Têx lênhx nhuôs zâu trâul pôngz đêx tsar ndê, Đắc Lắc uô li chas chiê tsi tror muôx yưv têx cêr pôngz siêz

Nhiv kruôr no, ntơưv xã Cư Pơng, huyện Krông Búk (Đắc Lắc) muôx iz txuz pôngz đêx, uô 3 lênhx vir ndâuk, nus muôs hâur iz chuôz zis trâul tuôs. Lênhx nhuôv hloz nhiv kruôr muôx 9 shông, tus zâu muôx 5 shông. Niêv lâul Nguyễn Thị Loan heik:

“Tar su lênhx niêv muk ciêz lok, tus nhuôv hloz txơưv heik lênhx niêv tiêk, chor nhuôv zuôr muk uô si tov pak đêx, lênhx niêv tsi khênhr, cxoz muk uô si tov tsav pôngz đêx. Tus nhuôv nhoz mê njik txơưv nhiês cêr muk uô si, xar muôx nhos iz six hơưv đhâu co, tsi pov chor nhuôs nhoz kror tưs, lênhx niêv li muk zok nriêr. Thâuv muk txos qơư pov chor nhuôv têx khâu xưz, zok nriêr iz njik li pov 2 tus nhuôv zâu ntaz tuôx, hok tus tov kaz sơưr đơưk grêk mul đros zok nriêr hâur pak đêx, li chox tâu hâur co lok, taz sik cux chơưv tsi tâu”.

Têx nhuôv hmôngr tsi jông co, muôx 2 lênhx zos shux xênhz tsêr cơưv cxênhx iz Phạm Hồng Thái, xã Cư Pơng. Cưk kriê Vũ Thị Vân-Thơưx seiz car tsêr cơưv heik pâuz, hâur tsêr cơưv muôx pak đêx uô luôv đêx, njuôk xav hâur cheix so sor no, đhâu thâuv moz Covid-19 tsi yuô huôv xênhz phiv liv mak tsêr cơưv zuôr krêz đuô lớp kriê têx nhuôs shux xênhz uô luôv đêx. Chor nhuôv heik sâuv muôx bê nhoz hâur ntơưr zuôr cơưv shâuv uô luôv đêx, taz sik tưz tsi tâu tâu cơưv txơưv muôx têx tsi jông li ntơư:

“Zos thâuv tưs moz tsi yuô huôv xênhz phiv liv, tsêr cơưv zuôr krêz lớp kriê têx nhuôs uô luôv đêx. Lok sâuv têx lênhx seiz car đội mak thâuv tưs cux yax kriê txos trâu chor nhuôs têx tsưr ziv phax tar trâul pôngz đêx, têx tsi jông chiê por hưv truôx tuk têx nhuôs shux xênhz. Txix thâuv ntêx txos nhiv no, tsêr cơưv tsi tâu muôx yưv iz jiês li co hlo, lok six pôngz siêz thâuv iz njêik muôs pôngz tas nro 2 lênhx nhuôv shux xênhz cơưv coz, mnôngs luk thiêz ciêz”.

Sở Lox tôngv Xaz pênhz thiêz xã hội tỉnh Đắc Lắc thôngz sâu tso pov, shông 2020 hâur thax tsav tỉnh muôx 54 txuz pôngz đêx, uô tuôs 73 lênhx nhuôs; hok shông 2021 mak 48 txuz, 51 lênhx nhuôv trâul tuôs. Ciês têx hnuz hâur kaz hlik hli 3/2022 nhiv kruôr đhâu tưz muôx 2 txuz trâul pôngz đêx, uô tuôs 5 lênhx nhuôs ntơưv huyện Ea Súp thiêz Krông Búk. Zơưv Nguyễn Duy Tuyết-Tsar phongx pov tsơưv xã hội, Sở Lox tôngv Xaz pênhz thiêz xã hội Đắc Lắc heik, hâur 2, 3 shông tror lok no, qênhx shênhx têx nhuôs zâu trâul pôngz đêx ntơưv Đắc Lắc txơưv tưz txo grêk mê njik, taz sik cux tsênhv ntâu, lar heik zos muôx ntâu txuz chôngz lênhx trâul pôngz đêx. Cơ quan muôx vax huôv thiêz cxuô thax tsav qơư tsi so heik tsôngv pêx xênhv cov tsưx phưv, seiz shuôs njôngr têx mê tuz mê nhuôv, lar heik zos hâur six hơưv cheix ntux sor:

“Cơ quan Lox tôngv Xaz pênhz Xã hội zos taz viv seiz car, hâu nov hâur huyện, hâur xã tsuv tsi so yax kriê txos trâu têx lênhx uô niêv uô txir, lok sik chor nênhs seiz jor, por hưv têx nhuôs zâu tsuv seiz shuôs njôngr chor nhuôs ntơưv vax tsêr, tsi chiê têx nhuôs zâu muk uô si iz lênhs, nhoz jê têx ntus đêx, pak đêx riêz nênhs”.

Heik lol sâuv luôs hâux lưv phax tar pôngz đêx trâu têx shux xênhz, zơưv Đỗ Trường Hiệp, Phưv Giám đốc Sở Zoz zux Đắc Lắc heik:

“Sở Zoz zux tỉnh chox kriê cxuô luz tsêr cơưv bax kriê têx txux chi tsưr ziv uô nênhx, lok sâuv phax tar pôngz đêx trâu shux xênhz; tso cưk kriê muk cơưv cxaz nzir têx tsưr ziv yuôr trâul chiê lok đros paz kriê txux chi uô luôv đêx trâu têx nhuôs shux xênhz. Cxiv tsa têx faz tsưr ziv phax tar têx tsi jông, hâur co muôx phax tir thêir pôngz đêx nhoz hur si cxuô luz tsêr cơưv, sir jos txos shông 2030, txo grêk tsơưs 30% têx txuz pôngz đêx, txos shông 2025, 50% shux xênhz hâur thax tsav tỉnh Đắc Lắc pâuz uô luôv đêx”.

Thâuv muôx tas nro chuôz zis, tsêr cơưv ntơưr thiêz xã hội sik đros thôngx siêz, côngv tsưr ziv bax phax tir thêir têx tsi jông trâu nhuôs zâu, hâur co muôx pôngz đêx, vav chiê siêz tiêk, hâur six hơưv zuôr txos ntơưv Đắc Lắc zuôr tsi muôx yưv têx cêr pôngz siêz viv pôngz đêx li heik sâuv./.

(Tuấn Long VOVTN-Riê Lâux cxeik, nhênhv)

Shôngx A Ly- Lênhx đangv viên jông nhoz Nậm Vì

10 shôngk tov ntêx, iz cxiê xã, jêx jos nhoz huyện ntus đriv Mường Nhé, tỉnh Điện Biên muôx yưv iz cxiê vênhv thix phưx txuôx lok txiv ngaz viv tsôngv box tsir têz tsir qơư chuôz ndê siêz. Taz sik, nhoz ntâu jêx jos txơưr, hâur co muôx Huổi Lúm, xã Nậm Vì, txiv ngaz chinhr trị ngaz tul. Chêx cuk no muôx tâu khov muôx Chi bộ Đảng thiêz têx lênhx đảng viên jông sir jos muk txos yênhx ziv chuôz zis chiê yax mông trâu tsôngv box pâuz, uô jông trơưk Đảng li chủ trương, têz qơưk li cêr chei chiê ngaz tul luz nênhx. Tix lâuk Shôngx A Ly pheiz kênh: Shông 2011, iz cxiê lênhx nênhs fêv sik hâuz zâuv yênhx tix "têz qơưk Hmôngz" nhoz jos Huổi Khon, xã Nậm Kè. Thâuv co, pox nhuôs nhoz Huổi Lúm cux tsi pâuz mnôngs lơưr lênhx tưs. Muôx lênhx nênhs hâur jos trâus moz, mnôngs lơưr nênhs fêv luk mak zông mor, zông đêx, tsir muk pêv har jôngr chiê tâu tas siv nênhx, xar njôngr tuôs lơưv zuôr muôx tâu luz nênhx jông đuô. Chiê pox nhuôs tsi mnôngs lơưr nênhs fêv, đros thiêz pưs txux zos iz lênhx đảng viên, heik tâu mak tsuv uô tâu, tix lâuk tưz heik kriê pox nhuôs uô 2 chiv blêx liêx, tsuôk zuôr pox nhuôs tsi cxoz tsir têz tsir qơư. Heik ntâu mak jux jus cux tưz muôx 2,3 ziv chuôz zis mnôngs thiêz uô lơưr, đhâu co zos tas nro jêx jos mnôngs lơưr. Khov co thâuv Huổi Khon muôx hâux lưv nxor loanv, mak jos Huổi Lúm cux tsi mnôngs lơưr, thiêz tso siêz uô nox uô hâuk, nhoz uô nênhx.

          "Đros thiêz đảng viên li pưs txux, sơưr thơưx hâur chi bộ, cur thâuv tưs heik mak cux zuôr uô tâu, sir jos paz pox nhuôs huôv tsar kinh têr, taz por côx phax txiv ngaz, vênhv tôngv pox nhuôs chos blêx 2 chiv iz shông. Cur cux zuôr sir jos viv pox nhuôs luz nênhx, tsuôr pox nhuôs tsi mnôngs lơưr nênhs fêv, tsi tsir têz tsir qơư"

          Zos đảng viên hâur lưx lươngv dân quân thâuv co, A Ly thâuv tưs cux uô ntêx nyuôk hâur xã, hâur jos li cxuô luôk hâux lưv, viv li tix lâuk tâu njênhs njôngr uô Bí thư Chi bộ hâur jos. 10 shông đhâu, zos Bí thư Chi bộ, tix lâuk Shôngx A Ly suôr tsi tâu shor muôx hor ntâu jiês tix lâuk muk đhâu trôngz đhâu har chiê njiz thiêz vênhv tôngv yênhx lênhx nênhs, yênhx ziv chuôz zis sir jos uô nox, huôv tsar kinh têr chuôz zis. Tix lâuk Zax A Hả, tsôngv box jos Huổi Lúm, xã Nậm Vì, huyện Mường Nhé, tỉnh Điện Biên puz pâuz: Tix lâuk 2 niêv txir muôx ntu mnôngs lơưr nênhs fêv, tso vax tsêr tsês tsir muk pêv har jôngr nhoz. Khov muôx Shôngx A Ly tuôx vênhv tôngv, heik kriê tsưr ziv uô nox, tix lâuk 2 niêv txir tror lok nhoz uô nênhx ntơưv qơư kuz thiêz tsâu siêz uô nox:

          "Môngr jông muôx đồng chí Ly heik kriê viv li cur 2 niêv txir tsi tsir muk pêv har jôngr thiêz, tso siêz nhoz uô nênhx thiêz iz shông uô 2 chiv blêx, tu zus 5 tul buô, uô chơưr poz cưk. Txos nhiv no chuôz zis muôx nox muôx tsês. Hâur shông no cur cux sir jos krêz qơư chiê tu zus tsiêx cxu keiz ok. Nhiv no chuôz zis luz nênhx ngaz tul thiêz tsênhv tsoz phưz 2 tul mê nhuôs muk cơưv đại học nhoz Hà Nội"

          "Zuk zos lênhx nênhs hâur tuêv paz tsôngv box huôv tsar kinh têr taz sik zuk jos tsênhv lok six pluôk, tsuv uô li chas chiê tsôngv box muôx txâuk nox?". Lo luk co thâuv tưs cux nhoz trơưr hâur lênhx đảng viên Shôngx A Ly li tâuz hâu. Txix siêz xar co, tix lâuk qir nriêr pâuz sâuv mạng txix hâux lưv zôngv têx zav meir lok tsêz chos, tu zus, txos nhiv no hâux lưv hlôngr yiêz tsưr ziv tsêz chos, txos hâux lưv truôx siêz paz pox nhuôs mak tsi zuôr pâux nzir tul tsi. Zơưv Shôngx A Say, Phưv Bí thư Đảng ủy xã Nậm Vì, huyện Mường Nhé, tỉnh Điện Biên puz pâuz: Ntu shông 2011, sir tas đas jos mak iz shông jos Huổi Lúm cux tsuôk uô tâu iz chiv blêx liêx, ntâu chuôz zis tsi muôx nox. Shôngx A Ly tưz cuiz tênhv đros thiêz 5 cưr tix txơưr hâur chuôz zis zuôr iz luz meir tsuôr ar tsiv grê 24 tsov đeiv- luz meir thiêz chor nhiêx txiêx yưv zos lok six ntâu pir đros tsôngv box hâur jos ntu co. Taz sik hâux lưv uô co tưz gôngr phênhv muôz siêz luz nênhx, huôv tsar kôngz nuv trâu tsôngv box hâur jos. Co zos nhiv no chuôz zis tưs cux muox txâuk nox, tsi trâus nyeiz pluôk li ntu đrav ntêx thiêz:

          "Đồng chí Shôngx A Ly zuôr meir thiêz heik kriê pox nhuôs zôngv, thiêz zuôr meir paz pox nhuôs krêz phaz uô liêx kêz nteir, zôngv têx cưx đês mê uô pas zus njês chiê phưx vưv chuôz zis. Pox nhuôs luz nênhx yênhx trus tâu muôz siêz, hlôngr yiêz. Chuôz zis tưs cux muôx keiz, ok, muôx cxur tsês chiê. Chính quyênx tiv phaz cux lok six jông siêz"

          Hla đhâu luz nênhx yeiz pluôk, tsôngv box Huổi Lúm li luz nênhx ziv hnuz ziv hlôngr yiêz jông, đros têx txox cêr yiêz, têx luz tsêr tâu cxiv uô jông, têx mê nhuôs tâu muk cơưv ntơưr, têx har jôngr njuôz jông. Pox nhuôs li cêr shir phaz cux chênhr zos cêr jông siêz mak lênhx đảng viên hluôk Shôngx A Ly thâuv tưs cux xar njôngr txos./.

                                                Vũ Lợi- Txâur Vax cxeik nhênhv