Moz Covid-19 phax tir thêir tâu, pok cxax yuôx vắc xin côngz tiv 4

Ntơưv Quảng Ninh-iz hâur têx thax tsav qơư uô tiêr nzor luôs hâux lưv cxax yuôx vắc xin côngz tiv 3 trâu tas nro cxuô lênhx nênhs. Chor nênhs trâul tuôs tiv moz Covid-19 nhoz Quảng Ninh cux tsơưs đuô hur si pir li hâur tas nro têz qơưk, txo grêk tsơưs têx lênhx trâul moz hnhar thiêz trâul tuôs, txo grêk têx lênhx trâul moz yiêz, muôz jông hâu cêr chiê ntơưv qơư huôv tsar kinh tế-xã hội, tuôr truôx cêr chuôz tsar hâur 2 shông muôx moz Covid-19 huôv xênhz.

Txơưv li ntơư, muôx nhos 2 luz hlik đhâu-thâuv tas nro têz qơưk qir uô luôs hâux lưv seiz njuôk shuôs, cxax yuôx phax tar moz Covid-19 trâu têx nhuôs zâu txix 5- 11 shông ntâu, ntơưv Quảng Ninh thiêz ntâu thax tsav muôx têx lênhx nhuôs zâu tsuv nduô tsês tsi cxax yuôx phax phôngz moz, viv tsênhv chơưv kho têx moz txơưr đuô lok sik tiv trâul moz yiêz Covid-19. Têx li heik no cux uô trâu luôs hâux lưv cxax yuôx vắc xin côngz tiv iz trâu têx nhuôs zâu kênhz thiêz sơưr đơưk cxơưx txos iz zav li iz cxiê lênhx uô niêv uô txir nhoz xã Tân Phong, huyện Ninh Giang, tỉnh Hải Dương heik:“Cur cxơưx lok cxax yuôx vắc xin trâu têx nhuôs zâu txix 5 shông tror zar sâuv, viv cur tus nhuôv tưz trâul moz Covid-19 thiêz đas jos puôr lênhx truôx tuk. Chênhr viv li, zos tiêk chiê cur xeir tso mê nhuôv cxax thiêz tsi cxax mak cur zuôr tsi chiê mê nhuôv cxax”.

Sơưr đơưk têx cêr cxơưx lok sâuv cxax côngz tiv 4 cux uô trâu iz cxiê lênhx nênhs cxơưx đhâu thâuv lơưr trâul moz Covid-19. Zơưv Trần Văn Sung, phường Tứ Minh, TP Hải Dương heik pâuz:“Ntâu lênhx nênhs tso siêz thiêz cxơưx tsi xar cxax côngz tiv 4 yuôx phax phôngz moz gênhk. Viv đhâu cxax côngz tiv 2, tiv 3 lơưr pov moz kror côngz cxax thiêz gênhk, lar heik zos nhiv no moz tsi yuô huôv xênhz phiv liv. Co zos iz kro sơưr đơưk tso siêz, tsi jông trâu hâux lưv phax tar moz, viv iz jiês no têx caz moz li: Omicron cux tsênhv taz tov huôv xênhz, zos moz tror phiv liv mak zuôr lok six nhuôz trâu ngênhx y tế thiêz tas nro côngv thôngx”.

Ntơưv cxuô thax tsav qơư li: Cao Bằng, Bắc Kạn tsênhv sir jos uô cov tiêr luôs hâux lưv cxax côngz tiv 3 yuôx vắc xin thiêz qir cxax côngz tiv 4 , uô ntêx zos cxax trâu têx lênhx zôngx ziv trâul cik tâu moz li: Chor nênhs muôx moz hâur đros chêr, tsi yuô muôx đas jos…. Zơưv Nguyễn Tiến Tôn, Giám đốc CDC Bắc Kạn heik pâuz: Ntơưv qơư tsênhv muôx tsưr ziv phênhz thiêz fuô uô luôs hâux lưv cxax côngz tiv 4, sir jos cov muôx bâuv li chas yuôx tuôx, cxax tas bâuv li co trâu tsôngv niêv txir pêx xênhv:“Pêz bax hux jos đros cxuô huyện, TP thiêz qênhz shuôs chor nênhs đas cir cxax, chiê sâu bê, heik trâu viện vêv xênhz dịch tễ T.Ư muôz vắc xin tuôx cov txâuk li tsi sênhv lok sik tsi uô tuôr xuôv têx yuôx. Nhiv no nhiv kruôr lênhk txeik tâu 10 cxênhz ntâu côngz yuôx vắc xin, pêz zuôr phênhz pheiz trâu 8 huyện, TP chiê cxax uô ntêx trâu tsôngv niêv txir cưr tix nênhx tsa uô ntêx hnuz 30/6”.

Chor nênhs nhênhz chơưv heik: Cxax yuôx vắc xin phax phôngz moz Covid-19 trơưk cui tinhv thiêz txâuk lok six zov chênhr chiê sơưr đơưk muôx txâuk đas jos phax tir thêir moz gênhk. Chênhr zos li ntơư, ntâu têz qơưk sâuv ntiêx têz tưz fuô uô luôs hâux lưv cxax yuôx vắc xin phax tar moz Cov-19 côngz tiv 4 chiê tsưx phưv sơưr đơưk đas jos tsi trâul cik tâu têx caz moz yiêz.

Tsênhz tiês đhâu ntâu jiês moz huôv xênhz, tưz khav tinhv yuôx vắc xin tir thêir tâu caz moz Covid-19. Nhoz iz cxiê têz qơưk tưz muôx kênh lênhx trâul moz têx caz moz yiêz Omicron, hâux lưv fuô uô kênhz cxax côngz tiv 4 yuôx vắc xin phax phôngz moz muôx têx zuôr uô tsar ndê têx lênhx nênhs trâul moz hnhar./.

(VOVĐB-Riê Lâux cxeik, nhênhv)