Huôv tsar đảng viên heir nênhs tsơưs lok six txov nhêv nhoz Lai Châu: Nthuôr đar têx tsưr ziv uô tâu jông

Hâur 2.300 ntâu lênhx đảng viên tỉnh Lai Châu tso nhoz hâur đảng txix hâur six cxiv 2020-2025 txos 31/8/2022, muôx 22 lênhx đảng viên yiêz zos heir nênhs Cống; heir nênhs Mảng muôx 14 lênhx, La Hủ zos 58 lênhx thiêz Si La zos 10 lênhx đảng viên. Têx li heik no zos iz kro jông, phênhv tưs heik tâu têx phiv liv txix ntâu shông đhâu hâux lưv huôv tsar đảng viên nhoz têx heir nênhs tsơưs co. Zơưv Cao Duy Đan, Bí thư Đảng ủy xã Trung Chải, huyện Nậm Nhùn, tỉnh Lai Châu heik pâuz:

“Uô lơưr tsưr ziv choz xeir nênhs tso nhoz hâur đảng, lar heik zos thax tsav tox siêz thiêz ho zos đảng viên heir nênhs tsơưs, no zos iz kro đảng ủy xã lok six cxơưx, viv tsênhz tiês hâux lưv co phiv liv uô. Qir txix luz nênhx xênhz huôx nox nhoz, phênhv ntâu lơưr muôx txux chi, cơưv ntâuz ntơưr cxix cxuô thiêz muk uô nox đêz. Chênhr viv li, thôngz đhâu têx jiês cơưv Ban chấp hành, pêz tưz xar tsưr ziv, heik têx tsêr cơưv nzor kriê txux chi trâu shux xênhz lok sâuv uô hâux lưv, iz chas ntơư xã cux kriê cxaz têx tsưr ziv yuôr trâul, xeir nênhs tso nhoz hâur đảng”.

Shông 2020, lênhx hluôk Hù Chà Soan, heir nênhs Si La, nhoz Seo Hai, xã Can Hồ, huyện Mường Tè tâu cơưv cxaz têx tsưr ziv lok jênhv pâuz đảng. Tiv tsi so muk uô nox đêz viv li Soan tsi tâu pâuz sâu ntơưr thor nhoz hâur Đảng. Hù Chà Soan tsưr ziv xar zos, muôx têx huôv tsar uô nox thiêz muôx hâux lưv uô truôx ciês sâuv chênhr zuk li qơư nhoz, paz côngz đas jos sik đros chor hluôk nênhs cxiv tsa jêx jok cov ziv hnuz ziv huôv tsar, vav mênhx, sơưr đơưk muôx luz nênhx jông đuô:

“Cur cux iz zav li ntâu lênhx nênhs txơưr đuô lok six xar cov muôx hâux lưv uô, muôx phênhv sâu tâu truôx sâuv zuk li qơư nhoz. Muk uô nox đêz cux phiv liv thiêz cux đros cxaz chuôz tsi tâu xênhz huôx đoanx viv li sir jos tsi tâu. Pêz cux xar tiêk, têx lênhx tsi muôx nhiêx hli, thâuv cxaz chuôz têx lớp cơưv cxaz lok jênhv pâuz Đảng mak tror tâu têz qơưk paz chiê tso siêz muk cơưv đrav xã”.

Trơưk li zơưv Trần Đức Hiển, Phưv Bí thư Thường trực huyện ủy Mường Tè, tỉnh Lai Châu, hâur têx shông đhâu huyện tưz uô ntâu faz tsưr ziv, têx tsaz yênhx paz max huôv tsar kinh tế-xã hội trâu tsôngv box heir nênhs tsơưs, hâur co muôx têz qơưk têx chei paz tsês trâu tsôngv box Cống, Mảng, La Hủ, Si La lok sâuv nhoz truôx qơưk, huôv tsar zoz zux; y tế…. Lar heik zos bax cxiv tsa tsưr ziv kriê cxaz têx txux chi yuôr trâul chiê huôv tsar đảng viên:

“Thường trực Huyện ủy tưz chox kriê têx Ban cxiv tsa đảng, lar heik zos tsênhv qơư kriê cxaz têx txux chi tsưr ziv huyện krêz lớp kriê lok Đảng têx tsưr ziv, cui tinhv trâu chor hluôk nênhs, têx lênhx uô tâu hâux lưv jông, txâuk hnuz nhôngs uz no…. nhoz thax tsav tsôngv box heir nênhs tsơưs”.

Zơưv Mạc Quang Mạnh, Phưv Tsar ban Tsưr tsix Tỉnh ủy Lai Châu heik pâuz, têx tsưr ziv zov chênhr, xuz thơưx zos tror huôv tsar đảng viên hâur thax tsav qơư; tso têx lênhx đảng viên hluôk uô ntêx nyuôs, uô qơư khov chiê nthuôr đar, cxiz tsôngv box sik tưr huôv tsar uô nox, siz cơưv shâuv, gra siêz txux chi tsưr ziv jênhv pâuz, tso tsês jux juk cêr nênhx pôngz kaz, sir jos yênhx lênhx đảng viên. Lar heik uô lơưr jông Đảng, têz qơưk têx tsưr ziv, tsênhv chei cik txos thax tsav tsôngv box heir nênhs tsơưs li: Kriê txux chi tsưr ziv uô nuv, zok nriêr hâux lưv uô, yưv pênhr cxiv tsa têx côngz trênhx, paz huôv tsar uô nox uô hnar chiê pêx xênhv gra siêz phênhv sâu tâu, truôx tuk luz nênhx:

“Zuôr txos no, tỉnh cux tror chox kriê huyện ủy ntus đriv hux jos đros đảng ủy tuz lênhv pênhz phax tso nzir canr bôv, đảng viên tuz lênhv pênhz phax muk đros têx chi bộ jêx jok nhoz ntus đriv, thax tsav tsôngv box heir nênhs tsơưs xênhz huôx chiê pâuz tâu têx luôs hâux lưv hâur qơư nhoz cux iz zav li qênhz pov, kriê cxaz têx txux chi tsưr ziv yuôr trâul chiê xeir lênhx nênhs tso nhoz hâur Đảng”.

Nhoz trâu thax tsav ntus đriv tsênhv yuôr ntâu txov nhêv thiêz phiv liv, têx lênhx đảng viên heir nênhs tsơưs tsênhv ziv hnuz ziv tsar ndê chôngz jux juk tuôx, uô qơư khov, cxơưz paz chiê tsôngv box cxuô heir nênhs Lai Châu hla đhâu cêr txov, tso tsês têx cêr nênhx phôngz cxưx pôngz kaz, cxiv tsa luz nênhx tsâu sor, vav mênhx./.

(VOVTB-Riê Lâux cxeik, nhênhv)

Pox niêv tox siêz Thuận Châu sir jos hla đhâu têx phiv liv chiê uô tsưr kinh têr chuôz zis

     Xênhz zus thiêz hloz lox hâur iz chuôz zis uô kôngz nuv, thâuv zuôr txir cxiv tsa chuôz zis, pos Phạm Thị Đào tsik so xar uô li chak cov kinh têr chuôz zis huôv tsar, paz trâu têx tuz nhuôs tâu cơưv ntơưr cxix cxuô. Đhâu ntâu shông sir jos, pos tưz nriêr tâu tsưr ziv huôv tsar uô kinh têr txix chor lớp choz zok khoa học kỹ thuật lok tu zus tsiêx cxu. Shông 1997, tâu chuôz zis muôz iz gơưv niêv buô thiêz tâu Hôiv pox niêv paz chiê txêik pênhr hâur Zênhx hangx tsênhv chêi xar hôiv huyện, pox tưz sir jos chiê huôv tsar kinh têr chuôz zis txix tu zus. Đros tsưr ziv zos muôz lur zus ntêr, thâuv co, pos tưz zuôr nzir 5 tuk mê nhuôv buô lok zus muôs grêix uô ntêx thâuv tok oz tuk niêv buô no sha mê nhuôv. Taz sik, tiv tsik tâu muôx chênhz zênhv, tsưr ziv tu zus cux xưk li tsưr ziv phax tar caz moz, zav nox trâu tu zus ntu thâuv co mak cux muôx tsơưs, viv li chuôz zis hâux lưv tu zus njiz ntâu kror phiv liv:

“Viv zuk tsik muôx nhiêx zuôr jâuz ntơưv têx ciêz, viv li chuôz zis tsuôk chiv chir muk hlêik jâuz, nriêr jâuz chox lok tsuôr hâu, thâuv ntêx mak hâu txix kror chuz thiêz trâur tơưl xưz, phiv liv hênhr; tu zus jux juk iz gơưv txix thâuv tâu niêv têik zơưv txir muôz puz, đhâu co muôz iz tuk muôs, tsês iz tuk thiêz zus tâu nzir iz paz, txix co mak chuôz zis huôv tsar taz sik cux tsuôk car zus iz tuk niêv buô li co xưz”.

Tsik tsês li co, pos tror sir jos nhênhz chơưv, cơưv shâuv gra siêz txux chi, tsưr ziv, cux xưk li cxaz chuôz chor lớp kruôz kriê lok tu zus zos thị trấn, xar, jêx jok tsưr tsix. Đhâu oz pêz shông, chuôz zis chor buô jux juk huôv tsar truôx tuk, sha mê nhuôv jông thiêz paz muôx tâu phênhv sâu truôx tuk; kinh têr chuôz zis txix co cux muôx đuô, tưz tsik zos thêv tas têx nhiêx kir txêik trâu zênhx hangx mak tsênhv muôx nhiêx yưv pênhr kriz đar nzir tu zus. Txos nhiv no, pos chuôz zis tưz muôx tsêr guôx tu zus buô đar xar muôx 100 thiêr ndis, đros muôx 30 tuk buô; iz shông chuôz zis muôx muôx 6 tấn buô grêix, sâu tâu xar muôx 300 triệu đêiv. Pos Phạm Thị Đào hêik:

“Thâuv tu zus, chiê têx qir tsik tsư thâuv tsik tâu nzuôr tsêr guôx, chuôz zis tưz zôngv chor fuôk txix chuz chơưr, đros trâu vâuv poz cưk, thâuv muôz trâu nox mak zuôr vâuv đros nzir mên plaz hnhur chiê muôz ciês trâu buô nox shơư đros krâur. Uô li co mak tsik phiv liv li chak txos tsơưr lươngv chor buô thiêz ho paz uô trâu têx qir buô tsik yuô tsư thâuv tsik tâu nzuôr cov ntưk muk trâu hâur kror bioga”.

Niêv tix Lường Thị Thanh Thủy, Chủ tịch Hôiv Pox niêv huyện Thuận Châu, tỉnh Sơn La puz pâuz, tưz tsik zos iz lênhx pox niêv, iz lênhx niêv xưz, hôiv viên Phạm Thị Đào tsênhv khav tênhv tâu zuk li pưk txux, qơư sơưr hâur cxuô phongz yaox ntơưv thax tsav qơư, tiv zix zos têx phongz yaox sik tưr huôv tsar kinh têr, txo grêk cêr yêiz pluôs. Pos Đào li tsưr ziv tu zus buô tưz tâu chôngz lênhx pox niêv hâur Hôiv cơưv shâuv kriz uô thiêz tax tâu kinh têr siêz, huv đros trâu uô nox ntơưv thax tsav qơư:

“Niêv tix Phạm Thị Đào zos iz hâur chor hôiv viên uô ntêx hlo hâur phongz yaox Pox niêv huôv tsar kinh têr ntơưv thax tsav thị trấn huyện Thuận Châu. Txơưv tiêk nhiv kruôr zos huôv tsar kinh têr ziv chuôz zis, taz sik txix niêv tix Đào li tsưr ziv huôv tsar kinh têr cux tưz jux juk tâu cơưv shâuv chiê kriz uô đêz đar têx tsưr ziv uô nox sâuv thax tsav”.

Đros pos Phạm Thị Đào, huyện tox siêz Thuận Châu tsênhv yuôr lok six chôngz lênhx pox niêv txơưx uô kinh têr hênhr; lơưr uô bluô nux sâuv ntâu kror li: Tu zus tsiêx cxu, chos ntông nox txir sâuv ar têz nxaz, chos jôngr, kinh doanh lok sik yênhx lix doanh nghiệp chiê kriz đar ciêz đrôngs… Txơưv iz lênhx nênhs nhiêk muôx nhiêk tsưr ziv uô kinh têr sik txơưr, taz sik puôr lênhx zos sir jos uô bluô nux txix ciês zuk đas jos, tsưr ziv uô. Txix co, paz sir jos uô côngz xưv txo grêk cêr yêiz pluôs, huôv tsar kinh têr-xar hôiv ntơưv thax tsav qơư./.

(Trấn Long-Lik Thox cxêik nhênhv)