Đeix nta suôz Việt Nam yax xa cxuô xor mông muôx liv nhoz ntus đriv Điện Biên

           Hâur coz nas chuô lox nhiv kruôr đhâu, ntâu jêx jok nhoz tox siêz Điện Biên tưz trâus uô ruôr hiêv hnhar, kuôk cêv, têx xor mạng trâus uô tuôr thênhv, tsi jông tas iz cxiê. Txơưv li ntơư, taz sik Đeix nta suôz Việt Nam cux yax xa tâu xor mông txos trâu tsôngv lax pêx xênhv. Khov co, pêx xênhv pâuz tâu sei ntux têx txơưr txar thiêz lênhk txeik tâu tsôngv niêv txir cưr tix nênhx tsa sơưr đơưk nhoz 2 chas thax tsav cêr paz.

           Tix lâus Thi Xênhv Muôk, tsar jok Háng Pu Xi heik: Tsôngv box Háng Pu Xi tsênhv lok six txov nhêv, tsơưs chuôz zis thiêx muôx ti vi seiz, xor tôngx jông zôngv, taz sik khov muôx luz đeix mê mnôngs thiêz Đeix nta suôz Việt Nam tso nta suôz, tsôngv niêv txir lax pêx xênhv tưz pâuz tâu sei têx mông heik lok nas chuô lox, đêx cuôr yôngz nhiv kruôr đhâu. Txix ntơư, bax phax txar thiêz txuôk hu tâu trâu têx đoanx, lênhx nênhs uô hâux lưv jông siêz nhoz cxuô thax tsav tuôx paz max pêx xênhv. “Têx đoanx uô hâux lưv jông siêz, nênhs siêz jông hâur tas nro têz qơưk khov thôngz đhâu Đeix nta suôz Việt Nam cux tưz pâuz txos tsôngv pêx xênhv trâus đêx nas chuô uô ruôr hiêv thiêz tuôx paz sơưr đơưk lok six ntâu. Ntâu đoanx muôz nhiêx txiêx paz pêx xênhv cxiv kho vax tsêr, têx trâus puôk tsuôx chiê sơưr đơưk truôx tuk luz nênhx, viv li tsôngv niêv txir lax pêx xênhv uô tsâus lok six ntâu txos sơưr đơưk têx cêr paz”.

            Zơưv Trọng Bình Xênhv Zax, Bí thư Đảng ủy xã Xaz Zôngz khav tinhv: Nta suôz, lar heik zos Đeix nta suôz Việt Nam chênhr zos qơư yax xa Đảng, têz qơưk, hâu nov têx tsưr ziv, luk kriê txos trâu pêx xênhv. Hâur coz nas chuô lox nhiv kruôr đhâu, chênhr Đeix yax xa tâu zênhx max têx mông muôx liv, tưz paz hâu nov ntơưv qơư thiêz tsôngv pêx xênhv pâuz tâu sei chiê bax phax txar thiêz nzor truôx tuk luz nênhx. Tsi tiêk phax txar tâu têx riêz nênhs, Đeix nta suôz tsênhv yênhx qơư yax xa mông zov chênhr, kriê têx txux chi, tsưr ziv huôv tsar uô nox trâu tsôngv niêv txir lax pêx xênhv. “Đeix nta suôz muôx liv lok six jông, viv têx xor mông puôr lênhx muôx tsênhz, kriê mênhx lok ntux li txơưr txar, cêr huôv tsar uô nox, hu lơưk chor nênhs siêz jông siz chos paz trâu lênhx nênhs njiz phiv liv, cêr txov, chênhr zos li heik co, tâu hâu nov cxuô thax tsav qơư ntâuk grê jông, kruôs nxiês txos. Tsi tas li, tsôngv pêx xênhv cux pov tâu mnôngs đeix nta suôz mak muôx liv cơưk thiêz sơưr đơưk cux pâuz tâu cxuô xor mông jông, lênhx tưs cux kruôs txos, txix ntơư njênhs njôngr, tso siêz đuô’.

           Tsi tiêk tsôngv pêx xênhv thax tsav tox siêz, chor tuz lênhv pênhz phax uô hâux lưv nhoz ntus đriv, Đeix nta suôz cux zos lênhx fôngx zưs sưv jông đros đreiv lơưr hâur yênhx hnuz hmo.

Thiếu tá Trần Minh Hội, canr bôv Tuz lênhv Pênhz phax tỉnh Điện Biên heik: Khov muôx Đeix nta suôz yax xa têx xor mông, canr bôv, chiến sĩ tưz pâuz tâu sei cxuô zav, cê phưx vưv têx hâux lưv uô, cê yax kriê, vênhv tôngv tsôngv pêx xênhv nhoz ntus đriv sik đros tsưx phưv truôx tuk thax tsav qơư, huôv tsar uô nox uô hnar. “Cur khênhr huôk njôngr mnôngs Đeix trâu thâuv luz six hơưv so, têx hnuz so. Đros thiêz tuz lênhv pênhz phax uô hâux lưv tsưx phưv ntus đriv, Đeix nta suôz Việt Nam yax xa lok six ntâu têx mông muôx liv txos trâu sơưr đơưk, paz lênhx nênhs mnôngs pâuz tâu ntâu zav lok têx muôx liv, tsi jông hâur xã hội, luz nênhx. Txix ntơư pêx xênhv chênhr phax, gra siêz txux chi tsưr ziv jênhv pâuz”.

           Nhoz tox siêz đêz đrôngs thiêz hur si têx jêx jok, thax tsav trâus đêx nas uô ruôr hiêv, Đeix nta suôz Việt Nam cux yax xa tâu cxuô xor mông txos trâu pêx xênhv, gra cêr chiê siêz thiêz sik pheiz kênh phiv liv đros sơưr đơưk. Co tsi tiêk yax xa Đảng, têz qơưk têx luk heik, tsưr ziv kriê, tsênhv zos qơư cxơưz đas jos paz tsôngv box thiêz chor tuz lênhv pênhz phax truôx siêz đuô nhoz ntus đriv./.

Vũ lợi-Riê Lâux cxeik, nhênhv

Nôngx mênhx Sơn La xar txơưr, uô yiêz, paz trâu chor hax huv tâu muôs muk txos ntâu qơư đuô

            Ntâu shông sưv đros hâux lưv chos chor jâuz, txir, kok lơưr tsưr ziv cxôngx nzor, niêv tix Lò Thị Tâm nhoz phường Chiềng Sinh, Sơn La njiz tsik tsơưs têx phiv liv tiv jâuz txir kok tsik so trâus caz tho nox thiêz tsơưr lươngv kik. Chiê hlôngr yiêz tsưr ziv uô nox hâur chuôz zis, niêv tix tưz sir jos hlôngr yiêz đuô têx tsưr ziv lok uô jâuz ngaz tuk, sir zôngv khoa học kỹ thuật trâu uô nox… Nhiv no, sâuv kror ar têz muôx 1.000 thiêr ndis, niêv tix chuôz zis tưz sâu tâu txix 30-40 triệu đêiv iz chiv jâuz, siêz đuô lok six ntâu pir li thâuv ntêx: “Thâuv ntêx chuôz zis chos tâuz đas taz sik tsik tâu pâuz kỹ thuật, tsuôk uô tsar lơưx txix shôngz ntông, tsik muôx cxiv luôs zưs đêx. Txix thâuv muôx khuyến nông chox muk cơưv shâuv mak thiêx pâuz uô tsar lơưx txix chor hluô nhựa, cxiv luôs zưs đêx paz sâu tâu jông đuô. Thâuv ntêx zos sâu tâu iz tấn, mak txix thâuv pâuz uô tsar lơưx nhựa thiêz zưs đêx cxênhx txuôs li no mak huôv tsar jông đuô, sâu tâu muôx 2 txos 3 tấn”.

            Đros chor zav tsoz chos tưz tâu uô, chos tâu jông nhoz chor ar têz tox nxaz Sơn La yênhx châuv shông no, ntâu hax huv ntông nox txir yiêz cux tưz tâu kriz uô jux juk, khov muôx pox nhuôs li sir jos thiêz txơưx xar tơưv uô.

           Bùi Việt Hùng, nhoz phường Chiềng Cơi li luz vax txir nho muôx chôngz nênhs zuôr zos iz kror uô tâu jông li hêik sâur. Nhiv no tix lâus Hùng tsênhv muôx 2.700 ntâu tsoz txir nho đuz chos hâur qơư muôx tax thêir vor thiêz xar muôx 400 tsoz lê chos shơư đros 1.000 tsoz thanh long; iz shông muôs trâu sâuv ciêz đrôngs tâu muôx yênhx châu tấn txir cxuô zav: “Zuk nhiêv txos uô kôngz nuv, tiv zix zos chos ntông nox txir, thiêz pov zuôr huôv tsar tâu chor nho thiêz lê sâuv thax tsav Sơn La, viv li tưz sir jos chos oz zav tsoz chos no. Txos nhiv no, zuk tưz uô tâu têx hax huv tsơưr lươngv thiêz têx tsơưr pưr, tsik muôx chor yuôx por vêv đrox tsuôs. Zuk cux tưz muôs sâuv mạng xar hôiv, paz muôs tâu jông đuô chor hux huv no”.

          Pêx xênhv Sơn La chor hợp tác xã cux tưz jux juk hlôngr yiêz têx tsưr ziv uô, huv đros trâu chor tsưr ziv uô nox yiêz paz trâu chor kôngz nuv tâu muôs txos trâu ntâu thax tsav qơư đuô. Li HTX kôngz nuv Chiềng Xét, phường Chiềng An, chor zav tsoz chos chênhr li cà phê, mơ, txir khơưz đuz.

           Lơưr zơưv Quàng Văn Diên, Giám đốc HTX, chiv 2024-2025, HTX xã muôs muôx 40 tấn cà phê kaz jông trâu HTX Cà phê Bích Thao chiê muôs tơưv saz đrâuv têz qơưk, paz muôx phênhv sâu iz lênhx thành viên tâu xar muôx 400 triệu đêiv iz shông: “Pêz chor hax huv cà phê hmôngr 100% zos nôngz cà phê Arabica, uô đros jiz mur zos chor hax huv chênhr, txơưr đuô chor cà phê thương mại. Pêz xêir 100% zos chor txir siêz liêz jông, muôz jiêz yar ntux, tsik zos kra kruôr… Chor hax huv no mak pêz uô cê chiê piêr pâuz, đăngk cir hax huv OCOP, cê muôs chiê muôx tâu phênhv sâu siêz trâu chor nênhs hâur HTX… Chos txix shông 1993, thâuv ntêx gri muôs cà phê tsik truôx, ndê grêk tsik so, txos nhiv no pêz thiêx pâuz tâu tsiv gri chor cà phê zos li chak, tsuv tsoz phưz, uô li chak chiê paz muôx tâu hax huv kaz jông, muôx côngz bê thiêz muôs sâuv ciêz đrôngs cov paz muôx nzir phênhv sâu trâu pox nhuôs, HTX”.

         Thôngz sâu hâur tas nro tỉnh, txos nhiv no, Sơn La tưz cxiv tsa côngz bê trâu 308 qơư cungz ngaz tuk, 29 hax huv tâu por vêv, 218 mã sôr thax tsav chos; 240 ntâu hax huv OCOP cấp tỉnh thiêz têz qơưk; muôx 9 thax tsav kôngz nuv công nghệ siêz đros chor hax huv chênhr, li: yuôx zêx, cuô mik, cà phê, na, txir mo môngk, txir lưv tsiz sôngz, txir khơưz đuz.

           Chênhr sir jos hlôngr yiêz têx tsưr ziv uô nox, sir zôngv khoa học kỹ thuật yiêz jông, huôv tsar chor hax huv yiêz, piêr pâuz têx hax huv… nhoz yênhx lênhx nênhs, HTX tưz paz cxơưz cxiz uô tâu jông đuô têx kôngz nuv ntơưv thax tsav qơư. Tưz tsik zos thax tsav qơư muôx thax tsav chos ntông nox txir ntâu tiv zix faz Bắc; muôx ntâu hax huv txỉ ntông, tsơưr lươngv, phênhv sâu tsar ndê hênhr, muôx côngz bê hâur têz qơưk thiêz sâuv ntiêx têz; Sơn La tsênhv jux juk kriz uô tsưr ziv zos yênhx tsênhv qơư huôv tsar kôngz nuv sir zôngv công nghệ siêz nhoz thax tsav Tây Bắc, sir jos uô cov tâu tsưr ziv hur jông thiêz huôv tsar truôx đrênhk./.

Lê Hạnh-Lik Thox cxêik nhênhv