêz tu xưz pêv kâuv tsêr lok cxuz, uô pos 3 pos cư khiêr tsi zênhx, thâuv ndo tâu tưz trâus ar cxuz txos chax đaz. Zos tsi muôx tix lâus Tiện tuôx paz mak cur 3 pos cư tưz tsi muôx txox siê li hnuz no lơưv:“Cur seiz Tiện chuôs li tror xênhz zus đuô cur 3 pos cư iz jiês thiêz, viv muôx Tiện chơưv paz, tsi tiêk Tiện iz lênhs xưz, tsênhv hu zâuv 2, 3 lênhs tuôx đros paz hur si. Zos Tiện tsi pov pêz chor pos cư mak pêz tưz tsi muôx li hnuz no lơưv”.

Txuz tox xưz poz iz tas hmo 2 six, hnuz xiêz 10/9, ntơưv jok Át Thượng, xã Minh Xuân, huyện Lục Yên, tỉnh Yên Bái uô puôk tsuôx 5 luz tsêr, 9 lênhx nênhs trâus tuôs./.

                                                                                                          Tuấn Xuân-Riê Lâux cxeik, nhênhv