Cao Bằng, Bắc Kạn: Tsi tâu muôx qơư sâu zuôr truôx trâu paz niêv tsiêx cxu

          Muôx ntu zos ciêz muôs nhux tưv lox tiv zix faz Bắc đros thiêz yênhx cxênhz tul nhux tưv, nhux đas tâu muôv muôs hâur têx jiês krêz ciêz, taz sik zuôr xar 3 shông đhâu, ciêz nhux Trà Lĩnh, thị xã Trà Lĩnh, huyện Trùng Khánh, tỉnh Cao Bằng chuôk li tsi krêz ciêz. Qir tiv tsi zos tiv moz sơưr poz sâuv tơưr greix nhoz paz tsiêx cxu huôv xênhz, hâux lưv thâux nhux mul muôs njiz ntâu phêv liv mak phênhv ntâu zos viv muôs tsi tâu nhux tiv moz Covid-19. Zơưv Hoàng Văn La, tsôngv box xã Thành Công, huyện Nguyên Bình, tỉnh Cao Bằng puz pâuz:

          "Cur chuôz zis muôx 10 tul nhux tưv nhux đas, ntêr lok no tsi pov muôx lênhx tưs tuôx nus zuôr, nhiv no muôx tsơưs lênhx nênhs zuôr hênhr. Cur phênhv ntâu zos chiê mul leix têz xưz muôs tsi tâu. Ntu zuôr txos cur tsuv nriêr cxaz ntâu hnhaz blêk đuô thiêx li txâuk chiê puz nhux nox hâur cheix ntux no"

          Nhiv no Cao Bằng muôx tas nro chor nhux tưv nhux đas zos 210 cxênhz ntâu tul. Hâux lưv lax muôs tâu nhux tưz uô ntâu lênhx nênhs tsi xar huôv tsar tu zus nhux thiêz, txơưv tiv phaz muôx chính sách paz 50 phênhv puô nhiêx liv txeik pênhr lơưr UB tỉnh Cao Bằng li Nghị quyết 48/2020 lok paz txưv huôv tsar tsiv uô kôngz jôngr nuv sâuv thax tsav. Đrâuv co, tu zus lơưr saz cơư hâur guôx, tu cov tros cux pôngz ntâu pênhr, tiv zix cheix ntux no nhoz tox siêz Cao Bằng mak no njiv, khênhr muôx đâuk tê, jâuz tâux muôx tsi txâuk trâu nhux nox. Zơưv Nông Văn Giang nhoz xã Trường Hà, huyện Hà Quảng heik:

          "Cur chuôz zis zus 3 tul nhux tưv chiê zuôr qir, leix têz. Shông no nhux muôs tsi tâu trâu saz Trung Quốc viv li cux ntêr lok no tsi pov muôx lênhx tưs tuôx nus zuôr nhux, grê muôs mak grês kis. Nhoz no muôx tsi ntâu jâuz tâux, viv li cur tsi zus ntâu, phênhv ntâu zos puz nox hnhaz blêk, nox krâur thiêz tsơưz xưz".

          Hâux lưv tuz luôv tsi tuôx zuôr nhux tưv nhux đas viv muôs tsi tâu trâu saz Trung Quốc cux uô zênhr shar ntâu txos hâux lưv tu zus thiêz grê muôs nhux nhoz Bắc Kạn, tiv phaz muôx tas nro chor nhux zos 70 cxênhz tul. Ciêz nhux tưv nhux đas lox tiv zix nhoz tỉnh Bắc Kạn zos nhoz xã Nghiên Loan, huyện Pác Nặm cux tsênhv krêz ciêz, taz sik nênhs muôs mak ntâu đuô nênhs tuôx zuôr nhux. Zos li ntu uô ntêx thâuv moz Covid-19 huôv xênhz, grê nhux tâu muôs nhoz Bắc Kạn, Cao Bằng ndê txos 110 cxênhz đeiv iz cir mak nhiv no tsuôk muôs tâu iz đraz thiêz nênhs tuôx zuôr txu grês ntâu, uô ntâu ziv chuôz zis tu zus nhux cơư hâur guôx cux njiz trâus ntâu phêv liv viv grê krâur chuôz ndê thiêz yuôr ntâu nux grê zuôr trâus thêv.

          Ntu đhâu, hâux lưv tu zus nhux tưv nhux đas chiê muôs tưz paz ntâu ziv chuôz zis nhoz têx tỉnh tox siêz hla đhâu cêr pluôk, ngaz tul luz nênhx thiêz sir jos uô bluô nux. Têx tiv phaz no cux tso tơưv tsưr ziv tuôr truôx paz tsiêx cxu tu zus lơưr saz hax huv, chêx chôngk hlôngr yiêz nôngz nhux, tsưr ziv tu zus chiê chuôz ndê yar lengx, huôv tsar tu zus lơưr saz tu zus lox…Zơưv Hà Kim Oanh, Phưv giám đốc Sở kôngz nuv thiêz huôv tsar nôngx cxênhz Bắc Kạn puz pâuz:

          "Nganhx heik UB tỉnh chox kriê têx tiv phaz hlôngr tsưr ziv tu zus yênhx tu zus lox, hâur co heik mênhx txos hâux lưv sâu zuôr xiv huv. Txix tỉnh li pênhr jos, 3 tsaz yênhx têz qơưk li qơư tsov txos li pênhr jos, nganhx cux heik tỉnh chox kriê têx tiv phaz uô lơưr têx dự án sik côngv, txix nôngz tu zus txos tsưr ziv tu zus. Tiv zix zos sâu zuôr xiv huv reik đros HTX thiêz têx doanh nghiệp, đros têx luôk hâux lưv cungz thiêz sâu zuôr …jav qênhx shênhx tu zus tâu taz sik tsi muôx lênhx nênhs tuôx zuôr li nhiv no"./.

Công Luận-Txâur Vax cxeik nhênhv

Sơn La: Sir jos uô cov tâu tsưr ziv txo grêk tsơưs txiêz nanv zaoz thôngz hâur chor hli ka shông 2022

9 luz hli hâur shôngk shông 2022, sâuv thax tsav tỉnh Sơn La muôx yưv 21 txuz txiêz nanv zoz thôngz, uô tuôs 20 lênhx nênhs, traus saz 14 lênhx nênhs. pir li six shông uô ntêx chor txuz chuôz ndê, tsik grêk, chor nênhs tuôs ndê oz lênhx nênhs. Hâur chor hli kaz shông, tỉnh Sơn La sir jos uô tiêr tsưr ziv txo grêk tsơưs têx txiêz nanv zoz thôngz sâuv thax tsav tas nro tỉnh pir li six chênhz shông 2021. Têx tsưr ziv tưs chie uô tâu tsưr ziv no, zâuv sơưr đơưk nros nriêr pâuz.

Lơưr co, Ban ngaz tu zoz thôngz tỉnh Sơn La tror uô truôx thiêz sir jos uô jông Ban ngaz tuk zoz thôngz cxuô cấp li têx huôx tôngv; huiz tôngv tas nro cxiv luôs chinhr triv tỉnh đros uô côngz xưv taz por ngaz tuk zoz thôngz.

Chox kriê chuôz cxaz sir jos uô thiêz gra siêz tsơưr lươngv côngz xưv yax kriê, hêik pâuz, zoz zux pháp luật lok taz por ngaz tuk zoz thôngz. Tror sir jos uô yax kriê txos ciês trâu nênhs cxaz chuôz zoz thôngz pâuz, yax mông đhâu xưv lik têx kror uô cxâuv; tsêx trung trâu chor hluôk nênhs.

Sir jos gra siêz đuô sêiz car têz qơưk lok taz por ngaz tuk zoz thôngz sâuv cxuô kror: Cêv kuôk, Tsưr ziv, yưv pênhr cxiv tsa thiêz sêiz car, kho đuô têx cxiv luôs zoz thôngz. Hâur co, tsov cưv txos tiv zix côngz xưv taz por ngaz tuk zoz thôngz hâur chêix ntux nas chuô thiêz kho đuô, cxaz nzir cxiv luôs ngaz tuk zoz thôngz; pov, xưv lik cov ndar six hơưv têx phiv liv muôx yưv sâuv cêr, têx qơư phiv liv zos qir tiv uô muôx yưv têx txiêz nanv zoz thôngz.

Sêiz car vận tải: Chuôz cxaz sêiz car têz qơưk; qênhz yuôx, xưv lik têx kror uô cxâuv hâur thâux xa hax huv, tsôngv kruô. Chuôz cxaz qênhz yuôx, xưv lik truôx jông têx yêz thâux ntâu thiêz thâux chôngz nênhs tsik zos li cui tênhv.

Thox cxov, kruôz kriê, cungz hlôngr đuô ntơưr tsar yêz: Chuôz cxaz tsưr tsix qênhz yuôx thiêz kho đuô, xưv lik truôx chor tsênhv qơư kruôz kriê tsar yêz, cungz ntơưr tsar yêz li têx uô cxâuv. Tror kriz uô hâux lưv cungz, hlôngr đuô ntơưr tsar yêz yiêz lơưr Bôv Zoz thôngz Vận tải li chox kriê ntơưv iz cxiê huyện.

Chuôz cxaz nzir lưx lươngv chiê uô côngz xưv qênhz yuôx thiêz xưv lik truôx jông chor nênhs uô cxâuv lok zoz ngaz tuk zoz thôngz. Kriz uô truôx jông xưv lik têx uô cxâuv đros trâu yax kriê, hêik pâuz, zoz zux pháp luật chiê paz trâu sơưr đơưk pâuz tsênhz, uô truôx jông lơưr chêi têz qơưk lok taz por ngaz tuk zoz thôngz thâuv cxaz chuôz zoz thôngz.

Sik côngv chuôz cxaz qênhz yuôx thiêz xưv lik truôx jông lơưr chuyên đề, hâur co tsov cưv txos xưv lik chor yêz tas six hơưv sir zôngv, kinh doanh thiêz cxuô kror cik txos kinh doanh vận tải, qênhz yuôx hâuk chơưr, bia, sir zôngv chor câuk mov por vêv tâuz hâu, qênhz yuôx têx yêz thâux ntâu, yêz tsik muôx ntơưr hêik pâuz tsênhz lok ngaz tuk kỹ thuật thiêz por vêv tênhv qơư, yêz pêz luz los chiv chir uô, yêz mêir kuz, tsik jông lơưr tsưr ziv tưz tso tơưv.

Sir jos uô cov tiêr côngz xưv njêis yêv têx kror uô cxâuv sâuv ntus cêr lok ngaz tuk zoz thôngz cêr ar lơưr Ủy ban tỉnh li tsưr ziv tưz tso tơưv.

Tror sik côngv đros Ủy ban ngaz tuk zoz thôngz Têz qơưk hêik chor nênhs paz, paz nzir têx zav paz trâu lênhx nênhs ntaz sâuv blêiv đêx trâu chor pêx xênhv muôx luz nênhx txov nhêv uô nênhx nhoz ntơưv oz luz pak đêx tênhv Hòa Bình thiêz paz đêx tênhv Sơn La./.

(Bích Thủy BS-Lik Thox cxêik nhênhv)