Têx đras liêx nhoz qơư trâus đêx nas uô ruôr hiêv ntơưv Sơn La tror huôv, njuôz jông tuôx

Xã Tông Cọ, huyện Thuận Châu, Sơn La zos thax tsav trâus đêx nas ngaz 5 jiês siz lơưr liês hâur têx coz nas lox txix hli 7 txos nhiv no. Đêx nas hloz tưz cuôr cxuz thiêz uô puôk tsuôx tas tsôngv pêx xênhv 40 hâur 60 ha blêx.

Huôk njôngr têx hnuz ntux yar mê njik, đhâu hlo thâuv đêx grik, cxuô jêx jok nhoz Tông Cọ tưz zênhx max muk suô têx liêx, kho tsa chor blêx trâus đêx nas uô puôk tsuôx, tsi jông. Nhoz têx thax tsav vuôk har, đêx grik kênhz, uô tsi tâu chiv blêx no mak iz cxiê chuôz zis tưz muôz chor liêx têz hlôngr chos tâux chiê muôx jâuz puz nhux tưv. Pos Lường Thị Dinh nhoz jok Cọ, xã Tông Cọ, huyện Thuận Châu, Sơn La heik:“Cur chuôz zis chor blêx tưz trâus đêx nas cuôr cxuz tas hur si. Đhâu hlo thâuv đêx grik, cur tâu têz qơưk paz nôngz, kriê tsưr ziv lêix uô ar chiê tror tsêz đuô zuz. Nhiv no chuôz zis chor blêx tsênhv hloz lox jông, vav chiê siêz zuôr tâu sâu”.

Zơưv Lò Văn Hảo, Phưv Chủ tịch Ủy ban xã Tông Cọ heik pâuz: Xã tưz pheiz muôz zuôr xar iz tênhr nôngz blêx thiêz 500 qir zuôv cxiz trâu xar muôx 300 chuôz zis pêx xênhv tror tsêz chos đuô. Txos nhiv no, 30 ntâu ha blêx hâur xã tưz tâu uô đuô, hloz lox lok six jông:“Chor liêx têz kôngz trâus đêx nas ruôr hiêv, xã tưz chox kriê cxuô jêx jok, tsôngv pêx xênhv tror huôv tsar uô đuô, cux li muôz zuz nôngz trâu pêx xênhv uô. Yuôr iz cxiê liêx têz kôngz trâus đêx ngaz ntâu jiês, huôv tsar uô tsi tâu mak xã chox kriê, heik pêx xênhv đhâu thâuv đêx nas grik, sơưr đơưk muôz hlôngr chos poz cưk, uô lưv zav kôngz chiê truôx tuk luz nênhx”.

Ngênhx kôngz nuv tỉnh Sơn La thôngz sâu, đhâu têx coz nas lox ruôr hiêv tiv coz nas chuô sôr 2 thiêz sôr 3 uô, tas nro tỉnh muôx zuôr xar 2 cxênhz ha blêx nhoz ntâu thax tsav qơư trâus đêx nas ngaz, cuôr yôngz, uô puôk tsuôx. Zơưv Hồ Trung Kiên, Chi cục tsar Chi cục tsêz chos thiêz por hưv đrox tsuôs tỉnh Sơn La heik pâuz, Chi cục tưz uô hâux lưv đros phongx Kôngz nuv, Tsênhv qơư dịch vụ kôngz nuv cxuô huyện, TP xav tinhv thax tsav uô kôngz zôngx ziv trâus đêx ngaz; hu zâuv cxuô lênhx nênhs thoz huk têx cưx đês, puôz thêir njưs tar đêx, njưs liêx cov đêx ntưk tâus, grik sei tsi trâus ngaz. Iz chas ntơư, bax cxuô faz tsưr ziv chiê por hưv têx liêx têz kôngz:“Pêz heik tsôngv pêx xênhv uô blêx muk qênhz shuôs tsi so têx liêx têz, muôx tsưr ziv phax tir thêir caz hmoz tho nox uô ruôr hiêv đhâu têx coz nas hloz. Chor liêx têz blêx nhiv kruôr gôngr car, uô plaz naz mak tsôngv box muk muôz têx blêx trâus đêx nas uô kâus ntơư tsa, khi 3, 4 tsoz lok uô cê chiê têx blêx sơưr tâuk, trâu cxur, siêr jux juk, tâu hlêis sâu. Yuôr têx blêx tưz zuôr siêr, jông hlêis sâu, sơưr đơưk sir jos sâu hlêis nzor, nzaz nzơưv têx hnuz nhôngs jông chiê bax tsêz chos chiv jâuz tâuv ntux tsâus trâu”.

Txix ntux têx txơưr txar phiv liv, hâur thax tsav qơư cux heik tsôngv pêx xênhv tsuv sox seiz njôngr, bax cxuô faz tsưr ziv phax tir thêir, por hưv têx kôngz, tsoz chos chiê truôx tuk luz nênhx trâu tsôngv pêx xênhv nhoz thax tsav khênhr trâus đêx nas uô ruôr hiêv./.

                                                                                                                      Lê Hạnh-Riê Lâux cxeik, nhênhv