Tox siêz Mù Cang Chải chuv tôngv phax tar ntux nas, ar poz

Kuôk nor 1 shông tov ntêx, jiês ntux nas lix xưv tưz uô ruôr hiêv hnhar lok lênhx nênhs, tsêr nhoz thiêz têx côngz tsinhx công côngv nhoz Mù Cang Chải. 3 lênhx nênhs tuôs tiv tox poz ar lơưk thiêz đêx cuôr yôngz; zuôr xar 250 luz tsêr trâus ruôr hiêv, hâur co muôx 58 luz trâus puôk tsuôx, ar vôngz thiêz đêx cuôr yôngz tas hur si, 130 luz tsêr trâus puôk tsuôx hnhar thiêz 52 ziv chuôz zis tsuv ciêr chênhr txar qơư nhoz. Têx côngz tsinhx zaoz thôngz, đêx liv, y tế, tsêr cơưv, viễn thông trâus poz vâu, ar vôngz tas…Lơưr thôngz sâu, jiês đêx nas tưz uô ruôr hiêv 400 tỷ đeiv ntâu.

          Chuôz zis zơưv Zax A Chống nhoz jos Trống Là, xã Hồ Bốn zos iz hâur têx ziv chuôz zis trâus ruôr hiêv hnhar đhâu jiês ntux nas. Luz tsêr nhoz đros ntâu chuôz zênhx puôr lênhx trâus đêx nas cuôr yôngz, môngr jông tsi trâus ruôr hiêv lok lênhx nênhs. Đêx nas muk đhâu, chuôz zis zơưv Chống tưz tâu têz qơưk lênhx nênhs siêz jông paz nhiêx txiêx, tsôngv box hâur jos paz côngz uô lox tôngv chiê ar qơư cxiv uô đuô tsêr yiêz nhoz. Uô ntêx thâuv txos cheix lok nas shông no, luz tsêr tưz tâu uô tiêr ntơưv iz qơư đar tiêx jông, tsi cxơưx trâus tox poz, taz por truôx jông đuô qơư nhoz thâuv ntêx: “Khov muôx têz qơưk thiêz tsôngv box hâur jos paz max, shông no chuôz zis tsi cxơưx trâus đêx cuôr yôngz thiêz tox poz thiêz. Cxuô lênhx nênhs pov lok six tso siêz”

          Cux xưk li zơưv Chống chuôz zis, ntơưv jos Trống Là, xã Hồ Bốn, yênhx châuv ziv chuôz zis tsôngv box trâus pôngz lơưv tsêr nhoz thiêz chuôz zênhx chuôz tas tưz tâu huyện paz ar têz, paz nhiêx txiêx cxiv uô đuô tsêr nhoz yiêz. Txos nhiv no, 100% ziv chuôz zis tưz muôx qơư nhoz yiêz taz por.

          Tix lâuk Zax A Hồng, Tsar jos Trống Là pheiz kênh, shông no jos tưz tsưr tsix khiêz phêv tsôngv box thiêz yax mông chiê tsôngv pox nhuôk pâuz lok tsưr ziv phax tar đêx nas, tox poz ar lơưk: “Jos cux muôx tsưr ziv, pir li ntux lok nas fênhx yax mak tsôngv box nhoz tiz jông hâur tsêr, taz sik zos lok nas lox mak tsuv txar qơư nhoz muk nhoz ntơưv qơư jos tưz xeir chiê taz por hâur ntu muôx ntux nas lox, đêx cuôr yôngz, tox poz”

          Zơưv Shôngx A Bình, Chủ tịch UB xã Hồ Bốn puz pâuz, jiês ntux nas tsêz no, xã trâus ruôr hiêv hnhar tiv zix hâur huyện đros muôx 58 chuôz zis trâus zênhr shar, hâur co muôx 21 ziv chuôz zis tsêr nhoz trâus đêx cuôr yôngz tas hur si, 13 chuôz zis tsuv txar qơư nhoz. Ntâu cêr muk lok, njưk đêx cưx đês, tsoz chos, tsiêx tu zus trâus ruôr hiêv hnhar…

          Chiê txu grês têx trâus ruôr hiêv hâur cheix ntux nas shông no, xã tưz chuv tôngv uô têx tsưr ziv phax tar ntux nas li yax mông, heik kriê tsôngv box tir their, cxênhx tsês kôngz krâur. Đrâuv co, kho đuô, vêv xênhz, krêz thôngz têx côngz tsinhx tso đêx chiê đêx ntưs tâu thâuv muôx ntux nas. Chính quyênx xã cux seiz shuôk txar qơư nhoz trâu têx ziv chuôz zis nhoz qơư njuôs xav muôx tox poz, đêx cuôr yôngz.

          Cux lơưr zơưv Bình, iz thax tsav qơư tsôngv box nhoz hâur xã cux tâu bax 1 luz kẻng chiê thâuv trâus pôngz tênhv tênhz, tsi muôx sóng điện thoại mak khoz kẻng chiê canhv pov tsôngv box pâuz. Thôngx cxix thâuv muôx njuôs pov zuôr muôx ntux nas, xã chox kriê têx jêx jos heik tuêv uô ntêx nyuôk phax tar ntux nas thâuv muk thôngz pov, yax mông heik kriê tsôngv box… “Xã cux zuôr iz cxiê chênhz zênhv thiêz cxiv tsa tsưr ziv, kho đuô tsưr ziv taz por jông đuô. Hâur co tiv zix zos cxaz nzir njiêz luv zos cêr muk lok tsi tâu mak tsuv uô li chas, trâus pôngz tênhv tênhz mak tsuv uô li chas…”

          Mù Cang Chải nhoz siêz đuô niêv đêx hiêr 1 cxênhz yiv, phênhv ntâu zos trôngz jôngr ntông, muôx ntâu tul đêx lox zâu, zôngx ziv trâus muk lok tsi tâu thâuv muôx ntux nas, tox poz. Zơưv Lê Trọng Khang, Chủ tịch UB huyện Mù Cang Chải puz pâuz, đhâu qênhz yuôx uô ntêx cheix ntux nas, sâuv thax tsav tsênhv yuôr 40 ziv chuôz zis njuôs xav zuôr trâus đêx ngaz, 100 ntâu ziv njuôs xav trâus đêx cuôr yôngz thiêz tox poz.

          Chiê taz por tsôngv box li txox siêr thiêz chuôz zênhx chuôz tas, Ban chỉ huiz phax tar ntux nas- nriêr chơưv nanv huyện tưz cxiv tsa tsưr ziv, pheiz côngz jênhv vưv tsênhz mênhx trâu yênhx chiz coaz, taz viv, ban, nganhx thâuv muôx ntux nas, huiz tôngv 4 ntơưv qơư paz tsôngv box. Têx xã cux tror chuv tôngv seiz shuôk têx qơư njuôs xav muôx tox poz siêz chiê cxiv tsa têx tsưr ziv phax tar muôx chêx cuk; yênhx trus txar qơư nhoz trâu têx ziv chuôz zis nhoz uô nênhx buôk têx tul đêx, thax tsav tox trôngz njuôs xav muôx tox poz muk qơư taz por…“Pêz chox kriê têx lênhx nênhs hâur Ban chỉ huiz phax tar ntux nas-nriêr chơưv nanv chuôz tsar qênhz yuôx tiv phaz thiêz chox kriê têx xã muk txos yênhx jêx jos seiz shuôk, pâuz tâu têx riêz nênhs njuôs xav muôx yưv li tox poz, đêx cuôr yôngz, têx ziv chuôz zis nhoz qơư riêz nênhs ciêr chênhr txar qơư nhoz”.

          Zơưv Lê Trọng Khang cux puz pâuz, huyện cux krêz uô têx tsưr ziv por vêv taz por trâu têx côngz tsinhx đêx liv, đêx tênhv, tsas tir their tox poz, cêr zaoz thôngz, tênhv tênhz, đêx xênhz huôx…. Chiê taz por tsiv uô, muôv muôs tâu hax huv thiêz taz por tsôngv box li luz nênhx hâur cheix ntux nas./.

Đinh Tuấn-Txâur Vax cxeik nhênhv

Cui tênhv paz ar têz trâu tsôngv box mênhx cxưx tsơưs nênhs

Chinhr phuv tso tơưv Nghị định sôr 102 hnuz 30/7/2024 cui tênhv tsênhz mênhx uô lơưr Chêi ar têz iz cxiê grê. Nghị định tâu uô trơưk txix 1/8/2024.

Nghị định hêik mênhx, hâux lưv paz ar têz trâu tiz nênhs zos mênhx cxưx tsơưs nênhs cui tênhv ntơưv ntu 3 Grê 16 Chêi Ar têz tâu uô li đrav kaz:

Đros chor nênhs tsik yuôr ar nhoz mak tâu muôz paz ar nhoz lok sik tâu hlôngr đuô tsưr ziv sir zôngv ar txix têx zav ar txơưr lok uô ar nhoz; nênhs sir zôngv ar zuôr tâu paz tsik tas nhiêx txiêx sir zôngv trâu kror ar tâu choz zok uô ar nhoz lơưr Ủy ban cấp tỉnh li cui tênhv.

Zos muôx tsik txâuk ar nhoz pir li chor ar nhoz tâu choz zok mak tâu hlôngr đuô tsưr ziv sir zôngv ar txix têx zav ar têz txơưr đuô lok uô ar nhoz thiêz tsik tas nhiêx txiêx sir zôngv kror ar hlôngr đuô lok uô ar nhoz co.

Đros chor nênhs tsik yuôr ar uô kôngz nuv lok sik thax tsav ar kôngz nuv tsênhv sir zôngv tsik muôx 50% thax tsav ar pir li chor ar tsuv tâu choz zok uô kôngz nuv ntơưv thax tsav qơư mak tâu choz zok nzir ar uô kôngz nuv tsênhv tsik tâu txâuk co.

Cui tênhv yiêz lok txo grêk nhiêx txiêx sir zôngv ar tâu uô trơưk txix 1/8/2024

Chinhr phuv tso tơưv Nghị định sôr 103 hnuz 30/7/2024 cui tênhv nhiêx txiêx sir zôngv ar, nhiêx ntiêr ar. Lơưr Nghị định, grêk 50% nhiêx sir zôngv ar thâuv tâu cơ quan têz qơưk muôx vax huôv choz zok ar, hlôngr đuô tsưr ziv sir zôngv ar, côngz jênhv qênhx sir zôngv ar trâu chor nênhs pluôs, ziv chuôz zis lok sik tiz nênhs zos mênhx cxưx tsơưs nênhs ntơưv chor thax tsav muôx kinh têr-xar hôiv txov nhêv tiv zix, ntus đriv, poz hiêr. Grêk 50% nhiêx sir zôngv têx ar nhoz trâu chor nênhs cui tênhv ntơưv điểm a thiêz điểm b Chêi Ar têz li ntu 3 Grê 124 tsênhv uô côngz xưv ntơưv têx xar ntus đriv, poz hiêr lok sik huyện poz hiêr tsik muôx taz viv hành chính cấp xar zos thax tsav muôx kinh têr-xar hôiv txov nhêv tiv zix.

Grêk 30% nhiêx sir zôngv têx ar nhoz trâu chor nênhs cui tênhv ntơưv điểm a thiêz điểm b Chêi Ar têz li ntu 3 Grê 124 tsênhv uô côngz xưv ntơưv chor xar ntus đriv, poz hiêr lok sik huyện poz hiêr tsik muôx taz viv hành chính cấp xar nhoz thax tsav muôx kinh têr-xar hôiv txov nhêv. Nghị định no tâu uô trơưk txix hnuz 1/8/2024./.

Chinhr phuv.vn-Lik Thox cxêik nhênhv