Sir jos uô hâux lưv jông viv nênhs moz thax tsav txov nhêv

Hâur têx hnuz tsiêz têz qơưk nhiv kruôr đhâu, khoa chơưv kho têx moz hnhar-phax tar kâus tưx Tsêr kho moz đa khoa tỉnh Yên Bái tsi so lênhk txeik thiêz chơưv kho 5 lênhx nênhs trâul moz hlưz cxa hnhar; hâur co muôx iz lênhx txir nênhx 47 shông nhoz huyện Lục Yên tuôx tsêr kho moz thâuv trâul moz plaz, plaz tsav thiêz ntuôr ntâu. Chor bác sĩ, cưk yuôx uô hâux lưv hâur hnuz 29 tsiêz ntơư tưz zênhx max seiz njuôk shuôs thiêz tâu xav co zos hlưz cxa lok six hnhar, zôngx ziv trâul tuôs. Têx lênhx bác sĩ tưz zênhx max chơưv kho li: Tso meir uô pa, liv nyar tsi so.....Đhâu zuôr xar iz hlik, lênhx nênhs moz no tưz nhoz khênhr jux juk, đas jos truôx tuk.

Niêv lâul Hoàng Thị Nhạn, tus txir nênhx moz heik sâuv li pox niêv heik, thâuv chox tus txir tuôx tsêr kho moz, niêv lâul lok six cxơưx, ntâu lênhx cux tiêk cov chox muk Hà Nội chơưv kho, taz sik niêv lâul cux njênhs njôngr trâu chor bác sĩ hâur tỉnh, lơưr zuôr chơưv kho tâu.

“Têx lênhx bác sĩ, cưk yuôx nhoz no lênhx tưs cux sir jos, moz siêz uô hâux lưv tsoz phưz đas jos trâu nênhs moz. Nhiv no bác sĩ cux muôx jông tsưr ziv chơưv kho moz gênhk lơưv. Chor nênhs hâur tsêr, nênhs cxênhz jê cux cxiz tiêk cov chox muk Hà Nội xưz, muôx kênh jiês zuk cux xar ntâu, taz sik chiê siêz thiêz njênhs njôngr trâu chor bác sĩ ntơưv no, lơưr muôx têx zuôr chơưv kho tâu, tus txir zuôr khax jux juk, cur tsưr ziv thiêz siêz xar co tưz muôx tsênhz tiês”.

Thạc sỹ, bác sĩ Lê Đức Thuận, uô hâux lưv hâur Khoa chơưv kho chor nênhs trâul moz hnhar-phax tar kâus tưx, Tsêr kho moz đa khoa tỉnh Yên Bái heik pâuz: Moz hlưz cxa li heik sâuv zos iz zav moz hnhar, zôngx ziv uô ruôr hiêv, tsi jông txos têx plaz hnhur, siêz njưk, muôx têx trâul tuôs. Cux seiz moz hnhar lok sik siz, nưk muôx nưk tsưr ziv chơưv kho huv đros, hâur co moz hnhar mak lok six sei, tsuv chơưv kho zênhx max txix liv nyar tsi so, tso meir paz uô pa.... Nhiv no tsêr kho moz đa khoa tỉnh Yên Bái zos qơư xuz thơưx hâur tỉnh fuô uô têx tsưr ziv chơưv kho li heik sâuv tsi so:

“Têx tsưr ziv chơưv kho moz yiêz mak thâuv tưs cux tsuv sir jos cơưv shâuv, gra siêz txux chi uô hâux lưv seiz njuôk shuôs, kho moz; tsi so sik thav, siz kriê lok sâuv tsưr ziv chơưv kho têx moz phiv liv thiêz hmôngr cux lok six jông, muôx chor cưk kriê, têx hloz thênhv siêz paz max”.

Qơư chiê tsêr kho moz đa khoa tỉnh Yên Bái fuô uô ntâu hâux lưv phiv liv, têx tsưr ziv yiêz, hâur co muôx têx moz lok six phiv liv chơưv kho, iz txưv tsuôk tâu seiz njuôk shuôs, kho moz nhoz chor tsêr kho moz lox T.Ư zos hâur 400 ntâu lênhx bác sĩ, cưk yuôx, muôx lok six ntâu bác sĩ hluôk muôx tsưr ziv tưz tâu cơưv cxix cxuô têx txux chi lok sâuv seiz njuôk, kho têx moz phiv liv, iz zav li Thạc sỹ, bác sĩ Trần Thanh An, xênhz shông 1993. Zos iz lênhx bác sĩ hluôk đuô hur si hâur khoa ngoại, taz sik nhiv no, tix lâus tưz muôx ntâu txux chi , tsưr ziv jông chơưv kho tâu têx moz phiv liv:

“Pêz thâuv tưs tưz sir jos cơưv shâuv, zok nriêr têx tsưr ziv jông, cơưv nzir têx yiêz hâur xã hội cux li sâuv ntiêx têz chiê uô lơưr, chơưv kho moz huv đros trâu ntơưv qơư, lênhx nênhs moz....”.

Thạc sỹ, bác sĩ Diêm Sơn, Phưv Giám đốc tsêr kho moz đa khoa tỉnh Yên Bái heik pâuz, tsêr kho moz đa khoa tỉnh Yên Bái nhiv no tsênhv fuô uô 300 ntâu tsưr ziv seiz njuôk shuôs, kho moz li hâur têx tsêr kho moz lox T.Ư chiê chơưv kho moz trâu pêx xênhv, iz chas ntơư zos iz cxiê tsưr ziv jông cơưv shâuv tâu saz đrâuv luôs 2 chas têz qơưk lol:

“Luôs hâux lưv kriê cxaz txux chi tsưr ziv uô hâux lưv trâu canr bôv thâuv tưs cux tâu tsêr yuôx moz siêz txos. Iz shông pêz tso xar muôx 20 lênhx nênhs muk cơưv cxaz têx tsưr ziv yuôr trâul lok sâuv seiz njuôk shuôs, kho moz gênhk. Iz shông pêz cux kriê nzir ntâu txux chi, tsưr ziv uô hâux lưv trâu sơưr đơưk. Lar heik zos tso têx lênhx bác sĩ muôx txux chi, tsưr ziv jông thiêz txơưx luk Anh muk cơưv saz đrâuv luôs 2 chas têz qơưk. Iz chas ntơư, iz shông pêz cux kriê nzir têx tsưr ziv seiz njuôk shuôs, kho moz hâur tsêr kho moz trâu yênhx cxênhz lênhx nênhs chiê gra siêz txux chi, tsưr ziv uô hâux lưv”.

Trơưk li qênhz shuôs, txos nhiv no, phênhv ntâu tsôngv pêx xênhv sơưr đơưk puôr lênhx jông siêz thiêz kruôs txos chor cưk yuôx, bác sĩ hâur tsêr kho moz đa khoa tỉnh Yên Bái uô tâu hâux lưv jông. Taz sik, đros thiêz tsưr ziv xar, tsi tiêk uô tâu hâux lưv jông tsoz phưz đas jos, chơưv kho moz gênhk trâu tsôngv pêx xênhv hâur tỉnh, tsêr kho moz đa khoa Yên Bái nhiv no cux tsênhv sir jos hlôngr yiêz, gra siêz txux chi tsưr ziv uô nuv chiê nzor yênhx tsêr kho moz đa khoa thax tsav Tây Bắc uô tâu jông luôs hâux lưv seiz njuôk, kho moz trâu tsôngv lax pêx xênhv lơưr Bộ Y tế cui tinhv hâur ntu zuôr txos./.

Đinh Tuấn-Riê Lâux cxeik, nhênhv