Cơ sở Đảng thiêz đảng viên uô ntêx nyuôl hâur luôs hâux lưv cxiv tsa nôngx cxênhz yiêz nhoz Yên Bái

Chor xã Phan Thanh- Tân Lập-Tân Lĩnh, huyện Lục Yên, tỉnh Yên Bái zos xã phênhv ntâu uô kôngz lôngk, côngv đros muôx ar têz nxaz, tsôngv box nhoz uô nênhx tsi chêx chôngk, viv li njiz ntâu phêv liv hâur hâux lưv cxiv tsa nôngx cxênhz yiêz, li ploz tsênhr lok phênhv sâu, lok zaoz thôngz muk lok…

          Shông 2021, thâuv huyện, tỉnh muôx chủ trương krêz đar, kho đuô cêr muk lok txuôk xã Phan Thanh đros têx xã Tân Lập thiêz Tân Lĩnh, chiê têx xã no uô tsưr ziv lok zaoz thôngz hâur cxiv tsa nôngx cxênhz yiêz, tsôngv box lênhx tưs cux jông siêz. Chênhr viv li, đrâuv têz qơưk li yưv pênhr, 540 ziv chuôz zis nhoz 3 xã nhoz buôk txox cêr no tưz txưv zênhv muôz zuôr xar 28 cxênhz yiv ndis ar, txiêr 36 cxênhz tsoz ntông cxuô zav, txar yênhx châuv cxênhz nja vax… tsi zuôr pâux nzir tul tsi.

          Zos iz lênhx đảng viên, zơưv Vi Đình Vân nhoz jos Trung Tâm, xã Phan Thanh tưz uô ntêx nyuôk muôz 1 cxênhz ntâu yiv ndis ar nhoz, ar vax chiê krêz đar cêr; zơưv chuôz zis cux zos iz hâur têx ziv chuôz zis đăng cir muôz ar uô ntêx thiêz ntâu ar tiv zix. Zơưv Vi Đình Vân pheiz kênh: “Pêz sik seiz lax tsuv muôz hor ntâu ar mak pêz truôx siêz muôz, viv muôx txox cêr no zuôr paz KTXH tiv phaz huôv tsar đuô”

          Txix tsôngv box li sik côngv siêz, côngv đas jos, txox cêr muk lok trâu têx xã Phan Thanh-Tân Lập- Tân Lĩnh tâu cxiv uô txuôk đros txix cêr 171, đar 7,5 yiv, ntêr 20 ceik cêr, lơưr ploz tsênhr cêr cấp 4 tox siêz tưz tâu uô tiêr lok shông 2023, nzor đuô luôs hâux lưv tso tơưv zuôr xar 1 shông. Zaoz thôngz muk lok jông đuô paz trâu huôv tsar KTXH thiêz uô têx ploz tsênhr txơưr, phênhv paz xã Tân Lĩnh uô tiêr hâux lưv cxiv tsa nôngx cxênhz yiêz; xã Phan Thanh njuôs xav kaz shông no zuôr uô tiêr; yuôr xã Tân Lập luôs hâux lưv tso tơưv zuôr uô cov tiêr hâur shông 2025. Zơưv Vi Văn Phú, Chủ tịch UB xã Phan Thanh, huyện Lục Yên puz pâuz: “Xã xav tênhv txos shông 2025 uô tiêr têx ploz tsênhr cxiv tsa nôngx cxênhz yiêz. Taz sik, nhiv no ntơưv pêz xã tưz muôx txox cêr yiêz, jông muk, no zos đas jos chiê xã thiêz pox nhuôk sir jos kaz shôngk shông 2024 no tax ploz tsênhr nôngx cxênhz yiêz”.

          Đros 20/24 xã tưz tax ploz tsênhr nôngx cxênhz yiêz, huyện Văn Yên sir jos txos tas shông no zuôr uô tiêr hâux lưv cxiv tsa nôngx cxênhz yiêz. Chiê uô tiêr luôs hâux lưv tso tơưv no, Văn Yên xav tênhv cxơưz tiês phongz yaox “2 sik côngv zos: côngv đas jos, côngv tsưr ziv; 5 sik đros uô cê: co zos đros truôx siêz, đros tưr thik, đros xar tơưv, đros txơưx jênhv, đros hlôngr yiêz thiêz iz qơư tsov txos zos cxiv tsa huyện tax nôngx cxênhz yiêz”.

          Chiê phongz yaox uô tâu truôx jông, uô ntêx thâuv krêz uô txos tsôngv box, huyện tưz choz jênhv vưv tsênhz mênhx txos yênhx cấp ủy đảng, tsưr tsix đoanx thêv thiêz đảng viên. Li ntơưv xã Lâm Giang, thâuv uô ntu cêr muk lok jos Ngòi Cài, ntêr 6 cei cêr ntâu, muôx ntu krêz đar 5,5 yiv, têx chi bộ jos tưz muk txos yênhx ziv chuôz zis chiê vênhv tôngv; tsưr tsix khiêz phêv sik seiz lax tsênhz mênhx, tso tơưv nghị quyết lênhs tov uô…viv li pox nhuôk sđ tưz thôngx ziv jông.

          Hâur uô ploz tsênhr lok tênhx qơư, chiê 70 qơư tu zus ntơưv xã taz por vêv xênhz lok thú y, tênhx qơư, têx ziv chuôz zis đảng viên zos têx ziv chuôz zis xuz thơưx uô kror bioga chiê yưr lir tsơưr kiês nênhs, đhâu co krêz uô đêz đar. Đros co zos tsưr tsix trâu têx ziv chuôz zis tu zus cir ntơưr uô. Viv li, 100% qơư tu zus nhoz xã tu zus ntâu puôr lênhx taz por vêv xênhz tênhx qơư trơưk cui tênhv. Zơưv Vũ Văn Hải, Bí thư Đảng ủy xã Lâm Giang, huyện Văn Yên puz pâuz: “Tas nro têx jênhv vưv cấp thênhv siêz krêz uô cux xưk li xã tso tơưv puôr lênhx khav tênhv Chi bộ thiêz đảng viên li pưs txux zos tsênhv, têx đồng chí Bí thư Chi bộ, ban côngz xưv mặt trận jêx jos tsuv zos lênhx nênhs uô uô ntêx. Pêz cux xav tênhv tsênhz mênhx jênhv vưv thiêz qir chiê têx jêx jos uô, tsi chiê muôx yưv qênhx shênhx muôx hâux lưv tsi uô txos viv tsi cxơưz cxiz uô”

          Txix ntâu tsưr ziv uô tâu truôx jông, huv đros tsênhv tsênhz nhoz yênhx tiv phaz, tiv zix zos tsưr tsix cơ sở đảng thiêz đảng viên uô ntêx nyuôl trâu luôs hâux lưv cxiv tsa nôngx cxênhz yiêz, txos nhiv no, tỉnh Yên Bái tưz muôx 106/150 xã tax ploz tsênhr nôngx cxênhz yiêz; hâur co muôx 37 xã tax ploz tsênhr nôngx cxênhz yiêz thênhv siêz, 11 xã uô siv. Tỉnh cux muôx 4/9 taz viv hành chính cấp huyện tâu côngz jênhv uô tiêr thiêz tax ploz tsênhr huyện nôngx cxênhz yiêz, muôx niêv đrôngs Yên Bái, thị xã Nghĩa Lộ, huyện Trấn Yên thiêz Yên Bình; njuôs xav kaz shông no huyện Văn Yên cux zuôr uô tiêr hâux lưv cxiv tsa nôngx cxênhz yiêz./.

                                                       T.Xuân-Txâur Vax cxeik nhênhv

Tsưr ziv xưv lik têx vuôz tsuôz nhựa chiê por vêv tênhv qơư cov hur jông

Têx vuôz tsuôz nhựa lok zos trox ntông uô phiv liv ntâu txos tênhv qơư thiêz lênhx nênhs li đas jos. Chênhr viv li, pêz tsuv muôx tsưr ziv chiê txo grêk tsơưs têx vuôz tsuôz nhựa chiê tsik muôx ntâu têx phiv liv txos đas jos lênhx nênhs thiêz cxuô zav. Taz sik tsuv xưv lik li chak cov huv đros thiêz truôx jông?

Muôz phêiz txix ciês thâuv xuz thơưx chiê tror uô đuô: Chôngz lênhx nênhs tsik so muôz têx vuôz tsuô tso siz shơư uô cê, tsik zos muôz phêiz uô yênh zav vuôz tsuôz uô ntêx thâuv zuôr chox muk por tsês. Viv li, uô phi liv ntâu txos trâu chor nhân viên tênhv qơư li hâux lưv sâu tsês têx vuôz tsuôz nhựa; uô tas ntâu six hơưv chiê phêiz cxuô zav vuôz tsuôz uô ntêx thâuv zuôr xưv lik; uô trâu chor vuôz tsuôz nhựa tsik hur, nhoz shơư đros têx vuôz tsuôz txơưr pov tsik tâu tsuv muôz phâuk lok sik hlơưr por tsês uô phiv liv, tsik hur txos tênhv qơư.

Tror sir zôngv têx chuôz zênhx nhựa: Tror sir zôngv zos tsưr ziv tsênhv tâu lok six ntâu cơ quan tênhv qơư cxơưz cxiz thiêz hêik kriê pêx xênhv tsuv uô. Uô li no zuôr paz txo grêk tsơưs têx vuôz tsuôz nhựa muôz por tsês trâu đrâuv tênhv qơư. Hlôngr trâu zôngv iz jiês chiê muôz por tsês mak sơưr đơưk zuôr sir zôngv tâu têx chuôz zênhx nhựa, hưx nhựa chiê uô têx zav txơưr li: qơư trâu têx chuôz zênhx cơưv ntơưr, têx têik chos pax… Hưx nhựa đhâu thâuv sir zôngv tas zuôr tror sir zôngv tâu chiê trâu đêx, trâu xaz phongx, cuô yuôx nzuôr têik điêr… Taz sik, chor hưx, têik trâu têx zav yuôx hóa chất, yuôx tuô đrox… mak tsik tâu tror sir zôngv nzir. Hâux lưv tror sir zôngv nzir hêik sâur zôngx ziv uô thiêz zuôr uô tâu ciês ntơưv tsêr.

Hlôngr têx hnaz tax txix têx hnaz ntơưr, hnaz ntâu sir zôngv tâu ntâu jiês: Zôngv hnaz tax chiê ntiv cxuô zav, ntiv têx zav nox tưz yênhx pêx xênhv li kror uô sưv txix ntêr lok. Hnaz tax tâu uô txix têx zav nhựa zuôr tror zôngv uô tâu lưv zav. Chor nênhs khoa học, tênhv qơư puôr lênhx hêik tiêk chiê chor hnaz tax no lưx mak tsuv tas muôx 500 txos 1000 shông zos tsik trâus yar ntux cuz jiêz txos. Zos nhiêv txos tênhv qơư hur jông mak tsuv tsik zôngv ntâu têx hnaz tax. Tsuv sir zôngv têx zav hnaz hlôngr trâu chor hnaz tax li: Hnaz ntơưr, hnaz ntâuz sir zôngv tâu ntâu jiês, chor hnaz uô txix têx hluô hnaz tax sir zôngv tâu ntâu jiês, chor hnaz tax zôngx ziv lưx.

Txo grêk tsơưs têx vuôz tsuôz nhựa txix chor ziv chuôz zis: Tsuv tso tsês cor cav sir zôngv têx chuôz zênhx nhựa hâur tsêr mor thiêz hlôngr trâu sir zôngv têx zav chuôz zênhx sưv đros trâu tênhv qơư txơưr đuô. Co zos zuôr têx têik ntiv têx zav nox tsik zos nhựa zuôr tror sir zôngv tâu ntâu jiês li thủy tinh, inox; muôz têx vuôz tsuôz por tsês ntơưv têx qơư cui tênhv, tsik muôz por tsês trâu cxiê qơư, tiv zix zos têx vuôz tsuôz nhựa viv tsuv tas muôx yênhx cxênhz shông chor vuôz tsuôz no thiêx li lưx. Thiêz tsuv muôz phêiz ciês tsik chiê cxuô zav vuôz tsuôz uô cê.

Tsik sir zôngv têx zav nox sêi, zav nox, hâuk sir zôngv têx têik trâu zos nhựa sir zôngv iz jiês: Nhiv no, sir zôngv têx zav nox sêi paz muôx ntâu kror zôngx ziv tiv muôx têx têik trâu zos nhựa sir zôngv iz jiês li têik, điêr, fax nhựa, hnaz tax mak sơưr đơưk zuôr zuôr tâu ntơưv têx qơư muôs hax huv, qơư muôs đêx hâuk, têx qơư uô jâuz mor nox đros gri lok six kik. Yênhx cxênhz têik trâu đêx hâuk nhựa tâu muôs yênhx hnuz cux zos bâuv li co luz têik nhựa thiêz hnaz tax tâu muôz por tsês trâu đrâuv tênhv qơư. Viv li, tsuv tso tsês jux juk têx cor cav no.

Cxuô lênhx nênhs tsuv sik côngv têk đros chinhr quyền, cxuô cấp, cxuô nganhx, thax tsav qơư phax tar tsik hur txix têx vuôz tsuôz nhựa chiê por vêv jông trâu luz nênhx./.

Bích Thủy BS-Lik Thox cxêik nhênhv-Lưu,in đĩa