Tsôngv box Cống nhoz Nậm Khao têx txux chi vênhx huôv jông

Tsênhv taz tov uô jâuz mor chiê bax trâu chuôz zis muk uô liêx têz, muk uô lưv zav hâux lưv thâuv tas cik sơưr nzor, taz sik niêv lâul Lò Thị Dung, heir nênhs Cống nhoz xã Nậm Khao, huyện Mường Tè, tỉnh Lai Châu cux ndo njôngr sênhr zuk heir nênhs têx suôz cưr cxiêx.

Niêv lâul Dung heik, tsôngv box Cống têx txưv cưr cxiêx, sênhr suôz heik cưr cxiêx ntơư puôr lênhx zos qir txix sơưr đơưk têx cêr khưr, huôv tsar cêr uô nênhx, nox nhoz muk lok hâur niêx hnuz. Thâuv tâu sâu tsês, sênhr  suôz heik, chor cưr cxiêx co tưz yênhx iz txux chi vênhx huôv thâuv tưs cux zuôr tsuv muôx hâur tsôngv box luz nênhx xênhz huôx niêx hnuz.

“Nênhs Cống muôx iz cxiê txux chi sênhr suôz hu gâux, heik cưr cxiêx uô si lov jêv jông thâuv nzor. Têx txưv cưr cxiêx no phênhv ntâu zos chor lâul kriê trâu têx tuz nhuôs cơưv thiêz sênhr suôz heik. Txos nhiv no, têx tuz nhuôs zâu hâur jok lơưr cơưv shâuv thiêz xar tsưr ziv, sênhr suôz heik txơưr mê njik”.

Đros trâu nênhs Cống têx txux chi hu gâux, heik cưr cxiêx lov jêv, lơưr cux muôx iz cxiê txux chi vênhx huôv, nuv uô jông thiêz. Nênhs Cống li têx txưv cưr cxiêx, cêr uô lov jêv puôr lênhx zos qir txix tsôngv box nhoz no luz nênhx khưr huôv tsar uô nox uô hnar, xênhz huôx xưk li: Đhiê uô si lov jêv heik lol sâuv tsêz chos blêx, hlêis sâu blêx thiêz sik đros nthuôr uô lov jêv thâuv sâu tâu kôngz lôngk nju...... Niêv lâul Lò Thị Dung heik pâuz nzir:

“Xưk li têx txux chi đhiê uô si lov jêv heik sâuv mak zuôr nthuôr uô hâur têx hnuz ntênhs, hnuz tsiêz lok sik 2, 3 hnuz muôx cêr shir phaz, lov jêv li: Txênhv tsêr yiêz, nox yôngz cok....”.

Heik txos nênhs Cống nhoz Nậm Khao li txux chi vênhx huôv, zuôr tsuv heik txos têx ntênhs hội thâuv nzor, hâur co muôx tsiêz Quề La Loong lok zos tsiêz poz cưk. Luz tsiêz no khênhr tâu tsôngv box tsưr tsix lok kaz hli 5, hâur hlik hli 6 luz hli ntux niêx shông-thâuv sâu tas têx kôngz. Co zos six hơưv chiê tsôngv box siz zâuv tuôx côngv cêr lov jêv, uô si đhâu iz shông khưr huôv tsar uô nox. Tsiêz poz cưk cux zos six hơưv chiê tsôngv cưr tix nênhx tsa sơưr đơưk hâur jok uô tsâus txos têx đaz xênhz têz xênhz qơư, car đêx car ar, pos zơưs por hưv por zơưv trâu tsôngv pêx xênhv uô tâu nox tâu hâuk, thor shông yiêz sơưr đơưk muôx đas jos jông, khưr huôv tsar uô tâu kôngz lôngk ntâu, sâu tâu nju, tu zus tsiêx cxu trơưk têk, muôx luz nênhx tsâu sor, vav mênhx. Zơưv Trần Mạnh Hùng, Phưv Gáim đốc Sở Vênhx huôv, thêv thao thiêz ju lix tỉnh Lai Châu heik pâuz, Cống zos iz hâur 4 heir nênhs lok six tsơưs nênhs, tsi tâu muôx 10 cxênhz lênhx nênhs nhoz Lai Châu, ntơư zos: Cống, Mảng, Si La thiêz Lự. Hâur co, heir nênhs Cống tsuôk muôx 370 ntâu chuôz zis, 1.500 lênhx nênhs, uô nênhx nhoz phênhv ntâu hâur xã Nậm Khao, huyện Mường Tè. Txơưv lok six tsơưs nênhs, taz sik tsôngv box Cống nhiv no tsênhv tuôr tsês, por hưv tâu ntâu têx txux chi vênhx huôv thâuv nzor li: Lul heik, tsêr nhoz, tsôngk tril yo hnar, ntênhs hội, cêr nênhx phôngz cxưx, txux chi uô si lov jêv.....

“Nhiv no heir nênhs Cống tsênhv tuôr tsês tâu ntâu txux chi vênhx huôv jông thâuv nzor hâur luz nênhx tsi chiê pôngz plox. Tsênhv tsênhz li: Ntênhs hội Tsiêz poz cưk, nox mor blêx yiêz.....tsênhv tâu tsôngv box Cống tuôr tsês, uô đreiv”.

Xênhz thiêz hloz lox nhoz thax tsav tox siêz đêz đrôngs, chênhr viv li, nênhs Cống Nậm Khao, huyện Mường Tè têx txux chi vênhx huôv muôx lok six ntâu zav jông heik lol tox siêz, qơư nhoz, cêr huôv tsar uô nox uô hâuk. Đros trâu Đảng, têz qơưk cêr moz siêz, paz max, nênhs Cống li txux chi vênhx huôv tsênhv tâu tsôngv box nhoz no tuôr tsês, por hưv jông tsi chiê pôngz plox./.

Khắc Kiên-Riê Lâux cxeik, nhênhv

Bắc Kạn nriêr tsưr ziv huôv tsar qơư ndis uô si côngv thôngx

          Jos Pác Ngòi (xã Nam Mẫu, huyện Ba Bể) –zos iz luz jos hêir nênhs Tày huôv tsar cêr uô nênhx nhoz. Ntơư zos tỉnh Bắc Kạn luz jos xuz thơưx tâu cxiv uô tsêr tok kruô, qơư muôs cxuô hav nox hâuk, hax huv, qơư ndis uô si. Nhiv no, jos Pác Ngòi muôx 100 chuôz zis, hâur ntơư muôx iz đraz chuôz zis tưz cxiv uô cxuô qơư ndis uô si, sêiz shuôk têz qơưs. Txơưv tiêk, hâur yênhx châuv shông đhâu, jos Pác Ngòi cux tsik tâu zos jos muôx qơư ndis uô si côngv thôngx. Cxuô qơư ndis uô si, qơư so, qơư nox hâuk uô tsik tâu huv đros tsôngv kruô siêz nhiêv thiêz tsik tâu muôx tsưr ziv hêik kriê zuk hêir nênhs têx txux chi, vênhx huôv jông trâu tsôngv kruô pâuz. PosTriệu Thị Dung, nhoz jos Pác Ngòi, xã Nam Mẫu hêik pâuz:

“Qơư ndis uô si cộng thôngx ntơưv no, uô tsik tâu huv đros thiêz luôs hâux lưv ntok ntâuz cux muôx ntâu lớp kriê cơưv, taz sik thâuv ntok tâu têx ntâuz tsik muôx kruô tuôx zuôr. Tsuv muôx chôngz lênhx uô thiêx uô tâu yênhx hax huv; nhiv no tsênhv muôx tsơưs lênhx uô tsik tâu yênhx hax huv”.

Lar hêik zos,  cxuô luz tsêr tok kruô chiê tsôngv kruô tuôx ndis shuôk têz qơưs nhoz so muk lok, tsôngv px cux tsênhv uô tsik tâu huv đros tsôngv px hêir nênhs tsơưs luz nênhx nox nhoz muk lok cxôngx nzor. Zơưv Dương Văn Phòng, iz lênhx muôx tsêr tok kruô nhoz jos Pác Ngòi, xã Nam Mẫu, huyện Ba Bể hêik pâuz nzir:

“Iz cxiê chuôz zis tưz uô tsêr, taz sik tsik muôx txâuk nhiêx zuôr chuôz zênhx, trôngx tos, zos chuôz zis tưs muk uô jos thiêx muôx mê njik nhiêx zuôr têx chuôz zênhx co thiêz thiêx uô tâu cxuô qơư ndis uô si. Chênhr zos li hêik ntơư, pêz cux njiz trâus ntâu phiv liv”

Hâur shông đhâu, jos Phiêng An, xã Quang Thuận, tâu xêir tsov cxiv uô jos ndis uô si côngv thôngx nhoz huyện Bạch Thông. Ntơư zos luz jos muôx hêir nênhs Cho huôv tsar cêr uô nênhx nhoz, cux muôx têx zav jông zos vax txir ntông li: Chuôz thox, Thênhx Caz đros trâu têx ar têz chos tsoz chos ntông yuôx zêx trơưk oz saz ntus đêx, tsuôk nhoz đêz đrôngl Bắc Kạn oz pêz cêik cêr. Tsôngv px cux xar njôngr tiêk, muôx têx jông li hêik co đros trâu têx tox trôngz câuv har jông jav thiêz tsôngv px hêir nênhs Cho cux tuôr tâu truôx têx tsôngk tiêz, tsôngk yo, txux chi, vênhx huôv jông cxôngx nzor, tsôngv px hêir nênhs Cho nhoz no, cux zôngx ziv huôv tsar uô qơư ndis uô si, sêiz shuôk têz qơưs. Zơưv Hoàng Nguyên Hữu, tsar jos Phiêng An, xã Quang Thuận hêik pâuz:

 “Chiê cxiv uô qơư ndis uô si côngv thôngx, tsuv huôv tsar truôx zuk hêir nênhs têx txux chi, vênhx huôv jông tsiv grê cxôngx nzor thiêz pêz cux moz siêz txos luôs hâux lưv khơưk tsês, huôv tsar têx txux chi, vênhx huôv jông co cov muôx đros đrêiv hâur luz nênhx niêx hnuz txuôk đros zuk hêir nênhs tsơưs cxuô zav nox kaz…Pêz cux njênhs njôngr tiêk, hâur ntu zuôr txos, cux zuôr uô tâu yênhx côngz qơư ndis uô si, sêiz shuôk têz qơưs”

Txos trâu nhiv no, iz chas đêiv fiêx sâu bê tiêk “Jos ndis uô si côngv thôngx” tâu rêik đhâu iz shông ntâu, jos Phiêng An cux tsik muôx kruô tuôx ndis uô si txos. Viv vax tsêr, qơư ndis uô si cxuô zav uô tsik tâu huv đros thiêz tsik tâu têz qơưs muôz pênhr nhiêx paz cxiv uô.

Chênhr zos li hêik ntơư, ntơưv jiês cơưv tiv 15, Hội đôngx tỉnh Bắc Kạn hâur hli 10 shông 2023 tưz thôngz đhâu Nghị quyết tso tơưv quy tênhv iz cxiê tsênhv chêi paz huôv tsar, cxiv uô qơư ndis uô si, sêiz shuôk têz qơưs hâur thax tsav tỉnh Bắc Kạn; tsênhv qơư co tâu xêir cxiv uô 3 luz jos ndis uô si côngv thôngx hâur thax tsav. Ntơư zos jos Khuân Bang, xã Như Cố, huyện Chợ Mới; Jos Cọn Poỏng, xã Nam Cường, huyện Chợ Đồn thiêz jos Chiêng, xã Đôn Phong, huyện Bạch Thông, tỉnh Bắc Kạn. Zơưv Hà Văn Tiến, Giám đốc Sở vênhx huôv tỉnh Bắc Kạn hêik pâuz nzir:

 “Têx qơư xêir tsuv muôx tox trôngz câuv har jông jav txuôk đros tsôngv px hêir nênhs tsơưs têx tsôngk tiêz, tsôngk yo, txux chi, vênhx huôv jông cxôngx nzor. Têx qơư co tsuv muôx cêr muk lok zôngx ziv trâu cxuô qơư ndis uô si, sêiz shuôk têz qơưs hâur thax tsav tỉnh”

Njuôk xav, đhâu 3 shông fuô uô, Hâu nov tỉnh Bắc Kạn cux zuôr  cxiv uô tâu tiêr cxuô qơư ndis uô si, sêiz shuôk têz qơưs zos đrêiv luôs hâux lưv tso tơưv. Ntơư cux zos iz luôs hâux lưv uô trơưk Nghị quyết Đại hội Đảng bộ tỉnh Bắc Kạn ntu 2020-2025, huôv tsar qơư ndis uô si, sêiz shuôk têz qơưs cov yênhx iz luôs hâux lưv huôv tsar truôx kinh tế./.

         Tsu cxêik nhênhv-Công Luận, CQTT Đông Bắc