Lào Cai bax uô li chak thâuv Trung Quốc tror kriz trôngx đriv

Du lịch cux zos nganhx kinh têr tok njôngr thâuv Trung Quốc tror kriz trôngx đriv. Uô ntêx thâuv tsik tâu huôv xênhz caz moz Covid-19, zuôr xar iz đraz chor kruô tuôx Lào Cai zos txix luz têz qơưk no, paz muôx tâu phênhv sâu tsik tsơưs trâu thax tsav qơư co. Lơưr zơưv Hà Văn Thắng, Giám đốc Sở Du lịch Lào Cai, nganhx muôx vax huôv ntơưv thax tsav qơư đros Hiệp hôiv Du lịch thiêz têx taz viv chox kruô ndis shuôk têz qơưs tsuv sik thav uô cê chiê sêiz lax, nriêr tsưr ziv zôngx ziv tiv zix bax txêik tok chor kruô du lịch tuôx txix Trung Quốc thâuv luz têz qơưk no tror kriz trôngx đriv. Vênhv thix no cux tưz tâu hêik txos ntơưv Đại hôiv Hiệp hôiv Du lịch tỉnh nhiv kruôr tâu tsưr tsix: “Tưz tsik zos txêik tok tsôngv kruô tuôx trâu Lào Cai xưz, đros pưk txux zos qơư txuôk đros thax tsav qơư kinh têr, Lào Cai tưz bax đros saz Trung Quốc cxiv tsa kriz uô tour du lịch-iz têz qơưk muôx 6 kror qơư tuôx ndis shuôk uô si (txix Côn Minh-Châu Hồng Hà txos Sa Pa-Hà Nội-Hải Phòng-Quảng Ninh). Pêz zuôr nzor sik thav đros saz Trung Quốc chiê tror kriz uô tour du lịch no”.

Hâur 3 shông muôx caz moz, huôx tôngv zuôr muôs hax huv đhâu ntus đriv Lào Cai-Hà Khẩu njiz lok six ntâu phiv liv. Txơưv cấp ủy, chính quyền ntơưv qơư tưz bax lok six jông, sir jos, taz sik tsiv gri hax huv muôs đhâu Lào Cai txix shông 2020 txos nhiv no puôr lênhx grêk tsơưs pir li shông 2019 thâuv tsik tâu muôx caz moz. Lơưr pos Đào Thị Quỳnh Lưu, Công ty Cổ phần thương mại zuôr muôs tơưv saz đrâuv têz qơưk Xuân Phát, Trung Quốc tror kriz trôngx đriv zuôr paz trâu doanh nghiệp, chor tos sik côngv nhoz oz saz ntus đriv tâu sik njiz, sik thav ciês, têx sik sêiz lax zuôr chuôz ndê lok six ntâu đhâu sik thav trực tuyến; huôx tôngv sik pâur, zuôr muôs hax huv tsik trâus uô ntov ntâu cux paz trâu trôngx đriv tâu muk lok đhâu zôngx ziv đuô: “Lok six vav tiêk zuôr tror kriz trôngx đriv nzor viv tiêk nhiv no hax huv tâu muôs muk lok đhâu muôx tsơưs hok trôngx đriv mak muôx ntâu yêz đrêk cux uô trâu muk lok njiz ntâu phiv liv. Thiêz nhiv no chor nênhs zuôr hax huv zuôr xar zuôr zuk têx hax huv mak cux nyêi tsav tsơưr lươngv tsik taz por. Đuô thiêz têx hax huv Việt Nam mak tsuv muôz nhiêx tas mak mav li tâu thâux muk. Hok xưk li uô ntêx mak zuôr muôz iz kror uô ntêx, thâuv tưs choz zok tas hax huv mak mav muôz nhiêx cov tas ciês cux tâu, zos muôx yưv phiv liv mak zuk muk trâu saz lơưr têz qơưk xưv lik lok cux tâu”.

Pos Lưu cux vav tiêk zuôr tror sik thav zuôr muôs hax huv tâu đros chôngz lênhx nênhs tưz tso tsês tiv muôx caz moz. Txơưv tiêk yuôr chôngz lênhx nênhs tsuv zok nriêr đuô thiêz cux tưz truôx tuk, taz sik pos Lưu hêik tiêk zuôr tror uô tâu xưk li kuz thâuv trôngx đriv tror tâu zuôr muôs hax huv muk lok đhâu xưk li ntu đrav ntêx.

Xor mông txix Sở Ngoại vụ tỉnh Lào Cai puz pâuz, txos nhiv no chirnh quyền saz tor tsik tâu muôx xor mông hêik pâuz tsênhz lok six hơưv tror kriz trôngx đriv. Taz sik hâur hnuz 23/12/2022, lơưr huyện Hà Khẩu, tỉnh Vân Nam, Trung Quốc li luk hu zâuv, đoanx têiv plor hlôngr njêx muôs cấp ủy, chinhr quyền thành phố thiêz 3 huyện ntus đriv zos Bảo Thắng, Bát Xát, Mường Khương, Lào Cai tưz muk đhâu trôngs đriv Lào Cai trâu lơưr têz qơưk chiê sik thav đros saz Trung Quốc. No zos iz jiês sik thav jông viv tâu tsưr tsix ciês tsik zos đhâu trực tuyến li thâuv ntêx. Lơưr zơưv Ngô Vũ Quốc, Phưv Chủ tịch Ủy ban thành phố Lào Cai, no zos kror jông chiê paz chuôz cxaz cêr coangz siv thôngx ziv sik côngv oz tos. Ntơưv jiês sik thav, ntâu tsênhv njiêz tâu hêik tơưv chiê sik đros sêiz lax xưk li paz thơưz sik côngv sâuv ntâu kror zos zuôr muôs hax huv, zoz zux, du lịch, vênhx huôv, thể thao, côngz xưv sêiz car ntus đriv…: “Tiv zix zos chuôz cxaz txuôk đros lok tsênhv chêi nhoz oz tos chiê paz thơưz zuôr muôs hax huv. Hâur co thành phố cux hêik tơưv siêz xar chuôz cxaz gra siêz đas jos txux chi sêiz car nênhs tsar yêz muk lok đhâu trôngx đriv li thâuv ntêx, oz tos zuôr chêix tâu zuk chor yêz muk lok trâu oz saz têz qơưk; thiêz hâux lưv oz tos zuôr hlôngr yiêz tâu tsưr ziv choz zok txêik jênhv hax huv zuôr muôs đhâu ntus đriv sôr 2 Kim Thành”.

Thôngz sâu puz pov, uô ntêx muôx moz Covid-19, iz shông chor nênhs muk lok đhâu trôngx đriv Lào Cai chiê du lịch, zuôr muôs hax huv, sêiz yuô chor nênhs cxênhz jê muôx nhos 6-8 triệu lênhx nênhs. Zos tror kriz trôngx đriv xưk li kuz mak cux tsuv njuôk xav txos têx tsưr ziv phax, tar caz moz cov huv đros. Sik thav đros Sở Y têr tỉnh Lào Cai, hlôngr njês muôs Sở no puz pâuz zuôr muôx têx tsưr ziv tâu kriz uô jông thâuv muôx tỉnh chox kriê./.

(An Kiên-Lik Thox cxêik nhênhv)

Pêx xênhv tox siêz Lai Châu bax tsưr ziv por hưv têx tsoz chos, tsiêx tu zus txix ntux no njiv ntêr hnuz

Tsuôk đhâu 10 hnuz ntâu tsêz uô zuz, jiês ntux no njiv 2, 3 hnuz đhâu uô tsôngv box  nhoz jok Co Phày, xã Mường Cang, huyện Than Uyên, tỉnh Lai Châu iz cxiê zuz liês trâul tê, blôngx njưk tas. Têx li heik co uô tsôngv pêx xênhv hâur thax tsav cxơưx, thâuv ntux tror no njiv ntêr hnuz. Zơưv Nùng Văn Thin, nhoz jok Co Phay heik pâuz: Thâuv muk qênhz shuôs, cur pov iz cxiê liêx têz trâul uô ruôr hiêv thiêz tsênhv zok nriêr qir tiv seiz zos viv li chas. Trơưk li njuôk xav, muôx têx zos ntux no hênhr, sơưr đơưk ho tsi tâu bax tsưr ziv phax tir thêir zênhx max viv li têx zuz liês thiêx trâul tsi jông li co: “Chiv ntux tsâus shông 2022 pêz cux tsêz uô zuz tas lơưv. Thâuv ntux yar pêz cux heik sơưr đơưk cov muôz têx hnaz tax vor thêir ntơư yêv muk, tsâuk ntux mav tror muôz vor trâu thiêz têx hnuz ntux no mak vor thêir jông chor zuz liês tsi chiê trâul tê uô ruôr hiêv. Xar njôngr cov ntux paz, tsi no hênhr chiê pêx xênhv sơưr đơưk uô tâu kôngz lôngk”.

 Cux xưk li ntâu thax tsav qơư hâur huyện Than Uyên, xã Mường Kim tsênhv zos iz hâur têx suôv qơư uô ntêx nyuôs hlôngr yiêz zuz nôngz tsoz chos chiv ntux tsâus thiêz chiv châux yiêz. Têx tsoz chos chiv ntux tsâus, iz chas 155 ha poz cưk, xã njuôk xav sir jos chos têx kok zax zưv, điz, tâuz tưs đros thiêz zuôr xar 40 ha. Ciês chiv châux yiêz, ntơưv qơư tsênhv sir jos chox kriê tsiv uô xar muôx 330 ha chor nôngz blêx yiêz, sâu tâu nju, tsơưr lươngv yiêz. Zơưv Lê Thái Sơn, Phưv Chủ tịch Ủy ban xã Mường Kim, huyện Than Uyên heik pâuz: Ciês thâuv txos cheix uô kôngz, xã tưz heik cxuô jok heik tsôngv niêv txir cưr tix nênhx tsa sơưr đơưk cov uô kôngz trơưk cui tinhv, taz por lơưr tsưr ziv: “Ủy ban xã tưz yênhx lix têx tổ côngz xưv muk jêx jok yax kriê, vênhv tôngv tsôngv box sơưr đơưk hâur thax tsav xã seiz shuôs njôngr têx kôngz chiv ntux tsâus. Đros thiêz chor zuz liês uô chiê chos, pêz cux tưz tso tổ côngz xưv muk kriê pêx xênhv vor thêir cov tsi trâul uô ruôr hiêv, lar heik zos têx hnuz no njiv li ntu nhiv no”.

Nhiv no tsôngv pêx xênhv hâur thax tsav huyện Than Uyên tsênhv sir jos tu, seiz shuôs njôngr xar muôx 200 ha kôngz chiv ntux tsâus li: Poz cưk, jâuz tâuv cxuô zav. Chiv châux yiêz shông no, njuôk xav huyện zuôr tsêz chos muôx 2 cxênhz ntâu ha blêx. Txos nhiv no tsôngv box hâur thax tsav qơư tưz tsêz uô zuz tâu 50%, thiêz njuôk xav zuôr jông chos lok hli 1/2023.

Chiê txo grêk tsơưs têx trâul ruôr hiêv tiv ntux no njiv, txos nhiv no Ủy ban huyện Than Uyên tưz tso tơưv ntâuz ntơưr chox kriê fuô uô têx tsưr ziv phax tar no thiêz yeiz trâu tsoz chos, tsiêx tu zus, shuôz njêl thiêz kriê sơưr đơưk uô kôngz chiv châux yiêz 2022-2023. Iz chas co, chox kriê cxuô xã yax mông, vênhv tôngv tsôngv box muôz hnaz tax xor thêir chor zuz liês tưz tsêz uô tas ntơư, sơưr đơưk tsi chos mak tu thiêz seiz njôngr têx kôngz hâur chor hnuz no njiv…. Zơưv Nguyễn Trọng Hướng, Phưv tsar phongx Kôngz nuv thiêz huôv tsar tox siêz huyện Than Uyên heik pâuz: “Cơ quan lês car uô đreiv têx nuv li heik sâuv tưz nhênhz chơưv, uô têx ntâuz ntơưr chox kriê Ủy ban cxuô xã, thị trấn bax uô hâux lưv phax tar no trâu têx tsoz chos, tsiêx tu zus. Sir jos yax kriê trâu tsôngv box tsi tso têx tsiêx lak yar, chaz lok gâuv no, hlêis jâuz puz, xor thêir qơư cơư tsiêx cov ntov tsi chiê chuô txiêk yâu….”.

Tsêz chos trơưk cui tinhv zos iz hâur têx lok six zov chênhr quyết tinhv uô têx kôngz yênhx côngz. Taz sik, trơưk li njuôk xav, chor hli tsênhv yuôr hâur cheix ntux no shông no tsênhv zuôr muôx ntâu jiês no njiv thiêz ntêr hnuz. Chênhr viv li, tsôngv box nhoz Lai Châu cux xưk li têx tỉnh Tây Bắc tsênhv zuôr njiz trâul phiv liv thiêz tsuv bax têx faz tsưr ziv phax tar no trâu tsoz chos, tsiêx tu zus cux xưk li taz por uô tâu kôngz trơưk cheix chiv lơưr cơ quan muôx vax huôv kriê, thiêx tsi trâul uô ruôr hiêv./.

(Khắc Kiên-Riê Lâux cxeik, nhênhv)