Điện Biên thiêz têx tỉnh Bắc Lào sik côngv tês tir thêir têx nênhs fêv zuôr muôs zax zênhz 

Zos thax tsav qơư zôngx ziv trâu chor nênhs fêv nhiês zuôr muôs, thâux gra zax zênhz txix Lào lok Việt Nam thiêz muôs trâu têz qơưk tiv 3, viv li nênhs phamv cxâuv li huôx tôngv sâuv cêr ntus đriv tỉnh Điện Biên lok six zov chênhr. Hâur 6 luz hlik hâur shôngk shông no, lưx lươngv Bộ đội pênhz phax tỉnh Điện Biên tưz sik côngv, ruôr yênhx côngz yênhx châuv txuz án zov chênhr lok zax zênhz, sâu tâu zuôr xar 190 đeiv zênhz đơưz thiêz 144 cxênhz ntâu njiêr zax zênhz shơư yuôx. Trung tá Chu Ngọc Lệ, Phưv tsar phongx phax tar zax zênhz thiêz nênhs phamv cxâuv, Bộ đội pênhz phax tỉnh Điện Biên puz pâuz:

          “Zax zênhz tâu nhiês zuôr lok hâur têz qơưk đhâu ntâu tsưr ziv huôx tôngv, liv zôngv têx lưx lươngv chuôz tsar phax tar moz Covid-19 sâuv ntêx qơư seiz car nhoz ntus đriv, lơưr hlôngr tsưr ziv huôx tôngv ntơưv têx thax tsav tox siêz chiê jav tâu pêz li seiz car. Viv li pêz tsuv sik côngv jông đros têx lưx lươngv muôx txơưx jênhv Lào qênhz yuôx seiz car, chuv tôngv xav tênhv chuyên án, txuz án tơưv txênhz muôx chêx cuk đros têx zav nênhs phamv cxâuv zax zênhz”.

          Xav tênhv tsưr ziv “ chuv tôngv paz fôngx zưs cux zos paz trâu zuk”, Công an tỉnh Điện Biên têx shôngk đhâu tưz chuv tôngv sik côngv đros têx lưx lươngv muôx txơưx jênhv têz qơưk Lào tơưv txênhz, pâuz tâu qênhx shênhx, pov, phax tar nênhs phamv cxâuv zax zênhz muôx lênhx coaz txos 2 têz qơưk. Đrâuv paz txưv têz qơưk Lào krêz uô trâur nuv huôx tôngv têx tuêv côngz xưv qênhz yuôx seiz car zaoz thôngz reik đros tơưv txênhz đros têx tsưr tsix, nênhs phamv cxâuv; uô Bộ công an VN li chủ trương, Công an Điện Biên tưz sik côngv đros Công an tỉnh Sơn La krêz uô 76 qơư uô hâux lưv trâu công an Lào ntơưv têx jos nhoz buôk ntus đriv. Đại tá Touxong Patchay, Phưv giám đốc Công an tỉnh Luông Pha Băng, Lào puz pâuz:

          “Công an tỉnh Điện Biên zos tỉnh sik côngv đros Công an tỉnh Luông Pha Băng. Hâux lưv Công an tỉnh Điện Biên heik tuêv côngz xưv muk paz max lưx lươngv Công an tỉnh Luông Pha Băng hâur tơưv txênhz phax tar nênhs phamv cxâuv zos iz hâux lưv lok six muôx ziz njiêz thiêz zuôr trâus viv đhâu côngz xưv tơưv txênhz phax tar nênhs phamv cxâuv zax zênhz tưz uô txu grês zav nênhs phamv cxâuv no ntơưv Lào, gôngr phênhv coaz tsôngv lok hâux lưv phax tar nênhs phamv cxâuv zax zênhz txux đêz nhiês muôv muôs thâux gra zax zênhz lok hâur tiv phaz”.

          Đros têx lưx lươngv li paz txưv, tiv zix zos công an têx tỉnh Bắc Lào, txix kaz hli 11/2021 txos nhiv no. Công an tỉnh Điện Biên tưz ntês yênhx côngz 12 lênhx nênhs phamv cxâuv, hâur co muôx 6 lênhx lok six riêz nênhs muôx lênhx coaz txos zax zênhz; ruôr yênhx côngz yênhx puôk txuz án, chuyên án zax zênhz lox zâu. Tiv zix zos ntês yênhx côngz Và A Bi (xênhz shông 1995)- lênhx nênhs phamv cxâuv riêz nênhs muôv muôs zax zênhz txix shông 2014. Thâuv tsênhr khiêr gâuv, Bi tưz muk txos ntâu qơư txơưr thiêz yax six muk têz qơưk Lào chiê uô si. Ciês thâuv Công an Điện Biên sik côngv ntês tâu Và A Bi mak têx nênhs fêv txơưr tưz sik zâuv sik côngv chiê chơưv Bi. Taz sik, khov Công an Lào li paz txưv, Công an Điện Biên tưz chox tâu Bi lok VN taz por. Zơưv Lê Thành Đô, Chủ tịch UB tỉnh puz pâuz: Cxiv tơưv txênhz phax tar zax zênhz nhoz Điện Biên tsênhv lok six phêv liv. Viv li, tỉnh tưz chox kriê têx lưx lươngv sik côngv jông đuô thiêz đros têx lưx lươngv muôx txơưx jênhv têz qơưk Lào thiêz Trung Quốc chiê phax tar hâux lưv muôv muôs zax zênhz lok hâur thax tsav:

          “Hâur ntu nhiv kruôr đhâu, tỉnh ủy, HĐ, UB tỉnh Điện Biên tưz tso tơưv ntâu tsưr ziv chiê tơưv txênhz phax tar zav nênhs phamv cxâuv no, gôngr phênhv tuôr truôx txiv ngaz sâuv thax tsav cux xưk li sâuv ntus đriv. Thôngx cxix chuôz tsar sik côngv jông hâur lưx lươngv Điện Biên thiêz lưx lươngv têx tỉnh Bắc Lào thiêz Trung Quốc chiê phax tar zax zênhz, tuôr truôx luz nênhx ngaz tul trâu tsôngv box”.

          Khov sik côngv jông haur têx lưx lươngv muôx txơưx jênhv têx tỉnh Bắc Lào, nênhs phamv cxâuv zax zênhz li huôx tôngv sâuv têx cêr ntus đriv tỉnh Điện Biên heik taz, Tây Bắc heik cxuô tưz thiêz tsênhv jux jus txu grês. Hâux lưv no ziv tso pov cêr sik côngv siêz jông hâur VN-Lào, txox cêr sik côngv co zuôr tiêv tiêv truôx tul./.

(Vũ Lợi-Txâur Vax cxeik nhênhv)

Tsôngv pox niêv Yên Châu (Sơn La) sir jos “huôv tsar uô nox, hla đhâu cêr pluôs”

Niêv lâul Tsaz Xênhv Muôk, nhoz jok Na Lù, xã Phiêng Khoài, huyện Yên Châu (Sơn La) chuôz zis sir jos khưr uô têx liêx têz taz sik phênhv sâu cux tsi tâu pêk tsơưs; ntâu shông cux zos chuôz zis pluôs hâur jok, hâur xã. Shông 2015, txix têx pênhr txeik Tsêr nhiêx tsênhv chei xã hội thiêz chuôz zis têx nhiêx txiêx cxênhx txuôs tâu, niêv lâul tưz muôz têx liêx têz uô tsi jông kôngz hlôngr chos ntông nox txir muôx grik kinh tế siêz, huv đros trâu ntơưv qơư.

Txos nhiv no, chuôz zis li liêx têz đar muôx iz ha ntâu tưz muôx 400 tsoz txir khơưz, 100 tsoz txir lưv tsiz sôngz txi txir tâu sâu đê. Iz chas ntơư, niêv lâul cux chos nzir têx tâux, poz cưk chiê muôx cov txâuk jâuz krâur trâu 30 ntâu tus buô, yis, nhux thiêz têx keiz ok nox. Niêv lâul Tsaz shir phaz heik: Txix chuôz zis tsưr ziv huôv tsar uô nox li heik sâuv, hâur 2 shông jê lok no, đhâu yưx tas têx nhiêx txiêx zuôr krâur, ntiêr nênhs đros tu têx ntông nox txir, tsiêx cxu, chuôz zis cux sâu tâu 200 tsov đeiv ntâu:

“Thâuv ntêx, cur chuôz zis cux lok six txov nhêv, luz nênhx phênhv ntâu zos khov trâu têx poz cưk, thiêz ziv trâul txov đuô thâuv muôx 2 tus nhuôv. Seiz pov tu zus tsơưs têx tsiêx cxu cux tsi tâu đaz tsi, muôs lok cux tsi tâu ntâu, cur thiêz cur tus txir tưz sir jos zok nriêr tsưr ziv yiêz huôv tsar uô nox chiê hla đhâu cêr pluôs, truôx tuk luz nênhx”.

Txix pênhr 200 tsov đeiv tâu tsaz yênhx “paz têx lênhx pox niêv vir ndâuk pluôs huôv tsar uô nox” zos Hội Liên hiệp pox niêv Việt Nam kriz uô, shông 2019, Hội Liên hiệp pox niêv huyện Yên Châu tưz đros Hội Liên hiệp pox niêv tỉnh Sơn La xeir tsov xã Tú Nang (Yên Châu) fuô uô luôs hâux lưv paz chor pox niêv hâur thax tsav co huôv tsar tu zus nhux sha mê nhuôv. Iz chas ntơư, iz lênhx pox niêv vir ndâuk tâu txeik 15 tsov đeiv tsi zuôr nhiêx nju chiê zuôr nôngz tsiêx cxu lok tu zus. Chor nhiêx txeik ntơư zuôr tâu thêv hâur 3 luz shông, iz shông thêv 5 tsov đeiv. Cuiv nhiêx zos Hội Liên hiệp pox niêv xã seiz car. Têx lênhx pox niêv hâur paz tâu kêr txeik chor nhiêx heik sâuv tâu kriê lok têx tsưr ziv huôv tsar uô nox, tu zus tsiêx cxu chiê uô thiêz tu tâu têx tsiêx hloz lox jông trơưk siêz xar….. Zos iz hâur têx lênhx nhoz hâur paz pox niêv vir ndâuk sik đros huôv tsar uô nox, tu zus nhux sha mê nhuôv xã Tú Nang, niêv lâul Hoàng Thị Tươi heik:

“Chor pênhr no lok six muôx liv trâu têx lênhx pox niêv vir ndâuk muôx luz nênhx txov nhêv li cur. Chor pênhr no cur tưz muôz zuôr nhux lok zus, zuôr sir jos tu cov jông chiê sha mê nhuôv, vav ntâu jux juk tuôx”.

Paz muôz pênhr kêr txeik huôv tsar cêr uô nox, Hội liên hiệp pox niêv Yên Châu thâuv tưs cux moz siêz txos têx chuôz zis pox niêv uô nênhx nhoz iz lênhs, pox niêv uô tsưr chuôz zis; heik chor pox niêv vir ndâuk cxaz chuôz  xênhz huôx, uô ntâuz ntơưr kêr txeik pênhr huôv tsar uô nox…. Txos nhiv no, Hội tưz paz sơưr bê kir Tsêr nhiêx Kôngz thiêz huôv tsar tox siêz, Tsêr nhiêx tsênhv chei xã hội li têx pênhr zuôr xar 180 tyv đeiv, muôz trâu 2.500 ntâu chuôz zis kir txêik huôv tsar uô nox.

Iz chas co, Hội cux sir jos fuô uô cxiv vênhv tôngv cxiv tsa “tsêr sor siêz” trâu chor pox niêv pluôs, vir ndâuk txov nhêv lok tsêr nhoz, paz lơưr truôx siêz, sir jos khưr huôv tsar uô nox. Pos Quàng Thị Hoa, Chủ tịch Hội Liên hiệp pox niêv huyện Yên Châu (Sơn La) heik pâuz: Txix hâur shôngk shông 2021 txos nhiv no, Hội tưz đros cxuô ngênhx cik txos thiêz Hội Liên hiệp pox niêv thênhv siêz paz max 5 lênhx pox niêv pluôs cxiv kho têx vax tsêr nhoz, paz sik pheiz kênh têx cêr txov chiê lơưr truôx tuk luz nênhx, sir jos hla đhâu cêr pluôs:

“Six hơưv zuôr txos, Hội Liên hiệp pox niêv huyện zuôr tror yax kriê, vênhv tôngv chor pox niêv vir ndâuk sik đros paz trâu têx lênhx muôx luz nênhx txov nhêv cux iz zav li huôk njôngr cxuô cấp, cxuô ngênhx cik txos li têx cêr paz chiê sik đros paz chor pox niêv txov nhêv lok tsêr nhoz cxiv kho têx vax tsêr, uô tâu jông luôs hâux lưv zok muôz trơưk li đại hội đại biểu pox niêv huyện tsưr ziv tso tơưv, cux iz zav li uô lơưr Nghị quyết Đại hội Đảng bộ huyện Yên Châu lok paz têx chuôz zis pluôs, txov nhêv uô, kho đuô têx vax tsêr nhoz cov khor truôx”.

Cux trơưk li pos Quàng Thị Hoa, chor pox niêv vir ndâuk Yên Châu thâuv tưs tưz sir jos huôv tsar cêr uô nox, tsi tok txos têz qơưk, sơưr đơưk têx cêr paz, truôx siêz khưr huôv tsar uô nox hla đhâu yeiz pluôs. Iz chas ntơư, cux sik thôngx siêz, siz paz huôv tsar uô bluô nux txix ciês zuk thax tsav qơư nhoz./.

(Trấn Long-Riê Lâux cxeik, nhênhv)