Siêz njênhs njôngr trâu lớp kriê cơưv hâur pâuk ntơưr

          Qir hlôngr trâu cheix ntux no, ntux pok huôz gi, chuô yuôz lok six no njiv. Nhiv kruôr muôx 8 six tsâus ntux, taz sik ntâu chuôz zis nhoz têx jêx jos tox siêz tưz cơư trôngx thiêz tuô tênhv tênhz chiê muk pư. Taz sik, thâuv cxơưx pluôk mor nox trâu chor mê nhuôk tas, niêv lâuk Hờ Thị Xuân, 45 shông, mênhx cxưx Hmôngz, nhoz jos Che Bó, xã Phúc Than, huyện Than Uyên (Lai Châu) ho max gra luz tênhz thiêz hnaz ntơưr chiê muk tsêr vênhx huôv cơưv cxuôv đis muôs ntơưr.

          “Viv luz nênhx nhoz tox siêz, txix thâuv tsênhv zâu cur tsi tâu muk cơưv ntơưr. Nhiv no pov cưk kriê lok jêx jos krêz lớp kriê ntơưr, viv li cur đăng cir muk cơưv ntơưr thiêz nhiv no tưz txơưx nhênhv, txơưx uô toán. Cur zuôr sir jos cơưv tiêr lớp cxuôv đis muôs ntơưr no chiê pâuz đuô, luz nênhx tsi txov nhêv thiêz”

          Ntâu luz hlik no, cưk kriê Trần Trọng Tuấn, Tsêr cơưv cxênhx iz Phúc Than, huyện Than Uyên tưz kriê ntơưr ntơưv lớp cxuôv đis muôs ntơưr nhoz tsêr vênhx huôv Che Bó no. Trơưk 8 six tsâus ntux, lớp cơưv qir tơưk tênhv tênhz chiê kriê ntơưr. Chiê lớp cơưv muôx cxix cxuô đuô, cưk kriê Tuấn yax six tuôx txix thâuv 7 six tsâus ntux thiêz muk txos yênhx ziv chuôz zis seiz nus, tôngv vênhx yênhx lênhx nênhs muk cơưv ntơưr.

          Cưk kriê Tuấn pheiz kênh: Lớp cxuôv đis muôs ntơưr nhoz jos Che Bó muôx 20 ntâu lênhx shux xênhz zos pox niêv mênhx cxưx Hmôngz, puôr lênhx zos lox tôngv tsênhv hâur chuôz zis. Viv li, uô ntêx thâuv zuôr muk cơưv ntơưr mak tsuv uô tas têx luôk hâux lưv hâur tsêr thiêx li muk cơưv tâu ntơưr.

          “Tsôngv box mênhx cxưx Hmôngz nhoz jos no, luz cheix no tưz sâu tas kôngz lôngk taz sik tsênhv yuôr ntâu txir hơưk. Tiv zix cheix no têx lênhx uô txir khênhr muk uô jos đêz, hâur jos tsuôk yuôr pox niêv xưz. Taz sik lơưr cux lok six sir jos hla đhâu têx phêv liv tsâu siêz muk cơưv ntơưr, hnuz tưs cux tuôx cxix cxuô 100%. Cưk kriê tuôx paz kriê ntơưr trâu sđ, tiv zix zos tsôngv box Hmôngz mak cux jux jus pâuz ntơưr, no zos têx jông siêz tiv zix đros têx cưk kriê ntơưr”.

          Xã Phúc Than, huyện Than Uyên nhiv no tsênhv muôx 3 lớp cơưv cxuôv đis muôs ntơưr, đros muôx 70 ntâu lênhx shux xênhz, phênhv ntâu zos pox niêv tsôngv box mênhx cxưx Hmôngz, Poz Ziz, Khơ Mur. Txơưv lớp cơưv muôx yênhx châuv lênhx nênhs nhoz cxuô hov hnuz nhôngs, cxuô zav mênhx cxưx, yênhx tưv tsi xưk iz zav, taz sik viv xar cơưv cov pâuz ntơưr, xar uô tsưr luz nênhx; viv li txơưv luz nênhx jông li chas, txơưv ntux no njiv, lok sik chox mê nhuôk tsênhv zâu đros muk cơưv ntơưr, taz sik têx shux xênhz co cux sir jos chiê tuôx cơưv ntơưr cxix cxuô.

          Cưk kriê Phan Bá Đại, Hiệu trưởng Tsêr cơưv cxênhx 1 Phúc Than, huyện Than Uyên puz pâuz:

          “ Têx shux xênhz nhoz no puôr lênhx txix 40-45 shông ndê muk, no zos têx lênhx nênhs thâuv ntêx tsi tâu muk cơưv ntơưr. Thiêz đros chính quyênx, jêx jos li hâux lưv yax mông chor shux xênhz tuôx cơưv ntơưr cxix cxuô đuô. Shux xênhz nhoz no cux lok six xar muk cơưv ntơưr, gôngr phênhv muôz siêz tsôngv box tiv phaz li yênhx tưv, đrâuv co gôngr phênhv uô tỉnh thiêz huyện li đề án cxuôv đis muôs ntơưr ntu 2021-2025”

          Pos Vũ Thị Kim Lý, Phưv tsar phongx zaoz zux thiêz thox cxov huyện Than Uyên, tỉnh Lai Châu puz pâuz: Chiê têx lớp cơưv tax chêx cuk siêz taz viv xeir têx cưk kriê phưv txơưx kriê ntơưr tsuv zos têx lênhx nênhs muôx chênhz zênhv, pênhr xưv uô côngz xưv thiêz pâuz luk mênhx cxưx. Txix thâuv krêz lớp cơưv txos thâuv suôv câuv, đrâuv jênhv vưv chuyên môn, têx cưk kriê tsênhv muôx jênhv vưv sik côngv đros cấp ủy, chính quyênx tiv phaz chiê uô jông pưs txux yax mông viên sir jos hâur têx vênhv thix nhoz jêx jos:

          “Chiê krêz uô jông côngz xưv cxuô đis muôs ntơưr huyện cux tưz muôx têx chox kriê lok six jông, tsưr tsix têx jiês khiêz phêv thiêz heik cấp ủy, chính quyênx tiv phaz sik côngv đros hâur côngz xưv huiz tôngv shux xênhz muk cơưv ntơưr. Paz txưv shux xênhz muôx luz nênhx txov nhêv, tôngv vênhx chiê muk cơưv ntơưr cxix cxuô. Nhiv no lớp cơưv tsênhv muôx cxix cxuô shux xênhz tuôx cơưv, tax huyện li tsưr ziv qir thơưx tso tơưv hâur côngz xưv cxuôv đis muôs ntơưr”.

          Têx shux xênhz nhoz tox siêz Than Uyên, tỉnh Lai Châu li hâux lưv muk cơưv ntơưr txơưv lok six phêv liv, taz sik hâur têx lớp cơưv zos têx siêz xar njôngr tâu pâuz chiê hlôngr yiêz luz nênhx. Lơưr sir jos muk cơưv ntơưr, cơưv tas ho ciêr chênhr tror lok tsêr bax trâu iz hnuz yiêz uô hâux lưv. Taz sik đrâuv têx suôz nhênhv ntơưr co zos siêz njênhs njôngr lok iz luz nênhx tov kaz no jông đuô nhoz tox siêz Tây Bắc./.

(Khắc Kiên-Txâur Vax cxeik nhênhv)

PHÊNHV SEIZ CAR THIÊZ TSƯX PHƯV JÔNGR

Grê 52. Ntor cơư têx jôngr ntông txưr

1. Đros thiêz vax têz qơưk, thax tsav por hưv têx shôngz ntông, chiv xênhz đrox tsuôs tâu cui tinhv li đrav kaz:

a) Tsi ntor cơư têx jôngr ntông txưr hâur xuz jôngr txưr; tsi khơưk sâu têx shôngz ntông kruôr, ntông vâu lor hâur thax tsav khưx phưx chiv xênhz đrox tsuôs hâur xuz jôngr txưr;

b) Tâu khơưk sâu têx ntông tưz tuôs, vâu lor kruôr, ndêz hâur thax tsav xuz jôngr txưr;

c) Tâu khơưk sâu têx ntông, tơưk, têx đrox, ndêz uz no hâur thax tsav zuôr ar luôv plas chiê cxiv uô côngz trênhx tâu cơ quan lês uô hâux lưv têz qơưk muôx vax huôv cir, tso chei;

d) Tâu khơưk sâu têx zav muôx hâur xuz jôngr, tsiêx kuk, ndêz, têx yuôx đrox njuôz…..lơưr jênhv vưv khoa học thiêz công nghệ đhâu thâuv tâu cơ quan lês uô hâux lưv têz qơưk muôx vax huôv cir.

2. Đros thiêz thax tsav jôngr por hưv chiv xênhz đrox tsuôs, tâu cui tinhv li đrav kaz:

a) Tâu khơưk sâu têx ntông kruôr, tơưk, têx đrox tsuôs uz no iz chas chor shôngz ntông, ndêz hâur xuz jôngr thâuv luôx, tu têx jôngr ntông chiê por hưv, cxiv kho, khưx phưx têx đrox tsuôs, shôngz ntông…..hâur thax tsav qơư zuôr ar luôv plas chiê cxiv tsa côngz trênhx đhâu thâuv tâu cơ quan lês uô hâux lưv têz qơưk muôx vax huôv cir;

b) Tâu khơưk sâu têx zav muôx nhoz hâur xuz jôngr, tsiêx kuk, ndêz…..lơưr jênhv vưv khoa học thiêz công nghệ đhâu thâuv tâu cơ quan lês uô hâux lưv têz qơưk muôx vax huôv cir;

c) Đros thiêz têx jôngr txi, tâu khơưk sâu chor shôngz ntông tưz tuôs, vâu lor, têx đrox tsuôs, ndêz uz no…..; txiêr cơư ntông phưx vưv côngv thôngx li zoz qơưx tâu cơ quan lês uô hâux lưv têz qơưk muôx vax huôv cir.

3. Đros thiêz thax tsav jôngr phưx vưv nhênhz chơưv khoa học, tâu cui tinhv li đrav kaz:

a) Tâu khơưk sâu, ntor têx shôngz ntông lơưr jênhv vưv khoa học thiêz công nghệ đhâu thâuv tâu cơ quan lês uô hâux lưv têz qơưk muôx vax huôv cir

b) Tâu khơưk sâu têx ntông, tơưk, đrox tsuôs, ndêz uz no muôx hâur xuz jôngr thâuv cxiv kho, luôx tu têx jôngr ntông hâur ntu zuôr ar luôv plas chiê cxiv tsa côngz trênhx tâu cơ quan lês uô hâux lưv têz qơưk muôx vax huôv cir;

c) Tâu khơưk sâu têx chiv xênhz đrox tsuôs, shôngz ntông hâur xuz jôngr, tsiêx kuk, ndêz…..phưx vưv nhênhz chơưv khoa học thiêz công nghệ./.

4. Đros thiêz vax shôngz ntông têz qơưk, jôngr txưr têz qơưk, tâu cui tinhv li đrav kaz:

a) Tâu krêz uô, khơưk zuôr têx zuz ntông, yuôx đrox njuôz uz noo;

b) Tâu khơưk têx shôngz ntông, tơưk, đrox tsuôs, ndêz hâur ntu cxiv kho, luôx tu chor jôngr ntông thiêz uô lơưr tsưr ziv txơưr đuô; krêz sâu têx ntông, tơưk, đrox tsuôs, yuôx đrox njuôz, ndêz hâur  xuz jôngr thâuv ntu zuôr ar luôv plas chiê cxiv tsa côngz trênhx tâu cơ quan lês uô hâux lưv têz qơưk muôx vax huôv cir; khơưk sâu têx shôngz ntông tưz tuôs, lor vâu.

5. Khơưk sâu têx shôngz ntông hâur xuz jôngr txưr  uô lơưr Chei no cui tinhv thiêz cui tinhv seiz car, tsưx phưv jôngr./.

(Tuyết Lan-Riê Lâux cxeik, nhênhv)