Huyện tox siêz Mù Cang Chải huôv tsar truôx cxuô hêir nênhs têx txux chi, vênhx huôv jông

Kênhx Hmôngz zos iz zav txux chi, vênhx huôv jông tâu sir zôngv đhâu ntâu tiêv; taz sik, hâur oz pêz shông đhâu lok no, chuôs li chor hluôk muôx tsơưs lênhx thiêx pâuz txos pêz hêir nênhs Hmôngz têx txux chi kênhx cxôngx nzor. Chênhr zos li hêik ntơư, hâur ntu đhâu, tưz muôx chôngz lênhx hluôk tưz cxiv tsa qơư khơưk tsês thiêz huôv tsar cov tâu truôx pêz Hmôngz têx txux chi kênhx cxôngx nzor. Qơư khơưk tsês têx txux chi kênhx tưz muôx 12 lênhx hluôk Hmôngz nhoz cxuô luz jêx jos hâur thax tsav xã sik côngv đas jos tsưr ziv khơưk tsês thiêz cơưv shâuv pêz Hmôngz têx txux chi kênhx tsik chiê trâus pôngz plox. Tus cưr Lở A Thông, nhoz Xã Lao Chải, huyện Mù Cang Chải shir phaz lul hêik pâuz: “Pov chor hluôk nhiv no tsik cơưv shâuv pêz Hmôngz têx kênhx; cur thiêx xar tiêk, tsuv cxiv tsa qơư khơưk tsês têx txux chi kênhx cxôngx nzor, tsik chiê trâus pôngz plox”

Zơưv Lở A Trừ, nhoz xã Lao Chải, huyện Mù Cang Chải cux hêik pâuz tiêk: Trơưk li pêz Hmôngz chor lâuk piêr tsês, kênhx zos iz zav txux chi, hêik cxiv cxuô lok pêz hêir nênhs Hmôngz luz nênhx nox nhoz muk lok txix thâuv ntêx đros đrêiv luz nênhx đhâu ntâu tiêv thiêz kênhx tâu sir zôngv trâu thâuv muôx iz tus lâuk pur 120 shông tâu tas siv nênhx, chiê xa lênhx nênhs tâu tas siv nênhx co muk thơưx thiêz, muk chuôs pox côngz zơưv côngz. Iz chas ntơư, kênhx cux tâu yuôz hêik txos cêr gâux cêr đrâuv, nthuôr uô cêr lov jêv, đhiê pax vuôs  hâur têx hnuz kriz nênhk hội, hâur têx hnuz tsiêz huv đros hâur luz nênhx: “Chor hluôk nhiv no, chuôs li muôx tsơưs lênhx thiêx cơưv shâuv, khơưk tsês pêz Hmôngz têx txux chi kênhx cxôngx nzor. Taz sik, hâur ntu đhâu, cux pov muôx iz cxiê lênhx hluôk cxiv uô qơư tsês pêz Hmôngz têx txux chi kênhx”

Ntơưv tsêr cơưv cxênhx 1 thiêz cxênhx 2 xã Mồ Dề, cưk kriê hâur tsêr cơưv ntơưr tưz kriz lớp kriê cơưv shâuv yuôz kênhx, đhiê kênhx, cơưv shâuv ntok ntâuz. Shuv xênhz Suôr xênhv Zax, cơưv lớp 9 A1 shir phaz lul hêik pâuz: “Cur tưz đros cơưv hâur lớp kriê cơưv lok cxuô hêir nênhs têx txux chi, vênhx huôv jông cxôngx nzor thiêz ntơư cux zos iz kro muôx liv chiê sđ khơưk tsês thiêz huôv tsar truôx zuk hêir nênhs têx txux chi, vênhx huôv jông tsik chiê trâus pôngz plox”

Cưk kriê Phạm minh Dũng, thơưx sêiz car tsêr cơưv cxênhx 1 thiêz cxênhx 2 Xã Mồ Dề cux hêik pâuz tiêk: cxuô lênhx shuv xênhz thiêz cưk kriê puôr lênhx truôx siêz kriê thiêz cơưv cov tuôr tâu truôx cxuô hêir nênhs têx txux chi, vênhx huôv jông nhoz cxuô tsênhv qơư: “Hâur ntu têz qơưs hlôngr yiêz nhiv no, têx tuz nxêik shuv xênhz nhiêv cơưv shâuv lok ntâu zav yiêz, tsik ndo txos zuk hêir nênhs têx txux chi, vênhx huôv jông cxôngx nzor. Chênhr zos li hêik ntơư, cưk kriê hâur tsêr cơưv tưz tso tơưv luôs hâux lưv chiê kriê cxuô lênhx shuv xênhz hâur tsêr cơưv khơưk tsês sđ têx txux chi, vênhx huôv jông cxôngx nzor”

Mù Cang Chải zos huyện tox siêz muôx 95% zos pêz hêir nênhs Hmôngz nhoz huôv tsar cêr uô nênhx. Chênhr zos li hêik ntơư, luôs hâux lưv khơưk tsês thiêz huôv tsar cxuô hêir nênhs tsơưs têx txux chi, vênhx huôv jông zos iz luôs hâux lưv zov chênhr tsuv uô cov tâu truôx, muôx đros đrêiv hâur luz nênhx, paz phênhv cxiv tsa thax tsav qơư nhoz cov ziv hnuz ziv jông jav huv đros hâur luz nênhx./.

Tsu cxêik nhênhv-Đinh Tuấn, CQTT Tây Bắc

Por hưv tsês hêir nênhs Ê đê têx txux chi vênhx huôv jông thâuv nzor thôngz đhâu têx lớp kriê cơưv khoz đruôl tôngx, nxêz tôngx

Hâur luz hli đhâu lok no, tas cik tưs, ntơưv tsêr vênhx huôv côngv thôngx jok Kmrơng Prong B, xã Ea Tu, TP Buôn Ma Thuột, tỉnh Đắk Lắk ho lov jêv ntưk suôz đruôl tôngx nxêz tôngx đros suôz luôs, heik lul. Zuôr xar 30 lênhx tuz nxeik hluôk shir phaz lul thâuv tâu cơưv zuk hêir nênhs têx txux chi, tsưr ziv  khozđruôl tôngx, nxêz tôngx, khoz trax shôngz... Y Thiên Niê heik: “Thâuv xuz thơưx nhiv kruôr cơưv cux phiv liv, tsi pâuz khoz hlo, tâu cưk kriê, kriê lok six ntâu viv li nhiv no pêz cux pâuz mê njik têx txux chi lơưv. Pêz lok six shir phaz thâuv tâu cưk kriê moz siêz kriê pêz têx txux chi li ntơư”.

Lơưr zơưv Y Wih Êban, Bí thư Chi bộ jok Kmrơng Prong B, kriê cơưv têx txux chi khoz đruôl tôngx nxêz tôngx zos ntâu lênhx nênhs tsưr ziv, siêz xar njôngr. Đhâu ntâu jiês muk yênhx chuôz zis chiê vênhv tôngv  niêv txir tso têx tuz nhuôs muk cơưv khoz đruôl tôngx nxêz tôngx, cheix so sor shông no lớp tưz hu zâuv tâu lok six chôngz lênhx tuz nxeik hluôk, nhuôs zâu cxaz chuôz: “Krêz lớp cơưv no, chor canr bôv hâur jok cux lok six shir phaz, pov têx tuz nhuôs moz siêz, sir jos cơưv, ntâu lênhx tsi nhoz hâur bê ntơưr cơưv taz sik lơưr cux tưz tuôx đros cơưv hur si. Nhiv no mak uô tâu trơưk tsưr ziv xar lơưv. Viv li sir jos kriê nzir têx txux chi trâu chor nhuôs thiêz, tsi tiêk lớp no xưz, lưv shông zos muôx nênhs cơưv mak cux zuôr krêz lớp cơưv hur si”.

Cheix ntux sor no, đros trâu lớp kriê txux chi khoz đruôl tôngx nxêz tôngx hâur jok Kmrơng Prong B, xã Ea Tu, tsênhv muôx iz lớp xưk li ntơư ntơưv jok Ko Siêr, phường Tân Lập, TP Buôn Ma Thuột thiêz. No zos têx lớp Tsênhv qơư yax mông, vênhx huôv thiêz thêv thao TP Buôn Ma Thuột tsưr tsix trơưk tsưr ziv por hưv, tuôr tsês cxuô heir nênhs tsơưs TP Buôn Ma Thuột têx txux chi vênhx huôv tsi chiê pôngz plox ntu 2022-2025, uô txos shông 2030. Pos Phạm Thị Hải Bình, Phưv Giám đốc Tsênhv qơư heik pâuz: “Thâuv muk vênhv tôngv têx tuz nhuôs shông no cơưv mak tsi phiv liv li têx shông uô ntêx, shông no chor nhuôs đas cir cơưv cux chôngz lênhx. Pêz seiz lok têx phường, xã tsi tâu krêz lớp cơưv ntâuk đruôl tôngx nxêz tôngx thiêz lớp kriê txux chi sênhr chêr heik cưr cxiêx xoang lok sik têx lớp tưz cơưv xar cơưv cxaz nzir têx txux chi, tsưr ziv uô lov jêv chiê krêz lớp cxơưz cxiz chor tuz nhuôs, cxênhx hluôk sir jos cơưv thiêz đros tuôr tsês tsi chiê pôngz plox”.

Uô đreiv luôs hâux lưv kriê txux chi khoz đruôl tôngx nxêz tôngx hâur ntâu shông đhâu, zơưv Y hiu niê Kđăm nhoz jok M’Duk, phường Ea Tam, TP Buôn Ma Thuột heik, têx uô zơưv xar njôngr zos uô li chas chiê kriê tâu têx txux chi vênhx huôv jông trâu cxênhz tuz nxeik hluôk, nhuôs zâu: “Kriê đuô têx txux chi, têx zov chênhr zuk pâuz trâu chor tuz nxeik, thâuv tưs txos cheix so sor cur pov uô têx hâux lưv co lok six muôx liv, fuô uô tâu hâux lưv por hưv, tuôr tsês tsôngv box Êđê têx txux chi vênhx huôv jông tsi chiê pôngz plox”.

Đros trâu chor tuz nxeik hluôk, nhuôs zâu cơưv khoz đruôl tôngx nxênhz tôngx, iz jiês tuôx cơưv zos têx jiês cơưv muôx cêr lov jêv, jông siêz viv chor nhuôs tâu pâuz nzir lok têx txux chi vênhx huôv, buôk ti tâu sênhr chêr uô zuk heir nênhs cêr lov jêv uô si. Têx li heik co tsi tiêk paz chor nhuôs muôx nzir txux chi jông hâur têx hnuz so sor, tsênhv paz kriê chor nhuôs đros por hưv, tuôr tsês têx txux chi cêr nênhx vênhx huôv jông tsi chiê pôngz plox./.

VOVTN-Riê Lâux cxeik, nhênhv