Việt Nam-Lào huôv tsar cêr côngv siêz đhâu hâux lưv uô nhoz têx jos thax tsav ntus đriv

Jok Lao Khô 1, xã Phiêng Khoài, huyện Yên Châu, hâur têx shông tir ntâuk trol châuz Pháp tsưx phưv têz qơưk (1949-1952), tâu kuz Tổng Bí thư Đảng Nhân dân cách mạng Lào Cay-xỏn Phôm Vi Hẳn thiêz Ban têx lênhx nênhs uô ntêx nyuôs tir ntâuk trol châuz Lào Bắc  thâuv ntu co xeir uô qơư cxiv tsa tsưr tsix têx hâux lưv tir ntâuk tsav. Zơưv Tsaz Lao Khô chuôz zis têx cêr paz max, tsi nyei phiv liv tưz jêik jông canr bôv thiêz paz tas zuk li tsưr ziv, pênhr xưv trâu têz qơưk Lào, uô 2 Đảng, 2 têz qơưk, 2 heir nênhs Việt Nam-Lào muôx cêr sik thôngx siêz truôx jông.

Txix zơưv Tsaz Lao Khô chuôz zis 2, 3 ziv nênhs Hmôngz, nhiv no tưz muôx ntâu ziv chuôz zis lok nhoz uô yênhx jok lox, zuôr bê hu zos jok Lao Khô 1 hlôngr trâu jok Phiêng Sa thâuv ntêx. No cux zos jok xuz thơưx tâu xeir fuô uô trơưk tsưr ziv, têx jok nhoz 2 saz đriv têz ntơưv Sơn La sik thôngx siêz, siz paz siz hluz. Trơưk li tix lâus Tsaz Lao Khai, tsar jok Lao Khô 1, jok muôx 130 chuôz zis, uô ntêx thâuv zuôr uô trơưk li heik sâuv, tsôngv pêx xênhv jok Lao Khô 1 thiêz jok Nà Khạng, nhoz thax tsav jok Phiêng Xa, huyện Xiềng Khọ, tỉnh Hủa Phăn (Lào) iz txưv tưz uô nênhx nhoz sik thôngx siêz, siz paz siz hluz, jok no muôx đaz tsi, muôx nuv li chas lok lơưr luz jok saz tov tuôx paz, tuôx đros uô:“Thâuv jok siz paz jok, pêz huôv tsar uô nox, uô kôngz saz tov no lok lơưr cux tuôx cơưv shâuv têx tsưr ziv uô nox, thiêz thâuv pâuz tsưr ziv uô, pêz cux kriê trâu tsôngv niêv txir cưr tix nênhx tsa saz tov uô trơưk; iz zav li uô blêx, poz cưk thâuv ntêx, nhiv no pêz hlôngr chos têx ntông nox txir, lơưr pov pêz uô tâu lơưr cux tuôx cơưv shâuv, uô trơưk…”.

Iz chas sik kriê tsưr ziv huôv tsar uô nox, siz pâur jos, pâur hax huv, chor tuz lênhv Pênhz phax Chiềng On, huyện Yên Châu đros tsôngv pêx xênhv jok Lao Khô 1 cux muk trâu jok Nà Khạng kriê tsôngv cưr tix nênhx tsa nhoz jok saz tov tsưr ziv uô liêx đêx thiêz muôz têx nôngz blêx yiêz lok tsêz chos siv; kriê hlôngr yiêz zuz nôngz tsoz chos, paz thiêz muôz zuôr xar 2 cxênhz tsoz zuz ntông nox txir li: Txir khơưz, txir lol tsuôk….trâu chos. Khov co, tsôngv pêx xênhv jok Nà Khạng tưz sir jos uô lơưr têx tsưr ziv yiêz hâur tsêz chos kôngz, jux juk uô muôx phênhv sâu tâu nzir; tsôngv pêx xênhv nhoz 2 saz đriv têz sik pâur têx hax huv tâu zôngx ziv đuô. Tix lâus Dừ Lao Chảnh, nhoz jok Lao Khô 1, xã Phiêng Khoài heik pâuz:“2 saz Việt Nam-Lào sik thôngx siêz, siz hluz siz paz, cur cux muk saz tov chiê paz lơưr chor cưr tix nênhx tsa jok Nà Khạng, Keo Lôm, Phiêng Xa, Lào chos têx txir ntông, sâu zuôr txir ntông. Muk trâu saz tov, pov lơưr muôs zuk cux zuôr gra lok chiê paz lơưr muôs hur si; hok hâur jok cur chos têx zav txir ntông đaz tsi, txi txir njư, sâu đê tâu ntâu, muôs tâu gri mak cux gra muk saz tov Lào kriê lơưr chos thiêz uô trơưk”.

Shông 2013, Bộ Chỉ huy Bôv đôiv Pênhz phax Sơn La tưz nhênhz chơưv trâu cấp ủy, hâu nov ntơưv qơư kriê thiêz tsưr tsix cir ntơưr sik thôngx siêz đros 7 thax tsav jok thiêz têx jêx jok nhoz jê 2 saz đriv têz hâur huyện Yên Châu, tỉnh Sơn La thiêz huyện Xiềng Khọ, tỉnh Hủa Phăn, Lào. Zuôr xar 10 shông sik thôngx siêz, siz hluz siz paz, têx taz viv, jêx jok tưz uô lơưr jông cui tinhv sik thôngx siêz, siz paz hâur huôv tsar uô nox uô hâuk, vênhx huôv, xã hội, sik đros đơưk tu têx cuz nxor muôx yưv nhoz đriv têz; tsi yuôr qênhx shênhx sik txênhz liêx têz, txênhz ar nhoz, tso tsês têx liêx têz tsi uô, muk lol đhâu ntus đriv tsi trơưk chei, tsôngv box sơưr đơưk nhoz thax tsav đriv têz luz nênhx iz hnuz hlôngr yiêz, vav mênhx jux juk. Zơưv Bun-Luôi Súc-Thi-Vông, Giám đốc Sở Ngoại vụ tỉnh Hủa Phăn, Lào heik pâuz:“Têx jok nhoz jê đriv têz hâur 2 tỉnh Hủa Phăn thiêz tỉnh Sơn La txix thâuv ntêx txos nhiv no thâuv tưs tưz uô nênhx sik thôngx siêz, siz hluz siz paz, muk lol siz shuôs, sik cơưv shâuv têx tsưr ziv huôv tsar uô nox cov sơưr đơưk muôx luz nênhx vav mênhx, hlôngr yiêz”.

Đros trâu têx cêr sik thôngx siêz, siz hluz siz paz hâur huôv tsar kinh tế xã hội, têx thax tsav jok 2 saz đriv têz tưz siz paz, sik đros seiz car, tsưx phưv truôx tuk thax tsav ntus đriv, siz cxơưz chiê sik đros huôv tsar, muôx luz nênhx tsâu sor; cxiv kho Việt Nam-Lào cêr coaz siv fôngx zưs thâuv nzor ziv hnuz ziv truôx jông đuô./.

(Trấn Long-Riê Lâux cxeik, nhênhv)