Ntux yiêz hâur chor tsêr niêv côngv siêz nhoz ntus đriv Lai Châu

           Têis cik sơưr nzor kaz shông nhoz jok Dền Thàng A, xar ntus đriv Dào San, tỉnh Lai Châu, ntux yiêz lok txos yênhx luz tsêr yiêz nhiv kruôr uô tâu tiêr. Hâur luz tsêr yiêz tix lâus Dì A Thào tsênhv uô tiz jông so têx trôngx tos, đêi nzir đêiv lịch yiêz. Đrâuv yar tiêx, chor nhuôv zâu đhiê uô si iz ndis luz hâur pâuk txir đuôx tsênhv piz tơưs pax. Sơưr đơưk têx suôz luôs, suôz luk thav tsênhv puz pov iz chêix ntux yiêz lok txos yênhx ziv chuôz zis ntơưv no. Tix lâus Thào ziv chuôz zis zos iz hâur chor chuôz zis tâu Têz qơưk paz 60 triệu đêiv chiê kho đuô tsêr đaz tuôs lav nhoz. Muôz nzir chor nhiêx cxênhx tsês tâu, kir txêik nzir chor cưr tix nênhx tsa, đhâu ntâu shông nhoz tok, nhiv no tix lâus chuôz zis tưz muôx tâu iz luz tsêr khor jông nhoz trơưk siêz xar: “Cur luz tsêr kuz zos tsêr ntôngx, vor vuôk đơưz xưz. Yâu chuô, xâu nas ntâu. Nhiv no tâu têz qơưk paz, chuôz zis muôx nzir nhiêx uô tsêr yiêz mak jông đuô lơưv. Muôx tsêr yiêz mak shir phaz đuô, têx fôngx zưs tuôx yav lok cux shir phaz đuô. Tsiêz no chuôz zis cux tưz bax tâu kêiz, buô chiê nox tsiêz lơưv, lênhx tưs cux shir phaz hênhr”.

            Đros pêx xênhv nhoz ntus đriv Lai Châu, iz luz tsêr khor truôx jông tưz tsik zos chiê gâuv yar , gâuv nas mak tsênhv zos qơư khov vav chiê pox nhuôs truôx siêz nhoz hâur jêx jok, tuôr tsês ar, uô nênhx nhoz truôx thiêz đros por vêv jông ntus đriv, ndêx chiv ntus đriv têz qơưk. Têx hnuz jê Tsiêz, sâuv chor jêx jok tox siêz, canr bôv thax tsav qơư, bôv đôiv pênhz phax ho muk sêiz shuôk chor chuôz zis nhiv kruôr uô tâu tsêr yiêz. Muôx nênhs paz qêz suôz têx vax tsêr, nênhs mak paz đêix qix têz qơưk, đêi đuôz zơưv hloz Hôx… đros pox nhuôs bax chiê tok ntux yiêz. Tix lâus Vềnh Xênhv Zax, Bí thư Chi bôv, Tsar jok Dền Thàng A hêik pâuz: “Tâu njiê pov têz qơưk paz trâu pox nhuôs hâur kho đuô chor tsêr đaz tuôs lav nhoz, cur shir phaz hênhr. Cxiê shông tok Tsiêz hâur chor tsêr kuz mak phiv liv hênhr. Shông no tâu nhoz hâur tsêr yiêz, chuôz zis tưs cux shir phaz. Hlôngr njêx muôs pox nhuôs hâur jêx jok, pez uô tsâus Đảng, Têz qơưk ntâu hênhr”.

           Chor tsêr yiêz tâu uo tiêr tsênhv jux juk paz uô hlôngr yiêz chor jêx jok nhoz ntus đriv. Hêik txos chêix ntux yiez nhoz thax tsav ntus đriv shông no, pêx xênhv tsik so thav txos lênhx tuz lênhx pênhz phax – chor nênhs tưz tsik zos yênhx hnuz hmo qênhz yuôx, sêiz jor jông chor ndêx chi ntus đriv, mak tsênhv paz đas jos cxiv sta têx vax tsêr trâu pox nhuôs. Đại úy Dì A Cường, Đôiv tsar Đôiv Trinh sát, Zênhx Pênhz phax Dào San, tỉnh Lai Châu hêik pâuz: “Canr bôv, chiên sĩ muk trâu thax tsav paz pox nhuôs thâux xa têx suôz jêz, poz jêz, paz cxiv tsa tsêr, vor tsêr. Thâuv pov chor tsêr đaz tuôs lav nhoz tâu kho đuô txix chor tsêr cxiv tsa khor truôx, pêz cux lok six shir phaz đros thâuv muôx tez qơưk paz trâu lơưr”.

            Têx hâux lưv uô tâu, têx hnuz côngz tưz paz uô jông đuô sik côngv quân-pêx xênhv nhoz thax tsav ntus đriv. Đros ntâu chuôz zis, no zos luz tsiêz xuz thơưx ciês tâu nhoz, tok tsiêz hâur luz tsêr yiêz. Nhuôv zâu muôx tâu qơư cơưv ntơưr jông. Nênhs lâul muôx qơư nhoz so sor siêz đuô. Kror chuz muôx tơưl chir njôngr hâur chêix ntux yiêz, uô sor siêz tas nro trâu jêx jok. Thượng tá Hà Đức Long, Bí thư Đảng ủy, Chinhr triv viên Zênhx Pênhz phax Dào San puz pâuz: “Canr bôv, chiến sĩ hâur taz viv tưz sik côngv trâu cuiv, zuôr nzir têx tuv, txax, pav, fax ntiv trâu chor chuôz zis tsênhv txov nhêv. Vav tiêk pox nhuôs muôx tâu stêr yiêz, muôx txâuk cxuô chuôz zênhx chiê tok ntux yiêz, nox Tsiêz sor so, shir phaz đuô; txix co đros chinhr quyền thiêz bôv đôiv Pênhz phax côngv têk por vêv truox jông tsưr qênhx ngaz tuk ntus đriv têz qơưk”.

           Ntux yiêz tưz lok txos sâuv thax tsav ntus đriv Lai Châu đros muôx chor pax txir đuôx kuk thiêz chor tsêr yiêz sor so txix cêr siêz jông. Thâuv pêx xênhv muôx qơư nhoz truôx, jêx jok shir phaz, ntux đriv hax zav tâu por vêv truôx jông đuô. Ntux yiêz lok txos thax tsav ntus đriv têz qơưk cux zuôr lov jêv, shir phaz thiêz sor siêz đuô./.

Khắc Kiên-Lik Thox cxêik nhênhv