Sơn La huôv tsar cxiv uô jông têx cêr muk lol

         Tix lâus Quàng Văn Mẳn nhoz jok Kham, phường Chiềng Cơi, tỉnh Sơn La heik pâuz, tix lâus chuôz zis muôx zuôr xar 2 ha têz chos cà phê. Txox cêr lus muk lol đhâu đrôngs Sơn La ntêr xar muôx 20 cêik txix thâuv uô tiêr tưz paz tix lâus chuôz zis thiêz ntâu ziv chuôz zis pêx xênhv uô nênhx nhoz trơưk 2 saz ntus cêr zôngx ziv huôv tsar uô nox, lax luôv. “Pir li thâuv ntêx mak nhiv no muk lol zôngx ziv đuô. Cà phê nhoz no mak kênh chuôz zis muôx ntâu, têx ziv cux tsơưs xưz. Txix thâuv tỉnh uô cêr lus muk lol đhâu no, tsôngv pêx xênhv cux zôngx ziv huôv tsar uô nox, zuôr muôs hax huv đuô”.

           Hli 5 shông 2025, dưv anr cêr muk chênhr Hòa Bình-Mộc Châu, ntu muk đhâu thax tsav tỉnh Sơn La tưz qir cxiv tsa. Txơưv thâuv uô cêr, yênhx puô chuôz zis pêx xênhv zuôr trâus uô ruôr hiêv viv sâu zuôr ar chiê cxiv tsa côngz trênhx thiêz cxiv uô têx qơư yêik txar tsôngv pêx xênhv muk nhoz, taz sik pâuz tsênhz thâuv muôx cêr muk chênhr đhâu, sơưr đơưk zuôr zôngx ziv muk lol, huôv tsar uô nox, luz nênhx kinh tế, xã hội txix co cux zuôr vav mênhx đuô, viv li phênhv ntâu tsôngv pêx xênhv puôr lênhx jông siêz, thôngx ziv đros luôs hâux lưv krêz uô txox cêr no. Tix lâus Vì Văn Đông nhoz jok Páng, xã Chiềng Khoa, huyện Vân hồ (kuz), nhiv no zos xã Tô Múa, tỉnh Sơn La shir phaz heik pâuz: “Tsôngv niêv txir cưr tix nênhx tsa sơưr đơưk jông siêz 100% lok tsưr ziv cxiv uô cêr muk chênhr đhâu thax tsav. Nhiv no mak tok njôngr txox cêr co ziv uô tâu nzor ziv jông xưz”.

           Zơưv Nguyễn Minh Tiến, Phưv chủ tịch Ủy ban tỉnh Sơn La heik pâuz, đros thiêz tsưr ziv huôv tsar cxiv uô jông têx cêr muk lol nzor đuô pir li cui tinhv, six cxiv 2020-2025, Sơn La tưz fuô uô ntâu faz tsưr ziv cxơưz cxiz huôv tsar cxiv uô têx cêr muk lol cov truôx jông chiê cxơưz paz huôv tsar. Ciês hâur six cxiv, BCH Đảng bộ tỉnh tưz tso tơưv Nghị quyết sôr 05 hnuz 21/01/2021 lok huôv tsar kinh tế xã hội truôx, hu zâuv tas nro cxix luôs chính trị thiêz pêx xênhv, côngv thôngx doanh nghiệp hâur thax tsav sik đros uô, khov li co, đhâu zuôr xar 5 shông, Sơn La tưz hlôngr yiêz lok six ntâu. “Tỉnh tưz uô tiêr, muôz lok sir zôngv txox cêr lox sôr 06 lus muk lol đhâu đrôngs Sơn La; dưv anr cxiv kho txox cêr txix cêr lox 37 Bắc Yên muk trâu cêr lox 278D Mường La; krêz côngz uô dưv anr cêr muk chênhr Hòa Bình-Mộc Châu, ntu đhâu thax tsav tỉnh Sơn La; yưv pênhr cxiv uô txox cêr chênhr muk lol hâur Mộc Châu; dưv anr cêr muk txix Tiểu khu 26/3, xã Cò Nòi txos tiểu khu 10, xã Hát Lót, huyện Mai Sơn..... Iz chas têx dưv anr cêr muk lol zov chênhr, tas nro tỉnh fuô uô phôngz yaox uô cêr muk lol jêx jok, reik đros cxiv tsa jêx jok yiêz. Hâur ntu đhâu, tưz cxiv uô, kho đuô 857 ntâu cêik cêr muk lol jêx jok”.

           Nhiv no tỉnh Sơn La cux tsênhv tror heik trâu T.Ư tror fuô uô têx ntu cêr muk chênhr Mộc Châu tuôx trâu tsênhv qơư tỉnh Sơn La thiêz tỉnh Điện Biên (trơưk txox cêr lox sôr 06) thiêz cêr muk chênhr Sơn La-Yên Bái (kuz), nhiv no zos Sơn La-Lào Cai hâur ntu 2026-2030; tror fuô uô iz cxiê dưv anr cêr muk lol trâu lưv thax tsav qơư txơưr đuô. Iz chas ntơư, sir jos thix ziv ntâu ziv chiê hu zâuv yưv pênhr cxiv tsa qơư tsav yêz za Nà Sản..... Đhâu co, jux juk muôx ntâu cêr muk lol zôngx ziv trâu iz tỉnh tox siêz, ntus đriv, muôz qơư chuôz jos chiê hu zâuv yưv pênhr uô, huôv tsar sei thiêz truôx hâur ntu zuôr txos./.

Thu Thùy-Riê Lâux cxeik, nhênhv

Lênhx chi hội tsar pox niêv nhoz tox siêz ntus đriv uô tâu hâux lưv jông         

          Tâu xênhz zus thiêz hloz lox hâur iz chuôz zis muôx luz nênhx txov nhêv, niêv lâuk Hùa tsuv so ntơưr tsês chiê muk uô têz. Iz shông, niêv lâuk chuôz zis tsuôk chos tâu iz chiv blêx, sâu tâu mê njik tsuôk txâuk chiê cxơưx trâu chuôz zis. Thâuv zuôr txir, niêv lâuk muk uô nhaz ntơưv jos Trường Sơn, tror njiz ntâu phêv liv hâur huôv tsar uô nox thiêz tsoz phưz mê nhuôk.

         Shông 2020 thâuv niêv lâuk tâu bo xeir uô chi hội trưởng chi hội pox niêv hâur jos, niêv lâuk tưz sir jos cxaz chuôz têx lớp kriê cxaz zos Hội pox niêv cấp siêz tsưr tsix, tâu bax yênhx tưv lok huôv tsar kinh têr thiêz tâu pâuz txos têx chính sách paz txưv. Jênhv pov têx kror jông lok hâux lưv tu zus, niêv lâuk truôx siêz hlôngr txix tsêz chos hlôngr chiê tu zus nhux tưv nhux đas thiêz yik.

       Shông 2021, niêv lâuk Hùa krêz đar chuôz zis li trâur nuv tu zus sâuv mênhv chêx đar 58 hecta ntâu. Paz tsiêx cxu qir thơưx tsuôk muôx 8 tul nhux tưv nhux đas, tas nro tsiv grê 80 tsov đeiv, hâur co niêv lâuk txeik cxaz 50 tsov đeiv txix Zênhx hangx chính sách xã hội. Đros siêz truôx bo chiê huôv tsar uô nox, niêv lâuk sir jos cxaz chuôz têx lớp kriê cxaz, nriêr pâuz cxeix laov ntâuz ntơưr lok tsưr ziv tsoz phưz tsiêx cxu thiêz yưv pênhr chos jâuz tâux puz nhux nox. Thôngx cxix, niêv lâuk tsov cưv cxax yuôx phax moz trâu tsiêx tu zus, tsi tso kuk mak cơư cov seiz car tâu jông đuô. Khov truôx siêz uô, chor tsiêx cxu hloz lox thiêz huôv tsar sei. Txix shông 2021 txos shông 2025, niêv lâuk chuôz zis li paz tsiêx cxu tưz chuôz ndê txox 17 tul ndê txos 40 tul, đros co zos muôx 8 tul yiv thiêz 100 ntâu tul keiz ok. Khov co, iz shông niêv lâuk chuôz zis sâu tâu txix 150 txos 180 tsov đeiv, luz nênhx muôx ntâu hlôngr yiêz.

          Tsi taz txơưx huôv tsar uô nox, niêv lâuk Lỳ Y Hùa tsênhv uô ntêx nyuôk hâur  uô têx quy ước, hương ước nhoz tiv phaz, sir jos vênhv tôngv hội viên cxaz chuôz cxiv tsa jêx jos. Tiv zix, niêv lâuk tưz huiz tôngv pox niêv gôngr đas jos paz têx chuôz zis pluôk cxuôv tsêr lav uô, cxiv tsa têx cêr zaoz thôngz lok muk hâur jêx jos. Tsuôk xav hâur shông đhâu, tưz muôx 673 jiês hội viên cxaz chuôz huôx tôngv no.

        Khov têx gôngr côngv jông co, ntâu shông tsi so niêv lâuk Hùa tâu hội pox niêv xã Nậm Cắn bo xeir zos uô tiêr jông jênhv vưv, jênhv Hội LH pox niêv thênhv siêz li ntâu ntơưr kruôk. Tiv zix, shông 2024, niêv lâuk tâu xeir zos iz hâur têx lênhx hội viên jông hâur tỉnh, tâu cxaz chuôz Đại hội UB MTTQ VN tỉnh jiês tiv 10, six cxiv 2024-2029.

          Niêv lâuk Hùa li têx yênhx côngz jông co tsi taz paz uô chuôz zis hlôngr yiêz jông mak tsênhv tâu chôngz lênhx pox niêv nhoz tox siêz sik đros cơưv shâuv uô lơưr. Khov trâur nuv tu zus muôx chêx cuk co, muôx chôngz lênhx nênhs tuôx cơưv shâuv chênhz zênhv, tsiv uô xênhz yar kôngz nuv. Niêv lâuk Hùa cux truôx siêz heik kriê tsưr ziv tsoz phưz tsiêx tu zus, tsưr ziv phax moz thiêz seiz car nhiêx txiêx. Niêv lâuk li têx sir jos tưz paz uô hlôngr yiêz jông pox niêv tiv phaz li jênhv pâuz lok huôv tsar uô nox, paz lơưr truôx siêz đuô hâur huôv tsar uô nox thiêz hlôngr yiêz luz nênhx.

        Đros têx yênhx tix tax tâu, niêv lâuk Lỳ Y Hùa tsi taz zos đeiv iêr chi cax lus hâur jos lok huôv tsar uô nox mak tsênhv zos lênhx nênhs tso pov pox niêv mênhx cxưx tsơưs nênhs li siêz sir jos hâur hâux lưv cxuôv cêr yeiz pluôk, gôngr phênhv cxiv tsa têz qơưk ziv hnuz ziv huôv tsar.

          Phênhv “Nôngx mênhx zuôr tsuv pâuz” hnuz no zos Đeix nta suôz VN đros Tsênhv qơư cxiz kôngz têz qơưk uô./.

Lầu Chia-Txâur Vax cxeik nhênhv