Đà Nẵng uô jông phôngz yaox pox niêv sik tưr huôv tsar uô nox

Niêv lâul Cao Thị Hương Lúa, tsưr iz qơư tsiv uô têx thax kaz jiz nhoz phường Hòa Xuân, quận Cẩm Lệ, TP Đà Nẵng qir huôv tsar uô nox txix tsiv uô têx suôz thax, ntơư zos muôz kriêr đax chox lok tsiv uô txix shông 2017. Xuz thơưx, niêv lâul Lúa đros têx chuôz zis pêx xênhv têx tỉnh Quảng Nam, Quảng Bình thiêz têx tỉnh Tây Nguyên chiê sâu zuôr chor nox thiêz kriêr đax nhôngk. Đhâu ntơư, muôz tsiv uô suôz thax, hmôngr kriêr đax.... Nhiv no, niêv lâul Lúa têx xiv huv tâu ciêz đrôngs sâu zuôr truôx tuk, tsiv uô têx huv cik txos kriêr đax nhôngk thiêz kriêr nox muôs trâu têx qơư zuôr muôs hax huv. Iz shông, niêv lâul muôs muôx iz tênhr hmôngr kriêr đax (bâuv li 20 tênhr kriêr nhôngk) thiêz 3 tênhr suz thax kriêr (muôx nhos 6 tênhr kriêr nhôngk) trâu ciêz đrôngs,...., iz shông muôx phênhv sâu tâu iz tỷ đeiv ntâu. Niêv lâul Cao Thị Hương Lúa heik:

“Pêz cê uô meir, cê uô têk chiê uô tâu têx xiv huv. Pêz txuôk đros pêx xênhv thiêz chor pox niêv chiê lơưr chos, pêz sâu zuôr lok tsiv uô têx suôz thax uz no. Khov cxuô cấp Hội pox niêv paz max, têx xiv huv no tưz tâu ntâu tus chôngz lênhx pâuz txos đuô. Hâur ntu zuôr txos, pêz zuôr tsiv uô ntâu xiv huv yiêz chiê tâu trơưk li kruô siêz nhiêv thiêz muôz hâux lưv uô trâu ntâu lênhx pox niêv”.

Niêv lâul Nguyễn Thị Thanh Nhung, nhoz quận Cẩm lệ, TP Đà Nẵng kêr txeik tsêr nhiêx tsênhv chei xã hội 100 tsov đeiv, cxiv uô qơư, zuôr chuôz zênhx, zuôr meir lok huôv tsar uô nox. Iz shông, niêv lâul Nhung qơư tsiv uô suôz thax Thiên Phước uô tâu 4 tênhr thax kaz jiz, phênhv ntâu muôs trâu ciêz đrôngs faz Trung thiêz faz Nam. Niêv lâul qơư uô nox co muôz hâux lưv uô trâu ntâu lênhx lox tôngv pox niêv ntơưv qơư, xav kror đruôz đraz iz lênhx nênhs tâu 8-10 tsov đeiv iz hlik. Nhiv no, têx thax kaz jiz Thiên Phước zos zav nox sưv đros têx lênhx kruô tuôx ndis shuôs têz qơưk uô si thâuv txos Đà Nẵng. Niêv lâul Lê Thị Minh Tú, nhoz xã Hòa Tiến, huyện Hòa Vang, TP Đà Nẵng uô hâux lưv ntơưv niêv lâul Nhung qơư tsiv uô thax kaz jiz Thiên Phước heik pâuz: Thâuv ntêx niêv lâul uô hâux lưv zuôr muôs hax huv li uz li no xưz, phênhv sâu tâu tsi truôx tuk, txix thâuv tuôx uô nuv ntơưv no, luz nênhx tưz truôx tuk, hlôngr yiêz ntâu.

“Uô hâux lưv nhoz no phênhv sâu tâu truôx tuk đuô, txâuk txoz cxơưx trâu luz nênhx, chuôz zis. Thiêz uô hâux lưv hâur no, têx hnuz ntênhs, hnuz tsiêz cux tâu nhiêx, tâu huv hur si viv li pêz tso siêz nhoz uô hâux lưv”.

TP Đà Nẵng muôx iz cxênhz ntâu trâur nuv pox niêv huôv tsar uô nox, zok nriêr hâux lưv uô trâu yênhx cxênhz lênhx lox tôngv pox niêv muôx luz nênhx txov nhêv, pox niêv pluôs. 2, 3 shông jê lok no, Hội Liên hiệp pox niêv TP Đà Nẵng sơưr bê paz 10 cxênhz ntâu lênhx pox niêv vir ndâuk kêr txeik tsêr nhiêx tsênhv chei xã hội zuôr xar 300 tyv đeiv, huôv tsar uô nox, lax luôv. Trơưk li pos Nguyễn Thị Huyền, Phưv Chủ tịch Hội Liên hiệp pox niêv TP Đà Nẵng, Phôngz yaox pox niêv sik tưr huôv tsar uô nox uô hnar tưz cxiz sơưr đơưk hlôngr yiêz siêz xar, krêz đar tsưr ziv uô nox:

“Hội Liên hiệp pox niêv muôx ntâu faz tsưr ziv chiê paz max tsôngv pox niêv vir ndâuk huôv tsar uô nox. Txix ntơư, cxiv tsa, hu zâuv tâu ntâu lênhx pox niêv siz paz uô nox uô hnar, yênhx lix HTX sik côngv têk uô nox. Iz chas co, Hội tưz chox kriê cxuô cấp Hội ntơưv qơư uô jông hâux lưv paz chor pox niêv vir ndâuk sơưr bê kêr txeik tsêr nhiêx tsênhv chei xã hội têx pênhr chiê lơưr huôv tsar uô nox uô hnar, lax luôv, muôx phênhv sâu tâu truôx, cxơưz paz luz nênhx iz hnuz truôx njês jux juk”./.

VOVMT-Riê Lâux cxeik, nhênhv

Cơưv shâuv hloz Hôx chiê cxiv tsa jêx jok vav mênhx, jông jav đuô

Zos cưk kriê ntơưr tâu chiê kriê ntơưr ntơưv thax tsav mênhx cxưx tsơưs nênhs Đầm Ròn, huyện Đam Rông, tỉnh Lâm Đồng txis shông 1980, đhâu xar muôx 4 shông uô tiêr tâu jông côngz xưv zoz zux, shông 2018, zơưv Liêng Jrang Ha Tương, nhoz jok Đa Tế, xar Đạ M’rông so lâul thiêz tâu chiê uô Bí thư Chi bôv jêx jok. Uô kror hâux lưv yiêz no, zơưv Liêng Jrang Ha Tương tưz phuôx huiz tâu jông zos lênhx đảng viên, đros chor đảng viên txơưr hâur chi bôv tsik so tsưr tsix cơưv sêiz lax, kriz uô tâu truôx jông têx nghị quyết chuyên đề lok huôv tsar kinh têr, vênhx huôv, xar hôiv, gra siêz pêx xênhv luz nênhx sâuv cxuô kror. Zơưv Liêng Jrang Ha Tương phêiz kênh, chiê pêx xênhv hâur jok sir jos khưr uô nox, hlôngr yiêz đuô tsoz chos, gra siêz tsưr ziv uô nox, zơưv thiêz chor đảng viên hâur chi bôv puôr lênhx tsuv uô ntêx hlo hâur kriz uô. Tiv zix, tsuv phuôx huiz đảng viên li pưk  txux, sir jos cơưv shâuv thiêz uô lơưr zơưv hloz Hôx cêr uô nênhx jông txix ciês têx hâux lưv uô tsênhv tsênhz:

“Đảng viên tsuv zos chor nênhs uô ntêx hlo, tsuv zos nênhs uô uô ntêx, txix co thiêx paz trâu pox nhuôs hlôngr đuô siêz xar, njiê pov têx zuk uô tâu co. Xưk li ntu đhâu, pêz tso tơưv têx tsưr ziv uô lok six tsênhv tsênhz, li chos jâuz njuôz, tu zus kêiz ol, buô… chiê paz trâu kinh têr ziv chuôz zis. Txix têx kror tưz uô tâu, pêz tưz hêik kriê hâur tas nro pêx xênhv thiêz lơưr cux tưz uô trơưk, paz trâu kinh têr zuk chuôz zis, txo grêk tâu phênhv tưs nhiêx txiêx zuôr têx zav nox yênhx hnuz. Co cux zos kror mak cur pov tâu zos đảng viên thâuv cơưv shâuv mak tsuv cơưv shâuv txix ciês têx hâux lưv uô tsênhv tsênhz li co”.

Đhâu 5 shông uô Bí thư Chi bôv, zơưv Liêng Jrang Ha Tương tưz tsês chiê ntâu kror jông, shir phaz hâur yênhx lênhx canr bôv, đảng viên thiêz pox nhuôs sơưr đơưk siêz. Tsênhv tsênhz, tưz muôx zuôr xar 50 ziv chuôz zis mênhx cxưx tsơưs nênhs hâur jok hlôngr yiêz đuô thax tsav ar têz chos blêx iz chiv tsik jông chiê chos jâuz caz tu zus lưk caz, ntâu ziv chuôz zis chos nzir jâuz tâuv, huôv tsar tu zus tsiêx cxu chiê tưz tsik zos paz muôx tâu ciês zav nox ntơưv qơư mak tsênhv muôs trâu sâuv ciêz đrôngs thiêz. Txix co, pêx xênhv hâur jok luz nênhx jux juk tâu truôx tuk thiêz hlôngr yiêz đuô. Têx phongx cxưx yôngz cok, uô đaz uô kruô pôngz kaz cux tâu tso tsês, têx vênhx huôv mênhx cxưx jông tâu tuôr tsês chiê thiêz phuôx huiz. Cêr muk lok hâur jêx jok hur, jông, huv trâu têx luôs hâux lưv zos jêx jo vênhx huôv. Zơưv Liêng Hót Ha Phương, hêir nênhs K’ho nhoz jok Đa Tế, xar Đạ M’rông puz pâuz:

“Hâur jok Đa Tế muôx Bí thư chi bôv jok chox car mak cêr muk lok hur jông, tas nro cxuô kror hâux lưv hâur jok puôr lênhx tâu uô truôx jông tas hur si”.

Jok Đa Tế, xar Đạ M’rông, huyện Đam Rông muôx zuôr xar 220 ziv chuôz zis, zuôr xar 1.000 lênhx nênhs, phênhv ntâu zos mênhx cxưx tsơưs nênhs. Thâuv ntêx, tiv têx tsưr ziv uô nox pôngz kaz, phênhv ntâu zos chos cà phê thiêz blêx liêx, tu zus tsơưs thiêz tso yar… viv li luz nênhx tsênhv yuôr ntâu txov nhêv, chor ziv chuôz zis pluôs tsav muôx iz đraz ntâu, tâu txo grêk txos yuôr tsơưs đuô 20%.

Lơưr zơưv Nguyễn Hoàng Mai, Bí thư Đảng ủy, Chủ tịch Ủy ban xar Đạ M’rông, zơưv Liêng Jrang Ha Tương zos iz lênhx nênhs muôx suôz bê thiêz zos iz lênhx đảng viên uô ntêx hlo. Đros uô Bí thư Chi bôv jok, zơưv tưz sir jos gôngr côngv trâu côngz xưv cxiv tsa đảng, cxiv tsa chinhr quyền, hêik pêx xênhv sir jos huôv tsar kinh têr-xar hôiv, txo grêk yêiz pluôs truôx đrênhk thiêz côngv têk cxiv tsa jêx jok yiêz, zos lênhx nênhs trâu chor đảng viên hluôk cơưv shâuv thiêz uô trơưk:

“Đa Tế nhiv no zos luz jok muôx ntâu kror jông. Thiêz hâur tsêr vênhx huôv jêx jok cux tưz cxiv tsa chi bôv, ban sêiz car jêx jok, chor đoanx thêv li têx hâux lưv uô, chiê yênhx hli, yênhx quý muôx ntâuk gri tsênhv tsênhz cov sơưr đơưk sir jos uô đuô. Tsuv hêik tiêk, đros zos Bí thư chi bôv jêx jok, zơưv Liêng Jrang Ha Tương tưz uô tâu ntâu kror jông, tâu Đảng ủy, Ủy ban xar muôz ntâu ntơưr kruôk, thiêz vav tiêk ntu zuôr txos zơưv Tương tror sir jos phuôx huiz tex uô tâu no chiê paz trâu Chi bôv Đa Tế ziv hnuz ziv huôv tsar. Zos yênhx iz Chi bôv uô tâu jông nhoz xar Đạ M’rông, thiêz muôx ntâu xar txơưr đuô cơưv shâuv thiêz uô trơưk”.

Chênhr têx sir jos, uô ntêx hlo hâur chor phongz yaox zos thax tsav qơư phuôx tôngv, uô ntêx hlo chiê chor đảng viên hluôk thiêz pêx xênhv sâuv thax tsav cơưv shâuv thiez uô trơưk, đảng viên Liêng Jrang Ha Tương, Bí thư Chi bôv jok Đa Tế zos yênhx lênhx nênhs uô tâu hâux lưv jông hâur jêx jok, tâu huyện Đam Rông, tỉnh Lâm Đồng khơưk muôz lok six ntâu ntơưr kruôk./.

TTTN-Lik Thox cxêik nhênhv