Chêix đê njik yuôx zêx nhoz tox siêz Suối Giàng

Tsik zos chiv yuôx zêx sâu đêx tâu tsơưr lươngv siêz tiv zix hâur shông taz sik chiv yuôx zêx chêix ntux yiêz ho zos chor yuôx zêx tâu tsôngv box Hmôngz nhoz Suối Giàng tok njôngr, viv chor yuôx zêx no iz shông tsuôk muôx iz jiês. Chor yuôx zêx đhâu iz ntu muôx ntux no, huôz tsâuk zuôr hlar tuôx têx chor njil mok jông thiêz kaz tiv zix. Niêv tix Sổng Thị Su, nhoz xar Suối Giàng, huyện Văn Chấn puz pâuz:“Thâuv sơưr nzor uô mor siêr krưr mor gra muk, txos trâu chor trôngz yuôx zêx muôx 8 six, thâuv no mak chor yuôx zêx thiêx pôngz lưs tas. Muk nzor hênhr đê mak chor yuôx zêx zuôr ntuz, chor njil yuôx zêx zuôr nông. Zos yar ntux mak txix 7 six ntâu txos 8 six đê tâu lơưv hok muôx ntux nas mak tsuv txos 9 six thiêx đêx tâu. Chiv yuôx zêx chêix ntux yiêz no mak pov đê lok six shir phaz, paz muôx nzir nhiêx txiêx trâu chuôz zis”.

Nhoz Suối Giàng nhiv no muôx plâuz vạn ntâu tsoz yuôx zêx Shan Tuyết, hâur co phênhv ntâu zos chor yuôx zêx lâul muôx yênhx puô shông, siêz muôx oz pêz thiêr. Nhoz sâuv kror qơư siêz đuô 1.200 thiêr pir đros ntus đêx hiêr, muôx huôz tsâuk yênhx shông, jêx tưv thâuv đruôz hnuz thiêz hmo ntux sik txơưr ntâu đros trâu qiv hơưv, đêx ar huv đros, uô trâu chor yuôx zêx Shan tuyết kaz thiêz tsư ha, cuô đêx njuôz. Tiv zix, chor yuôx zêx ntơưv no tsik sir zôngv txos iz zav hóa chất lok sik qir zuôv tưs viv li lok six hur.

Yuôx zêx lâul ntơưv Suối Giàng mak kaz sik txơưr đhâu têx chêix, hâur co chiv ntux yiêz chor yuôx zêx kaz thiêz tsư ha đuô hur si, uô trâu chor nênhs hâuk tâu lok six nhiêv. Pos Lâm Thị Kim Thoa, Giám đốc HTX Suối Giàng, huyện Văn Chấn hêik:“Chor yuôx zêx lâul no txos chiv ntux yiêz mak tsư ha thiêz lok six kaz. Tas nro chor yuôx zêx pê zuô tâu mak lok six kaz, cux tsik pov kaz hêik li chak trâu sơưr đơưk pâuz. Chiv ntux yiêz zos chiv tâu ntâuk gri lok six siêz, tâu chor nênhs nhiêv hâuk yuôx zêx ntâuk gri siêz lok kror tsư ha thiêz kaz”.

Hâux lưv sâu đê chor yuôx zêx nhoz Suối Giàng mak phênhv ntâu zos chor pox niêv mênhx cxưx Hmôngz đê. Sâuv tsoz yuôx zêx, iz hnuz iz lênhx nênhs zuôr đê tâu muôx 10 ntâu cir njil yuôx zêx nhôngk. Niêv tix Lyk Xênhv Shôngx nhoz jok Giàng B, xar Suối Giàng, huyện Văn Chấn puz pâuz, thâuv ntêx hâux lưv sâu đê chor yuôx zêx tsik tâu uô jông, tsik tâu muôx têx tsưr ziv sâu đê viv li tsơưr lươngv tsik siêz, taz sik khov chor pox niêv sơưr đơưk tâu cơưv shâuv têx tsưr ziv kỹ thuật, viv li tưz pâuz sâu đê huv zos “1 luz njil oz đêiv blôngx”. Nhiv no chor njil yuôx zêx no tsênhv tâu sâu zuôr txix 25 txos 30 cxênhz đêiv iz cir:

Txix chor njil yuôx zêx sâu đê tâu, ho tâu chor nênhs nhoz ntơưv no uô jông uô zuôr paz muôx tâu chor yuôx zêx nto bê, hâur co tsuv hêik txos yuôx zêx Hồng trà, Hoàng trà thiêz Bạch trà. Zos chor zav yuôx zêx kaz jông tiv zix. Tix lâus Nguyễn Mạnh Linh, sêiz car huôv tsar têx hax huv, HTX Suối Giàng, huyện Văn Chấn puz pâuz: “Thâuv chor njil yuôx zêx đê lok mak tsuv njuôz jông, đhâu co chor njil yuôx zêx tâu tsês chiê thiêz xuôk mêir nzuôx chuô nzuôx cov tsik sor hênhr. Đhâu co chor nênhs hâur qơư uô zuôr phêiz chor yuôx zêx, yuôx zêx iz luz njil mak zuôr tâu uô chor yuôx zêx kaz jông li bạch trà, 1 njil 2 blôngx mak uô têx zav yuôx zêx njuôz lok sik hồng trà, hoàng trà…”.

Chiv yuôx zêx chêix ntux yiêz-zos kriz thơưx trâu iz shông yiêz tsênhv tâu pox nhuôs tsôngv box Hmôngz nhoz Suối giàng tror sâu đê, uô chiê paz muôx tâu têx hax huv kaz jông muôs muk trâu cxiê qơư hâur têz qơưk thiêz muôs muk trâu cxiê qơư sâuv ntiêx têz./.

                                                                                                              Đinh Tuấn-Lik Thox cxêik nhênhv

Nôngx mênhx tsuv chuv tôngv cxaz chuôz

hlôngr yiêz số uô kôngz nuv

          Đhâu 13 shôngk ntâu uô tsaz yênhx Nôngx cxênhz yiêz reik đros têz qơưk li têx qơư tsov txos, tỉnh Quảng Ninh tưz muôx 100% xã tax ploz tsênhr nôngx cxênhz yiêz hâur co phênhv ntâu zos tax xã nôngx cxênhz yiêz muôz siêz; 28/98 xã tax nôngx cxênhz yiêz hlôngr yiêz. Tas nro têx tiv phaz nhoz Quảng Ninh tax thiêz uô tiêr jênhv vưv cxiv tsa nôngx cxênhz yiêz, hâur co, huyện Tiên Yên thiêz Đầm Hà tax ploz tsênhr nôngx cxênhz yiêz muôz siêz xuz thơưx tas nro têz qơưk. Chêx cuk jông tiv zix zos Quảng Ninh uô tiêr tsaz yênhx 135, tsi yuôr xã zos xã txov nhêv tiv zix. Phênhv sâu fênhx pheiz thax tsav nôngx cxênhz tax 73 tsov đeiv ntâu iz lênhx nênhs iz shông. Gôngr phênhv lok haur chêx cuk no, Hội nôngx mênhx Quảng Ninh tưz uô jông pưs txux sik côngv, yax mông, vênhv tôngv nôngx mênhx uô jông Đảng li chủ trương chính sách, têz qơưk li cêr chei. Tiv zix, Hội nôngx mênhx Quảng Ninh zos qơư tâu njênhs njôngr, sơưr paz 1 cxênhz 234 hội viên txeik pênhr đros tas nro 2 cxênhz 200 tỷ đeiv chiê huôv tsar kinh têr. Zơưv Trần Văn Thụ, Chủ tịch HĐ xã Húc Động, huyện Bình Liêu puz pâuz:“Xã Húc Động txov nhêv tiv zix tâu txeik pênhr txix cuiv paz txưv tiv zix zos tỉnh thiêz huyện li cuiv paz nôngx mênhx. Tas nro nhiv no, txeik txix zênhx hangx chính sách xã zos 20 tỷ đeiv ntâu thiêz têx phênhv paz txưv zos zuôr xar 2 tỷ đeiv chiê cxaz chuôz têx trâur nuv chos, tsiv uô cuz thaz kok blôngx njê, tu zus yik thiêz nhux đas chox lok chêx cuk kinh têr siêz”

          Qir lok trâu ntu yiêz chiê muôz siêz tsơưr lươngv luz nênhx nôngx mênhx nhoz uô nênhx ntơưv thax tsav nôngx cxênhz, tox siêz, poz hiêr, ntus đriv, Quảng Ninh tso tơưv tsưr ziv txos shông 2030 muôx 100% chor xã thiêz tsơưs tiv zix 40% chor xã tax ploz tsênhr nôngx cxênhz yiêz hlôngr yiêz, 100% chor huyện tax nôngx cxênhz yiêz muôz siêz, tsôngv box nhoz thax tsav nôngx cxênhz li phênhv sâu bâuv 3 jiês pir đros shông 2020. Chiê tax tâu chêx cuk no, tiến sĩ Nguyễn Khắc Toàn, Hiệu trươngv Tsêr cơưv cán bộ Hội nôngx mênhx VN puz pâuz, nênhs nôngx mênhx nhoz Quảng Ninh tsuv cxaz chuôz jông đuô thiêz hâur ntu hlôngr yiêz số, tiv zix zos thâuv kôngz nuv zos 1 hâur 8 vênhv thix tsov cưv hlôngr yiêz số têz qơưk:“Nôngx mênhx li phêv liv tiv zix zos jênhv pâuz, kênhz hlôngr yiêz. Nôngx mênhx tsi tâu xar tâu tiêk hlôngr yiêz số zos hâux lưv zuôr trâus, zos paz huôv tsar tsưr tsix, lênhx nênhs thiêz tas nro vênhv thix, tas nro têz qơưk. Txơưv kôngz nuv zos iz hâur 8 vênhv thix tâu tsov cưv hâur hlôngr yiêz số têz qơưk, taz sik hâux lưv tso tơưv zos tsưr tsix kôngz nuv mak Hội nôngx mênhx li pưs txux lok six siêz zos tsưr tsix đoanx thêv, zos lưx lươngv paz nôngx mênhx, lênhx nênhs coaz tsôngv hâur kôngz nuv, nôngx cxênhz”.

          Chiê uô hâux lưv hlôngr yiêz số, hâux lưv kriê cxaz, muôz siêz pênhr xưv số trâu nôngx mênhx zos lok six zuôr trâus thiêz uô ntêx tsuv chêx chôngk pênhr jos chiê thox cxov chor cán bộ uô côngz xưv hội nhoz têx cấp. Nênhs nôngx mênhx cux tsuv chuv tôngv cơưv shâuv lok công nghệ số, jux jus pâuz lok kỹ thuật yiêz, chox xiv huv kôngz nuv trâu sâuv sàn muôv muôs thiêz yênhx trus cxaz chuôz lok hlôngr yiêz số uô kôngz nuv./.

                                                                                                    VOV Đông Bắc-Txâur Vax cxeik nhênhv