Hâur shôngk shông yiêz njiz cưk kriê Lý Hồng Quân- Lênhx nênhs paz tuôr tsês kriê kênhx Hmôngz trâu hluôk nênhs

Xênhz zus thiêz hloz lox ntơưv jos Bản Nghè, xã Cổ Linh, huyện Pác Nặm, tỉnh Bắc Kạn, cux xưk li ntâu lênhx mê nhuôs nênhs Hmôngz txơưr, txix ciês thâuv tsênhv zâu, suôz kênhx Hmôngz tưz muôx đros đreiv đros cưk kriê Lý Hồng Quân luz nênhx. Cưk kriê lok six nhiêv thiêz lok six xar tâu shâuv yuôz thiêz đhiê kênhx li cxuô lênhx hluôk tuz nhoz hâur zuk jêx jos. Taz sik viv tsuv muk cơưv ntơưr viv li cưk kriê tưz tso tsês siêz xar njôngr co. Tov kaz no, thâuv cơưv tiêr ntơưr thiêz lok uô côngz xưv kriê ntơưr ntơưv Tsêr cơưv cxênhx I Nghiên Loan II, xã Nghiên Loan, huyện Pác Nặm cưk kriê thiêx muôx six hơưv shâuv yuôz thiêz đhiê kênhx. Cưk kriê Quân pheiz kênh:

Shâuv yuôz kênhx tưz tsi zôngx ziv, chiê đhiê tâu kênhx cov txơưx mak ziv lax thiêz tsuv lok six truôx siêz cơưv shâuv thiêx li đhiê tâu jông. Txos nhiv no cưk kriê Lý Hồng Quân tsi taz txơưx đhiê kênhx mak cưk kriê tsênhv xar tơưv ntâu tsưr ziv đhiê kênhx yiêz, jông thâuv đhiê kênhx Hmôngz li: đhiê kênhx sâuv hluô, sâuv ntông siêz. Tsi taz sir jos xar tơưv tsưr ziv đhiê kênhx, chiê paz hluôk nênhs Hmôngz nhiêv yuôz kênhx, đhiê kênhx thiêz tror phuôx huiz, tuôr tsês kênhx Hmôngz, đrâuv six hơưv muk kriê ntơưr, cưk kriê Lý Hồng Quân tsênhv ndaz ndơưv six hơưv so muk vênhv tôngv têx mê nhuôs zâu shâuv yuôz thiêz đhiê kênhx. Txos nhiv no, cưk kriê tưz kriê tâu trâu 2 tul mê nhuôs txơưx yuôz thiêz đhiê kênhx, yax six đros cưk kriê muk piêr kriê nhoz ntâu qơư đros siêz xar heik kriê thiêz tror paz cxênhx hluôk nênhs nhiêv kênhx đuô.

          Tul mê nhuôv Dương Văn Minh, 10 shông, zos cưk kriê Quân li iz hâur 2 lênhx shux xênhz txơưx yuôz thiêz đhiê kênhx heik lok zuk tul cưk kriê: Cưk kriê Lý Hồng Quân xar njôngr hâur ntu zuôr txos tsênhv zuôr yuôz kênhx côngv đros têx cưr lok yiêz nhiv no chiê kênhx Hmôngz muôx têx hlôngr yiêz huv đros thiêz cxênhx hluôk nênhs tưz sik tuôr truôx têx muôx thâuv nzor. Đros siêz xar co, cưk kriê Lý Hồng Quân đros têx lênhx nênhs moz siêz đros vênhx huôv mênhx cxưx nhoz xã tưz yênhx lix CLB kênhx Hmôngz nhoz tiv phaz thiêz tror chuôz cxaz siêz nhiêv kênhx Hmôngz trâu têx hluôk nênhs nhoz zuk têz qơưk txơưx yuôz kênhx, đhiê kênhx. Cưk kriê têx sir jos co tâu sâu jênhv đhâu ntâu giải, ntâu huy chương ntơưv ntâu jiês piêr đhiê kênhx txix cấp tỉnh txos Trung ương.  Zơưv Lâm Ngọc Du, Giám đốc Tsênhv qơư vênhx huôv tỉnh Bắc Kạn puz pâuz:   "Tix lâuk Quân tưz đros têx lênhx nênhs txơưx kênhx Hmôngz nhoz xã Cổ Linh yênhx lix CLB kênhx Hmôngz, tix lâuk Quân zos lênhx nênhs kriê kênhx trâu tsôngv box hâur xã thiêz têx hluôk nênhs. Tix lâuk li têx uô tâu co tâu sâu jênhv đhâu ntâu giải đros têx gôngr côngv hâur huôx tôngv vênhx huôv nênhs Hmôngz heik cxuô thiêz huôx tỉnh vênhx huôv tỉnh Bắc Kạn heik taz"

          Cưk kriê Lý Hồng Quân li têx luôk hâux lưv uô tâu jông co lok six muôx ziz njiêz, gôngr phênhv paz trâu cxênhx hluôk nênhs mênhx cxưx pâuz thiêz ziv moz siêz đuô txos hâux lưv tuôr tsês kênhx Hmôngz./.

(Vàng Lan-Txâur Vax cxeik nhênhv)

Tsôngv box Hmôngz li phongx cxưx uô đaz trôngs

Chiê bax uô đaz trôngs, uô ntêx tsưr tsês tsuv bax pêz tuk tâux kêiz, iz luz vaz trâu chor tâux thiêz iz zar tư tơưl tsênhv chis, iz tuk đêr lok sik tuk buô muôx 10-12 cir thiêz khơưz iz luz kror toz muôx iz thiêr ciês ntơưv kror trôngx tas saz puôz trâu tsưr tsêr luz txax chiê nquôr cxuô zav trâu hâur luz kror co thâuv uô chêi đaz kruôk no. Thâuv tưz bax tâu têx li hêik co, txos thâuv tsâuk ntux, tsưr tsêr lok sik lênhx nênhs uô đaz kruôk zuôr chox tuk đêx lok sik tuk buô zôngv uô đaz kruôk lok trâu ntơưv kror trôngx tas lok sik kror trôngx txuôk thiêz piz hu xưk li zơưv Yuôk Lik Xênhv Vưx li têx luk hu đrav kaz no:

Thâuv hu tiêr, tuk tsiêx zôngv uô đaz trôngs no zuôr  tâu muôz trâu chor hluôk nênhs hâur tsêr chox muk tuô, tuk tsiêx tsuv tâu hâur tsêr xưz tsik tâu chox muk tuô saz đrâuv jôngr. Đhâu thâuv tuô fêik tâu mak muôz tuk tsiêx co têx plaz hnhur chox lok hâu chiê uô txiv, zos têx kror zâu hênhr nyêi tsav lax nriêr mak muôz ndâu qoz uô cê chox muk hâu cov thiêx tsik lax nriêr thâuv hâu tâu siêr. Pêz tuk tâux tâu chox muk tsês trâu hâur tsưr têr luz txax pư. Bax 5 luz ntiv lox chiê trâu txiv đros 5 luz piz (muôx chuôz xênhv mak 9 txiv). Tix lâus Nov Tsơưz Xênhv Thox nhoz jok Nà Ngần, xar Chiềng Ngần, TP Sơn La puz pâuz:

Thâuv cxôngr thiêz trâu txiv tiêr mak hêik cov iz lênhx nênhs muôz luz yoz hêik iz yoz cuô grêix lok trâu trâu hâur chor piz thiêz tsưr tsêr piz ntuôk hâur luz txax. Zos 5 txiv mak zuôr tsuv ntuôk 5 jiês, iz jiês ntuôk tas mak muôz chor khoz cuô grêix co trâu sơưr đơưk lok sik muôz trâu chor mê nhuôv zâu hâuk. Hâuk tas ho tror trâu cuô grêix trâu chor piz thiêz tror ntuôk nzir. Thâuv ntuôk thor tas mak chor txiv zuôr tâu nyêis lok trâu trâu sơưr đơưk nox uô ntêx, nox tas mak mav li trâu mor trâu cxuô lênhx nênhs đros chuôz zis nox thiêz muôx luk phôngv trâu chuôz zis cov tsik muôx moz gênhs, tu tsiêx cxu hloz lox jông thiêz huôv tsar. Nox tas mak cxuô lênhx nênhs tsuv nzuôr têk ntơưv luz fiêz đêx tưz tâu bax uô ntêx txơưz ntơưv iz saz luz kror khơưz ntơưv kror trôngx tas uô ntêx thâuv zuôr tơưv đrâuv jôngr thiêz lok muk tsêr cov hur si tso. Thâuv nox hâuk tiêr, sơưr đơưk tưz muk tsêr tas mak tsưr tsêr mav li muôz pêz tuk tâux câur thiêz muôz rêik trâu pêv faz nja sâuv grênhz tsê qar tsưr tsêr luz txax, thâuv no cux zos tưz uô tiêr phôngx cxưx, chêi đaz trôngs lơưv. Zơưv Yuôk Lik Xênhv Vưx nhoz jok Pha Khoang, xar Co Max, huyện Thuận Châu puz pâuz nzir:

Pêz tsôngv box Hmôngz li chêi uô đaz trôngs zos chiê thor cov têx tsiêx cxu hâur chuôz zis hloz lox, tsik muôx moz gênhs thiêz huôv tsar, paz trâu chuôz zis muôx tâu luz nênhx tsâu sor thiêz shir phaz./.

(Lik Thox cxiv sâu thiêz cxêik nhênhv)