Ju lix côngv thôngx paz muôx cêr huôv tsar uô nox truôx tul trâu tsôngv box mênhx cxưx tsơưs nênhs

         Jos Lao Chải, xã Khun Há, huyện Tam Đường zos qơư muôx 100% tsôngv box Hmôngz nhoz uô nênhx. Muôx trôngz jôngr chiv xênhz jông jav, qiv hơưv lax khiêv, chính quyênx tiv phaz tưz chox kriê pox nhuôk kho đuô tsêr nhoz, chos pax địa lan, uô cêr bê tông, tsêr so homestay, tuôr tsês vênhx huôv chax chês jông chiê cxiv tsa jos yênhx jos ju lix côngv thôngx. Txix iz jos pluôk thâuv ntêx, nhiv no jos Lao Chải tưz hlôngr yiêz jông, shông tưs cux tos 13 cxênhz ntâu jiês kruô tuôx ndis shuôk uô si.

          Tix lâuk Cứ A Ly, ziv chuôz zis uô ju lix côngv thôngx hâur jos Lao Chải pheiz kênh, jos tâu côngz jênhv zos ju lix OCOP jông hâur tỉnh. Nhiv no hâur jos muôx 7 ziv chuôz zis uô jix vuv Homestay. Txix thâuv huôv tsar ju lix côngv thôngx, têx ziv chuôz zis hâur jos li phênvh sâu ziv hnuz ziv hlôngr yiêz jông, tsi khưr li thâuv ntêx thiêz. Li tix lâuk li jix vuv homestay nhiv no muôx 5 qơư so, côngv đros jix vuv nox hâuk, iz shông tso lok phênhv sâu 150 tsov đeiv ntâu.

          “Cur chuôz zis tưz qir kho đuô tsêr nhoz thiêz qir tos kruô tuôx so txix shông 2021. Txos nhiv no cur chuôz zis thâuv tưs cux nsar txos têx jix vuv phưx vưv jông tiv zix trâu tsôngv kruô li nox hâuk, so. Đrâuv co cur chuôz zis cux piêr kriê têx cưr lok, tsôngs yo mênhx cxưx Hmôngz jông, chiê cungz trâu tsôngv kruô thâuv lơưr muôx zoz qơưx”

          Nhoz siêz 1 cxênhz 500 yiv pir đros ntus đêx hiêr, jos Sì Thâu Chải, xã Hồ Thầu, huyện Tam Đường, tỉnh Lai Châu muôx qiv hơưv lax khiêv, trôngz jôngr chiv xênhz jông jav. No zos qơư jông chiê tsôngv kruô tuôx ndis seiz uô si, tuôx nriêr pâuz tsôngv box Cho li têx vênhx huôv chax chês jông. Nhiv no jos muôx 15 ziv chuôz zis uô homestay thiêz tos txix 300 txos 400 kruô ndis shuôk uô si nox so ntơưv no.

          Zơưv Lù A Nghi, Tsar jos Sì Thâu Chải puz pâuz, khov muôx trôngz jôngr chiv xênhz jông jav, pox nhuôk yax six cơưv shâuv, muôz siêz tsơưr lươngv têx jix vuv phưx vưv kruô nox hâuk, nzuôr chêr txix đêx yuôx...5 shông tror lok no, chungz fênhx iz shông jos tos muôx nhos 10 cxênhz jiês kruô. Kruô nhoz so ziv hnuz ziv chôngz, tưz gôngr phênhv muôz siêz phênhv sâu trâu tsôngv box hâur jos, đros phênhv sâu txix 2-3 châuv tsov đeiv ndê txos 100 tsov đeiv iz shông.

          “Cheix kruô ju lix muk ndis shuôk uô si chôngz khênhr zos kaz shông thiêz nox tsiêz tas, viv li pêz yax six krêz uô vêv xênhz jêx jos, chos pax chos ntông jông jav. Đros têx chuôz zis uô qơư nhoz so, pêz cux heik lơưr kho đuô tsêr nhoz, cơ sở cxuô zav chiê tos kruô txix jix vuv nox hâuk, nzuôr chêr đêx yuôx...”

          Tsi taz muôx trôngz jôngr chiv xênhz jông jav, Lai Châu tsênhv zos qơư têx mênhx cxưx tsơưs nênhs nhoz uô nênhx, đros muôx cêr vênhx huôv jông. Hâur tas nro 20 mênhx cxưx sik đros nhoz uô nênhx sâuv thax tsav, mênhx cxưx Thái thiêz Môngz tsav phênhv ntâu, hâur co muôx 5 mênhx cxưx lok six tsơưs nênhs zos Lự, Cống, La Hủ thiêz Si La. Đros qiv hơưv lax khiêv yênhx shông, Lai Châu zos qơư jông chiê huôv tsar ju lix côngv thôngx reik đros nhoz so uô si. Txos nhiv no tiv phaz muôx 13 jêx jos tâu côngz jênhv zos qơư ju lix côngv thôngx cấp tỉnh. Têx vênhx huôv jông tâu têx cấp, têx nganhx, tsôngv box tsov cưv tuôr tsês thiêz chox lok têx tsiv grê lox hâur luz nênhx côngv thôngx.

          Zơưv Trần Mạnh HÙng, Giám đốc Sở vênhx huôv, thiv thao thiêz ju lix Lai Châu puz pâuz, shông 2024, tiv phaz tưz tos zuôr xar 1,4 tsov jiês kruô, phênhv sâu chuôz ndê zuôr xar 40% pir đros shông 2023; hâur co kruô ndis seiz, nriêr pâuz ju lix vênhx huôv côngv thôngx tsav 50% ntâu. BCH Đảng bộ tỉnh li Nghị quyết 04 lok tuôr tsês, phuôx huiz têx mênhx cxưx li vênhx huôv chax chês jông, reik đros huôv tsar ju lix ntu 2021-2025 ndar txos shông 2030 tưz paz thiêz chuôz cxaz đas jos trâu nganhx ju lix tiv phaz.

          “Hâur ntu zuôr txos tỉnh zuôr tsov cưv uô jông côngz xưv yax mông, vênhv tôngv tsôngv box cxaz chuôz đros chính quyênx chiê cxiv tsa, phuôx huiz têx tsiv grê ju lix côngv thôngx nhoz tiv phaz. Txix co tỉnh zuôr chuôz tsar, huoz tôngv têx pênhr jos chiê yưv pênhr cxiv uô cơ sở cxuô zav. Tiv zix zos tỉnh zuôr paz tsôngv box thox cxov, kriê cxaz trâu têx lênhx nênhs uô ju lix ntơưv têx qơư ju lix côngv thôngx”.

          (Khắc Kiên-Txâur Vax cxeik nhênhv)