Pêx xênhv Phong Dụ Thượng (Lào Cai) cxơưx hlo muôx ar poz thâuv txos chêix ntux nas chuô

            Pos Trần Thị Điều nhoz jok Làng Chạng, xar Phong Dụ Thượng, tỉnh Lào Cai puz pâuz: Jiês đêx ngaz cuôr lox thâuv hli 10 shông 2025 tưz cuôr tas muôx 8 thiêr ar ntus đêx Ngòi Hút, buôs ti chuôz zis kror ar, uô poz vâu tas nro chuôz zis iz luz tsêr, tsêr mor thiêz tas nro côngz trinhx vêv xênhz. Nhiv no, txơưv tưz sir jos kho đuô chiê muôx qơư xênhz huôx uô ntêx taz sik luz plas tsêr cux tsênhv nhoz jê ciês ntơưv ntus đêx. Đros qênhx shênhx ar poz ziv hnuz ziv ntâu, pos chuôz zis luz nênhx njiz ntâu phiv liv. Thâuv tưs cux lok six cxơưx: “Cxơưx hênhr, nhiv no tsuôk vav tiêk têz qơưk sêi đrơưv cxiv tsa thêir kror qơư no chiê por vêv tâu cxuô zav thiêz txox siê. Nhiv no thâuv tưs muôx lok nas chuô mak pêz puôr lênhx khiêr gâuv xưz”.

          Trơưk pos Hà Thị Đông, iz ziv chuôz zis uô nênhx nhoz ntêr shông ntơưv Làng Chạng, chiê tuôr tâu chor ar trơưk ntus đêx, pos chuôz zis tưz chos shôngz thiêz chor ntông jiz ntêr shông, chor ntông nhiv no tưz lox tas lơưv. Taz sik, jiês đêx ngaz cuôr lox thâuv kaz hli 9, hâur hlik hli 10 tsêiz no tưz cuôr tas nro chor shôngz ntông co. Đros qênhx shênhx ntus đêx tror muôx chor qơư ar xưz poz phiv liv, pos Đông hêik vav tiêk têz qơưk zuôr nzor yưv pênhr cxiv tsa njưs thêir, chiê đơưk kho cov tiêr têx qơưk muôx ar xưz poz: “Thâuv tưs muôx lok nas chuô mak tsik car nhoz hâur tsêr lơưv. Lok six cxơưx thiêz nyêi. Vav tiêk Têz qơưk zuôr paz đơưk kho trâu pêx xênhv tso siêz đuô luz nênhx cov uô tâu nox truôx jông”.

           Trơưk chor nênhs sâu xor xưv nriêr pâuz, đhâu chor jiês lok nas chuô đêx ngaz cuôr tsik so hâur oz shông 2024 thiêz 2025, qênhx shênhx ar poz trơưk ntus đêx Ngòi Hút tsênhv txơưx txar phiv liv. Nhiv no, đêx ngaz cuôr tưz uô ar xưz poz iz ntu ntus đêx ntêr xar muôx 750 thiêr, xưz poz ntâu trâu pêx xênhv chor ar têz thiêz chor côngz trinhx cxiv tsa. Ntâu luz tsêr hâur jok tưz muôx têx qơư xưz poz lox, zôngx ziv trâus xưz poz trâu hâur tuk đêx.

            Trơưk zơưv Hoàng Văn Khoa, Phưv Chủ tịch Ủy ban xar Phong Dụ Thượng, chiê por vêv tâu txox siêz thiêz cxuô zav trâu pêx xênhv, uô ntêx chêix ntux nas chuô shông no, Ủy ban xar tưz muôz iz phênhv nhiêx txiêx têz qơưk ntơưv qơư tsiv gri muôx 550 triệu đêiv chiê cxiv tsa njưs thêir uô ntêx, đros ntêr muôx 100 ntâu thiêr ndis. Taz sik tsuôk zos tsưr ziv tir tar uô ntêx, lok tsưr ziv muk ntêr, xar hêik cov cxiv tsa njưs thêir sêi đrơưv ntơưv jok Làng Chạng: “Ciês đhâu muôx jiês đêx ngaz cuôr thâuv hli 10 shông 2025, chinhr quyền thax tsav qơư cux tưz muôx ntâuz ntơưr hêik trâu Ủy ban tỉnh pâuz, xa trâu chor sở, nganhx cov cxiv tsa njưs thêir ntơưv thax tsav jok Làng Chạng chie por vêv lênhx nênhs thiêz cxuô zav trâu pêx xênhv”.

            Tưz tror txos chêix ntux nas chuô đêx ngaz cuôr shông no, pêx xênhv jok Làng Chạng vav tiêk dưv anr cxiv tsa njưs thêir zuôr nzor tâu kriz uô. Hâur ntu nhoz tok, pox nhuôs nhoz no hêik chinhr quyền ntơưv qơư paz cov sêi chor tsưr ziv đơưk kho uô ntêx li: Uô tơưz poz jêz, kho đuô cưx ha trâu đêx ntưk lok sik cxiv poz jêz thêir, chiê paz txo grêk tsơưs têx trâus ruôr hiêv./.

Đinh Tuấn-Lik Thox cxêik nhênhv

Têx lênhx tuz lênhv Pênhz phax kriê txux chi, hâur pâuk ntơưr trâu tsôngv pêx xênhv ntus đriv

           Lớp cơưv hlôngr yiêz sôr ntơưv jok Hợp 1, xã ntus đriv Dào San, tuz lênhv pênhz phax têx chuôz zênhx phưx vưv kriê txux chi trâu tsôngv pêx xênhv zos luz meir hu xor tôngx gra ntơưv têk-zav huv muôx liv txix tsaz yênhx “Cheix ntux yiêz ntus đriv paz pêx xênhv sor siêz”. Hok lol sâuv txux chi mak kriê tsôngv pêx xênhv đhok uô VNeID, krêz dịch vụ công, mã QR heik lol têx nênhs fêv uô cxâuv chei lok sik sir zôngv mạng xã hội truôx tuk. Đhâu tuz lênhv pênhz phax têx txux chi kriê, niêv lâul Pax Xênhv Shôngx nhiv no tưz pâuz zôngv meir hu xor tôngx chiê hu trâu lưv lươngv muôx vax huôv thâuv zuôr trâus txos. “Hnuz no chor txir nzơưv nhoz Zênhx Pênhz phax tuôx kriê pêz lok sâuv heik pâuz têx nênhs fêv uô cxâuv chei đhâu mã QR. Zos tov kaz no, muôx lênhx nênhs tưs tâu xav zos nênhs fêv lok sik nênhs tuôx uô muôx cuz nxor, tsi truôx tuk, pêz tsuv heik trâu Zênhx Pênhz phax pâuz chiê canr bôv tuôx paz pêz pêx xênhv”.

            Têx txux chi chor tuz lênhv pênhz phax kriê txos trâu tsôngv pêx xênhv tox siêz zos: Kriê lok sâuv hlôngr yiêz sôr, zok nriêr têx xor mông phưx vưv huôv tsar uô nox, cơưv txux chi txos trâu uô trơưk têx tsưr ziv yiêz....hâur luz nênhx niêx hnuz, hur tiz si puôr lênhx tâu chor tuz lênhv kriê iz kro jux juk, zôngx ziv pâuz, to tâuz. Trung úy Lê Việt Hoàng, canr bôv Zênhx Pênhz phax Dào San heik: “Cur cux tưz kriê têx txux chi zuk pâuz tâu trâu tsôngv pêx xênhv cơưv shâuv, uô trơưk, chiê paz sơưr đơưk pâuz tsênhz đuô lok têx jông, cux li uô lơưr hâur luz nênhx huôv tsar uô nox uô hnar”.

          Ntơưv xã ntus đriv Phong Thổ, Thiếu úy Lò Đức Thắng, Thơưx seiz car chor tuz lênhv vênhv tôngv tsôngv box sơưr đơưk Zênhx Pênhz phax trôngx đriv Ma Lù Thằng heik pâuz, chor nênhs lâul hnuz nhôngs siêz, tsi yuô pâuz luk Choz Tsiz mak kriê têx txux chi, tsưr ziv yiêz li heik sâuv ziv phiv liv đuô. Taz sik, chor tuz lênhv cux sir jos max mav tơư kriê iz kro jux juk, tưz paz tsôngv niêv txir lax pêx xênhv jux juk pâuz sir zôngv têx meir hu xor tôngx. “Pêz tưz cxiv tsa tsưr ziv yax kriê huv đros. Đros trâu têx li heik co zos muôz iz cxiê têx ntơưr chiê yax kriê trâu pêx xênhv zôngx ziv jênhv pâuz”.

           Ntơưv 11 xã ntus đriv hâur tỉnh Lai Châu nhiv no, têx đuôz tuz lênhv Pênhz phax sir jos kriê trâu pêx xênhv tsưr ziv cor, krêz meir hu xor tôngx  nhiv no tưz sưv đros sơưr đơưk. Đhâu iz jiês đhok uô VNeID lok sik uô yênhx côngz iz zav hâux lưv tưs sâuv mạng xã hội, tsôngv pêx xênhv tox siêz ziv shir phaz, jông siêz đuô. Pos Đồng Thị Thinh, nhoz jok Pa Nậm Cúm, xã Phong Thổ shir phaz heik: “Hnuz no muôx tuz lênhv pênhz phax tuôx ciês ntơưv tsêr kriê txux chi sir zôngv meir hu xor tôngx, sir zôngv VNeID, ntâu lênhx pêx xênhv hâur jok nhiv no cux tưz pâuz krêz uô ntâu zav ntâuz ntơưr lơưv”.

           Têx trâur nuv li “qơư trâu ntơưr heik pâuz nênhs fêv, nênhs uô cxâuv chei têz qơưk” lok sik “tuz lênhv pênhz phax sir jos kriê txux chi hlôngr yiêz sôr” tsi tiêk paz pêx xênhv thax tsav ntus đriv buôk ti txos têx hlôngr yiêz, tsênhv paz tsưx phưv truôx tuk ntus đriv têz qơưk. Đại tá Nguyễn Văn Hưng, Chính ủy Ban seiz car Tuz lênhv Pênhz phax Lai Châu heik pâuz: “Pêz tưz yênhx lix iz zênhx pênhz phax iz paz cưk kriê muôx txix 1-3 lênhx, muk cxuô jêx jok chiê paz thiêz kriê tsôngv pêx xênhv têx txux chi lok sâuv hlôngr yiêz sôr. Lar heik zos kriê pêx xênhv pâuz muôz têx xor mông heik lol chor nênhs fêv, nênhs uô cxâuv chei têz qơưk”.

            Têx luk, têx txux chi kriê trâu tsôngv lax pêx xênhv jêx jok nhiv no, tsênhv yênhx tsưr ziv jông chiê cxuô lênhx cxuô tus nhoz thax tsav tox siêz đêz đrôngs, ntus đriv muôx luz nênhx jông, vav mênhx lơưr chuôs 2 chas thax tsav huôv tsar hâur têz qơưk./.

Khắc Kiên-Riê Lâux cxeik, nhênhv