Huyện tox siêz Mù Cang Chải huôv tsar truôx cxuô hêir nênhs têx txux chi, vênhx huôv jông

Kênhx Hmôngz zos iz zav txux chi, vênhx huôv jông tâu sir zôngv đhâu ntâu tiêv; taz sik, hâur oz pêz shông đhâu lok no, chuôs li chor hluôk muôx tsơưs lênhx thiêx pâuz txos pêz hêir nênhs Hmôngz têx txux chi kênhx cxôngx nzor. Chênhr zos li hêik ntơư, hâur ntu đhâu, tưz muôx chôngz lênhx hluôk tưz cxiv tsa qơư khơưk tsês thiêz huôv tsar cov tâu truôx pêz Hmôngz têx txux chi kênhx cxôngx nzor. Qơư khơưk tsês têx txux chi kênhx tưz muôx 12 lênhx hluôk Hmôngz nhoz cxuô luz jêx jos hâur thax tsav xã sik côngv đas jos tsưr ziv khơưk tsês thiêz cơưv shâuv pêz Hmôngz têx txux chi kênhx tsik chiê trâus pôngz plox. Tus cưr Lở A Thông, nhoz Xã Lao Chải, huyện Mù Cang Chải shir phaz lul hêik pâuz: “Pov chor hluôk nhiv no tsik cơưv shâuv pêz Hmôngz têx kênhx; cur thiêx xar tiêk, tsuv cxiv tsa qơư khơưk tsês têx txux chi kênhx cxôngx nzor, tsik chiê trâus pôngz plox”

          Zơưv Lở A Trừ, nhoz xã Lao Chải, huyện Mù Cang Chải cux hêik pâuz tiêk: Trơưk li pêz Hmôngz chor lâuk piêr tsês, kênhx zos iz zav txux chi, hêik cxiv cxuô lok pêz hêir nênhs Hmôngz luz nênhx nox nhoz muk lok txix thâuv ntêx đros đrêiv luz nênhx đhâu ntâu tiêv thiêz kênhx tâu sir zôngv trâu thâuv muôx iz tus lâuk pur 120 shông tâu tas siv nênhx, chiê xa lênhx nênhs tâu tas siv nênhx co muk thơưx thiêz, muk chuôs pox côngz zơưv côngz. Iz chas ntơư, kênhx cux tâu yuôz hêik txos cêr gâux cêr đrâuv, nthuôr uô cêr lov jêv, đhiê pax vuôs  hâur têx hnuz kriz nênhk hội, hâur têx hnuz tsiêz huv đros hâur luz nênhx: “Chor hluôk nhiv no, chuôs li muôx tsơưs lênhx thiêx cơưv shâuv, khơưk tsês pêz Hmôngz têx txux chi kênhx cxôngx nzor. Taz sik, hâur ntu đhâu, cux pov muôx iz cxiê lênhx hluôk cxiv uô qơư tsês pêz Hmôngz têx txux chi kênhx”

          Ntơưv tsêr cơưv cxênhx 1 thiêz cxênhx 2 xã Mồ Dề, cưk kriê hâur tsêr cơưv ntơưr tưz kriz lớp kriê cơưv shâuv yuôz kênhx, đhiê kênhx, cơưv shâuv ntok ntâuz. Shuv xênhz Suôr xênhv Zax, cơưv lớp 9 A1 shir phaz lul hêik pâuz: “Cur tưz đros cơưv hâur lớp kriê cơưv lok cxuô hêir nênhs têx txux chi, vênhx huôv jông cxôngx nzor thiêz ntơư cux zos iz kro muôx liv chiê sđ khơưk tsês thiêz huôv tsar truôx zuk hêir nênhs têx txux chi, vênhx huôv jông tsik chiê trâus pôngz plox”

          Cưk kriê Phạm minh Dũng, thơưx sêiz car tsêr cơưv cxênhx 1 thiêz cxênhx 2 Xã Mồ Dề cux hêik pâuz tiêk: cxuô lênhx shuv xênhz thiêz cưk kriê puôr lênhx truôx siêz kriê thiêz cơưv cov tuôr tâu truôx cxuô hêir nênhs têx txux chi, vênhx huôv jông nhoz cxuô tsênhv qơư: “Hâur ntu têz qơưs hlôngr yiêz nhiv no, têx tuz nxêik shuv xênhz nhiêv cơưv shâuv lok ntâu zav yiêz, tsik ndo txos zuk hêir nênhs têx txux chi, vênhx huôv jông cxôngx nzor. Chênhr zos li hêik ntơư, cưk kriê hâur tsêr cơưv tưz tso tơưv luôs hâux lưv chiê kriê cxuô lênhx shuv xênhz hâur tsêr cơưv khơưk tsês sđ têx txux chi, vênhx huôv jông cxôngx nzor”

          Mù Cang Chải zos huyện tox siêz muôx 95% zos pêz hêir nênhs Hmôngz nhoz huôv tsar cêr uô nênhx. Chênhr zos li hêik ntơư, luôs hâux lưv khơưk tsês thiêz huôv tsar cxuô hêir nênhs tsơưs têx txux chi, vênhx huôv jông zos iz luôs hâux lưv zov chênhr tsuv uô cov tâu truôx, muôx đros đrêiv hâur luz nênhx, paz phênhv cxiv tsa thax tsav qơư nhoz cov ziv hnuz ziv jông jav huv đros hâur luz nênhx./.

                                         Tsu cxêik nhênhv-Đinh Tuấn, CQTT Tây Bắc

Quảng ninh: Muôx ntâu kror du lịch yiêz hâur chêix so sor shông 2023

Hâur têx hnuz kaz ciêz, Quảng Ninh tsik so tok chôngz lênhx kruô tuôx trâu ntơưv têx qơưk li Vịnh Hạ Long, Bảo tàng Quảng Ninh, chor qơư uô si ntơưv thành phố Hạ Long… đros chor nênhs nhoz so ntơưv têx tsêr kruô ndê muôx 70-80%. Ciês chor qơư tuôx ndis shuôk uô si ntơưv Vân Đồn, Cô Tô lok sik thành phố Móng Cái, chor kruô tuôx thâuv kaz ciêz chuôz ndê txix 30-40%. Zơưv Nguyễn Hải Linh, Trưởng phòng Vênhx huôv, thôngz mông thiêz du lịch huyện Cô Tô puz pâuz:“Shông 2023, Cô Tô tsưr tsix zuôr xar 20 xor xưv vênhx huôv chiê paz thơưz du lịch thiêz muôz tsưr ziv plox đêx hiêr lok huôx tôngv. Cô Tô zos thax tsav qơư xuz thơưx ciês nhoz faz Bắc tâu tso chêi uô kror huôx tôngv no. Đuô li Cô Tô kriz uô ntâu qơư đa đêx du lịch yiêz thiêz hu grus yưv pênhr huôv tsar chor hax huv vênhx huôv thể thao sâuv đêx hiêr jông chiê paz trâu tsôngv kruô muôx ntâu kror uô si đuô thâuv tuôx trâu Cô Tô”.

Chor taz viv lữ hành thiêz kinh doanh dịch vụ du lịch sâuv thax tsav cux cxiv tsa thiêz kriz uô ntâu tsưr ziv du lịch yiêz thiêz chuôz cxaz nriêr pâuz chiê zaz zâuv kruô tuôx hâur chêix so sor zuôr txos. Zuôr thav tâu txos iz cxiê kror yiêz li mnôngs têx suôz trax sâuv chor tàu nox hâuk, cxêik đuôz uô si ntơưv thành phố Hạ Long lok sik chêix dù za ntơưv qơư du lịch Tuần Châu… zơưv Phạm Ngọc Thủy, Giám đốc Sở Du lịch Quảng Ninh khav tênhv:“Tsôngv kruôr zuôr xêir tsov tâu chor qơư du lịch zuk nhiêv. Thiêz tsuv muôx têx tsưr ziv uô yiêz, têx kror hax huv jông thiêz gri huv đros. Tas nro chor no zos cơ quan sêiz car uô xưz mak zuôr uô tsik tâu tsuv muôx doanh nghiệp thiêz thax tsav qơư đros uô. Thiêz kror xuz thơưx zos cxuô thax tsav qơư tsuv tsưr tsix chor hax huv, huôx tôngv jông chiê piêr pâuz, zaz zâuv tsôngv kruô tuôx trâu têx qơư no”.

Đros chor thax tsav qơư du lịch hâur tas nro têz qơưk, Quảng Ninh tsênhv sir jos bax trâu chêix sor sor. Têx kror du lịch yiêz đros têx tsưr ziv phưx vưv jông, gri huv đros zuôr paz trâu tsôngv kruô nhiêv tuôx ndis shuôk, uô si ntơưv têx qơư jông, ngaz tuk no thiêz paz trâu Quảng Ninh uô tiêr tâu tsưr ziv txêik tok tâu muôx 14 triệu lênhx kruô du lịch hâur shông no./.

TTĐB-Txâur Vax cxêik nhênhv