Pox niêv mênhx cxưx tsơưs nênhs Gia Lai tâu têz qơưs muôz pênhr nhiêx paz tsưx phưv đas jos-xênhz zus mê nhuôv

Đros tỉnh tox siêz muôx chôngz tsôngv box mênhx cxưx tsơưs nênhs nhoz uô nênhx, thiêz chor pox niêv xênhz zus nhuôk hâur tsêr tsênhv tsav siêz pir đros phênhv chungz fênhx tas nro têz qơưk. Krêz uô Dự án 8 lok uô fênhx zav cxênhx txir nênhx thiêz pox niêv thiêz car chêx têx vênhv thix zuôr trâus đros pox niêv thiêz mê nhuôv, ntu I 2021-2025, Gia Lai zos 1 hâur 10 tỉnh tâu tsov cưv krêz uô 4 chính sách paz txưv pox niêv mênhx cxưx tsơưs nênhs xênhz zus nhuôk taz por thiêz tsoz phưz đas jos mê nhuôk muôx: tsoz phưz uô ntêx thâuv xênhz zus, paz txưv hâur ntu xênhz zus nhuôk; paz txưv tsoz phưz đhâu thâuv xênhz zus nhuôk; tsoz phưz đas jos trâu mê nhuôk.

          Ntu đhâu, têx cấp hội tưz sik côngv đros nganhx y tế tsưr tsix zuôr xar 100 jiês yax mông zaoz zux muôz siêz jênhv pâuz thiêz vênhv tôngv pox niêv xênhz zus nhuôk ntơưv qơư y tế, zaz zâuv 7 cxênhz ntâu lênhx pox niêv hâur hov hnuz nhôngs xênhz zus cxaz chuôz. Đrâuv co, tưz paz 361 hội viên pox niêv xênhz zus nhuôk ntơưv qơư y tế đros chor nhiêx txiêx zos zuôr xar 365 tsov đeiv. Đhâu têx huôx tôngv paz txưv no, tsi taz muôz siêz yênhx tưv, pênhr xưv tsoz phưz đas jos trâu pox niêv, mê nhuôk mak tsênhv gôngr phênhv paz chuôz cxaz đas jos chiê pox niêv muk qơư y tế xênhz zus nhuôk, sir jos uô trơưk chính sách jênh số. Niêv lâuk Rơ Châm Alênh, nhoz jos A Mơng, xã Ia Mơ Nông, huyện Chư Păk, tỉnh Gia Lai heik: “Cur tâu paz zuôr khâuz ndơưk, zuôr bỉm trâu mê nhuôk. Đhâu co cur pov lok six jông siêz viv cê jênhv tâu phênhv paz txưv, cê tâu heik kriê tsưr ziv tsoz phưz mê nhuôk cxix cxuô. Xênhz zus ntơuv qơư y tế xã zuk mê nhuôk tsênhv tâu cxax yuôx phax moz cxix cxuô, tâu seiz njuôs moz cov jông”.

          Đhâu hâux lưv krêz uô ntâu tsưr ziv paz pox niêv mênhx cxưx tớưs nênhs xênhz zus nhuôk taz por thiêz tsoz phưz đas jos mê nhuôk zâu tưz gôngr phênhv paz muôz siêz pox niêv li jênhv pâuz lok xênhz zus nhuôk taz por; lok tsoz phưz đas jos trâu pox niêv, mê nhuôk txix sir zôngv têx jix vuv y tế; pâuz thiêz tsoz phưz mê nhuôk trơưk tsưr ziv. Niêv lâuk Đinh Ly Ơn, nhoz jos Hek, xã Chư A Thai, huyện Phú Thiện, tỉnh Gia Lai puz pâuz: “Cur xênhz zus tul nhuôk hloz, tov kaz no zuôr tror xênhz tul tiv 2. Thâuv zuôr xar xênhz zus nhuôk cur muk qơư y tế chiê taz por trâu zuk thiêz mê nhuôk. Cur cux zuôr sir jos tsoz phưz chiê mê nhuôk muôx jông đas jos”

          Đhâu 3 shông krêz uô Dự án 8 sâuv thax tsav tỉnh Gia Lai tưz tax têx chêx cuk jông hâur cxuôv por tsês têx phênhz pêx lok txir nênhx thiêz pox niêv, uô muôx chêx cuk tsưr ziv pox niêv txir nênhx vax huôv siz luôs thiêz muôz siêz luz nênhx chinhz yênhx trâu pox niêv thiêz mê nhuôk thax tsav tsôngv box mênhx cxưx tsơưs nênhs. Heik cxuô lok chêx cuk krêz uô dự án 8 ntơưv tỉnh, pos Rơ Chăm H’Hồng, Chủ tịch Hội liên hiệp pox niêv tỉnh Gia Lai heik: “Têx trâur nuv, têx huôx tôngv thâuv tâu tsưr tsix krêz uô txos tỉnh, txos nhiv no mak tâu tsôngv box thiêz Hội viên pox niêv tos jênhv, tâu cấp ủy, chính quyênx tiv phaz ntâuk grê siêz. Hâur ntu zuôr txos mak têx cấp Hội tror chuv tôngv phuôx huiz zuk li pưs txux heik kriê, tsưr tsix krêz uô muôx chêx cuk 16 huôx tôngv nhoz 4 njiêz luv tsênhv hâur dự án 8, sir jos hla đhâu tsưr ziv tso tơưv hâur ntu 1. Tiv zix zos tsưr tsix têx huôx tôngv uô hlôngr yiêz siêz xar, tsưr ziv uô, gôngr phênhv cxuôv por tsês têx phênhz pêx lok txir nênhx thiêz pox niêv hâur côngv thôngx; têx cêr uô nênhx tsi jông thiêz iz cxiê vênhv thix xã hội zuôr trâus đros pox niêv thiêz mê nhuôk zâu”.

          Cux lơưr Chủ tịch Hội liên hiệp pox niêv tỉnh Gia Lai, Hội zuôr tror tuôr truôx têx trâur nuv uô jông no, chiê uô hlôngr yiêz siêz xar, tsưr ziv uô, muôz siêz pox niêv li pênhr xưv huôv tsar kinh têr, cxơưz tiês fênhx zav cxênhx txir nênhx thiêz pox niêv, car chêx têx vênhv thix zuôr trâus đros pox niêv thiêz mê nhuôk zâu, taz por pox niêv thiêz mê nhuôk li luk heik, cxaz chuôz tsênhv tsênhz hâur têx huôx tôngv huôv tsar kinh têr, xã hội nhoz côngv thôngx. Seiz car jông, paz muôz siêz pox niêv li pênhr xưv cxaz chuôz lênhs tov hâur cxix luôk chính trị. Tsưr tsix têx huôx tôngv bax lok yênhx tưv fênhx zav nênhs, pênhr xưv uô uô cê lok hâux lưv fênhx zav nênhs trâu cán bộ hâur cxix luôk chính trị, têx lâuk jos, tsar jos, têx lênhx txir ndâux txir luk hâur côngv thôngx. Đhâu co zuôr paz uô hlôngr yiêz tsênhz mênhx hâur uô hâux lưv fênhx zav cxênhx txir nênhx thiêz pox niêv, car chêx têx vênhv thix zuôr trâus đros pox niêv thiêz pox niêv, gôngr phênhv muôz siêz luz nênhx chinhz yênhx trâu pox niêv, mê nhuôk nênhs mênhx cxưx tsơưs nênhs sâuv thax tsav tỉnh Gia Lai.

          Đros ntâu huôx tôngv tsênhv tsênhz thiêz muôx ziz njiêz tưz thiêz tsênhv tâu têx cấp Hội liên hiệp pox niêv hâur tỉnh Gia Lai sir jos krêz uô, dự án 8 tâu njênhs njôngr zuôr paz trâu têx huôx tôngv, trâur nuv txơưr tâu krêz uô muôx chêx cuk thiêz truôx vênhs ntơưv thax tsav tsôngv box mênhx cxưx tsơưs nênhs Gia Lai./.

Hoàng Thái-Txâur Vax cxeik nhênhv

Sơn La sir jos uô luôs hâux lưv phax tar têx zak zưr vuôz tsuôz, kiêk nênhs hâur luz nênhx

Fuô uô luôs hâux lưv phax tar têx zak zưr tsi zôngv txos, tỉnh Sơn La tưz tso tơưv ntâu tsưr ziv, ntâuz ntơưr lok uô têx hâux lưv, sir jos seiz car, muôz têx zak zưr tsiv uô đuô lưv zav chuôz zênhx sir zôngv, chiê txo grêk tsơưs têx zak zưr vuôz tsuôz txos cxuô sở, ngênhx, Ủy ban cxuô huyện, TP. Iz chas ntơư, sir jos uô hâux lưv yax mông, fuô kriê têx cui tinhv chei têz qơưk lok por hưv tênhx qơư, phax tar zak zưr uô vuôz tsuôz, kiêk nênhs  txos cxuô lênhx pêx xênhv.

Đros trâu têx li heik co, nhoz cxuô cơ quan, taz viv tưz đros phuôx tôngv sir zôngv têx xiv huv uô hur tênhx qơư, tsơưs zôngv txos têx hnaz tax, hưx, têik zak zưr; phênhz chor hưx, têik muôx têx tror tsiv uô đuô tâu lưv zav ntơư chiê khơưk sâu thiêz muôs trâu chor qơư sâu zuôr.

Iz cxiê sở ngênhx tưz fuô uô têx hâux lưv tsênhv tsênhz li: Hội Liên hiệp pox niêv tỉnh fuô uô 4 trâur nuv jông “Qơư khơưk sâu, zuôr têx zak zưr tsi zôngv txos chiê muôs trâu tsêr máy tsiv uô, tâu nhiêx txiêx paz trâu chor nênhs muôx luz nênhx txov nhêv”; Tỉnh đoanx Sơn La tưz fuô uô tsaz yênhx Hluôk nênhs sik đros phax tar têx zak zưr vuôz tsuôz, kiêk nênhs đros thiêz tsưr ziv uô jông: Muôz têx zak zưr ntơư tsiv uô đuô lưv zav chiê sir zôngv; Ciêz đrôngs txo grêk tsơưs têx hnaz tax, zak zưr vuôz tsuôz, muôz têx zak zưr co pâur zuôr zuz tsoz chos, chor nênhs uô hâux lưv jông siêz uô đreiv luôs hâux lưv khơưk sâu têx zak zưr hâur đrôngs Sơn La. Ngênhx Công thương yax kriê, vênhv tôngv cxuô luz ciêz, qơư zuôr muôs hax huv cir ntơưr chos luk đros phax tar têx kiêk nênhs, vuôz tsuôz li heik sâuv, tsơưs zôngv txos chor hnaz tax; hlôngr pâur sir zôngv têx zav hnaz uô hur tênhx qơư, zôngx ziv lưx tâuk. Ngênhx vênhx huôv, thêv thao thiêz ju lix tưz kriê têx thax tsav, qơư ju lix, qơư nhoz so, qơư uô jâuz mor nox tsi so khơưk sâu, xưv lik têx kiêk nênhs, vuôz tsuôz trơưk cui tinhv; sir jos muôz têx zak zưr tsiv uô đuô lưv zav, hlôngr sir zôngv têx hưx, têik trâu đêx tsi zos zak zưr chiê por hưv tênhx qơư hur si, đu lus. Uô lơưr têz qơưk tsaz yênhx cxiv tsa jêx jok yiêz, cxuô thax tsav qơư tưz moz siêz yưv pênhr, sir jos fuô uô luôs hâux lưv por hưv tênhx qơư, qêz suô, khơưk sâu têx vuôz tsuôz, kiêk nênhs.

Lơưr zơưv Lê Văn Tuất, Giám đốc Công ty tênhx qơư tỉnh Sơn La: Xav kror đruôz đraz iz hnuz iz hmo, taz viv qêz suô, khơưk sâu 80 tênhr têx vuôz tsuôz, kiêk nênhs xênhz huôx. Công ty tsêr meir tsi uô têx nuv li: Muôz chor zak zưr vuôz tsuôz tsiv uô đuô lưv zav ntơư. Taz sik, ntơưv tsêr meir, chor zak zưr vuôz tsuôz co tsênhv tâu công nhân phênhz thiêz khơưk sâu đros lưv zav txơưr đuô muôx têx tsiv uô thiêz sir zôngv tâu: “Hâur tsêr meir xưv lik, jov têx vuôz tsuôz, kiêk nênhs tsênhv tâu chor nênhs uô hâux lưv hâur tsêr meir phênhz, khơưk sâu têx zav muôx têx tror tsiv uô tâu lưv zav li: Kuôr hlâu, têx zak zưr. Lơưr chei por hưv tênhx qơư cui tinhv, txos hnuz 31/12/2024, tas nro têz qơưk tsuv phênhz têx kiêk nênhs, vuôz tsuôz nhiêk tso nhiêk iz kro. Zos uô tâu jông luôs hâux lưv no mak co zuôr zos iz kro jông chiê txo grêk tsơưs têx zak zưr kiêk nênhs, vuôz tsuôz”.

Trơưk li Chính phủ hâux lưv tso tơưv txos shông 2025 zuôr sir zôngv 100% têx hnaz uz no uô hur tênhx qơư nhoz cxuô qơư zuôr muôs hax huv, hâur ciêz đrôngs hlôngr viv chor hnaz tax lưx tsi tâuk ntơư, Tsiv uô đuô, xưv lik 85% têx zak zưr tsi zuôr, tsi zôngv txos, vuôz tsuôz tênhx qơư. Chiê uô hâux lưv co, tỉnh Sơn La tưz tso tơưv 6 tsưr ziv, li zơưv Thiều Quang Phi Hùng, Phưv Tsar phongx seiz car tênhx qơư nhoz Sở Tênhx qơư tỉnh Sơn La heik: “Tỉnh Sơn La tso tơưv 6 tsưr ziv: Co zos uô tiêr cxix luôs têx cui tinhv, tsênhv chei lok seiz car têx kiêk nênhs, vuôz tsuôz xênhz huôx hâur thax tsav tỉnh, cov huv đros trâu chei têz qơưk têx cui tinhv nhiv no. Sir jos uô luôs hâux lưv yax mông, fuô kriê, vênhv tôngv txo grêk tsơưs têx zak zưr uô tsi hur tênhx qơư. Tsơưs zôngv txos têx zak zưr thiêz hnaz tax lưx tsi tâuk hâur xênhz huôx. Sir jos phênhz têx vuôz tsuôz, kiêk nênhs ntơưv chor qơư trâu têx kiêk nênhs, vuôz tsuôz, cux li cxơưz cxiz uô cxuô luôs hâux lưv phênhz têx kiêk nênhs, vuôz tsuôz nhiêk tso nhiêk iz kro chiê zôngx ziv xưv lik. Uô lơưr khoa học công nghệ hâur seiz car têx zak zưr tsi zuôr, tsi zôngv txos ntơư. Sir jos qênhz yuôx thiêz xưv bluô têx uô cxâuv”.

Đros trâu cxuô faz tsưr ziv uô li heik sâuv, Sơn La tsênhv sir jos sik đros phax tir thêir têx vuôz tsuôz, kiêk nênhs chiê tsưx phưv truôx tuk tênhx qơư./.

Bích Thủy-Riê Lâux cxeik, nhênhv