Điện Biên bax jông luôs hâux lưv kriz uô Ntênhs hội pax lâuk

          Shông no, ntênhs hội pax lâuk zuôr tsưr tsix txix hnuz 13 txos hnuz 16/3 ntơưv niêv đrôngs Điện Biên Phủ, sik côngv đros Hnuz ntênhs vênhx huôv, thiv thao thiêz ju lix têx mênhx cxưx tsơưs nênhs tỉnh Điện Biên jiês tiv 8. Sik côngv tsưr tsix li no njuôs xav zuôr muôx iz cheix ntênhs phêv jông, đros ntâu huôx tôngv jông chiê tsônv kruô tâu tuôx ndis seiz uô si.

          Zơưv Đoàn Văn Chì, Chủ tịch Hội đồng nghệ thuật, Sở vênhx huôv, thiv thao thiêz ju lix tỉnh Điện Biên pheiz kênh, ntênhs phêv shông no li têx jông zos tsaz yênhx nghệ thuật krêz uô đros njiêz luv: “Điện Biên-pax lâuk tơưs jông jav”. Tsaz yênhx tâu bax uô jông đros công nghệ tơưk tênhz 3D mapping yiêz, tso pov Điện Biên li ntu lix xưv thiêz vênhx huôv jông ntơưv qar tiêx tỉnh. Đhâu tsaz yênhx no, tiv phaz xar tsưr tsix iz hmo thuôr uô cêr lov jêv jông tsês chiê hâur tsôngv kruô li siêz tsi plox:

          “Côngz xưv bax uô txos nhiv no tsênhv tâu uô lơưr trơưk tsưr ziv, njuôs xav muôx iz cheix ntênhs phêv jông chiê tsôngv kruôr hâur thiêz đrâuv tỉnh tuôx seiz. Tsaz yênhx thuôr uô cêr lov jêv tâu krêz uô jông li iz lo luk hu zâuv txix nzor, đhâu nhênhz chơưv pov tsaz yênhx thuôr uô cêr lov jêv tuôv zênhv jông thiêz cxix cxuô, heik tơưv lok têz qơưk, lênhx nênhs Điện Biên”.

          Đrâv tsaz yênhx thuôr uô cêr lov jêv krêz uô, ntênhs phêv pax lâuk 2025 tsênhv muôx ntâu huôx tôngv jông li heik cưr cxiêx trâur lâuk, đhiê pax vuôs, piêr kriê tsôngs yo mênhx cxưx, zav nox kaz thiêz têx tsưr ziv uô si trâur lâuk; tiv zix zos muôx jiês muk tâus cêr đros njiêz luv “Điện Biên jông jav”. Ntênhs phêv shông no tsênhv muôx têx đoanx nghệ thuật ntiêx têz txix Lào thiêz Thái Lan cxaz chuôz, gôngr phênhv sik côngv vênhx huôv hâur Điện Biên thiêz têx têz qơưk nhoz buôk co. No zos jiês chiê tsôngv kruô hâur thiêz đrâuv têz qơưk tâu nriêr pâuz lok vênhx huôv thax tsav Tây Bắc cux xưk li thax tsav Đông Nam Á.

          Iz kror jong hâur ntênhs phêv thiêz zos jiês thik “lênhx nxeik pax lâuk jông gâux 2025”. Jiês thik shông no tsi taz kruôk txos lênhx nxeik jông gâux mak tsênhv kruôk txos lênhx nxeik muôx yênhx tưv, txơưx njê thiêz pâuz lok vênhx huôv, lix xưv Tây Bắc. Tiv zix, Ban giám khảo zuôr muôx lênhx nxeik jông gâux zos hoa hậu, á hậu nto bê tuôx chấm thik, paz muôz siêz tsiv grê jiês thik. Pos Nguyễn Thị Thanh Hương, Phưv giám đốc Tsênhv qơư vênhx huôv, điện ảnh tỉnh Điện Biên puz pâuz:

          “Jiês thik shông no zuôr muôx ntâu kror yiêz, tưz hu têx á hậu Việt Nam, nênhs jông gâux hâur têx jiês thik tuôx uô ban giám khảo. Txix co uô tsênhz mênhx đuô, khav tênhv tâu tsiv grê jiês thik no. Têx tỉnh tây Bắc cux muôx ntâu lênhx nxeik cxaz chuôz jiês thik no ntơưv Điện Biên”.

          Chiê taz por ntênhs phêv tsưr tsix jông đros muôx ntâu pax lâuk tơưs jông jav, TP Điện Biên Phủ tưz krêz uô tsưr ziv tsoz phưz jông 2 cxênhz 600 tsoz pax lâuk sâuv têx cêr lox muk lok, taz por pax tơưs jông jav trơưk six hơưv tsưr tsix. Zơưv Đỗ Ngọc Tú, Tsar phongx seiz car niêv đrôngs, TP Điện Biên Phủ puz pâuz:

          “Txix hnuz 15/2 pêz tưz tsuôk yuôx paz cxơưz chiê tsoz pax lâuk hloz lox thiêz jênhs blôngx chiê cov tơưs pax sei thiêz jông. Đros co zos tsuôk yuôx tuô caz hmoz…chiê taz por tsoz pax lâuk tơưs jông trơưk jiês tsưr tsix ntênhs pax lâuk shông no”.

          Ntênhs phêv pax lâuk shông 2025 zuôr zos ntênhs phêv vênhx huôv jông, chox lok trâu tsôngv kruô hâur thiêz đrâuv têz qơưk têx jông jav hâur siêz tsi plox. Têx txox cêr pax lâuk tơưs đơưz vos jông jav, têx jiês thuôr uô cêr lov jêv jông đros têx huox tôngv vênhx huôv zuôr gôngr phênhv khav tênhv Điện Biên li qơư sơưr hâur ju lix Việt Nam./.

(Vũ Lợi-Txâur Vax cxeik nhênhv)

Khoa học kỹ thuật-paz trâu kinh têr kôngz nuv nhoz Lai Châu

“Thâuv ntêx pêz puôr lênhx chos chor zuz nôngz ntơưv thax tsav qơư thiêz tsês chiê nôngz txix chiv no trâu chiv tov kaz, tsơưr lươngv kik. Nhiv no têz qơưk paz nôngz J02 thiêz JR20, tsơưr lươngv siêz đuô, paz trâu pêx xênhv muôx phênhv sâu tâu ntâu kôngz”.

“Thâuv ntêx mak pox nhuôs zôngk têk ntâuk blêx tas ntâu đas jos. Nhiv no muôz mêir uô tsik tas ntâu đas jos thiêz ntâuk sêi đuô lơưv”.

Co zos pox nhuôs nhoz tox siêz Lai Châu li têx hêik pâuz đhâu thâuv sir zôngv khoa học kỹ thuật trâu uô kôngz nuv. Txix thâuv muôx khoa học kỹ thuật, pox nhuôs tưz tsik tas ntâu đas jos lox tôngv, txo grêk tsơưs nhiêx txiêx yưv uô, paz muôx tâu têx qơưk uô kôngz nuv hax huv tsêx trung lox đar ntơưv thax tsav qơư.

Khov sir zôngv khoa học kỹ thuật paz trâu uô nox, txix shông 2021 txos nhiv no tỉnh Lai Châu tưz kriz uô zuôr xar 100 tsưr ziv cxơưz cxiz uô kôngz, choz zok khoa học kỹ thuật uô nox trâu 5.000 ntâu ziv chuôz zis thiêz chor doanh nghiệp, Hợp tác xã. Đuô li, cxuô thax tsav qơư tưz kriz uô tsaz yênhx iz xar iz hax huv OCOP, paz trâu chor hax huv OCOP hov 3 ntơưv thax tsav qơư ndê xar muôx 250 zav hax huv.

Zơưv Nguyễn Xuân Cát, Chủ nhiệm HTX Kuz hluôk nênhs uô ntêx hlo thâuv ntêx huyện Tân Uyên, tỉnh Lai Châu puz pâuz:

“Pêz tâu taz viv khuyến công tỉnh paz nzir nhiêx txiêx thiêz HTX tưz zuôr tâu iz chor mêir uô chor nôngz mắc ca muôx công suất lox. Chênhr viv công suất lox tưz paz muôx nzir phênhv sâu trâu chor ziv chuôz zis thiêz HTX. Khov muôx mêir công suất lox tưz sâu zuôr thiêz uô tâu tas nro têx hax huv trâu pox nhuôs, zos tsik muôx têx mêir lox li no mak zuôr sâu zuôr thiêz uô tsik tâu tas têx hax huv trâu pox nhuôs”.

Cux li HTX Kuz chor hluôk nênhs uô ntêx hlo thâuv ntêx huyện Tân Uyên, txix iz kror qơư uô chor cuz thaz kruôr kok tsơưz zâu, shông 2018 HTX Kôngz nuv dịch vuv Bình Lư, ntơưv xar Bình Lư, huyện Tam Đường (Lai Châu) tâu yênhx lix. Đros sir zôngv tsưr ziv uô nox lơưr ploz tsênhr VietGAP, HTX chor hax huv tưz tsik zos tax tâu hax huv OCOP hov 3 mak tsênhv paz trâu chor cuz thaz kruôr kok tsơưz no tâu muôs muk txos cxuô qơư hâur têz qơưk.

Zơưv Nguyễn Ngọc Ánh, Giám đốc HTX Kôngz nuv dịch vuv Bình Lư puz pâuz, txos nhiv no HTX tưz uô tâu txix 250-300 tấn cuz thaz kruôr kok tsơưz iz shông thiêz hax huv cuz thaz kruôr kok tsơưz Bình Lư tưz jux juk tâu nênhs sir zôngv nhiêv zuôr, khav tênhv tâu côngz bê sâuv ciêz đrôngs:

“Txix thâuv tâu côngz jênhv zos hax huv OCOP, cur pov chor hax huv no tưz tâu piêr kriê txos trâu cxuô qơư thiêz tâu chôngz nênhs pâuz txos. Ntâu qơư muôs hax huv lox, tsêr kruô thiêz chor tos sik côngv tưz pâuz txos thax tsav qơư chor hax huv thiêz pêz cux tưz cir tâu ntâu hux thôngx. Ntu zuôr txos, chor tos sik côngv cux tsênhv zuôr sâu zuôr tas nro pêz chor hax huv thiêz cur pov jê lok no tsôngv kruô cux zuôr ntâu têx hax huv no, viv li no zos iz kror lok six jông”.

Uô lơưr Nghị quyết 17 shông 2024 lok huôv tsar sâm Lai Châu sâuv thax tsav, ntu 2024-2030, tsưr ziv uô txos shông 2045; lơưr Thủ tướng Chinhr phuv li tsaz yênhx huôv tsar Sâm Việt Nam, Lai Châu tưz kriz uô chor thax tsav chos sâm ntơưv huyện Mường Tè, Phong Thổ, Tam Đường, Sìn Hồ. Zơưv Shôngx Lử Por, Chủ tịch Ủy ban huyện Tam đường, tỉnh Lai Châu puz pâuz:

“Uô lơưr tỉnh li tsưr ziv thiêz đhâu qênhz yuôx mak huyện Tam Đường muôx 3 xar zos Hồ Thầu, Giang Ma thiêz Khun Há tưz thiêz tsênhv xêir tsov, tsưr tsix kriz uô zuz nông thiêz chos sâm. Nhiv no chor ziv chuôz zis tưz uô ar chiê uô zuz sâm thiêz iz cxiê ziv chuôz zis tưz muôx phênhv sâu tâu txix chos sâm”.

Khoa học kỹ thuật tưz paz cxơưz cxiz trâu uô kôngz nuv Lai Châu huôv tsar truôx jông./.

Khắc Kiên-Lik Thox cxêik nhênhv