Cxiv tsa “tsêr cơưv sor siêz” nhoz Yên Bái

Đhâu thâuv muôx chox kriê, heik fuô uô, tsêr cơưv cxênhx iz Nguyễn Viết Xuân, huyện Lục Yên (Yên Bái) tưz cxiv tsa têx tsưr ziv “tsêr cơưv sor siêz” reik đros têx tsênhv tsênhz ntơưv qơư li: Six hơưv cơưv jông, tênhx qơư nhoz cơưv tsi muôx têx cuz nxor trâu cưk kriê ntơưr, shux xênhz; khưx phưx qênhx shênhx sik đros uô hâux lưv kriê thiêz cơưv ntơưr, seiz car huv đros tsi thôngx li thâuv ntêx; cxiv tsa tsêr cơưv hur si, njuôz jông….. Cưk kriê ntơưr Đặng Thị Lan Hương, thơưx seiz car tsêr cơưv heik pâuz:

“Txix canr bôv seiz car txos chor cưk kriê ntơưr, nhân viên, pêz sơưr đơưk tưz tsuv hlôngr yiêz siêz xar, tsưr ziv uô nuv, chor cưk kriê uô uô ntêx chiê têx nhuôs shux xênhz pâuz tâu thiêz cơưv shâuv, uô trơưk, hlôngr yiêz tsưr ziv, têx siêz xar. Pêz cux tưz uô trâur nuv “Lớp cơưv sor siêz”thiêz “tsêr cơưv sor siêz” chiê iz hnuz têx nhuôs tuôx tsêr cơưv zos iz hnuz lov jêv, shir phaz thiêz chor cưk kriê ntơưr cux pov iz hnuz uô hâux lưv kriê txux chi zos iz hnuz jông siêz, muôx cêr shir phaz”.

Cxênhx 2, zos têx shux xênhz nhoz hnuz nhôngk txix 12-15, chor nhuôs muôx ntâu hlôngr yiêz lok sâuv siêz xar, cêr hloz lox viv li tsưr ziv lok tênhx qơư zoz zux tâu chor tsêr cơưv nhoz Yên Bái lok six moz siêz txos. Chiê txix ntơư, chor cưk kriê thiêz shux xênhz muôx cêr sik thôngx siêz, siz njênhs njôngr hâur niêx hnuz. Trơưk li cưk kriê Bùi Thị Kim Thoa, thơưx seiz car tsêr cơưv cxênhx 2 thị trấn Yên Bình, huyện Yên Bình heik:

“Hâur têx lớp cơưv mak cux tưz cxiv uô trâur nuv “Têx shux xênhz nhiêv thiêz xar uô”, nhoz co chor nhuôs muôx têx phuôx huiz tâu zuk li txux chi tsưr ziv, thiêz uô trơưk li siêz xar heik trâu têx lênhx cưk kriê. Pêz cux tưz yênhx lix têx paz heik kriê txux chi tsưr ziv uô nênhx hâur tsêr cơưv paz max têx nhuôs muôx luz nênhx txov nhêv, paz đơưk tu têx tsi jông trâu shux xênhz. Iz chas co, pêz cux heik têx lênhx cưk kriê ntơưr hâur tsêr cơưv đros moz siêz txos chor nhuôs shux xênhz, chiê têx nhuôv thâuv tưs cux pov muôx cêr shir phaz, lov jêv thâuv tuôx tsêr cơưv, cơưv ntơưr”.

  Iz chas cxiv kho, uô trơưk têx tsưr ziv tưz muôx, tsêr cơưv cxênhx 3 Hoàng Văn Thụ, huyện Lục Yên (Yên Bái) nhiv no tsênhv uô lơưr têx faz tsưr ziv “tsưr tsix kriê cơưv thiêz uô têx nuv zoz zux”; txix ntơư paz chor cưk kriê, têx nhuôs shux xênhz pov hnuz tưs tuôx tsêr cơưv cux zos iz hnuz shir phaz, muôx cêr lov jêv thiêz jông. Ntâu lênhx shux xênhz Yên Bái tưz uô lơưr zuk têx tsưr ziv, siêz xar, txơưx xar tơưv. Phạm Quỳnh Hương, shux xênhz lớp 10A11, tsêr cơưv cxênhx 3 Hoàng Văn Thu, huyện Lục Yên heik:

“Ntơưv tsêr cơưv no, pêz tsi tiêk tâu chor cưk kriê ntơưr sik pheiz kênh têx phiv liv, paz max pêz mak tsênhv tâu hur si lơưr chor niêv lâul, tix lâus cơưv siêz mê njik ntơư paz thiêz. Pêz siz paz, siz hluz hâur cêr cơưv txux thiêz sik heik kriê cêr uô nênhx jông, yênhx lênhx nênhs tsiv txiêx, shux xênhz ciêz, mnôngs luk. Pêz cux muôz jông six hơưv chiê uô têx hâux lưv uô cê, đhâu ntơư muôx cêr sik thôngx siêz, sưv jông đuô, thiêz tâu uô trơưk li zuk têx tsưr ziv, siêz nhiêv”.

Txos nhiv no, tas nro 453 luz tsêr cơưv hâur thax tsav tỉnh Yên Bái tưz xeir tsov uô lơưr têx tsưr ziv huv đros trâu yênhx tsêr cơưv li tsênhv tsênhz. Hâur co, muôx 136 tsêr cơưv đas cir uô hur si têx tsưr ziv “tsêr cơưv sor siêz”. Taz sik, trơưk li zơưv Đào Anh Tuấn, Phưv Giám đốc Sở zoz zux tỉnh Yên Bái, zos thax tsav xuz thơưx hâur tas nro têz qơưk uô lơưr trâur nuv no trâu cấp tỉnh, chênhr viv li, hâur six hơưv fuô uô, ntơưv qơư cux njiz trâul ntâu phiv liv, lar heik zos hâux lưv “Hlôngr yiêz tsưr ziv kriê txux chi” lok sik “cxiv tsa cêr coaz siv sik paz hâur thiêz saz đrâuv tsêr cơưv”…. Chênhr zos li heik co, Sở tưz tso tơưv 5 hâux lưv chiê uô thiêz kaz shông cơưv no zuôr ntâuk grê chiê muôx têx tsưr ziv cxiv kho cov huv đros.

“Cxiv tsa tsêr cơưv sor siêz tsi zos tsênhv njiêz đaz tsi lok six zov chênhr, co zos uô ndar txos 3 tsưr ziv “sik paz-truôx tuk-sik thôngx siêz”. Chiê uô tâu têx li heik co, chor canr bôv, cưk kriê thâuv tưs cux zos têx lênhx uô ntêx nyuôs lok sâuv uô nuv jông, hlôngr yiêz tsưr ziv siêz xar. Txix ntơư tsưr tsix têx hâux lưv kriê txux chi, kriê cêr uô nênhx jông, tsiv txiêx, li muôx cêr shir phaz, truôx tuk, sik thôngx siêz”./.

(Trịnh Xuân-Riê Lâux cxeik, nhênhv)