Txir nênhx, pox niêv vax huôv siz luôs nhoz tox siêz mênhx cxưx tsơưs nênhs tỉnh

Thái Nguyên

            Niêv lâuk Bàn Thị Hằng chuôz zis zos iz hâur têx ziv chuôz zis txơưx huôv tsar cêr uô nox nhoz xã Quân Chu, huyện Đại Từ, tỉnh Thái Nguyên. Khov gruôs khưr huôv tsar uô nox, niêv lâuk Hằng 2 niêv txir tưz cxiv tsa tâu trâur nuv chos ntông nox txir đar 3 hecta đros trâu chos tsơưz, zuôr xar 3 cxênhz tsoz txir lưs jôngr, txir chuôz thox, txir lưv tsiz sôngz, tso lok phênhv sâu ngaz tul yênhx puôk tsov đeiv iz shông. Niêv lâuk Bàn Thị Hằng puz pâuz: no cux zos têx tax tâu jông txix niêv lâuk 2 niêv txir li têx sir jos cov txir nênhx pox niêv vax huôv siz luôs, sik đros pheiz kênh txix ciês thâuv nhiv kruôr siz zuôr uô txix gơưv txos nhiv no:

          “ Hâur luz nênhx, cur tul txir cux sik đros pheiz kênh têx hâux lưv. Viv li cur muôx ntâu six hơưv chiê tsoz phưz zuk thiêz chuôz zis”

          Tix lâuk Nguyễn Văn Dân, niêv lâuk Hằng tul txir heik:

          “Cur li siêz xar zos paz tâu trâu pox niêv tul tsi mak paz. Muk uô hâux lưv lok tsêr cux paz pox niêv uô jâuz mor, têx hâux lưv hâur tsêr. Cur pov tsuv uô li ntơưv chuôz zis thiêx li shir phaz”

          Niêv lâuk Nguyễn Thị Luyện, nhoz xã Đồng Thịnh, huyện Định Hóa, tỉnh Thái Nguyên, niêv lâuk li kror jông siêz zos thâuv muk uô hâux lưv lok, têx hâux lưv hâur chuôz zis thiêz tsoz phưz mê nhuôk, tul txir tưz paz uô tas. Txơưv xênhz zus iz huôv zos nhuôv nxeik, luz nênhx cux jông, taz sik niêv lâuk 2 niêv txir tsi muôx tsưr ziv tror xênhz zus cxaz tul nhuôv tuz. Niêv lâuk oz niêv txir pâuz siz hluz, mê nhuôk ciêz thiêz cơưv ntơưr hênhr viv li ntâu shông chuôz zis puôr lênhx tax chuôz zis vênhx huôv. Niêv lâuk Nguyễn Thị Luyện puz pâuz:

          “Cur uô cưk kriê ntơưr cxênhx mê nhuôk zâu, lok six khưr taz sik cur tul txir mak pâuz thiêz sik đros cur pheiz kênh cxuô hâux lưv hâur tsưr, tsoz phưz mê nhuôk, viv li cur lok six jông siêz”

          Thâuv ntêx hâur tsôngv box mênhx cxưx tsơưs nênhs, thâuv tưs cux muôx siêz xar zos “seiz chor nhuôv tuz muôx tsiv grê đuô chor nhuôv nxeik”. Têx siêz xar pôngz kaz co tưz uô pox niêv yênhx têx lênhx nênhs muôx vax huôv tsi siz luôs pir đros thiêz txir nênhx. Chiê hlôngr yiêz siêz xar, cêr uô nênhx, pox Dương Thị Thanh Luyến, Chủ tịch Hội liên hiệp pox niêv huyện Đại Từ, tỉnh Thái Nguyên puz pâuz:

          “ Pêz cux chox kriê yênhx lix têx trâur nuv, têx tsưr ziv uô jông pir li têx trâur nuv CLB phax tar uô hiêv txos pox niêv, mê nhuôv nxeik, CLB phax tar ntâuk tsiv chuôz zis, paz pox niêv yênhx lix têx HTX, tuêv sik hux jos nriêr pâuz pox niêv li siêz nhiêv chiê cxơưz tiês huôv tsar cêr uô nox”.

          Xav txos tas shông 2022, chor pox niêv cơưv tiêr thạc sĩ hâur tas nro tỉnh Thái Nguyên tax 54%. Chor pox niêv uô giám đốc, uô tsưr doanh nghiệp, HTX tax 28% ntâu….Đrâuv co, tưz muôx yênhx cxênhz ziv chuôz zis zos pox niêv uô tsưr, sir jos hla đhâu cêr pluôk, gôngr phênhv txu grês chor ziv chuôz zis pluôk sâuv thax tsav tỉnh txo grês yuôr 4% ntâu. Zơưv Hoàng Văn Chính, Phưv tsar ban mênhx cxưx tỉnh Thái Nguyên khav tênhv:

          “Ntu zuôr txos, UB mênhx cxưx tỉnh Thái Nguyên tror heik cấp ủy thiêz chính quyênx tiv phaz sâuv thax tsav tỉnh zos têx tiv phaz tsuv sir jos, tror chuôz tsar yax mông lok txir nênhx pox niêv vax huôv siz luôs. Tiv zix zos têx njiêz luv tưz tâu heik hâur tsaz yênhx têz qơưk li tsưr ziv huôv tsar KTXH thax tsav tsôngv box mênhx cxưx tsơưs nênhs”.

          Txir nênhx, pox niêv vax huôv siz luôs zos tsưr ziv uô zuôr trâus hâur ntu cxiv tsa thiêz huôv tsar KTXH thax tsav tsôngv box mênhx cxưx tsơưs nênhs. Hâux lưv cxơưz tiês txir nênhx pox niêv vax huôv siz luôs thax tsav tsôngv box mênhx cxưx tsơưs nênhs reik đros huôv tsar uô cxuô zav, tưz cxơưz cxiz tỉnh Thái Nguyên li KTXH ziv hnuz ziv huôv tsar. Txix co muôx ntâu lênhx pox niêv tâu cơưv shâuv, phuôx huiz tsiv grê thiêz yênhx têx lênhx nênhs muôx têx gôngr côngv lok xã hội ziv hnuz ziv huôv tsar truôx jông, huv đros./.

(VOV4-Txâur Vax cxeik nhênhv)

Điện Biên sir jos 100% shux xênhz cxaz chuôz BHYT

          Shông cơưv nhiv kruôr đhâu, tỉnh Điện Biên muôx zuôr xar 198 cxênhz lênhx shux xênhz muôx ntơưr BHYT (tax 98%). Muôx BHYT, chor nhuôs tâu tsoz phưz đas jos zôngx ziv thiêz zênhx max đuô. Hâur shông, BHXH tỉnh tưz muôz nhiêx txiêx tsoz phưz đas jos xuz thơưx trâu 230 ntâu lênhx nênhs, xav hur si tas xar muôx 3 tyv đeiv. Iz chas ntơư, 14 cxênhz ntâu lênhx shux xênhz cux tâu seiz njuôk shuôs, kho moz BHYT ntơưv têx qơư seiz njuôk shuôs, kho moz, đros thiêz nhiêx txiêx tas 6 tyv đeiv ntâu.

Txix hâux lưv tsoz phưz đas jos xuz thơưx trâu shux xênhz thiêz fuô uô luôs hâux lưv seiz njuôk shuôs, kho moz trâu chor nhuôs zênhx max, zôngx ziv, shông cơưv yiêz 2023-2024, BHXH tỉnh Điện Biên sir jos cov 100% shux xênhz cxaz chuôz thiêz muôx ntơưr BHYT.

Chiê uô tâu luôs hâux lưv no, Cơ quan BHXH tỉnh tsênhv sir jos đros ngênhx Zoz zux kriê fuô uô hâux lưv BHYT shux xênhz hâur shông cơưv yiêz; hux jos đros têx cơ quan yax xa mông cxiz uô jông hâux lưv yax kriê lok BHYT shux xênhz têx jông thiêz zuôr trâul txos; hux jos đros cxuô thax tsav qơư jux juk uô tiêr cxix luôs y tế hâur tsêr cơưv chiê uô tâu luôs hâux lưv tsoz phưz đas jos trâu shux xênhz ntơưv têx qơư zoz zux.

Hâu nov BHXH tỉnh Điện Biên heik pâuz, shông cơưv no, shux xênhz hâur thax tsav zuôr tror tâu paz thêv 50% BHYT trơưk li Ủy ban tỉnh Điện Biên Quyết tinhv sôr 03 hnuz xiêz 09/2/2021. Tsênhv tsênhz, phênhv thêv BHYT shux xênhz shông cơưv 2023-2024 zos 972 cxênhz đeiv iz shông.

Taz sik, têz qơưk tưz đros paz thêv 30% chor nhiêx co lơưv; yuôr đuô li tror tâu tsêr nhiêx tỉnh paz thêv 50%, chênhr zos li co, iz lênhx shux xênhz tsuôk tâu thêv nhiêx BHYT lok six tsơưs xưz.

Iz chas ntơư, shux xênhz li niêv txir muôx têx xeir tsov tsưr ziv thêv BHYT 3 luz hlik iz jiês, 6 luz hlik iz jiês lok sik 12 luz hlik iz jiês huv đros trâu zuk chuôz zis. Thâuv cxaz chuôz thiêz muôx ntơưr BHYT, chor nhuôs shux xênhz zuôr tâu tsoz phưz đas jos jông đuô, lar heik txo grêk tsơưs phiv liv lok nhiêx txiêx trâu lênhx nênhs zuôr BHYT chuôz zis. Txix têx li heik co, chor uô niêv uô txir tsuv sir jos zuôr BHYT trâu zuk têx tuz nhuôs chiê tâu sơưv têx jông thiêz muôx liv lok tsoz phưz, tsưx phưv đas jos./.

Vũ Lợi-Riê Lâux cxeik, nhênhv