Nganhx zaoz zux Lai Châu sik côngv tês tuôr tsês, phuôx huiz mênhx cxưx li

cêr nênhx vênhx huôv jông

          Câu lạc bộ "Tuôr tsês vênhx huôv, nghệ thuật trâur lâuk" li six hơưv kriê đhiê pax vuôs, heik cưr cxiêx trâur lâuk nhoz tsêr cơưv cxênhx 2 Ta Gia, huyện Than Uyên, tỉnh Lai Châu lok six lov jêv đros têx suôz trax tính tâuv lok six jông mnôngs. Đhâu 2 shông yênhx lix, txos nhiv no CLB tưz muôx 30 ntâu lênhx học viên zos têx mê nhuôk shux xênhz txix lớp 6 txos lớp 9 zos mê nhuôk tsôngv box mênhx cxưx Thái tuôx cxaz chuôz. Lớp muôx ntâu lênhx mê nhuôk shux xênhz tuôx cơưv zos viv đrâuv têx môn cơưv tsênhv, no tâu seiz zos huôx tôngv uô si lov jêv đhâu six hơưv cơưv ntơur tas pêv shux cơưv. Shux xênhz Tòng Thị Anh, cơưv lớp 7A1, tsêr cơưv cxênhx 2 Ta Gia puz pâuz:

          "Tsêr cơuv muôx lok six ntâu huôx tôngv vênhx huôv mênhx cxưx. Cur zos nênhs Thái viv li lok six nhiêv zuk mênhx cxưx li vênhx huôv. Cur zuôr sir jos cxaz chuôz têx huôx tôngv chiê tuôr tsês, phuôx huiz zuk mênhx cxưx li vênhx huôv jông"

          Đros thiêz hâux lưv muôz siêz tsơur lươngv kriê thiêz cơưv ntơưr, hâur ntu đhâu, Tsêr cơưv mê nhuôk zâu xã Phúc Than, huyện Than Uyên tưz uô uô cê ntâu huôx tôngv tuôr tsês têx mênhx cxưx li vênhx huôv lok hâur tsaz yênhx cơưv. Chiê muôx txâuk têx chuôz zênhx kriê thiêz lok vênhx huôv, tsêr cơưv tưz đros shux xênhz li niêv txir chiv chir uô têx chuôz zênhx uô si thiêz tsưr tsix huôx tôngv heik kriê têx mê nhuôk têx tsưr ziv uô si trâur lâuk li: ntâuk tuôx luz, leiv poz, đhiê pax vuôk ... txix co, mê nhuôk tâu kriê cxaz lok pênhr xưv uô nênhx, zaoz zux siêz nhiêv têz nhiêv qơư, siêz tuôr tsês thiêz phuôx huiz zuk mênhx cxưx li vênhx huôv jông. Cưk kriê Nguyễn Thị Ánh Nguyệt, Hiệu trưởng tsêr cơưv mê nhuôk zâu xã Phúc Than, huyện Than Uyên puz pâuz:

          "Chiê mê nhuôk pov iz hnuz muk cơưv ntơưr zos iz hnuz lov jêv, ntơưv tsêr cơưv muôx shux xênhz zos tsôngv box Hmôngz mak chiê mê nhuôk uô si li: ntâuk tuôx luz, đhiê kênhx; ntơưv tsêr cơưv muôx têx shux xênhz mênhx cxưx Thái mak chiê mê nhuôk đhiê pax vuôs xòe, uô têx tsưr ziv uô si trâur lâuk; chiê mê nhuôk ziv nhiêv muk cơưv ntơưr đuô"

          Hâur shông cơưv 2020-2021, sâuv thax tsav tưz muôx tsêr cơuv cxênhx 1 thiêz cxênhx 2 yênhx lix CLB "Tuôr tsês vênhx huôv, vênhx ziv trâur lâuk" đros têx paz li: xơưk pax ntâuz, yuôz kênhx Hmôngz, heik cưr cxiêx Thái, ntâuk trax tính tâuv. Txos nhiv no, têx trâur nuv no tâu krêz uô đêz đar ntơưv 100 phênhv puô têx tsêr cơưv cxênhx 1 thiêz cxênhx 2. Đhâu co, paz têx mê nhuôk pâuz, seiz tâus thiêz tuôr tsês zuk mênhx cxưx li vênhx huôv jông, pâuz lok vênhx huôv têx mênhx cxưx sâuv thax tsav. Pos Đỗ Thị Kim Lý, Phưv tsar phongx zaoz zux thiêz thox cxov huyện Than Uyên, tỉnh Lai Châu puz pâuz: Nhiv no, têx tsêr cơưv tưz uô tsưr ziv iz lênhx cưk kriê ntơưr, shux xênhz zos nênhs mênhx cxưx mak tsuv muôx zuk mênhx cxưx li iz chêr khâuz ndơưk chax chês hnar lok hnuz thưr 2 yênhx ciêz, hnuz ntênhs, hnuz tsiêz thiêz huôx tôngv đrâuv six hơưv kriê ntơưr. Têx tsêr cơưv đros cấp ủy, chính quyênx tiv phaz yax mông, zaoz zux muôz siêz têx lênhx uô niêv uô txir, tsôngv box li siêz tuôr tsês, phuôx huiz têx mênhx cxưx li vênhx huôv jông reik đros huôv tsar ju lix côngv thôngx:

          "Chiê uô yênhx côngz Nghị quyết lok tuôr tsês, phuôx huiz têx mênhx cxưx sâuv thax tsav li vênhx huôv jông, đros nganhx zaoz zux huyện Than Uyên chiê chox têx njiêz luv lok hâur tsêr cơưv, pêz tưz chox kriê tas nro têx taz viv tsêr cơưv cxiv tsa CLB "Tuôr tsês vênhx huôv trâur lâuk" têx mênhx cxưx. Txix co tsưr tsix kriê hâur têx tsêr cơưv têx njiêz luv zos vênhx huôv mênhx cxưx jông".

          Chiê huôx tôngv tuôr tsês, phuôx huiz vênhx huôv jông tâu krêz uô jông, nhiv no têx tsêr cơưv nhoz huyện Than Uyên, tỉnh Lai Châu tsênhv hu cxaz têx nghệ nhân, lâuk jos, têx lênhx txir ndâux txir luk cxaz chuôz huôx tôngv zaoz zux vênhx huôv mênhx cxưx, kriê vênhx huôv chax chês trâu mê nhuôk shux xênhz. Đros hâux lưv chox têx njiêz luv zaoz zux vênhx huôv mênhx cxưx lok hâur tsêr cơưv ntơưr thôngz đhâu ntâu huôx tôngv tsênhv tsênhz, tsi taz paz shux xênhz têx mênhx cxưx tuôr tsês tâu zuk mênhx cxưx vênhx huôv jông, mak tsênhv gôngr phênhv paz têx mê nhuôk co yênhx têx lênhx nênhs jông tov kaz no, nhoz uô nênhx muôx txơưx jênhv đros chuôz zis, đros zuk têz qơưk đuô./.

Khắc Kiên- Txâur Vax cxeik nhênhv

Muk trâu tox siêz  Mộc Châu sêiz shuôk têx txir hồng siêr

          Hâur têx hnuz kaz hli 10, iz chas Mộc Châu muôx têx tox trôngz câuv har đros trâu têx trôngz tsoz chos yuôx zêx jông jav, tsôngv kruô cux tsênhv tâu sêiz pov têx txir hồng txi txir ndư, siêr đax, huv đros tsôngv kruô siêz nhiêv.

          Chêix txir hồng siêr nhoz thax tsav tox siêz Mộc Châu txix hli 9 txos hli 12 hâur niêx shông. Zos tsôngv kruô muk txos trâu Mộc Châu, ndis uô si trơưk txox cêr hâur thax tsav jos ôn, jos Pa Khen, nhoz đrôngl Nông trường Mộc Châu, cux sêiz pov têx txir hồng txi txir ndư, jông jav, nziv tsôngv kruô siêz nhiêv. Zơưv Đặng Mạnh Hùng, iz lênhx kruô nhoz Hà Nội tuôx ndis shuôk têz qơưs txos tox siêz Mộc Châu, shir phaz luk hêik pâuz:

        “Cur sêiz pov têx vax chos tsoz chos txir hồng, chênhr zos têx qơưs jông jav, ndis uô si, sêiz shuôk têz qơưs thiêz thax tsav qơư co, chuô lax nziês hâur yênhx shông. Đhâu tuôx ndis uô si, sêi shuôk têz qơưs jiês no, cur zuôr hêik kriê trâu têx fôngx zưs tuôx sêiz shuôk thax tsav qơư jông jav nhoz Mộc Châu”

          Txir hồng Mộc Châu muôx ntâu zav; ntơư zos txir hồng liêz, txir hồng pluôk. Pir li txir hồng liêz, thâuv siêr đax luz txir mêx njik đax liêz, nox kaz jiz; zav txir hồng tiv oz, thâuv siêr luz txir đax lik, tsư kaz; zav txir hồng pluôk, thâuv qêik chox lok nox, luz txir cox gis gis. Taz sik, uô ntêx thâuv zuôr muôz luz txir cox chox lok qêik nox, tsuv muôz luz txir ntơư tsâu đêx 2-3 hnuz.

          Chor txir hồng ntơư, iz chas tsôngv kruô tuôx ndis uô si nox siv thiêz cux tsênhv zos zav hax huv chiê tsôngv kruô zuôr chox muk puz têx fôngx ưs cxênhz jê nox siv. Chiê muôx cov txâuk qơư trâu tsôngv kruô ndis uô si, sêiz shuôk têz qơưs, ntâu chuôz zis nhoz huyện Mộc Châu, tưz tsês têx vax chos txir hồng txi ndư txir chiê tsôngv kruô tuôx ndis uô si, cxêik đuôz. Pos Nguyễn Thanh Huệ nhoz đrông Nông trường Mộc Châu shir phaz lul hêik pâuz:

        “Cur chuôz zis chor txir hồng tsâu, muôx 60 tsoz. Pâuz tâu tsôngv kruô nhiêv ndis uô si, cxêik đuôz, li ntơư cur chuôz zis thiêx tu, yiz têx blôngx txix hâur hli 9 xiêz txos trâu nhiv no. Njuôk xav, pêz zuôr chiê tsôngv kruô tuôx ndis uô si, cxêik đuôz trâu thax tsav qơư co trâu têx hnuz zuôr txos no thiêz”

          Chêix txir hồng siêr đax, nox kaz, cux chênhr zos iz zav hax huv cxơưz cxiz tsôngv kruô tuôx ndis uô si, sêiz shuôk têz qơưs txos tox siêz huyện Mộc Châu, tỉnh Sơn La./.

                                          Tsu cxêik nhênhv-Lê Hạnh, CQTTTB