Txir lê hâur thax tsav xã Giang Ma

          Hâur chiv cheix sâu txir lê, pox nhuôk xã Giang Ma, huyện Tam Đường, tỉnh Lai Châu tưz krêz trôngx vax txir lê chiê tos kruô tuôx cxeik đuôz thiêz sâu zuôr. Tsuôk hâur six hơưv muôx nhos 10 hnuz krêz trôngx, têx tsưr vax tưz tos muôx nhos 3 cxênhz jiês kruô tuôx ndis seiz, chiv chir đê têx luz txir lê chiê nox. Viv mênhv chêx txir lê shông no tâu tsoz phưz jông, txir lâuk, kaz jông, viv li ziv zaz zâuv chôngz tsôngv kruô tuôx ndis seiz, sâu đê. Tix lâuk Zax A Phưv, tsưr vax txir lê nhoz jos Giang Ma pheiz kênh: chuôz zis li vax txir lê chos shông 2016 thiêz muôx 120 ntâu tsoz tưz sâu đê tâu. Têx shông tov ntêx, muôs tâu muôx nhos 4 tênhr ntâu thiêz grê muôs chungz fênhx zos 20 cxênhz đeiv iz cir. Shông no txir lê tsi taz sâu tâu chiv cheix, mak grê muôs cux chuôz ndê chungz fênhx 25 cxênhz đeiv iz cir, tsênhv muôx kruô tuôx ndis seiz sâu cxaz tâu jix vuv tos kruô thiêz viv li chuôz zis li phênhv sâu cux chuôz ndê:

          “Chos poz cưk thiêz chos blêx mak tsi muôx chêx cuk hor ntâu, txix chos txir lê tưz tso lok chêx cuk kinh têr siêz đuô. Tsôngv kruô tuôx ndis seiz, cxeik đuôz uô si thiêz đê nox ntơưv vax cux lok six nhiêv”

          Nhiv kruôr jê ntơưv no huyện Tam Đường tưz tsưr tsix Hnuz ntênhs đê txir lê jiês tiv I shông 2024. Hnuz ntênhs tsưr tsix đros ntâu huôx tôngv jông li: đê txir lê, qeik txir lê jông, heik kriê têx trôngx txir lê thiêz têx qơư piêr muôs xiv huv kôngz nuv tiv phaz, zaz zâuv tâu yênhx cxênhz lênhx tsôngv kruô hâur thiêz đrâiv tỉnh tuôx cxaz chuôz. Tiv zix ntơưv ntênhs phêv, tỉnh Lai Châu tưz khơưk muôz ntơưr côngz jênhv xiv huv OCOP trâu xiv huv txir lê hâur tiv phaz, chuôz cxaz siêz njênhs lok tsơưr lươngv xiv huv trâu tsôngv kruô thiêz lênhx nênhs sir zôngv. Niêv lâuk Nông Quý Hương, tsôngv kruô tuôx txix Hà Nội pheiz kênh: xiv huv hur li txir lê nhoz Giang Ma tsênhv tâu nênhs sir zôngv, tiv zix zos têx niêv đrôngs lox lok six nhiêv txos. No zos jiês tiv 2 niêv lâuk đros chuôz zis tuôx Lai Châu thiêz tâu muk ndis seiz vax txir lê hâur cheix sâu đê txir.

          “Sơưr đơưs mak max muk ndis seiz uô si cxuô thax tsav qơư jông jav, têx niêv đêx hiêr jông, taz sik muôx tsi ntâu lênhx nênhs ho xar tâu tiêk muk ndis seiz têx thax tsav tsiv uô kôngz nuv li no”

          Đros thiêz qiv hơưv ar têz lax khiêv yênhx shông, xã Giang Ma, huyện Tam Đường, tỉnh Lai Châu tâu ntâuk grê zos thax tsav jông chiê chos têx zav tsoz chos nox txir li: txir đuôx, txir lê, txir khơưz. Ntâu shông no chính quyênx tiv phaz tưz cxơưz tiês yax mông, vênhv tôngv tsôngv box têx jêx jos sir jos hlôngr yiêz tsoz chos tsi jông chiê chos ntông nox txir. Txos nhiv no sâuv thax tsav tsênhv muôx 120 hecta ntông nox txir, hâur co muôx 50 hecta txir lê nôngz VH6 nhoz 7 sâuv 9 jêx jos tsênhv txos cheix sâu đê. Zơưv Ma A Tủa, Phưv Chủ tịch UB xã Giang Ma puz pâuz:

          “Xã muôx tsưr ziv huôv tsar chos txir lê reik đros huôv tsar kôngz nuv thiêz ju lix côngv thôngx. Đros txir lê nhoz tiv phaz muôx 2 chiv zos thâuv tơưs pax thiêz sâu đê txir muôx lok six chôngz tsôngv kruô hâur thiêz đrâuv tỉnh nhiêv txos”

          Txir lê kaz jong tưz chox lok tsiv grê kinh têr siêz trâu nôngx mênhx nhoz xã Giang Ma, huyện Tam Đường, tỉnh Lai Châu. Chiê tsoz txir lê thiêz têx tsoz chos ntông nox txir txơưr huôv tsar truôx tul, cấp ủy, chính quyênx tiv phaz tsênhv muôx tsưr ziv krêz đar mênhv chêx reik đros huôv tsar ju lix ndis seiz trôngz jôngr chiv xênhz nhoz tiv phaz. No zos tsưr ziv yiêz hâur huôv tsar kôngz nuv, paz tsôngv box têx mênhx cxưx muôz siêz tsiv grê thiêz suôz bê tsoz chos nhoz sâuv thax tsav, gôngr phênhv cxuôv yeiz thiv pluôk truôx tul nhoz tiv phaz./.

                  (Khắc Kiên-Txâur Vax cxeik nhênhv)

Pox niêv Gia Lai moz siêz paz têx nhuôv njuôs thiêz kriê ntơưr trâu tsôngv box thax tsav heir nênhs tsơưs

Hâur Rah Lan H’kưm nhoz jok Chuét Ngol, xã Chư Á, TP Pleiku, tỉnh Gia Lai 3 lênhx vir ndâuk, nuk muôs luz tsêr hnuz no lov jêv đuô pir li cxiê hnuz. Têx lênhx niêv, niêv lâul zos công an nhoz Hội pox niêv Công an tỉnh Gia Lai tuôx seiz shuôs chor nhuôs. H’kưm zos tus hloz, shông no nhiv kruôr muôx 15 shông heik pâuz: Niêv thiêz txir gơưk tưz trâul tuôs kuôk no 6 shông, txix thâuv ntơư txos nhiv no, Hội pox niêv Công an tỉnh lênhk nhav paz, txoz cxơưx trâu 3 lênhx nhuôs txix nox nhoz txos cơưv ntâuz ntơưr. H’Kưm heik:

“Niêx hnuz, zos muôx đaz tsi mak cur muôx têx hu trâu chor niêv lâul đros paz. Têx niêv lâul cux heik pêz tiêk, tsi tâu tso ntơưr tsês, tsuv siz siz hluz, siz kriê uô nênhx jông. Cur pov txo grêk tsơưs tâu iz phênhv tưs têx phiv liv thiêz tâu sơưr đơưk moz siêz, txoz cxơưx txos. Cur cux zuôr sir jos cơưv txux chi thiêz mnôngs luk chiê tsiv nhos trâu chor niêv lâul têx cêr paz, moz siêz txos pêz”.

Tsi tiêk zos Rah Lan H’Kưm 3 lênhx vir ndâuk, nuk muôs xưz, ntơưv tỉnh Gia Lai tsênhv muôx 31 lênhx nhuôv njuôs, phênhv ntâu zos heir nênhs tsơưs tâu cxuô cấp hội pox niêv Công an tỉnh Gia Lai lênhk nhav paz li heik sâuv. Đros thiêz nhiêx txiêx hu zâuv tâu txix canr bôv, chiến sĩ hâur têx taz viv thiêz vênhv tôngv xã hội sik đros paz, Hội pox niêv taz por txoz cxơưx tâu trâu iz lênhx nhuôs txix 4-5 tsov đeiv iz shông. Chor nhiêx no paz têx nhuôv njuôs tâu muk đros luôs lưv tus cơưv ntâuz ntơưr cxix cxuô, muôx nzir nhiêx zuôr ntơưr cơưv, chuôz zênhx phưx vưv cơưv txux chi. Thượng tá Nguyễn Thị Ngọc Thúy-Hội pox niêv Công an tỉnh Gia Lai heik pâuz:

“Iz chas moz siêz nus txos têx nhuôs cêr cơưv txux, đas jos, thâuv tưs shênhx cur cux muk seiz shuôs têx nhuôs ntơưv qơư nhoz, chox lơưr muk ndis uô si. Tsi tas li, cur tsênhv tok têx nhuôs lok seiz cur chuôz zis chiê têx nhuôs sưv jux juk đros cur tus nhuôv hâur tsêr”.

Cux txix cxuô cấp hội pox niêv cêr moz siêz txos, shông 2022 xã Phú An, huyện Đăk Pơ tưz muôx  lớp kriê hâur pâuk ntơưr trâu têx lênhx pox niêv vir ndâuk heir nênhs Bahnar. Khov co, txix tsi pâuz ntơưr, ntâu lênhx pox niêv vir ndâuk tưz pâuz nhênhv, pâuz sâu, pâuz xav fax thâuv zuôr muôs hax huv. Niêv lâul Bùi Thị Minh Dương-Chủ tịch Hội Liên hiệp pox niêv xã Phú An, huyện Đăk Pơ heik pâuz, txix têx uô tâu jông li heik co, luôs hâux lưv kriê hâur pâuk ntơưr trâu têx lênhx nênhs tsi tâu pâuz ntơưr tưz tâu nthuôr uô đêz đar txos trâu 2 chas thax tsav xã txơưr đuô. Shông no, hội liên hiệp pox niêv chor xã Yang Bắc, Yang Hội cux krêz nzir 02 lớp kriê hâur pâuk ntơưr , hu zâuv tâu 160 lênhx pox niêv vir ndâuk cxaz chuôz:

“Chor pox niêv vir ndâuk tsênhv yuôr ntâu zav tsi tâu pâuz cxuô, muk cơưv ntơưr lok tsênhv txax muôs, tsi car nhênhv tsav tsi zos, cưk kriê thiêz luôs lưv tus luôs zuk lok sik ntâu lênhx muk tsêr tưz tsi shâuv sâu, shâuv nhênhv hlo. Nus txos mak lơưr tiêk, tuôr chưx mêv tsênhv phiv liv yax tuôr co hlâu uô liêx têz. Taz thâuv shâuv sâu tâu iz tus ntơưr mak co zos iz kro jông cxiz chor pox niêv vir ndâuk sir jos đuô hâur cêr cơưv ntâuz ntơưr”.

Pos Rơ Chăm H’Hồng-Chủ tịch Hội Liên hiệp pox niêv tỉnh Gia Lai heik pâuz, iz chas lênhk nhav paz têx nhuôv njuôs thiêz kriê hâur pâuk ntơưr trâu chor pox niêv vir ndâuk heir nênhs tsơưs, cxuô cấp hội pox niêv hâur tỉnh tsênhv muôx cuiv nhiêx học bổng trâu chor shux xênhz muôx luz nênhx txov nhêv sir jos cơưv ntơưr hênhr, cxiv tsa tsêr niêv côngv siêz, paz pênhr trâu pox niêv huôv tsar uô nox, muôz zuz nôngz kôngz, tsiêx tu zus puz sơưr đơưk. Đhâu ntơư, yênhx cxênhz lênhx nhuôs zâu thiêz pox niêv vir ndâuk tâu paz max:

“Hâur ntu zuôr txos, Hội Liên hiệp Pox niêv tỉnh Gia Lai tror sir jos uô lơưr têx nuv tưz uô tâu jông; chox kriê cxuô cấp hội cơưv shâuv têx tsưr ziv huôv tsar uô nox uô hnar ntơưv thax tsav qơư thiêz hâur tas tỉnh chiê uô trơưk, huôv tsar kinh tế chuôz zis”.

Đros thiêz têx luôs hâux lưv uô tâu jông, tsênhv tsênhz, hội pox niêv cxuô cấp ntơưv tỉnh Gia Lai tsênhv paz chor nhuôv njuôs thiêz pox niêv vir ndâuk heir nênhs tsơưs txo grêk têx phiv liv, paz tsưx phưv truôx tuk thax tsav qơư nhoz./.

VOVTN-Riê Lâux cxeik, nhênhv