Quảng Ninh: Huôv tsar cxiv luôs zoz thôngz thax tsav nhoz đêz, tox siêz

2 hli ntâu lok no, pêx xênhv nhoz jê txox cêr lox 342 đhâu chor xar Thanh Lâm, Đạp Thanh, huyện tox siêz Ba Chẽ (Quảng Ninh) tưz sưv đros têx suôz mêir txiêr bê tông, yêz lox thâux ar, poz jêz muk lok chiê kho đuô têx cêr. Niêv tix Trần Thị Đoàn, xar Thanh Lâm puz pâuz: nhoz kuôk thị trấn Ba Chẽ tsik tâu muôx 30 cêik cêr taz sik thâuv tưs muôx hâux lưv tuôx muk huyện, niêv tix tsuv tuôx muk tas muôx 1 six 30 phênhz chêix yêz mêir thiêx txos. Chinhr viv li, pêx xênhv nhoz no lok six vav tok txos hnuz kho đuô, kriz đar txox cêr 342 no tâu uô tiêr: “Tuôx cơưv pêx xênhv thiêz tâu pêx xênhv thôngx ziv cir jênhv kriz uô, kho đuô cêr. Pêx xênhv txêik jênhv tas cxix cxuô chor nhiêx pâux nzir thiêz pâuz tiêk uô cêr zos kror jông đuô trâu pêx xênhv, jông trâu ntu nênhx tov ntêx no viv muôx tâu cêr muk lok zôngx ziv đuô”.

Dự án kho đuô txox cêr 342 ntêr muôx 60 ntâu cêik cêr txuôk thành phố Hạ Long muk đhâu huyện Ba Chẽ txos buôs ti trâu huyện Đình Lập, tỉnh Lạng Sơn. Ciês ntu đhâu huyện Ba Chẽ zos 20 ntâu cêik cêr, tâu kho đuô thiêz uô yiêz đros muôx ntâu ntu tâu kriz đar, uô cov ndax thiêz tsik yuô ndê tox; cêr đar muôx 9 thiêr… Thâuv uô tiêr, ntu cêr yiêz zuôr paz txo grêk tsơưs six hơưv muk lok txix Quảng Ninh thiêz Lạng Sơn tâu txo grêk tsơưs muôx 50 cêik cêr pir li txos cêr 4B nhiv no. Zơưv Trần Văn Chiều, Phưv Chủ tịch xar Đạp Thanh puz pâuz xar muôx 80 ziv chuôz zis trâus phiv liv txos uô dự án tưz thôngx ziv choz zok ar chiê taz viv kriz uô ntu cêr no: “Nhiv no cêr lok six zâu thiêz nkâuk lêv, ndê tox thiêz trâus đêx ngaz cuôr thâuv txos chêix ntux nas chuô, muk lok lok six phiv liv. Ntu cêr yiêz zuôr tâu kho đuô têx ntu muôx đêx ngaz cuôr, khưx phưx têx ntu cêr phiv liv thiêz muk đhâu têx qơư pêx xênhv nhoz chiê huv đros đuô thiêz tâu kriz đar đuô, txo grêk têx ntu ndê tox hênhr, nkâuk lêv ntâu chiê paz njiêz pov tâu đêz thiêz muk lok zôngx ziv đuô”.

Txos trâu six hơưv no, dự án txox cêr 342 tsênhv nhoz trâu ntu kriz uô thoz huk plas cêr, uô têx kror tso đêx thiêz qênhz shuôk, bax kriz uô têx qox Thác Dạ, Thác Chạ, Khe Lũ, Khe Lào…Zơưv Trần Việt Phương, Phưv Giám đốc Ban sêiz car dự án yưv pênhr cxiv tsa chor côngz trinhx Kôngz nuv thiêz Huôv tsar jêx jok tox siêz tỉnh Quảng Ninh, puz pâuz: “Dự án tâu njuôk xav kriz uô hâur 300 hnuz taz sik pêz zuôr sir jos uô cov tiêr tâu nzor tiv zix. Nhoz no mak khov trâu ntux yar ntux nas lok six ntâu viv ntu cêr muk lok đêz. Cêr bluô thiêz muôx tox trôngz siêz ntâu zos ntux lok nas mak tsuv so uô tsik tâu. Pêz tsênhv tsêx trung kriz uô ntu xuz thơưx, zos ntu phiv liv lax uô tiv zix, viv li tsuv kriz uô nzor chiê tsik njiz trâus phiv liv thâuv muôx ntux lok nas trâu hli 5 zuôr txos”.

Hâux lưv kho đuô, kriz đar txox cêr 342, paz muk lok tâu zôngx ziv đuô nhoz Quảng Ninh đros Lạng Sơn, Bắc Giang zos kror hêik tơưv sir jos uô tsưr ziv kriz uô zoz thôngz uô ntêx tâu Quảng Ninh kriz uô hâur ntâu shông ntơưv têx thax tsav qơư txov nhêv, thax tsav nhoz đêz, tox siêz chiê kriz uô tâu truôx jông chor Tsaz yênhx tsưr ziv têz qơưk, tưz tsik zos trâu tỉnh Quảng Ninh xưz mak tsênhv lok six muôx tsiv gri trâu têx tỉnh nhoz iz buôs ndis thiêz.

No zos kror paz trâu Quảng Ninh njuôk xav kriz uô têx qơư huôv tsar yiêz trâu thax tsav tox siêz đros tsưr ziv  siêz tiv zix zos huôv tsar kinh têr, paz zôngx ziv chiê pêx xênhv nhoz tox siêz, tsôngv box mênhx cxưx tsơưs nênhs tâu buôs ti, tâu sơưv têx kror yiêz jông lok y têr, zoz zux thiêz gra siêz tsơưr lươngv luz nênhx./.

TTĐB-Lik Thox cxêik nhênhv