Bắc Kạn: Sir jos uô cov tiêr luôs hâux lưv paz uô tsêr nhoz trâu chor chuôz zis pluôs lok shông 2025

Hli 8 no, pos Hoàng Thị Nháy nhoz jok Đon Tuấn-Khuổi Dủm, phường Huyện tụng, TP Bắc Kạn chuôz zis tưz tâu uô nênhx nhoz hâur luz tsêr khor truôx, đar pho. Pos Nháy shông no muôx 64 shông, trâul moz plơưr, tsi yuô muôx đas jos huôv tsar uô nox viv li nhiêx zuôr yuôx nox iz hlik cux tas xar muôx 2 tsov đeiv. Pâuz tâu pos Nháy luz nênhx txov nhêv, Ban côngz xưv Mặt trận tổ dân phố tưz muôx luk hu lơưk cxuô ban, ngênhx, đoanx thêv sik côngv têk paz cxiv uô tsêr nhoz trâu pos chuôz zis. Hli 7 nhiv kruôr đhâu, txix Ủy ban MTTQ tỉnh, Công an TP Bắc Kạn, Ủy ban MTTQ phường Huyền Tụng têx pênhr paz, pos Nháy luz tsêr tưz tâu cxiv uô yiêz. Pos Nháy shir phaz heik: “Cur lok six jông siêz, shir phaz viv tâu đoanx thêv, têz qơưk, tsôngv cưr tix nênhx tsa paz cxiv uô tâu tsêr yiêz. Cur muôx moz gênhk, uô tsi tâuk vax tsêr khor truôx nhoz, mê nhuôv cux li ntơư. Sơưr đơưk lok six moz siêz txos, tưz paz cxiv uô tâu vax tsêr, têx tuz nhuôs muôx qơư nhoz gâuv yar gâuv nas, cur shir hênhr”.

Niêv lâul Nông Thị Hiển nhoz jok Nà Vài, xã Bằng Thành, huyện Pác Nặm chuôz zis zos ziv chuôz zis pluôs, ho nhoz thax tsav txov nhêv hâur tỉnh Bắc Kạn. Ntêr lok no, tas nro niêv lâul chuôz zis cux tsênhv uô nênhx nhoz hâur luz tsêr kâus kêz jik, tsi pâuz shor txos thâuv tưs thiêx muôx nhiêx cxiv kho tâu vax tsêr khor truôx. Thâuv hâur shôngk shông 2024, niêv lâul chuôz zis tưz tâu paz 50 tsov đeiv txix Cuiv nhiêx viv nênhs pluôs tỉnh Bắc Kạn, đros trâu chuôz zis têx nhiêx txiêx cxênhx txuôs tâu thiêz chor cưr tix nênhx tsa hâur jok siz chos paz, niêv lâul tưz cxiv tâu iz luz tsêr yiêz, khor truôx đuô nhoz. Niêv lâul Hiển shir phaz heik pâuz: “Thâuv ntêx cur chuôz zis luz tsêr zos tsêr ntông, vor vuôk prôximăng, taz sik têx vuôk tưz trâul tơưs tas ntâu, lok nas lok six xâu, thâuv tưs muôx nas chuô lox, nyei tưz tsi car pư hlo. Nhiv no tâu MTTQ thiêz chor nênhs siêz jông paz max, cur tưz cxiv uô tâu tsêr khor truôx nhoz, nhiv no tso siêz lơưv”.

Hâur six cxiv 2019-2024, Ủy ban MTTQ Việt Nam tỉnh Bắc Kạn tưz đros hâu nov cxuô cấp sir jos uô phôngz yaox “Tas nro têz qơưk viv nênhs pluôs-tsi chiê lênhx nênhs tưs trâul txov nhêv”. 5 shông đhâu, Bắc Kạn tưz vênhv tôngv thiêz lênhk txeik Cuiv nhiêx “viv nênhs pluôs “ 95 tyv đeiv ntâu; txix chor pênhr heik sâuv thiêz têx nhiêx txiêx sơưr đơưk sik đros paz, MTTQ cxuô cấp thiêz têx tsưr tsix thành viên tưz paz cxiv uô yiêz, kho đuô tâu zuôr xar 2 cxênhz luz tsêr trâu chor chuôz zis txov nhêv lok tsêr nhoz. Chor nuv uô jông muôx têx lar heik txos li: Iz lênhx bôv đôiv lâul tỉnh Bắc Kạn paz txix 10 cxênhz đeiv tror zar sâuv iz shông chiê paz uô tsêr nhoz trâu chor bôv đôiv lâul muôx luz nênhx txov nhêv, khov li co, nhiv no 100% bôv đôiv lâul tỉnh Bắc Kạn phênhv ntâu tưz muôx vax tsêr khor truôx nhoz. Zơưv Nguyễn Văn Cường, Chủ tịch Hội bôv đôiv lâul phường Phùng Chí Kiên, TP Bắc Kạn heik: “Lok sâuv sik đros paz nhiêx txiêx trâu têx lênhx hội viên, bôv đôiv lâul txov nhêv lok tsêr nhoz, zos uô trơưk Đại hội Hội Bôv đôiv lâul tỉnh Nghị quyết, hu lơưk tas nro têx lênhx hội viên hâur tỉnh siz chos paz iz lênhs txix 10 cxênhz đeiv tror zar sâuv. Sơưr đơưk puôr lênhx jông siêz, thôngx ziv đros, muôx kênh lênhx tsênhv paz txos 200 cxênhz đeiv thiêz”.

Trơưk li pos Đỗ Thị Minh Hoa, Chủ tịch Ủy ban MTTQ Việt Nam tỉnh Bắc Kạn: Nghị quyết Đại hội Đại biểu MTTQ Việt Nam tỉnh Bắc Kạn hâux lưv tso tơưv trâu ntu 2024-2029 zos, hâur shông 2025 paz uô cov tâu 2 cxênhz luz tsêr nhoz trâu têx lênhx muôx luz nênhx txov nhêv: “Pêz xav tinhv hâux lưv yax kriê, vênhv tôngv têx tsưr tsix, lênhx nênhs, chor nênhs siêz jông chiê sơưr đơưk sik đros paz tâu ntâu đuô cov cuiv nhiêx viv nênhs pluôs muôx têx paz tâu ntâu chuôz zis pluôs, chuôz zis txov nhêv hla đhâu yeiz pluôs”.

Txơưv zos tỉnh tox siêz, txov nhêv yax hâur têz qơưk, têx chuôz zis pluôs tsênhv yuôr ntâu tsênhv thâuv têx pênhr paz tsơưs, taz sik txix cxuô cấp hâu nov ntơưv qơư, đoanx thêv, chor nênhs siêz jông têx sir jos paz, lar heik zos Ủy ban MTTQ cêr uô ntêx nyuôs, Bắc Kạn zuôr sir jos uô cov tiêr nzor luôs hâux lưv heik sâuv, tsi chiê chuôz zis tưs trâul txov./.

VOVĐB-Riê Lâux cxeik, nhênhv    

Lênhx shux xênhz thik tâu điểm siêz tiv zix nhoz Cao Bằng li têx sir jos

Txir tâu tas siv nênhx txix thâuv Đinh Huy Hoàng nhiv kruôr zos tul nhuôv tuz muôx 10 shông hnuz nhôngs. Chuôz zis muôx 2 niêv tuz viv li Hoàng chir chir uô cxuô luôk hâux lưv txix thâuv tsênhv zâu. Hluz niêv iz lênhs cxơưx trâu zuk tâu muk cơưv ntơưr viv li Hoàng lok six sir jos cơưv ntơưr, ntâu shông tsi so puôr lênhx tax tâu shux xênhz cơưv ntơưr hênhr.

          Thâuv thik tâu muk cơưv tsêr cơưv nội trú tỉnh, Hoàng lok six shir phaz viv cơưv ntơưv no mak lok six jông, niêv cux tsi tsuv cxơưx thiêz. Hâur 3 shông cơưv ntơưv tsêr cơưv PT mênhx cxưx nội trú, Hoàng tax tâu ntâu yênhx tix siêz, điểm chungz fênhx môn cơưv zos 9 điểm ndê muk. Shông lớp 11, Hoàng tax giải 3 thiêz lớp 12 tax giải 2 jiês thik shux xênhz cơưv hênhr cấp tỉnh môn Hóa; giải 4 jiês thik Robotics cấp tỉnh. Điểm thik cơưv tiêr cxênhx 3 shông 2024, Huy Hoàng tax 28 điểm, hâur co môn Toán 9 điểm, Vật lý 9,5 điểm, Hóa 9,5 điểm, yênhx lênhx shux xênhz tax điểm siêz tiv zix khoa khối A00 hâur tỉnh. Pheiz kênh lok tsưr ziv cơưv ntơưr chiê tax tâu chêx cuk siêz li ntơưv, Hoàng puz pâuz: “Cur li chênhz zênhv zos thâuv tưs cux uô lơưr cưk kriê têx tsưr ziv kriê sâuv lớp cơưv, cơưv jông têx yênhx tưv muôx hâur ntơưr giáo khoa. Thâuv cơưv tas sâuv lớp cur thâuv tưs cux chiv chir qênhz yuôx đuô zuk seiz to tâuz tas têx njiêz luv zuk tưz cơưv lơưv tâu. Đros môn Toán, Vật lý muôx lok six ntâu công thức, muôx têx công thức cur tsuv nriêr pâuz seiz lơưr cxiv tsa công thức co li chas, txix têx co cur ndo têx công thức co tâu ntêr đuô”.

          Hluz niêv khưr muk uô jos chiê cxơưx trâu zuk luz nênhx, tâu muk cơưv ntơưr viv li thâuv tưs tâu so nhoz tsêr, Hoàng cux tsês six hơưv paz niêv uô hâux lưv. Pos Nguyễn Thị Liên (nhoz jê Hoàng tsêr nhoz phố Hòa Bình, thị trấn Quảng Uyên, huyện Quảng Hòa, tỉnh Cao Bằng) puz pâuz: “Cur pov tul nhuôv Hoàng lok six ciêz, gruôs cơưv ntơưr, pâuz niêv tsi muôx hâux lưv uô truôx, Hoàng lok six sir jos cơưv ntơưr, so mak nhoz tsêr paz niêv uô hâux lưv, tax tâu yênhx tix li hnuz no zos lok six tsiv nhos, lok six jông siêz trâu Hoàng”

          Đros têx yênhx tix cơưv ntơưr hênhr, Hoàng thâuv tưs cux sir jos cxaz chuôz côngz xưv Đoàn, têx huôx tôngv vênhx ziv, thiv thao hâur tsêr cơưv; jông siêz tâu jênhv học bổng Odon Vallet thiêz tâu kruôk zos “Lênhx nênhs jông” hâur tsêr cơưv….Đinh Huy Hoành cux puz pâuz tưz đăng cir xeir zuôr cơưv iz nganhx kỹ thuật hâur tsêr cơưv Đại học Bách khoa Hà nội chiê tov kaz no sir jos uô trơưk zuk li siêz xar njôngr lok kỹ thuật công nghệ: “Cur đăng cir cơưv Đại học Bách khoa Hà Nội, cur xar njôngr tov kaz no tơưv shux zuôr yênhx iz lênhx kỹ sư uô vi mạch, chiê uô tâu têx chip, chuôz zênhx bán dẫn jông tiv zix, yiêz tiv zix…”

          Zos shux xênhz thik tâu điểm siêz tiv zix, Đinh Huy Hoàng li yênhx tix tax tâu zos lok six tsiv nhos đros Hoàng li têx sir jos cơưv ntơưr hâur 12 shông cơưv thiêz zos kror truôx tul paz lênhx shux xênhz nhoz tox siêz no tror uô tâu zuk li siêz xar njôngr trâu hâur ntu zuôr txos./.

VOVĐB-Txâur Vax cxeik nhênhv