Lào Cai seiz lax tsưr ziv kho đuô ju lix đhâu coz nas chuô Yagi uô ruôr hiêv

          Đhâu thôngz sâu, coz nas chuô Yagi tưz uô đêx nas ngaz, uô zênhr shar hnhar txos tas nro tỉnh Lào Cai, xav nhiêx zuôr xar tas 6 cxênhz tỷ đeiv; txix ntơư tưz uô tuôr thênhv tsik zos tsơưs txos ngênhx ju lix nhoz tsênhv qơư.

          Hâur ntu đhâu, kruô tuôx ndis seiz txos Lào Cai txu grês 70-80%, phênhv ntâu zos tiv têx xor mông muôx lênhx coaz txos taz por cheix ntux nas thiêz zaoz thôngz muk lok. Lơưr zơưv Nguyễn Quốc Huy, Giám đốc Sở zaoz thongz vênhv teiv tỉnh Lào Cai, txos nhiv no, phênhv ntâu têx cêr zaoz thôngz tưz tâu hôx phưx thiêz muk txos ciês têx xã, sir jos hâur hli 10 zuôr zôngx ziv muk lok sâuv têx niêv cêr lox, cêr muk lok têx tỉnh, têx xã. Hâur ntu khưx phưx, thix ziv nganhx ju lix sik côngv jông chiê thôngz xor mông sei txos tsôngv box:“Sâuv têx cêr muk lok pêz thôngz pov lơưr thax tsav qơư li cêr muk lok têx tỉnh, niêv cêr lox, cêr muk trâu huyện, xã, thix ziv nganhx ju lix cxaz nzir bê têx thax tsav qơư, qơư ju lix muôx lênhx coaz, đhâu co heik kriê sâuv têx xor mông ju lix chiê tas nro cxuô lênhx nênhs sik đros pâuz”

          Hlôngr njêx muôk têx nganhx muôx lênhx coaz cux cxaz chuôz ntâu ziv chênhv sik seiz lax tsưr ziv hôx phưx nganhx công nghiệp tsi uô kiês nênhs tênhx qơư, li hôx phưx têx jiês muk yêz cêr hlâu ju lix; tsưr ziv huôv tsar ju lix côngv thôngx trâu thax tsav qơư tsôngv box txar nhoz qơư yiêz; cxiv tsa bảo tàng heik lok coz nas chuô Yagi; chính sách paz txưv, car chêx têx phêv liv trâu doanh nghiệp; tsaz yênhx txu grês grê cxơưz cxiz ju lix đhâu jiês ntux nas; vênhv thix thôngz xor mông, heik kriê.

          Pos Zax Thị Dung, Phưv chủ tịch UB tỉnh Lào Cai thix ziv têx nganhx, tiv phaz tsuv chêx chôngk jông, ciêr chênhr hôx phưx nganhx kinh têr tsênhv hâur tỉnh, sir jos txos tas shông tos cxaz 2 tsov jiês kruô thiêz chiê tax tâu tsưr ziv tso tơưv zos 8,5 tsov jiês kruô hâur shông no:“Hâur ntu ntux nas, têx huôx tôngv puôr lênhx tso tsês. Taz sik thâuv khưx phưx tas pêz tsuv tsưr tsix đuô têx huôx tôngv, kruô ju lix tuôx tsuv pâuz lơưr xar ndis seiz tul tsi. Thix ziv nganhx ju lix chuv tôngv chiê tsưr tsix têx huôx tôngv cxơưz cxiz thiêz huôx tôngv ju lix ntơưv têx tiv phaz chiê zaz zâuv tsôngv kruô tuôx ndis seiz”.

          Njuôs xav, hâur shông 2025, Lào Cai zuôr kriz uô iz cxiê hâux lưv ju lix nto bê li Festinval niêv đêx Liêz, ntênhs phêv pax ntâuz, ntênhs phêv cheix ntux lax Bát Xát, giải tưr thik cheix yêz tuôv, giải đhiê đhâu trôngz, cxơưz cxiz ju lix đros Trung Quốc, Hàn Quốc…./.

                                                                                                                 An Kiên-Txâur Vax cxeik nhênhv

Tuôr truôx pêz Hmôngz têx txux chi kênhx nhoz thax tsav tox siêz Tuôv Chuôx

Tâu xênhv Yênhx chor cưk tsiv uô kênhx, nhoz jos 4, xã Sính Phình, huyện Tủa Chùa, tỉnh Điện Biên, cxiv tsa tâu 10 ntâu shông lok no. Iz chas cơưv shâuv đhiê kênhx nthuôr uô cêr lov jêv, chor cưk kênhx co cux tsênhv kriê txux chi kênhx trâu chor hluôk cơưv shâuv. Tâu xênhv Yênhx zos iz lênhx cưk tsiv uô kênhx shir phaz lul hêik pâuz: “Nhoz luz jos no, 100%, txơưv lênhx tưs cux pâuz kênhx, viv txux chi kênhx muôx liv trâu pêz Hmôngz luz nênhx. Shông 2019, pêz tưz kriz iz lớp kriê txux chi kênhx, muôx 10 lênhx cơưv, shông 2018, cux kriê iz lớp muôx 10 lênhx hluôk cơưv”

Zơưv Câu x Shôngx thiêz ntâu lênhx lâuk nhoz jos Har Đêx Dê, xã Sính Phình, cux shir phaz lul hâur luz chêix khưr sâu kôngz lôngk tas, sđ siz chos tsiv uô kênhx. Tâu zơưv Câu yax kriê, iz lênhx uô iz zav, đhâu co muôz chor ntir kênhx chox lok đhok uô cê trâu luz tâuz kênhx thiêx tsiv uô tâu tiêr iz traz kênhx. Cê tsiv uô kênhx, cê yuôz siv kênhx, kho cov cxuô tus ntir kênhx suôz đror jông huv đros: “Cur pâuz tsiv uô kênhx, cur thiêx kriê trâu cxuô lênhx sđ siz chos cơưv shauv cov pâuz pêz Hmôngz têx txux chi kênhx cov muôx đros đrêiv hâur luz nênhx. Tov kaz zuk lâuk, tsik muôx đas jos, kror muôs tsik pov cêr, zuk zuôr kriê tsik tâu txux chi kênhx trâu chor hluôk sđ”

Zơưv Hùng x Vưx, phưv Chủ tịch UB huyện Tủa Chùa, tỉnh Điện Biên cux hêik pâuz tiêk: Shông 2022, pêz Hmôngz luôs hâux lưv tsiv uô kênhx thiêz têx txux chi yuôz kênhx, đhiê kênhx hâur thax tsav tỉnh Điện Biên tưz tâu sâu tsês trâu têz qơưs ntâuz ntơưr, zos iz zav txux chi, vênhx huôv jông hâur têz qơưs. Chênhr zos li hêik ntơư, hâur ntu nhiv no nhoz cxuô tsênhv qơư tưz tso tơưv cxuô faz tsưr ziv, cxươz cxiz tsiv uô thiêz tuôr tsês pêz Hmôngz têx txux chi kênhx cov muôx đros đrêiv hâur luz nênhx tsik chiê pôngz plox: “UB huyện cux kriz hội tưr yuôz kênhx, đhiê kênhx thiêz co zos qơư chiê sđ sik phêiz kênh txux chi kênhx, nthuôr uô cêr lov jêv. Co zos iz luôs hâux lưv uô muôx liv chiê cxuô lênhx cưk kênhx tâu siz njiz, siz chuôs. Hâur ciêz vênhx huôv-ndis uô si, sêiz shuôk têz qơưs, zuôr tâu kriz uô trâu hâur hli 10 zuôr txos thiêz huyện cux zuôr kriz tưr yuôz kênhx, đhiê txux chi kênhx chiê hêik kriê pêz Hmôngz têx txux chi kênhx trâu tsôngv kruô ndis shuôk têz qơưs pâuz txos. Thiêz tsênhv zuôr kriz lớp kriê têx txux chi kênhx trâu chor hluôk sđ, viv co zos pêz Hmôngz nhoz Tủa Chuôx iz zav txux chi, vênhx huôv jông cxôngx nzor”

Đhâu ntâu tiêv lok no, kênhx Hmôngz tâu xav zos iz zav txux chi, vênhx huôv tsiv grê muôx đros đrêiv hâur luz nênhx. Chênhr zos li hêik ntơư, đhâu ntâu tiêv hâur cxuô ntu, pêz hêir nênhs Hmôngz nhoz cxuô qơư hâur hur si têz qơưs thiêx tsênhv huôv tsar-tuôr tâu tsês têx txux chi kênhx muôx đros đrêiv hâur luz nênhx tsik chiê pôngz plox./.

                                                                                          Tsu cxêik nhênhv-Vũ Lợi, CQTT Tây Bắc