Điện Biên truôx siêz trâu jiês thik cơưv tiêr THPT taz por, tax chêx cuk siêz

          Tsêr cơưv THPT huyện Điện Biện, tỉnh Điện Biên muôx zuôr xar 300 shux xênhz cxaz chuôz jiês thik THPT shông no. Shông cơưv nhiv kruôr đhâu, txơưv trâus zênhr shar ntâu tiv moz Covid-19, taz sik tsêr cơưv tưz sir jos kriê cxaz têx chuyên đề đros hâux lưv kriê cxaz pênhr xưv trâu shux xênhz thôngz đhâu cxix luôk têx đề thi, cux xưk li tsưr tsix trâu shux xênhz thik siv. Shux xênhz Đỗ Thị Yến Nhi, cơưv ntơưv tsêr cơưv THPT huyện Điện Biên, tỉnh Điện Biên puz pâuz, txos nhiv no, Nhi thiêz têx fôngx zưs cơưv khối 12 puôr lênhx pov lok six truôx siêz đros têx yênhx tưv cơưv tâu chiê bax trâu jiês thik zuôr txos:

          "Đrâuv yênhx tưv têx cưk kriê kriê trâu cur mak cur tsênhv chiv chir cơưv cxaz têx yênhx tưv sâuv mạng internet. Đrâuv co cux nriêr pâuz cxaz têx đề thi têx môn hâur jiês thik tsêz no cux xưk li iz cxiê đề thi siv txix Sở zaoz zux nhoz têx tỉnh tiêx đras".

          Cưk kriê Trần Đức Đạt, Phó hiệu trưỏng Tsêr cơưv THPT huyện Điện Biên puz pâuz: Txơưv tsuv 2 jiês tsưr tsix kriê ntơur thiêz cơưv trực tuyến, taz sik cxuô cán bộ, cưk kriê hâur tsêr cơưv puôr lênhx lok six sir jos bax têx yênhx tưv kriê trâu shux xênhz. Đhâu nriêr pâuz, txos nhiv no, têx shux xênhz puôr lênhx truôx siêz trâu jiês thik.

          "Đhâu uô côngz xưv kriê ntơur, tsêr cơưv cux tưz chox kriê têx tuêv chuyên môn hlôngr yiêz tsưr ziv kriê ntơur cov huv đros, chêx chôngk lok têx njiêz luv tsênhv, têx njiêz luv coaz tsôngv tiv zix chiê paz shux xênhz truôx siêz thik tax chêx cuk siêz tiv zix"

          Yuôr ntơưv tsêr cơưv THPT TP Điện Biên - iz hâur têx qơư muôx chôngz shux xênhz dưv thik tiv zix sâuv thax tsav thành phố, cưk kriê Phạm Quốc Cường, Hiệu trưởng tsêr cơưv puz pâuz: Đros krêz uô hâux lưv kriê cxaz trâu shux xênhz tsêr cơưv cux bax têx cơ sở cxuô zav, lênhx nênhs txos hâux lưv taz por txiv ngaz, phax tar moz hâur jiês thik.

          "Lok cơ sở cxuô zav txix qar thik, qơư uô côngz xưv txos têx njiêz luv muôx lênhx coaz txơur mak tưz bax uô jông. Txos nhiv no pêz tsuôk chêx chôngk tôngv vênhx shux xênhz truôx siêz chiê uô li chas thik tax chêx cuk jông tiv zix".

          Jiês thik cơưv tiêr THPT shông no, tỉnh Điện Biên muôx 23 qơư thik đros 6 cxênhz 400 lênhx shux xênhz dưv thik, njuôs xav muôx 1 cxênhz 200 cán bộ, cưk kriê seiz thik. Zơưv Nguyễn Văn Đoạt, Giám đốc Sở zaoz zux tỉnh Điện Biên puz pâuz: sở tưz yênhx lix têx đoanx qênhz yuôx uô ntêx thâuv tsưr tsix thik lok taz por cxuô zav trâu jiês thik; kriê cxaz cán bộ seiz thik; chuôz tsar côngz xưv yax mông chiê pâuz tâu xor mông cxix cxuô lok jiês thik trâu cưk kriê thiêz shux xênhz. Đrâuv 23 qơư thik, đros 290 qar thik truôx, nganhx cux bax 37 qar tos thik, 46 qar thik dưv phax trâu jiês thik:

          "Txos nhiv no cxuô hâux lưv bax trâu jiês thik tưz tâu uô tiêr txix yênhx lix Ban chox kriê Hội đồng thik, têx ban yênhx lix Hội đồng seiz thik thiêz têx ban txơur hâur Hội đồng thi puôr lênhx uô trơưk Bộ zaoz zux li tsưr ziv. Tỉnh Điện Biên cux tưz tsưr tsix kriê cxaz nghiệp vụ trâu cán bộ seiz thik txix ciês thâuv muk thox cxov ntơưv Bộ zaoz zux lok".

          Shông 2021, chor shux xênhz thik cơưv tiêr THPT nhoz tỉnh Điện Biên tax 98 phênhv puô ntâu. Đros hâux lưv bax jông cxuô zav trâu jiês thik, nganhx zaoz zux tỉnh Điện Biên tsênhv ndar txos iz jiês thik taz por, muôx tsơur lươngv, tax chêx cuk siêz./.

Vũ Lợi- Txâur Vax cxeik nhênhv