Hêir nênhs Poz Ziz đơưz Phù Yên Yên, Sơn La  shir phaz, lov jêv lul ntênhs hôiv Tsiêz 14/7

Trơưk li chor lâul iz txưv heik kriê tsês, thâuv ntêx, txos hnuz 14 luz 7 hli ntux, đhâu thâuv uô têx liêx têz kôngz tas, chor lâul nhoz hâur tsêr uô chei đaz kruôs, tuô keiz ok, krưr nduôr blâuv thiêz bax têx trôngx jâuz mor kaz chiê hu tsôngv niêv txir cưr tix nênhx tsa sơưr đơưk tuôx đros nox, côngv lov jêv, taz sik thâuv co têx nhuôs zâu ho tsuv muk seiz nhux tưv nox jâuz pêv têx har jâuz. Tsi tâu đros chor lâul nox tsiêz lov jêv, têx nhuôs zâu tưz muôz chor mê nhuôv nhux tưv kror ndâux par đros tsưr ziv xar: Lênhx nênhs tsi tâu nox, têx mê nhuôv nhux tưv cux tsi tâu nox.

Txix co, seiz pov tsi moz siêz, tsi yuô huv têx nhuôs zâu, chor lâul tưz khur xiv thiêz thôngx ziv xeir hnuz 14 luz 7 hli ntux niêx shông cê chiê nox kaz hâuk luôs đhâu iz shông sir jos khưr uô tâu kôngz lôngk, cê chiê uô tsiêz nox phôngv côngz đas jos, txoz cxơưx trâu nhuôs zâu. Txix co, Tsiêz hnuz 14 luz 7 hli ntux tsênhv tâu hu zos Tsiêz nhuôs zâu, yênhx iz txux chi vênhx huôv cêr nênhx phôngz cxưx jông tâu cxuô cxênhx fâuv nênhs Poz Ziz đơưz nhoz Phù Yên, Sơn La tuôr tsês thiêz nthuôr uô đreiv tsi chiê pôngz plox tax txos nhiv no.

Tsiêz hnuz 14 luz 7 hli ntux shông no tâu xã Phù Yên nthuôr uô nzor đuô 4 hnuz pir li cxiê shông. Xuz thơưx zos têx txux chi cxênhx cxênhv đaz kruôs. Têx trôngx jâuz mor tâu bax uô muôx cxix cxuô zav, đros trâu têx zav nox kaz muôx hâur thax tsav qơư thiêz đuôz shav chor nhuôs zâu seiz tưv tror tâu cxiv uô đuô hâur hnuz tsiêz 14 luz 7 hli ntux.

Đhâu hlo têx cxênhx cxênhv chei đaz kruôs txi côngv, cux fuô uô iz cxiê têx txux chi uô tsâus txos nhux tưv tưz đros pêx xênhv sir jos khưr uô kôngz thiêz xa tsưr ziv siêz xar cov iz shông têx kôngz hloz lox jông, sâu tâu nju, txâuk nox txâuk hnar, muôx luz nênhx tsâu sor, truôx tuk, iz chas ntơư cux zos six hơưv chiê côngv thôngx moz siêz txos têx nhuôs zâu. Pos Cầm thị Liên, nhoz jok Chiềng, xã Phù Yên, tỉnh Sơn La heik pâuz: “Jông siêz tâu đros côngv cêr lov jêv, tâu đros nox nênhs Poz Ziz đơưz xã Phù Yên têx zav nox kaz hnuz Tsiêz 14 luz 7 hli ntux. Ndax ntênhs cêr lov jêv no cur cux xar nthuôr, piêr kriê têx txux chi vênhx huôv jông ntơư  trâu cxuô xã nhoz jê iz ndis cux li tsôngv kruô 2 chas thax tsav pâuz txos pêz jok Chiềng cux li xã Phù Yên txux chi vênhx huôv jông”.

       Zos têx cxênhx cxênhv chei txi côngv tâu bax uô jông, mak phênhv cêr lov jêv cux muôx ntâu zav txux chi vênhx huôv tâu nthuôr uô trâu sơưr đơưk seiz thiêz đros côngv uô si lov jêv. Têx suôz cưr cxiêx, suôz gâux đros trâu sênhr chêr đhiê pax vuôk, ntâuk đruôl, ntâuk trax....cux hu zâuv chôngz lênhx ntâu tus pêx xênhv thiêz tsôngv kruô đros sik thôngx siêz, côngv uô lov jêv.

Iz chas ntơư, pêx xênhv thiêz tsôngv kruô tsênhv tâu ndis seiz têx qơư piêr kriê, muôs hax huv OCOP, tơưz êv, vaz, lêr, kôngz nuv ntơưv qơư thiêz tâu đros krưr, nox siv nênhs Poz Ziz đơưz têx nduôr blêx. Têx li heik sâuv cux muôx jông qơư trâu trâu sơưr đơưk cxeik đuôz uô si, paz muôx nzir ntâu zav txux chi vênhx huôv, qơư trâu pêx xênhv thiêz tsôngv kruô ndis uô si thâuv tuôx txos Phù Yên. Niêv lâul Nguyễn Thị Sen, Chủ tịch hội đôngx quản trị HTX Sen Hồng Hưng Thịnh, xã Phù Yên, tỉnh Sơn La heik: “Hnuz no tuôx đros côngv cêr lov jêv hnuz tsiêz 14 luz 7 hli ntux, pêz gra iz cxiê zav hax huv kaz thiêz jông hâur Phù yên tuôx piêr kriê, muôs trâu tsôngv kruô, lar heik zos pêz gra chor cxur kaz Xéng Cù tâu côngk nhav zos cxur kaz hur jông tâu chos hâur đras liêx Mường Tấc, Phù Yên tuôx, lok six xar cov tsôngv niêv txir cưr tix nênhx tsa sơưr đơưk đros paz pêz HTX zuôr muk nox siv”.

Tsiêz hnuz 14 luz 7 hli ntux shông no iz hâur têx txux chi jông zos 9 paz sik tưr uô têx zav nox kaz. Têx paz sik tưr co nhiêk gra nhiêk têx zav nox kaz tsiv uô li chor lâul thâuv ntêx iz txưv uô nox ntơư tuôx siz tưr txux chi. Tsi tiêk siz tưr têx txux chi uô nox, lơưr tsênhv piêr kriê, heik pâuz tsênhz yênhx zav nox  tâu uô thiêz muôx grik jông li chas uô trâu ziv muôx cêr lov jêv, chôngz lênhx ntâu tus canr bôv, pêx xênhv thiêz tsôngv kruô kruôs nxiês. Zơưv Phan Ngọc Linh, Chủ tịch Ủy ban xã Phù yên, tỉnh Sơn La heik pâuz: “Xã Phù Yên tsưr tsix ntênhs tsiêz hnuz 14 luz 7 hli ntux chiê gra cêr lov jêv, shir phaz trâu canr, đảng viên thiêz tsôngv pêx xênhv, por hưv tsês tsôngv box heir nênhs Poz Ziz nhoz thax tsav qơư no txux chi vênhx huôv tsi chiê pôngz plox. Hâur ntu zuôr txos, xã Phù Yên zuôr tror nthuôr uô têx txux chi vênhx huôv li: Ntênhs hôiv tsiêz hnuz 14 luz 7 hli ntux, txux chi nox mor blêx yiêz.... Thôngz đhâu têx txux chi , hâux lưv co chiê piêr kriê cxuô heir nênhs li txux chi vênhx huôv jông trâu chôngz lênhx ntâu tus pâuz txos”./.

CTVVOVTB-Riê Lâux cxeik, nhênhv

Nghị quyết 16-cxơưz huôv tsar qơư ndis uô si, sêiz shuôk têz qơưs Điện Biên

Qơư ndis uô si, sêiz shuôk têz qơưs Điện Biên hâur ntâu shông đhâu tưz muôx ntâu hlôngr yiêz. Txơưv li co, hur si cxuô qơư ndis uô si tsik tâu kriz uô đar, viv muôx tsơưs têx tsưr tsix, lênhx nênhs siêz jông muôz pênhr nhiêx cxiv uô, cxơưz cxiz tsik tâu chôngz lênhx kruô tuôx ndis shuôk. Muôx yưv têx phiv liv hêik co, Hội đôngx tỉnh tưz tso tơưv tsênhv chêi muôz pênhr nhiêx paz cxiv uô cxuô qơư ndis uô si, cov ziv hnuz ziv cxơưz cxiz tâu chôngz lênhx kruô tuôx ndis shuôk. Zơưv Lò Văn Muôn, Tsar jos ndis uô si côngv thôngx Phiêng Lơi, phường Điện Biên Phủ, tỉnh Điện Biên shir phaz lul hêik pâuz: “Phiêng Lơi zos qơư ndis uô si côngv thôngx, taz sik chor kruô tuôx ndis shuô tsênhv tsơưs. Nhiv no, tâu tỉnh muôz pênhr nhiêx paz cxiv uô cxuô qơư ndis uô si, tsôngv px hâur jos zuôr sir jos đros tsưx phưv truox tênhx qơư cov huv đros tsôngv kruô siêz nhiêv. Yax kriê cxuô chuôz zis kho đuô vax tsêr, zuôr nzir chuôz zav chuôz zênhx sir zôngv hâur chuôz zis cov jông jav huv đros tsôngv kruô siêz nhiêv. Đros co, tsuv tsiv uô cxuô zav hax huv muôs trâu tsôngv kruô ndis shuôk têz qơưs”

Trơưk li Nghị quyết 16, cxuô zav cux tâu têz qơưs muôz pênhr nhiêx paz, co zos: Huôv tsar, cxiv uô cxuô qơư ndis uô si côngv thôngx; cxiv uô vax tsêr hâur thax tsav qơư ndis shuôk têz qơưs; yêz thâux xa kruô muk lok trâu cxuô thax tsav qơư ndis uô si; hêik kriê têx muôx jông ntơưv qơư trâu tsôngv kruô pâuz; Huôv tsar uô nox txix cxuô qơư ndis uô si; qơư tsiv uô cxuô zav nox thiêz tsêr tok kruô tuôx nhoz so muk lok ndis uô si hâur thax tsav. Chor tâu paz phênhv nhiêx co zos cxuô tsưr tsix, lênhx nênhs sêiz car qơư ndis uô si, sêiz shuôk têz qơưs côngv thôngx, tâu cơ quan têz qơưs côngk nhav. Cxuô doanh nghiệp, HTX, ziv chuôz zis, chor kriz nthuôr uô cêr lov jêv, lênhx nênhs cxiv uô qơư ndis uô si tsuv uô trơưk tỉnh luôs hâux lưv tso tơưv. Trơưk li pos Nguyễn Thị Hiên–zos iz chuôz zis cxiv uô tsêr tok kruô A Thía nhoz phường Mường Thanh, Hội đôngx tỉnh Nghị quyết 16 zos ntu paz trâu sđ car xar, car uô cxiv uô cxuô qơư ndis uô si. Pos Hiên shir phaz lul hêik pâuz: “Zos tâu têz qơưs paz nhiêx, cur zuôr muoz chor nhiêx têz qơưs paz co kriz đar cxuô qơư ndis uô si, cxiv uô tsêr tok kruô, qơư muôs cxuô zav nox hâuk. Thiêz pêz cux xar kho đuô cxuô qơư ndis uô si cov ziv hnuz ziv jông jav, huv đros tsôngv kruô siêz nhiêv”.

Nghị quyết 16, hnuz 29/6/2026 hội đôngx tỉnh Điện Biên cux cui tênhv tsênhz mênhx phênhv nhiêx muôz paz: Co zos paz cxiv uô yiêz tsêr tok kruô ntơưv jos ndis uô si côngv thôngx zos 150 triệu iz luz tsêr tok kruô; paz cxiv uô tsêr tsês cxuô zav chuôz zênhx, hax huv muôx ntơưv qơư chiê tsôngv kruô tuôx sêiz shuôk zos 200 cxênhz đêiv iz luz tsêr hâur iz luz jos ndis uô si côngv thôngx. Zos chuôz zis, lênhx nênhs tưs zuôr yêz thâux xa kruô ndis uô si tâu têz qơưs paz 100 triệu chiê zuôr iz luz yêz ô tô tênhv.

Zơưv Trần Văn Tuấn, Phó Bí thư Đảng ủy, Chủ tịch UB xã Mường Phăng, tỉnh Điện Biên hêik pâuz: “Txix têx pênhr nhiêx muôz paz no, xã tưz sêiz car, qênhz yuôx tso tơưv cxuô luôs hâux lưv uô cov huv đros paz trâu px cxiv uô cxuô qơư ndis uô si côngv thôngx, cxơưz cxiz tâu chôngz lênhx kruô tuôx sêiz shuôk”

Chiê têx pênhr nhiêx co tâu chox lok huôv tsar uô huv đros hâur luz nênhx, Sở vênhx huôv tỉnh Điện Biên tsênhv taz tov yax kriê cxuô tsưr tsix, lênhx nênhs, chor chuôz zis tâu têz qơưs muôz phênhv nhiêx paz hêik sâu chox lok cxiv uô cxuô zav cov huv đros. Sở cux cir ntâuz ntơưr đros cxuô tsưr tsix, lênhx nênhs, chuôz zis chiê nzor tâu têz qơưs muôz phênhv nhiêx hêik sâu paz cov zos đrêiv Hội đôngx tỉnh Nghị quyết 16./.

                                     Tsu cxêik nhênhv-Thu Thùy