Tsuv muôx faz tsưr ziv tsưx phưv tsoz chos txir thênhx caz nhoz Văn Chấn

Zơưv Nguyễn Đức Thông chuôz zis nhoz jos Nông Trường, xã Thượng Bằng La, huyện Văn Chấn (Yên Bái) tsênhv sir jos tsoz phưz tsoz chos txir thênhx caz tsênhv yuôr đros siêz xar muôx cxaz iz phênhv sâu hâur ntu zuôr txos Tsiêz têz qơưs. Zos ziv chuôz zis chos txir thênhx caz lis đuô pir đros chor ziv chuôz zis ntơưv tiv phaz, viv li txos nhiv no, zơưv chuôz zis zos iz hâur têx ziv chuôz zis tsênhv yuôr ntâu txir thênhx caz hâur thax tsav xã. Txơưv li ntơưv, njuôs xav shông no chuôz zis li chor txir tsuôk sâu tâu 10 tênhr ntâu, txu grês iz đraz pir đros tsêz no. Qir tiv zos chuôz zis li tsoz txir thênhx caz trâus đax blôngx, lưx chas viv li mênhv chêx thiêz chor txir tâu sâu txu grês ntâu: “Muôx nhos 8 cxênhz yiv ndis ar chos txir thênhx caz mak cux trâus tuôs muôx nhos 4 cxênhz. Mênhv chêx muôx txir thênhx caz trâus tuôs cux tsi tâu pâuz chos nzir tul tsi, viv nhoz no têx ziv chuôz zis muôx tsoz chos trâus tuôs uô ntêx tưz nriêr cxuô zav tsoz chos chiê chox lok chos taz sik tsi jông”.

          Yuôr chuôz zis pos Phạm Thị Lan ho hmôngr tsi jông li ntơưv. Tas nro têx mênhv chêx chos txir thênhx caz thâuv ntêx, pos chuôz zis puôr lênhx hlôngr chiê chos tsoz chos txơưr, phênhv ntâu zos poz cưk. Lơưr pos Lan, xav lok tsiv grê kinh têr mak poz cưk muôx tsiv grê kis đuô tsoz txir thênhx caz lok six ntâu: “Cur chuôz zis tror chos txir thênhx caz taz sik tsi jông, viv li ho hlôngr chos poz cưk. Poz cưk mak tsi muôx tsiv grê, qir zuôv civ, nhiv kruôr muôx 7 cxênhz 1 cir nôngz poz cưk xưz”

          Thâuv ntêx, xã Thượng Bằng La, huyện Văn Chấn muôx 400 hecta ntâu txir thênhx caz, iz hâur têx tiv phaz muôx mênhv chêx txir thênhx caz lox tiv zix huyện. Chungz fênhx iz hecta chox lok phênhv sâu txix 400-500 tsov đeiv trâu tsôngv box. Tsôngv box luz nênhx nhoz no txix co muôx ntâu hlôngr yiêz. Chênhr viv li, thâuv tsoz txir thênhx caz pov muôx caz hmoz huôv xênhz tưz uô zênhr shar ntâu txos tsôngv box li phênhv sâu. Zơưv Hà Ngọc Đặng, Phưv chủ tịch UB xã Thượng Bằng La, huyện Văn Chấn puz pâuz: “Txir thênhx caz trâus caz hmoz uô hiêv zos iz phêv liv trâu tiv phaz. Ntâu shông đhâu xã tưz nriêr tsưr ziv chiê hlôngr yiêz mênhv chêx chos ntông nox txir, tiv zix zos tsoz chos txơưr sâuv mênhv chêx ar chos txir thênhx caz tưz trâus caz hmoz, no zos vênhv thix lok six phêv liv”.

          Lơưr nganhx Kôngz nuv thiêz huôv tsar nôngx cxênhz tỉnh Yên Bái: đros mênhv chêx txir thênhx caz nhoz Văn Chấn, Yên Bái trâus lưx chas, đax blôngx thiêz tuôs tưz tâu têx lênhx nênhs khoa học nhoz têx viện, tsêr cơưv xuz thơưx hâur nganhx lok vênhv thix kôngz nuv pêz têz qơưk tuôx seiz shuôk, nhênhz chơưv. Taz sik, txos nhiv no tsi tâu nriêr tâu qir tiv uô txir thênhx caz tuôs chiê phax tar muôx chêx cuk. Zơưv Nguyễn Xuân Huy, Chi cục tsar Chi cục tsêz chos thiêz por vêv đrox tsuôk nhoz tỉnh Yên Bái puz pâuz: Uô ntêx, tsuôk tso tơưv têx luk heik kriê trâu tsôngv box xưz:  “Thâuv txir thênhx caz pov đax blôngx, jênhs txir, kruôr chês…mak tsuv txiêr por tsês; têx tsoz tsênhv huôv tsar jông mak zuôr zuôv qir chiê ngaz tul mênhv chêx. Đros mênhv chêx tưz txiêr por tsês mak tsuv chos tsoz chos lur hnuz chiê phưx vưv tsiv uô li tâuv pâur, poz cưk, lôngx xôngz….Tov kaz no mak pêz tsuv tror nriêr pâuz qir tiv uô muôx yưv qênhx shênhx txir thênhx caz trâus caz hmoz uô hiêv no”.

          Ntu 2015-2020, huyện Văn Chấn, tỉnh Yên Bái muôx 2 cxênhz hecta ntâu txir thênhx caz chêx chôngk phênhv ntâu nhoz iz cxiê xã, thị trấn thax tsav li: Thượng Bằng La, Nghĩa Tâm, Minh An, thị trấn Nông trường Trần Phú….Txos shông 2022, tas nro huyện tsuôk yuôr tsi nto 1 cxênhz 100 hecta mênhv chêx txir thênhx caz./.

(Trịnh Xuân-Txâur Vax cxeik nhênhv)

Lênhx nênhs paz hêik kriê Đảng, Têz qơưk têx chêi txos trâu tsôngv box La Hủ nhoz Lai Châu

Jok Nhú Ma, xar Pa Ủ, huyện Mường Tè, tỉnh Lai Châu nhoz sâuv ntar trôngz jôngr thax tsav ntus đriv. No zos qơư muôx 100% tsôngv box La Hủ uô nênhx nhoz thiêz phênhv ntâu txux chi, jênhv pâuz tsênhv kik.

Chiê pox nhuôs pâuz tsênhz txos Đảng, Têz qơưk têx cêr chêi thiêz pâuz sir zôngv khoa học kỹ thuật paz trâu uô nox txo grêk yêiz pluôs, têx shông đhâu, zơưv Ly Sạ Pu đros zos lênhx đảng viên, nênhs muôx suôz bê hâur jok tưz sir jos yax kriê, hêik pêx xênhv tsik tsir têz tsir qơư nhoz, tsuv nhoz truôx têz truôx qơư; đros co zos cxơưz cxiz, hêik pox nhuôs uô jông chor phongz yaox sik tưr huôv tsar uô nox, cxiv tsa luz nênhx vênhx huôv yiêz. Zơưv Pu hêik: “Lơưr thênhv siêz li chox kriê zuk tsuv yax kriê trâu pox nhuôs pâuz, sir jos khưr uô nox, huôv tsar kinh têr, txo grêk yêiz pluôs, tsik uô zuôv cêr chêi têz qơưk thiêz uô cxâuv têx txiêz nanv xar hôiv. Txix co pox nhuôs hâur jok lênhx tưs cux sik tưr sir jos cov zos yênhx chuôz zis vênhx huôv. Hnuz hôiv niêv côngv siêz hâur jok shông tưs cux tsưr tsix, uô tâu jông, lok six shir phaz hênhr”.

Zênhx zos qơư phiv liv lok zax zênhz, chor chuôz zis yêiz pluôs yuôr chôngz, taz sik txix thâuv lênhx đảng viên lâul Ly Sạ Pu so hâux lưv lok uô nênhx nhoz ntơưv jok, sir jos đros cấp ủy, chinhr quyền thax tsav qơư sir jos yax kriê, hêik pox nhuôs cxiv tsa luz nênhx yiêz mak pox nhuôs nhoz Nhú Ma luz nênhx tưz hlôngr yiêz jux juk trơưk yênhx hnuz. Thiếu tá Ngô Văn Phương, Chinhr triv viên Zênhx Pênhz phax Pa Ủ puz pâuz: txix shông 2017 txos nhiv no, zơưv Ly Sạ Pu tưz sik côngv đros chor pênhz phax tsưr tsix tâu muôx 600 ntâu jiês yax kriê Đảng, Têz qơưk têx cêr chêi, đros muôx 1.000 ntâu lênhx nênhs cxaz chuôz: “Zơưv Ly Sạ Pu zos iz lênhx canr bôv, đảng viên uô  tâu hâux lưv jông, uô ntêx hlo, tsik so sir jos cxaz chuôz đros cấp ủy, chinhr quyền ntơưv qơư thiêz lưx lươngv pênhz phax chiê uô cov truôx jông lok chinhr triv, vênhx huôv, xar hôiv. Thôngx cxix yax kriê, hêik pêx xênhv thiêz đros bôv đôiv pênhz phax, thax tsav qơư qênhz yuôx por vêv ntus đriv, tuôr truôx tsưr qênhx ngaz tuk ntus đriv têz qơưk, tuôr truôx ngaz tuk chinhr triv thiêz ngaz tuk xar hôiv sâuv thax tsav”.

Zơưv Phạm Hồng Bình, Phưv Bí thư Đảng ủy xar Pa Ủ, huyện Mường Tè hêik pâuz: Zơưv Ly Sạ Pu thâuv ntêx no zos Bí thư Đảng ủy xar. Đhâu thâuv so hâux lưv lok nhoz hâur jok, zơưv tror tâu xêir tsov chiê uô Bí thư Chi bộ, uô tsar ban côngz xưv mặt trận hâur jok. Txơưv uô kror hâux lưv tưs, zơưv cux tsik so sir jos thiêz uô cov tiêr jông têx jênhv vưv tâu choz. Zơưv zos lênhx nênhs uô ntêx hlo, lênhx lâul jok, nênhs muôx suôz bê hâur tsôngv box cxuô mênhx cxưx ntơưv thax tsav qơư: “Đros thax tsav tsênhv yuôr ntâu txov nhêv, pox nhuôs li jênhv pâuz, txux chi tsênhv kik cux li huôv tsar tsik tâu kinh têr, xar hôiv mak muôx chor nênhs li zơưv zos iz kror lok six jông. Lơưr zos nênhs nhoz ciês ntơưv qơư nhoz, cê zos nênhs nhoz hâur tsôngv box mênhx cxưx tsơưs nênhs tưz tâu pêx xênhv njênhs njôngr. Đhâu têx hâux lưv uô tsênhv tsênhz cux tưz paz trâu pêx xênhv sir jos cơưv shâuv thiêz uô trơưk, cux paz trâu kinh têr-xar hôiv ntơưv thax tsav qơư huôv tsar đuô”.

Khov muôx chor đảng viên sir jos li zơưv Ly Sạ Pu, txix iz jêx jok chuôs li 100% zos chuôz zis pluôs, txos nhiv no chor chuôz zis pluôs nhoz jok Nhú Ma tưz tâu txo grêk tsơưs txos yuôr 50% ntâu; pox nhuôs tsik tsir têz tsir qơư nhoz lơưv, sir jos hlôngr yiêz đuô siêz xar, tsưr ziv uô nox, sik paz cxiv tsa jêx jok, qơư nhoz cov huôv tsar, jông jav đuô./.

Khắc Kiên-Lik Thox cxêik nhênhv