Kriê txux chi tsưr ziv seiz njuôk shuôs, kho moz gênhk trâu têx tỉnh Bắc Lào

Shông 1971, tỉnh Hủa Phăn, têz qơưk Lol Tsuôk li 2 lênhx shux xênhz xuz thơưx tưz cxaz chuôz tsaz yênhx cơưv txux chi tsưr ziv uô hâux lưv seiz njuôk shuôs, kho moz ntơưv tsêr cơưv Cao đẳng Y tế Sơn La. Txos ntu 1973-1985, đros thiêz zoz qơưx kriê txux chi canr bôv y tế phưx vưv trâu qơư tsav trok thiêz tsoz phưz tsôngv pêx xênhv đas jos, niêx shông, tsi tiêk Hủa Phăn, chor tỉnh faz Bắc Lol Tsuôk li: Bò Kẹo, Luông Pha Băng, Uđômxây, Phongsaly….puôr lênhx tso shux xênhz tuôx cơưv txux chi, tsưr ziv lok sâuv seiz njuôk shuôs, kho moz gênhk hâur tsêr cơưv. Txos nhiv no, luz tsêr cơưv co tưz tok muôx 800 ntâu lênhx shux xênhz têx tỉnh faz Bắc Lol Tsuôk tuôx nhoz, cơưv ntơưr.

Hâur thax tsav tỉnh Sơn La, muôx lok six ntâu lul heik, txux chi vênhx huôv nhiêk txơưr nhiêk tsi siz thôngx, taz sik têx shux xênhz Lol Tsuôk cux sir jos hla đhâu phiv liv, viv txix têx hnuz xuz thơưx nhiv kruôr tuôx txos, lơưr thâuv tưs tưz tâu chor canr bôv, cưk kriê thiêz shux xênhz Việt Nam moz siêz, paz max. Phết Sạ Vẳn Sỏn Ụ Thay, cơưv uô cưk yuôx, nhoz tsêr cơưv Cao đẳng Y tế Sơn La heik: “Đhâu zuôr xar 3 shông cơưv ntơưv tsêr cơưv Cao Đẳng Y tế Sơn La, cur pov chor cưk kriê, têx fôngx zưs lơưr siêz lok six jông. Cur tâu lơưr paz lok six ntâu thiêz muôz jông six hơưv trâu pêz nhoz cơưv ntâuz cơưv ntơưr. Pêz tâu têx fôngx zưs kriê iz kro jux juk, paz max chiê pêz cơưv tâu txux chi jông đuô”.

Đros trâu taz por têx chei paz cơưv txux chi lơưr HĐND tỉnh Sơn La têx Nghị quyết, shux xênhz Lol Tsuôk tuôx nhoz cơưv ntơưr ntơưv tsêr cơưv Cao đẳng Y tế Sơn La tsênhv tâu phênhz qơư nhoz hâur tsêr cơưv, phưx vưv nox hâuk ntơưv qơư uô jâuz mor nox, tâu paz lok sâuv tênhv tơưk, đêx zôngv…..

Iz chas co, ntâu trâur nuv, tsưr ziv uô jông tưz tâu tsêr cơưv fuô uô chiê paz shux xênhz Lol Tsuôk cơưv ntơưr, xênhz huôx zôngx ziv đuô, cux iz zav li uô shux xênhz 2 têz qơưk muôx cêr sik thôngx siêz truôx đuô, li: Yênhx lix câu lạc bộ luk Choz Tsiz, 2 lênhx fôngx zưs Việt-Lol Tsuôk siz paz (iz tus zos nênhs Việt Nam, iz tus zos Lol Tsuôk); cơưv thiêz shâuv heik lul Choz Tsiz đhâu têx jiês nthuôr uô vênhx huôv lov jêv hâur têx hnuz ntênhs lox….. Cưk kriê Lường Thị Ly, tsêr cơưv Cao đẳng Y tế Sơn La heik pâuz: “Cur thâuv tưs tưz moz siêz txos chor shux xênhz Lol Tsuôk. Ciês thâuv tâu choz hâux lưv seiz car lớp cơưv, cur tưz tso iz lênhx shux xênhz Việt Nam paz iz lênhx shux xênhz Lol Tsuôk txix kriê lul heik, ntơưr sâu txos trâu cơưv txux chi. Hâur six hơưv muk cơưv pêv lớp, pêz zênhx max qênhz pov têx lênhx cơưv tsi yuô tâu lul Choz Tsiz, paz kriê lơưr têx lo lul zôngx ziv cơưv, heik txos trâu têx phiv liv, cov zôngx ziv cơưv shâuv, heik tâu…..”.

50 ntâu shông uô luôs hâux lưv kriê txux chi tsưr ziv lok sâuv seiz njuôk shuôs, kho moz gênhk trâu têx shux xênhz Lol Tsuôk, Tsêr cơưv Cao đẳng Y tế Sơn La tưz thiêz tsênhv yênhx qơư njênhs njôngr trâu têx shux xênhz chor tỉnh faz Bắc Lol Tsuôk xeir tsov tuôx cơưv txux chi seiz njuôk shuôs, kho moz. Pos Lò Thị Kiểu, Phưv thơưx seiz car Tsêr cơưv Cao đẳng Y tế Sơn La heik pâuz: “Tsêr cơưv tưz hlôngr yiêz tsưr ziv, six hơưv kriê-cơưv luk Choz Tsiz ngênhx y, yuôx. Tsưr tsix kriê luk Lol Tsuôk trâu têx lênhx cưk kriê phưx vưv kriê txux chi thiêz seiz car chor shux xênhz Lol Tsuôk. Lar heik zos qênhz shuôs, zuôr shux xênhz, têx qơư y tế Lol Tsuôk li ziv chênhv lok chor canr bôv y tế tưz đhâu cơưv tas tror muk têz qơưk uô luôs hâux lưv seiz njuôk shuôs, kho moz gênhk seiz lơưr uô tâu  nuv lok tsi tâu….chiê txix ntơư cxiv kho tsaz yênhx, tsưr ziv kriê cơưv cux iz zav li seiz car, paz max huv đros, cơưv cov tâu txux chi jông đuô”.

Hâur yênhx puô, yênhx cxênhz lênhx shux xênhz Lol Tsuôk tuôx cơưv ntâuz ntơưr, txux chi tsưr ziv uô nuv ntơưv Tsêr cơưv Cao đẳng Y tế thiêz têx tsêr cơưv Cao đẳng, Đại học nhoz tỉnh Sơn La, ntâu lênhx shux xênhz đhâu cơưv tiêr tror mul zuk têz qơưk tưz muôx txux chi jông thiêz truôx lês uô têx luôs hâux lưv, tsoz phưz thiêz tsưx phưv đas jos trâu tsôngv pêx xênhv./.

(Lê Hạnh-Riê Lâux cxeik, nhênhv)

Thâuv tưs ntux lok nas txơưv trâus ngaz- vênhv thix cuz nxor nhoz ntâu qơư hâur Lào Cai

          Ntơưv tuêv jênh phố số 5, thị trấn Khánh Yên, huyện Văn Bàn, txix hâur shôngk shông txos nhiv no tưz 3 jiês trâus đêx ngaz. Zơưv Vũ Xuân Thủy- Tsar phongx kinh tế huyện Văn Bàn jênhv, cxix luôk njưk đêx tsênhv tsi tâu tuôv zênhv tâu pir đros thiêz niêv đrôngs li huôv tsar. “Đros thiêz niêv đros li huôv tsar mak cxix luôk tso đêx tuôv zênhv tsi tâu zoz qơưx nhiv no. Thax tsav no huyện tưz thiêz tsênhv cxiv tsa tsaz yênhx, tsưr ziv cxuô chiê qênhz yuôx tas nro têx qơư trâus đêx ngaz sâuv thax tsav thị trấn Khánh Yên chiê muôx tsưr ziv tso đêx muôx chêx cuk”

          Ntơưv TP Lào Cai, têx shôngk jê ntơưv no đêx ngaz tưz yênhx hâux lưv tsi so muôx yưv hâur yênhx shông. Sâuv hâux lưv sir jos chiê ndê niêv đrôngs hov 1, six cxiv no thành phố xav tênhv zuôr yưv pênhr muôx 300 tỷ đeiv ntâu chiê yưr lir txos qơư 50 ntâu qơư trâus đêx ngaz. Taz sik, đros cxix luôk njưk tso đêx ntêr zuôr xar 400 cei cêr mak zos iz hâux lưv uô tsi zôngx ziv. Zơưv Đào Minh Khánh- Tsar phongx coar lik niêv ciêz thành phố puz pâuz: “Thâuv ntêx yưv pênhr lok têx côngz tsinhx cxuô zav li cêr zaoz thôngz cux xưk li njưk tso đêx mak tsi uô txos qơư. Chênhr viv li tsi muôx njuôs xav tas nro lok tso đêx; hâur co têx dự án tâu uô viv lok six ntâu tsưr yưv pênhr viv li tsi taz por, thâuv lok nas đêx ntưs lok, ntâu qơư nhoz thax tsav kis tso đêx tsi tâu mak trâus ngaz lox”

          Tsi taz lok vênhv thix đêx ngaz, nhoz iz tỉnh tox siêz li Lào Cai, têx cêr muk lok zos tsi tâu yưr lir tso đêx jông mak zuôr lok six riêz nênhs. Tiv zix li ntơưv thị xã Sa Pa, thâuv ntux lok nas lox, ntâu cêr muk lok hâur thị xã đêx ntưs lox li tsas đêx, hlôngr trâu hâux lưv tso đêx lok hâur njưk đêx, muôx chôngz tsôngv box thiêz têx thax tsav qơư kis njiz trâus ntâu phêv liv. Zơưv Vương Trinh Quốc, nênhs sơưr thơưx chính quyênx thax tsav qơư ju lix no puz pâuz: “SaPa cux tưz chox kriê Phongx coar lik niêv đrôngs côngv đros têx taz viv muôx lênhx coaz, đros xí nghiệp tênhx qơư tsuv sik côngv qênhz yuôx tas nro cxix luôk tso đêx viv muôx ntâu dự án, muôx dự án zos thị xã uô, muôx dự án mak zos Ban ODA uô, puôr lênhx muôx cxix cxuô njưk tso đêx taz sik nhiv no hâux lưv tso đêx cux tsi tâu tâu pov tso tâu đêx mak đêx tsênhv ntưs lox thâuv muôx ntux nas”./.

(An Kiên-Txâur Vax cxeik nhênhv)