Cuêv fix paz trâu chor jêx jok nhoz tox siêz Lai Châu tơưv đhâu yêiz pluôs

            Tưz zênhx zos iz hâur chor ziv chuôz zis pluôs tiv zix hâur jok Pha Bu, niêv tix Pờ Le La, mênhx cxưx La Hủ ziv chuôz zis yênhx shông tsuôk pâuz tok trâu chor têz poz cưk, kok ntông xưz. Tiv uô lơưr têx tsưr ziv uô nox kuz, chor kôngz lôngk sâu tâu cux tsik txâuk trâu chuôz zis muôx 6 lênhx nênhs nox.

          Niêv tix Pờ Le La hêik pâuz, thâuv hnor chinhr quyền xar Pa Ủ hêik cov chos cuêv fix, niêv tix thiêz pêx xênhv hâur jok cux tsênhv lok six cxơưx. Taz sik, khov muôx paz zuz nôngz, canr bôv xar kriê têx kỹ thuật, niêv tix chuôz zis tưz sir jos chos xar muôx 1 héc ta cuêv fix. Đhâu 3 shông ntâu chos, tu, chor ntông no tưz piz sâu tâu blôngx, chês thiêz nhiv no chuôz zis tsênhv jênhv nzir zuz lok chos cov ntâu đuô: “Shông no, cur chuôz zis tâu paz chos 6 héc ta cuêv fix. Ntux kruôr viv li tas nro chuôz zis tưz sir jos chos cov ndar chiv. Zuk cux vav tiêk chor cuêv fix zuôr hloz sêi, tov kaz no paz muôx phênhv sâu truôx chiê txoz cxơưx trâu têx tuz nhuôs thiêz paz trâu luz nênhx cov tsik yuô txov nhêv”.

           Lơưr zơưv Pờ Lò Hừ, Bí thư Chi bôv, uô tsar jok Pha Bu, xuz thơưx thâuv kriz uô, pox nhuôs cux tsik pâuz chos cuêv fix li chak. Taz sik canr bôv xar tưz tuôx ciês trâu yênhx chuôz zis chiê paz zuz nôngz, kriê kỹ thuật chos, tu chor ntông. Piz chos mak thiêx pov tâu chor ntông no cux zôngx ziv chos, hloz lox jông. Nhiv no mak tưz txiêr chês, txiêr blôngx muôs tâu nhiêx lơưv, luz nênhx cux hlôngr yiêz jông đuô thâuv ntêx: “Cur chuôz zis thiêz ntâu ziv chuôz zis hâur jok piz chos cuêv fix txix shông 2022. Khov muôx canr bôv xar, canr bôv kỹ thuật uô tiz jông kriê txix chos txos tu, viv li chor ntông hloz lox jông, chiêx muôx 90% ntâu. Txos nhiv no, cuêv fix huôv tsar jông, lox sêi, muôx tsơưr lươngv jông. Pêz luz jok cux chos tâu trơưk tsưr ziv choz lơưv, pox nhuôs sơưr đơưk puôr lênhx shir phaz hur si”.

           Ntơưv xar Bum Tở, qơư muôx tsôngv box La Hủ thiêz Si La uô nênhx nhoz, chor cuêv fix cux tsênhv tâu sir jos chos thiêz zos yênhx tsoz chos chênhr paz trâu pêx xênhv tơưv đhâu yiêz pluôs. Đros muôx qiv hơưv lax, muôx ar jôngr ntâu, pêx xênhv nhoz ntơưv no sir jos uô lơưr tỉnh têx tsênhv chêi huôv tsar cuêv fix. Zơưv Hù Chà Khá, nhoz jok Sì Thâu Chải, xar Bum Tở puz pâuz: “Cur chos cuêv fix txix shông 2016. Nhiv no tưz lox tas, sâu tâu lơưv. Oz pêz shông no, cur chuôz zis txiêr chês, txiêr blôngx muôs trâu chor nênhs zuôr. Khov muôx chor cuêv fix mak chuôz zis tưz tsik txov nhêv li thâuv ntêx lơưv thiêz, muôx phênhv sâu truôx chiê paz trâu luz nênhx”.

             Chor cuêv fix tưz tsik zos paz trâu pêx xênhv nhoz tox siêz Lai Châu muôx phênhv sâu mak tsênhv paz tâu jông trâu tênhv qơư, paz muôx jôngr vor têx ar trôngz, paz muôx đêx, phax tar qiv hơưv txơưr txar. Txix têx pâuz tsik tsênhz xuz thơưx, pêx xênhv tưz muôx siêz njênhs jông đuô trâu chor cuêv fix thâuv muôx tâu phênhv sâu truôx đhâu ntâu shông vav tok njôngr.

             Zơưv Đao Văn Khánh, Chủ tịch Ủy ban xar Bum Tở puz pâuz: Đại hôiv Đảng bôv tỉnh Lai Châu jiês tiv 15 tưz tso tơưv tsưr ziv “Sir jos txos shông 2030, tỉnh Lai Châu zos yênhx tỉnh huôv tsar jông, sêi thiêz truôx đrênhk, zos tỉnh huôv tsar hênhr hâur tas nro têz qơưk”. Xar Bum Tở nhiv no tsênhv muôx zuôr xar 1 cxênhz héc ta cuêv fix thiêz xav jênhv cuêv fix zos tsoz chos chênhr, sir jos txos shông 2030 ndê muôx 1.500 ntâu héc ta, gôngr côngv trâu tỉnh li tsưr ziv chos cov tâu muôx 30 cxênhz héc ta: “Xar Bum Tở tưz tsêx trung kriz uô tsênhv chêi paz huôv tsar cuêv fix sâuv thax tsav. Hâur co, pox nhuôs tâu paz 100% zuz cuêv fix chiê chos. Tiv zix, tỉnh tsênhv muôx ntâu tsênhv chêi paz hâur 5 shông xuz thơưx chiê pêx xênhv por vêv, tu, paz trâu chor ntông huôv tsar truôx. Nhiv no, ntâu thax tsav cuêv fix txix 5 txos 7 shông tưz piz jông sâu. Ntu zuôr txos, xar zuôr tror sir jos yax kriê, tso tơưv chor phongz yaox chos nzir cuêv fix, sêiz no zos tsoz chos chênhr, paz trâu pox nhuôs txo grêk tâu yêiz pluôs thiêz huôv tsar kinh têr truôx đrênhk”.

             Cuêv fix tưz zos yênhx iz zav tsoz chos sưv jê, huv đros, paz trâu yênhx cxênhz ziv chuôz zis tsôngv box mênhx cxưx tsơưs nênhs nhoz thax tsav ntus đriv Tây Bắc huôv tsar tâu kinh têr, txo grêk tâu đhâu yêiz pluôs./.

Khắc Kiên-Lik Thox cxêik nhênhv

Sơn La sir jos fuô uô cxuô faz tsưr ziv uô lơưr Nghị quyết Đại hội Đảng bộ tỉnh

             Đại hội Đảng bộ tỉnh Sơn La jiês tiv 16 (six cxiv 2025-2030) tưz xav tinhv hâux lưv trâu ntu 2025-2030 zos sir jos cxiv tsa Đảng thiêz cxix luôs chính trị hur jông, truôx vênhk; tuôr tsês, por hưv chiê têx muôx jông, cêr sik thôngx siêz, cxuô heir nênhs li txux chi vênhx huôv;; tror hlôngr yiêz tsưr ziv xar, cxơưz huôv tsar khoa học, công nghệ, hlôngr yiêz sôr. Huôv tsar sei thiêz truôx, zuôr kôngz nuv hax huv công nghệ siêz, công nghiệp tsiv uô kôngz nuv zos qơư chênhr, reik đros ju lix chiv xênhz đrox tsuôs, vênhx huôv. Tsi so gra siêz pêx xênhv luz nênhx nox nhoz; taz por côx phax, txiv ngaz; cxiv tsa Sơn La yênhx tỉnh huôv tsar, tsênhv qơư kinh tế-xã hội hâur thax tsav Tây Bắc; tsênhv qơư tsiv uô xiv huv kôngz nuv hâur thax tsav trung du thiêz tox siêz faz Bắc; yênhx qơư ju lix zov chênhr hâur thax tsav trung du, tox siêz faz Bắc thiêz thax tsav ntus đriv Việt Nam-Lào.

            Đại hội tưz tso tơưv 24 luôs hâux lưv zov chênhr hâur têx ngênhx kinh tế, xã hội, tênhx qơư thiêz cxiv tsa Đảng chiê sir jos fuô uô hâur six cxiv 2025-2030. Hâur co muôx: Chuôz tsar xav kror đruôz têx xiv huv 5 shông ntu 2026-2030 tax 8-8,5% iz shông; xav kror đruôz đraz iz lênhx nênhs muôx phênhv sâu tâu txos shông 2030 tâu 90 tsov đeiv ntâu. Chor chuôz zis pluôs (trơưk cui tinhv ntu 2026-2030) cux txo grêk tsơưs.

            Chiê fuô uô tâu jông lơưr Nghị quyết Đại hội đros thiêz têx hâux lưv tso tơưv, tỉnh Sơn La tsênhv sir jos trâu 3 luôs hâux lưv zov chênhr.

             Hâur co, cxơưz cxiz hu zâuv, kriê cxaz têx txux chi tsưr ziv yuôr trâus thiêz seiz hloz txos têx lênhx nênhs txơưx njê, cxiv tsa canr bôv, hâu nov seiz car cxuô cấp moz siêz, uô ntêx nyuôs, lês uô jông têx hâux lưv zok muôz, lar heik zos lênhx nênhs sơưr thơưx muôx txux chi, tsưr ziv jông, uô ntêx nyuôs hâur cxuô cêr nuv, car xar, car heik, car uô, car taz txơưx jênhv, hlôngr yiêz txux chi, tsưr ziv, sir jos hla đhâu phiv liv, lês uô hâux lưv viv sơưr đơưk. Moz siêz huôv tsar cxiv uô jông têx cêr muk lol, muôz qơư chuôz jos huôv tsar kinh tế xã hội; huôv tsar côngz trênhx kôngz nuv, ju lix, thax tsav công nghiệp..... Tỉnh sir jos hlôngr yiêz sôr hâur cxix luôs chính trị; cxiv tsa, yênhx lix hâu nov lês uô têx hâux lưv lơưr tsưr ziv yiêz; dịch vụ ciêz đrôngs vav mênhx tâu fuô uô, đêz đar trâu ntâu qơư; kinh tế sôr thiêz xã hội sôr huôv tsar, truôx vênhk.

                Tỉnh moz siêz txos yưv pênhr cxiv tsa kinh tế xã hội huôv tsar truôx thiêz jông; sir jos sik côngv đros 2 chas thax tsav, 2 chas tỉnh thiêz têx qơư kinh tế lox hâur têz qơưk. Sir jos yưv pênhr cxiv tsa, kho đuô têx cêr muk lol zov chênhr hâur thax tsav; krêz uô têx muôx jông lok tênhv tênhz. Huôv tsar kinh tế lênhx nênhs sei thiêz truôx, muôx tsơưr lươngv; huôv tsar têx tsưr tsix kinh tế sik hux jos reik đros kinh tế hur jông, kinh tế truôx.....

              Tỉnh cux sir jos hlôngr yiêz têx ntâuz ntơưr thiêz hlôngr yiêz sôr, gra siêz luôs hâux lưv seiz car, cxiv kho, hlôngr yiêz tênhx qơư yưv pênhr; cxiv tsa tênhx qơư yưv pênhr côngz fênhx, muôx chei, vax huôv siz luôs, lês uô jông cxuô luôs hâux lưv uz no. Tror cxiv kho đuô ngênhx kôngz nuv, sir jos huôv tsar kôngz nuv uô lơưr công nghệ siêz, huôv tsar kôngz nuv hur jông, gra siêz tsơưr lươngv xiv huv kôngz nuv hax huv chênhr hâur tỉnh, muôs tâu gri reik đros trâu cxiv tsa, huôv tsar thiêz por hưv suôz bê. Sir jos huôv tsar ju lix yênhx ngênhx kinh tế chênhr. Tror cxiv tsa ngênhx vênhx huôv jông, muôx ntâu txux chi; uô jông têz qơưk tsaz yênhx lok tsoz phưz đas jos, jênh sôr thiêz huôv tsar. Tỉnh tror cxiv tsa lưv lươngv tuz lênhv, Công an muôx jos, lês uô tâu jông têx hâux lưv zok muôz lok tsưx phưv truôx têz qơưk, xã hội....../.

Bích Thủy-Riê Lâux cxeik, nhênhv