Phêv liv hâux lưv cxax yuôx phax moz nhoz Na Cô Sa

          Thâuv hnuz tưz keix, têx chuôz zis tưz qir tơưk tênhz, co cux zos thâuv têx cán bộ y tế nhoz xã ntus đriv Na Cô Sa, huyện Nậm Pồ, tỉnh Điện Biên qir muk têx jêx jos. Đros lơưr muk muôx Chủ tịch UB UBMTTQ xã- Cháng A Chinh. Luz hli tưs, uô ntêx thâuv txos jiês cxax yuôx phax moz cux zos têx jiês muk yax mông vênhv tôngv uô ntêx. Iz jiês muk, puôr lênhx chính quyênx xã, jêx jos cxaz chuôz chiê heik kriê paz pox nhuôk zôngx ziv to tâuz đuô thiêz thôngx ziv uô trơưk. Zơưv Cháng A Chinh, Chủ tịch UBMTTQ xã Na Cô Sa, huyện Nậm Pồ heik: “Thax tsav xã muôx ntâu lâuk jos, tsar jos, têx lênhx txir ndâux txir luk, pêz zuôr sik côngv đros têx đồng chí co chiê chuôz tsar uô côngz xưv yax mông”

          Yuôr zơưv Zax A Lếnh, Phưv Chủ tịch UB xã Na Cô Sa, huyện Nậm Pồ mak pheiz kênh, fênhx yax, sâuv thax tsav muôx qơư nhoz jông, tsôngv box li jênhv pâuz siêz mak zuôr chiv chir cxaz chuôz têx tsaz yênhx cxax yuôx phax moz krêz đar, taz por qênhx liv trâu zuk têx mê nhuôk. Taz sik, nhoz Na Cô Sa, hâux lưv no mak phênhv ntâu tsi muôx: “Đros thax tsv qơư, pox nhuôk phênhv ntâu zos mênhx cxưx Hmôngz, cux muôx pox nhuôk cxax yuôx phax moz. Thâuv cxax yuôx pov uô cuz lok sik gênhs gênhs mak têx lênhx uô niêv tsi car cxaz chuôz côngz xưv cxax yuôx phax moz lơưv thiêz. Đros cấp ủy chính quyênx tiv phaz li sik côngv, thâuv muôx tsưr ziv cxax yuôx zuôr sik côngv đros têx lưx lươngv, cán bộ y tế, têx ban nganhx đoanx thêv muk yax mông chiê pox nhuôk yax six, yênhx luz hli, 6 luz hli lok sik lơưr yênhx shông sâuv tas nro têx jêx jos sâuv thax tsav xã”

          Txơưv tưz muôx ntâu sir jos, taz sik Na Cô Sa cux tâu seiz zos qơư phêv liv hâur côngz xưv cxax yuôx phax moz nhoz tỉnh Điện Biên, lênhx nênhs cxax yuôx tax fênhx pheiz 20%, muôx têx thâuv tax 37-38%. Chiê hlôngr yiêz qênhx shênhx no, đrâuv côngz xưv yax mông, vênhv tôngv mak nhiv no cxax đrâuv qơư y tế, cxax nzir zos têx tsưr ziv tsênhv tâu lưx lươngv y tế sir jos krêz uô. Y sĩ Lò Văn Thỏa, Tsar trạm y tế xã Na Cô Sa, huyện Nậm Pồ, tỉnh Điện Biên pheiz kênh: “Trạm y tế krêz uô hâux lưv cxax yuôx phax moz ntơưv 11 jêx jos, muôx 1 qơư ntơưv trạm, 10 qơư cxax ntơưv jos. Cán bộ y tế zuôr muk txos yênhx jêx jos chiê cxax, jos tưs phêv liv mak muk txos yênhx ziv chuôz zis chiê vênhv tôngv chox mê nhuôk tuôx cxax yuôx phax moz cxix cxuô”

          Txơưv tsêr nhoz jê trạm y tế, taz sik đros ntâu lik zơưx, niêv lâuk Phàng Thị Nủ, nhoz jos Huổi Thủng 1 cux tsi tâu chox mê nhuôk muk cxax yuôx trơưk six hơưv cui tênhv. Đhâu qênhz yuôx, têx lênhx nênhs xưk li niêv lâuk Nủ, cán bộ trạm ho muk txos ciês tsêr chiê cxax yuôx trâu mê nhuôk, cov taz por six hơưv cui tênhv. Niêv lâuk Phàng Thị Nủ heik: “Muôx ntâu lênhx mê nhuôk muk cxax yuôx lok pov uô cuz, taz sik bác sĩ heik kriê tsưr ziv tsoz phưz đhâu thâuv cxax yuôx lơưv viv li cur cux tsi cxơưx luôx tưs”

          Qơư y tế Na Cô Sa nhiv no muôx 6 lênhx cán bộ, hâur co jênh số tas nro xã muôx 6 cxênhz 700 lênhx nênhs, nhoz uô nênhx ntơưv 11 jêx jos, đros 90% ntâu tsôngv box muk lơưr vax tsưr. Thax tsav ar nxaz, hâux lưv ntâu, phêv liv, taz sik đros chinhz yênhx, txơưx jênhv, têx cán bộ y tế nhoz no cux truôx siêz uô hâux lưv, sir jos hâur niêx hnuz. Luz hli tưs, têx jiês cxax yuôx phax moz cux tâu tsưr tsix đros têx phêv liv thâuv muk yax mông vênhv tôngv tsôngv box chox mê nhuôk tuôx cxax yuôx phax moz trơưk six hơưv./.

Vũ Lợi-Txâur Vax cxeik nhênhv

Lênhx cưk yuôx uô hâux lưv jông nhoz ntus đriv Sơn La

            Cêr muk trâu pos Lò Thị Nhọt, xã Chiềng Khương, huyện Sông Mã, Sơn La chuôz zis tưz lok six sưv đros thiếu tá, lênhx cưk yuôx tuz lênhv Lò Văn Thương nhoz Zênhx Pênhz phax Trôngx đriv Chiềng Khương. Iz chas txos hnuz tuôx seiz njuôk shuôs đas jos lơưr cui tinhv, thâuv tưs chuôz zis zuôr trâus paz, tix lâus Thương puôr lênhx tuôx ciês ntơưv chuôz zis chiê seiz njuôk shuôs đas jos trâu chor nênhs hâur tsêr. Hnuz nhôngk tưz lâul, tsi muôx đas jos uô nox, chuôz zis ho txov nhêv, pos Lò Thị Nhọt lok six chiê siêz, tok njôngr chor cưk yuôx tuz lênhv Pênhz phax têx cêr paz, txoz cxơưx trâu pos thiêz chuôz zis. “Shông no cur tưz 86 shông lơưv, khênhr trâus muôx moz gênhk, muôx chor tuz lênhv Pênhz phax tsoz phưz đas jos xưk li nênhs hâur tsêr, cur uô tsâus lok six ntâu txos chor nhuôv, tưz paz niêv muôx nzir đas jos, cêr chiê siêz”.

            Thiếu tá Lò Văn Thương thâuv tưs cux muôx thiêz gra đros têx chuôz zênhx seiz njuôk shuôs moz, cxuô zav yuôx muk yax mông, kriê pêx xênhv thax tsav ntus đriv tsưr ziv tsưx phưv jông đas jos chiê tsi yuô trâus muôx moz gênhk. Trơưk li tix lâus Lò Văn Thương, iz jiês muk jêx jok seiz njuôk shuôs đas jos trâu pêx xênhv, puôr lênhx zos six hơưv jông chiê tix lâus tâu chuôs njiz, sik thav đros tsôngv pêx xênhv ntus đriv, uô sơưr đơưk muôx cêr thôngx siêz đuô: “Pêz thâuv tưs tưz seiz pêx xênhv hâur thax tsav ntus đriv xưk li chor nênhs hâur tsêr, chênhr viv li thâuv pêx xênhv muôx moz gênhk, xar seiz njuôk shuôs đas jos, kho moz mak pêz jông siêz hlo muk yênhx chuôz zis chiê seiz njuôk shuôs đas jos trâu tsôngv box. Đhâu seiz njuôk shuôs moz, pêz tsênhv qênhz pov iz cxiê zav moz zôngx ziv siz cik tâu trâu lưv tus hâur thax tsav ntus đriv, zênhx max yax kriê pêx xênhv phax tir thêir têx caz moz ntơư”.

              Tsi tiêk tsôngv box thax tsav ntus đriv Sơn La, têx jiês muk uô hâux lưv seiz shuôs “Tuz lênhv Pênhz phax lênhx nhuôv puôs” Thạo Phe thiêz tsôngv pêx xênhv jok Đán, huyện Mường Ét, tỉnh Hủa Phăn, têz qơưk Lol Tsuôk, thiếu tá Lò Văn Thương khênhr tsês six hơưv muk seiz njuôk shuôs moz, sik thav đros tsôngv pêx xênhv, kriê sơưr đơưk tsưr ziv tsưx phưv đas jos. Co zos iz kro jông, uô ntâu lênhx pêx xênhv thax tsav ntus đriv Lol Tsuôk jông siêz thiêz shir phaz, lar heik zos têx chuôz zis muôx luz nênhx txov nhêv, tsi yuô tâu seiz njuôk shuôs đas jos viv nhoz kuôk đêz tsênhv qơư, iz zav li pos Nang Phon nhoz jok Đán: “Iz jiês chor tuz lênhv tuôx shuôs, seiz njuôk đas jos trâu pêz, lơưr tsênhv muôz yuôx nox kho moz gênhk hur si, pêz lok six jông siêz hênhr, uô tsâus ntâu txos chor tuz lênhv Pênhz phax Việt Nam”.

          Iz jiês muk đhâu thax tsav ntus đriv, txos trâu têx qơư tsôngv box txov nhêv, nhoz đêz đrôngs, zuôr trâus tâu paz, thiếu tá Lò Văn Thương cux sir jos uô luôs hâux lưv seiz njuôk shuôs đas jos trâu têx lênhx canr bôv, chiến sĩ tsênhv uô hâux lưv tsưx phưv têz qơưk.

          Thiếu tá Hoàng Quang Huy, Phưv seiz car Zênhx Pênhz phax trôngx đriv Chiềng Khương, Bôv đôiv Pênhz phax tỉnh Sơn La heik pâuz: “Đảng ủy, Ban chỉ huy zênhx tưz chox kriê chor cưk yuôx tuz lênhv hâur taz viv tsi so uô jông hâux lưv seiz njuôk shuôs đas jos trâu canr bôv, chiến sĩ, muôx txâuk yuôx nox kho moz gênhk trâu têx tuz lênhv; lar heik zos têx tổ đội uô hâux lưv nhoz đêz Zênhx, uô li chas chiê chor tuz lênhv muôx jông đas jos lês uô têx hâux lưv zok muôz, tsưx phưv truôx ntus đriv têz qơưk. Iz chas ntơư, cux chox kriê cưk yuôx tuz lênhv hâur zênhx tsi so hux jos đros chor cưk yuôx, bác sĩ 2 xã Chiềng Khương thiêz Mường Sai seiz njuôk shuôs đas jos trâu tsôngv pêx xênhv thax tsav ntus đriv, tsôngv box thax tsav saz đrâuv jê đriv têz.... Đhâu co, chiê tuz lênhv thiêz tsôngv pêx xênhv ntus đriv ziv muôx cêr thôngx siêz jông đuô”./.

Lê Hạnh-Riê Lâux cxeik, nhênhv