Uô tsêr trâu chor chuôz zis pluôs “qơư khov” trâu tsôngv box truôx siêz huôv tsar uô nox

          Tos kruô tuôx phôngv Tsiêz hâur luz tsêr truôx jông đar zuôr xar 100 yiv ndis, đros 3 qar pư, 1 qar tsêr kruô thiêz 1 qar uô jâuz mor nox, tix lâuk Trịnh Văn Hiến, 40 shông nhoz jos 2, xã Nghĩa Lộ, thị xã Nghĩa Lộ, tỉnh Yên Bái lok six shir phaz.

          Muôx ntu zos nênhs txơưx cơư ntông, viv li thâuv ntêx tix lâuk li phênhv sâu cxơưx trâu tas nro chuôz zis muôx 4 lênhx nênhs. Taz sik, hâur ntu uô hâux lưv, tix lâuk trâus txiêz nanv lox tôngv uô đas jos trâus txu grês ntâu, luz nênhx txov nhêv, têx siêz xar njôngr tsưr ziv uô tsuôk pâuz tso tsês li co, hâur co muôx tsưr ziv cxiv uô tsêr truôx jông chiê jav ntux yar ntux nas. Hmôngr jông zos shông no, lơưr tỉnh Yên Bái li đề án uô tsêr trâu chuôz zis pluôk ntu 2023-2025, tix lâuk chuôz zis jênhv tâu 50 tsov đeiv têz qơưk paz txưv, đros tsưr tsix, lênhx nênhs thiêz nênhs cxênhz jê li sik côngv paz thiêz txeik cxaz nhiêx txiêx tưz cxiv uô tâu luz tsêr yiêz đros cxuô lênhx nênhs hâur chuôz zis li cêr shir phaz lul. “Têz qơưk thiêz têx tập thể tưz paz cur muôx tâu luz tsêr sor si đuô, cur lok six shir phaz. Cur oz niêv txir zuôr sir jos chiê nzor hla đhâu luz nênhx yeiz pluôk”.

          Đros đề án paz nhiêx uô tsêr nhoz trâu ziv chuôz zis pluôk, chuôz zis zuôr xar pluôk ntu 2023-2025, đhâu 2 shông krêz uô, tas nro tỉnh tưz paz uô yiêz thiêz kho đuô 3 cxênhz 22 luz tsêr, uô tiêr 100% luôs hâux lưv tso tơưv. Tas nro nhiêx txiêx huiz tôngv uô njuôs xav tax zuôr xar 370 tỷ đeiv, siêz đuô 2,5 jiês pir đros nhiêx txiêx njuôs xav huiz tôngv lơưr đề án. Đrâuv co, tỉnh tsênhv paz uô 750 luz tsêr tsi nhoz hâur đề án đros tas nro nhiêx txiêx huiz tôngv uô zos zuôr xar 100 tỷ đeiv.

          Pheiz kênh lok tsưr ziv uô muôx chêx cuk đề án, zơưv Lương Mạnh Hà, Phưv Chủ tịch UB thị xã Nghĩa Lộ thiêz pos Lương Thị Xuyến, Phưv Chủ tịch UB huyện Mù Cang Chải, tỉnh Yên Bái puz pâuz: “Iz hâur têx tsưr ziv uô muôx chêx cuk mak thị xã Nghĩa Lộ tưz krêz uô zos huiz tôngv cxuô pênhr jos paz txưv. Đrâuv nhiêx txiêx têz qơưk paz, côngv thongx, tiv phaz tưz cxơưz tiês vênhv tôngv xênhv nênhs, chuôz zis gôngr paz, đros co zos lưx lươngv công an, quân đội thiêz têx đoanx thêv paz hnuz côngz…”

          Bí thư Tỉnh ủy Yên Bái- Trần Huy Tuấn puz pâuz: Nhiv no, tas nro tỉnh yuôr 2 cxênhz 200 ntâu ziv chuôz zis nênhs muôx côngz, liệt sĩ li nênhs cxênhz jê, ziv chuôz zis pluôk, chuôz zis zuôr xar pluôk, nênhs muôx luz nênhx txov nhêv tsênhv nhoz hâur luz tsêr lav uô, xơư nas…Ban thường vụ tỉnh ủy tưz chox kriê UB tỉnh cxiv tsa tsưr ziv, sir jos uô tiêr hâux lưv cxuôv tsêr lav uô, tsêr xơư nas uô ntêx hnuz 30/8/2025: “Lênhx tưs muôx tul tsi ma gôngr paz têx co, lênhx tưs gôngr hnuz côngz mak gôngr côngz uô, muôx tsơưs gôngr tsơưs, muôx ntâu gôngr ntâu…Tiv zix, têx tiv phaz tsov cưv tuôr truôx, pâuz tâu chor chuôz zis chính sách, chuôz zis pluôk, zuôr xar pluôk txov nhêv lok tsêr nhoz chiê muôx tsưr ziv ciêr chênhr paz txưv”.

          Têx luz tsêr cxiv uô jông thiêz tâu khơưk muôz tưz chuôk li chuôz cxaz siêz njênhs njôngr, đas jos chiê têx ziv chuôz zis nênyhs muôx côngz, nênhs pluôk sir jos truôx tul luz nênhx, gôngr phênhv txu grês sei chor ziv chuôz zis pluôk hâur tas nro tỉnh. Txos tas shông 2024, tỉnh Yên Bái tsuôk yuôr 5% ntâu chor ziv chuôz zis pluôk, sơưr tiv 6/14 tỉnhn thax tsav tox siêz faz Bắc; đhâu co, gôngr phênhv coaz tsôngv chox tỉnh Yên Bái yênhx qơư chi cax luk thiêz sơưr thơưx têx tỉnh hâur thax tsav Tây Bắc lok cxiv tsa nôngx cxênhz yiêz./.

Đinh Tuấn-Txâur Vax cxeik nhênhv

Tsưx phưv truôx jông têx jôngr ntông nhoz ntus đriv

             Luôx cêr kuôk cêv hluôr tơưk hâur têx xuz jôngr tưz tâu chor canr bôv qênhz yuôx jôngr thiêz tsôngv pêx xênhv xã ntus đriv Nậm Lạnh, huyện Sốp Cộp, Sơn La sik đros uô txix hâur cheix ntux kruôr txos nhiv no. Têx jiês muk luôx, suô đrox tsuôs cêv hluôr tơưk, canr bôv thiêz tsôngv pêx xênhv ho siz heik kriê têx tsưr ziv chiê bax phax tar hluôr tơưk txeik cuz jôngr. Tix lâus Bả Câuk Xênhv Vưx, nhoz jok Bánh Han, xã Nậm lạnh heik: “Thax tsav har jôngr têz qơưk choz trâu jok seiz car tsi tâu muôx iz jiês tưs trâus hluôr tơưk txeik cuz hlo. Iz ciêz pêz muk qênhz yuôx shuôs iz jiês; gra triêv txuôk, hlâu, fênhx muk luôx, nthuô đoz têx đrox kruôr cov đêz chiê cêv hluôr tơưk, zos qênhz pov kror tưs trâus txeik cuz mak tuô zênhx max”.

            Đros thiêz ntâu lênhx pêx xênhv Nậm Lạnh, jôngr lok six zov chênhr trâu lênhx nênhs luz nênhx, thâuv muôx txos iz đraz ntâu chuôz zis pêx xênhv hâur xã tsênhv huôv tsar kinh tế txix chos jôngr ntông. Têx shông jê lok no, tsôngv box tâu sơưv nhiêx har jôngr, muôx nzir nhiêx txiêx txoz cxơưx trâu luz nênhx thiêz paz cxiv uô têx côngz trênhx, hâux lưv hâur jok..... Tsi tiêk li heik co, luôs hâux lưv tsưx phưv, phax tar tsi chiê hluôr tơưk cuz jôngr thâuv tưs tưz tâu cấp ủy, hâu nov thiêz tsôngv pêx xênhv moz siêz txos, fuô uô jông. Tix lâus Mòng Văn Ênh, thơưx seiz car tổ txiv ngaz hâur thax tsav, uô thơưx seiz têx lênhx nênhs hâur jok Bánh Han, xã Nậm Lạnh uô hâux lưv tsưx phưv jôngr heik pâuz: “Jok têx lênhx nênhs lês uô hâux lưv tsưx phưv jôngr muôx 12 lênhx, siz phênhz côngz muk qênhz yuôx, por hưv, phax tar hluôr tơưk cuz jôngr. Jok cux tâu paz zuôr xar 200 tsov đeiv nhiêx har jôngr, pêz zôngv chor nhiêx co krêz uô cêr muk trâu chor thax tsav huôv tsar uô nox, muôz mê njik trâu têx lênhx luôx cêr cêv hluôr tơưk chiê sơưr đơưk zôngx ziv muk lol uô nox uô hnar, zuôr triêv txuôk, chuôz zênhx phưx vưv phax tar cuz tox cuz jôngr”.

             Co cux zos tsưr ziv 114 tổ tsưx phưv jôngr, phax tar cuz tox cuz jôngr hâur jêx jok nhoz huyện Sốp Cộp fuô uô chiê sik đros tsưx phưv truôx jông têx jôngr ntông. Đros trâu têx li heik sâuv, nhoz cxuô thax tsav ntus đriv tsênhv muôx Ban seiz car jôngr lâul-phax phưv Sốp Cộp li tổ tsưx phưv jôngr, phax tar cuz tox cuz jôngr; têx zênhx Pênhz phax Nậm Lạnh, Mường Lạn thiêz Mường Lèo hur si. Chor canr bôv yuôx jôngr seiz car thax tsav cxuô xã cux nhoz trơưr ntơưv qơư, muk yênhx jêx jok, đros tsôngv pêx xênhv fuô uô tsi so têx hâux lưv heik sâuv. Tix lâus Quàng Văn Minh, uô hâux lưv qênhz yuôx jôngr seiz car thax tsav xã Nậm Lạnh heik: “Cur muk yax kriê trâu têx lênhx tsưr jôngr, côngv thôngx jêx jok cxiv tsa tsưr ziv phax tar hluôr tơưk cuz tox cuz jôngr. Pêz muk cxuô luz jok, huôk njôngr thâuv tsôngv pêx xênhv cơưv jêx jok chiê yax kriê trâu sơưr đơưk lok tsưx phưv jôngr ntông. Lar heik hâur cheix ntux kruôr, pêx xênhv khênhr hlơưr têz, liêx têz nhoz jê têx ntus har jôngr viv li pêz tsuv muk qênhz shuôs, kriê sơưr đơưk hlơưr têz trơưk cui tinhv, iz zav li: Hlơưr trâu thâuv 6 six sơưr nzor tsi yuô muôx chuô lox ntơư, lok sik zar tsâuk ntux xưz”.

            Txơưv zos huyện ntus đriv tsênhv lok six txov nhêv, phênhv ntâu zos tsôngv box heir nênhs tsơưs uô nênhx nhoz, taz sik Sốp Cộp zos thax tsav sơưr tiv 2 hâur 12 huyện, TP hâur tỉnh Sơn La muôx ntâu shôngz ntông nzôngr tox trôngz câuv har, tsav zuôr xar 49%. Cxuô cấp, cxuô ngênhx thiêz tsôngv pêx xênhv hâur thax tsav tsênhv uô jông luôs hâux lưv tsưx phưv xar muôx 150 cxênhz ha har jôngr, hâur co ar muôx jôngr ntông zos zuôr xar 70 cxênhz ha. Zơưv Trần Ngọc Đoàn, Thơưx seiz car, qênhz yuôx jôngr huyện Sốp Cộp, Sơn La heik: “Qênhz yuôx jôngr tưz phênhz côngz, chox kriê cxuô lênhx lês uô luôs hâux lưv yuôx jôngr seiz car truôx jông cxuô xã, thax tsav, hâur têx hnuz kruôr gis hênhr mak sơưr đơưk nhoz trơưr ntơưv qơư hâur niêx hnuz hmo, siz hlôngr njo uô hâux lưv seiz car. Iz chas ntơư, vênhv tôngv pêx xênhv cxuô jêx jok, têx lênhx tsưr jôngr, yax kriê cxuô chuôz zis cir ntơưr chos luk trâu tsar jok, tsar jok chos luk trâu Chủ tịch Ủy ban xã tsưx phưv truôx têx jôngr ntông, tsi chiê trâus cuz hnhiêz”.

             Hâur têx xuz jôngr lâul, hnuz tưs cux pov lênhx nênhs muk qênhz yuôx, tsưx phưv jôngr, hnor têx suôz luk yax kriê lok huôv tsar uô nox, tsưx phưv jôngr ntông chiê nzôngr tox trôngz câuv har nhoz ntus đriv tox siêz faz Bắc./.

Lê Hạnh-Riê Lâux cxeik, nhênhv